འགྱུར་ལྡོག་སྨུག་སྤྲིན་གཡོ་བའི་མི་ཡུལ་ནས། །

རེ་དོགས་སེམས་ཀྱི་རྦ་རླབས་རྒོད་ན་ཡང་། །

དྲོད་འཇམ་ཉི་འོད་འཛུམ་པའི་སྤང་ཁུག་ནས། །

མཛེས་སྡུག་ཧ་ལོ་ཁྱོད་ལ་མགུར་ཞིག་འབུལ། །

ཕྱི་བཀོད་མཛེས་ཤིང་ཆར་ལྡན་དུས་ཞེས་འབོད། །

དབྱར་ཟླ་ར་བའི་དབྱངས་ལྡན་དེ་ཡང་ལྷགས། །

ལྟ་བས་མི་ངོམས་སྔོ་ལྗང་དུས་ཚིགས་འདི། །

འགྲོ་བའི་ཡིད་སེམས་འཁྲེང་སའི་དབྱིག་འཛིན་ནོར། །

ལྷང་ལྷང་གྲགས་པའི་མོན་གྱི་ཁུ་བྱུག་དེས། །

སྐྱེ་འགྲོའི་སེམས་ལ་དགའ་བའི་དཔལ་སྟེར་ཞིང་། །

སྒྲོ་ལྡན་གཤོག་འགྱུར་ངོམ་པའི་རི་སུལ་ནས། །

གཤིས་བཟང་འབྲོག་གི་མཛངས་མའི་རྫི་གླུ་འཇེབས། །

སྲོག་ལྡན་ལང་ཚོ་རྒྱས་པའི་དབྱར་དུས་སུ། །

འཇིག་རྟེན་རྒྱན་གྱིས་བཀླུབས་པའི་ངང་ཚུལ་རྨད། །

ཕྲ་ཚོམ་མེ་ཏོག་དབུས་ཀྱི་སྦྲང་ཆུང་ཁྱོད། །

འཕུར་ལྡིང་གར་ལ་རོལ་བའི་གཤོག་རྩལ་རྫོགས། །

ཕྱེ་ལེབ་གར་དུ་རྩེན་སའི་དབེན་ཐང་དུ། །

ལུག་ཁྱུ་སྤྲིན་དང་འདྲེས་པའི་སྡེ་མཐའ་ནས། །

ལུག་རྫིའི་མགུར་མ་གཙང་པོའི་རླབས་དང་འགྲོགས། །

རྟ་ནོར་ལུག་གསུམ་འཛོམས་པའི་འབྲོག་སྡེ་སྐྱིད། །

ཟམ་ཟིམ་ཆར་པའི་འོག་གི་རྨི་ལམ་ཞིང་། །

བདེ་སྡུག་རེས་མོས་གྲུབ་པའི་ཚོར་བ་རྒོད། །

སྣང་བའི་འཇིག་རྟེན་འཇའ་ཡི་གུར་ཁང་ནང་། །

རྩྭ་ཐང་བུ་མོའི་བཞིན་རས་ལྟ་ན་སྡུག །