ལྡེམ་ལྡེམ་ལུས་ཀྱི་སྟངས་སྟབས་ཤིག་གིས། །

དབང་མེད་ཡིད་ཀྱི་དྲན་པ་ཕྲོགས་སོང་། །

ཁ་དན་ཚིག་གི་འགྱུར་མེད་དམ་བཅའ། །

རང་སྲོག་ལས་ཀྱང་གཙིགས་སུ་འཛིན་འོས། །

ཁྱོད་ཀྱི་དུང་ཞེན་བརྩེ་བའི་མུ་ཏིག །

བདག་གི་མགུལ་དུ་མཛེས་པར་བསྒྲོན་ན། །

ཡ་ཆུང་ཟླ་བའི་གུར་ཁང་དབུས་སུ། །

ཁྱོད་ཞལ་མེ་ལོང་རང་འཆར་ཡིན་ནོ། །

སེམས་སོང་སྙིང་གི་ཁྲེལ་གཞུང་ཅན་མ། །

གཞོན་པའི་སྙིང་གི་ཞིང་སར་བཞད་དུས། །

སྤང་ལྗོངས་བདེ་མོའི་མེ་ཏོག་དག་ཀྱང་། །

ངོ་ཚའི་དབང་གིས་མགོ་བོ་དུད་སོང་། །

དགུང་སྔོན་མཐོངས་ཀྱི་དཀར་གསལ་ཟླ་བ། །

ཁྱོད་གདོང་མཛེས་པའི་དོ་ཟླ་མིན་སོང་། །

ཙ་རིའི་རོང་གི་སྨྱུག་ཕྲན་ཚོགས་ཀྱང་། །

ཁྱོད་གཟུགས་མཐོང་དུས་ལྕུག་ལྕུག་འདར་སོང་། །

མཛེས་སྡུག་མེ་ཏོག་སྐྱེད་མོས་ཚལ་དུ། །

གཡུ་སྦྲང་བུང་བས་གཤོག་རྩལ་ངོམས་དུས། །

དབྱངས་རྟ་སྙན་མོའི་འགྱུར་ཁུག་ལྷན་དུ། །

ཁྱོད་དང་ལྡེམ་ལྡེམ་གར་ལ་རོལ་ཆོག །

མི་ཚེའི་ལམ་འཕྲང་ཅི་ཙམ་དོག་ཀྱང་། །

སེམས་པ་སྦྲེལ་ནས་མདུན་དུ་ཆས་དགོས། །

མི་ཚེའི་ལ་ཁའི་དབུ་རྩེར་འབྱོར་ཡང་། །

བརྩེ་སེམས་དར་དཀར་རིང་དུ་བསྲིངས་ངེས། །

སྔོ་ལྗང་གཡུ་ཡི་མཎྜལ་ཐང་དུ། །

མ་བསྡུས་ཁྱོད་དང་ལྷན་དུ་འཛོམས་དུས། །

ཡིད་ལ་རེ་བའི་མཛངས་མ་རྣམ་གྲོལ། །

མི་ཚེ་འདི་ཡི་སྐྱ་ཡ་ཡིན་སོང་། །

ཁྲུང་ཁྲུང་དཀར་མོའི་སྙན་དབྱངས་དྲུག་འགྱུར། །

གཙང་པོའི་ངོགས་ནས་ལྷང་ལྷང་གྲགས་དུས། །

རྒྱང་རིང་ས་མཐའི་ཆུང་འདྲིས་ལོ་ལོ། །

ཡ་ཆུང་སེམས་ཀྱི་ནམ་མཁར་འཆར་བྱུང་། །