པད་སྒྲོན་སྐྱོ་གླུ།（ལྷ་རྩེའི་དམངས་གཞས）
ལྷ་ཞོལ་བྱེ་མའི་དཀྱིལ་ལ། །
བུ་མོ་སྣ་མིན་སྣ་ཚོགས། །
མདོག་གཞུང་ལ་མོ་རྒྱག་མཁན། །
པད་སྒྲོན་གཅིག་པོ་རེད་འདུག །
ཆུ་ལ་ལྷགས་པ་བརྒྱབ་ནས། །
རིལ་མ་མཐའ་ལ་བཏོན་སོང་། །
ཡབ་ཡུམ་བཀའ་མོལ་གནང་ནས། །
བུ་མོ་མི་ལ་སྟེར་སོང་། །
འདི་ནས་གྲུ་སའི་བར་ལ། །
ཆང་དང་ཇ་ཡི་སྐྱེལ་མ། །
མདོག་གཞུང་ལ་མོ་རྒྱག་དུས། །
བདག་དང་ཨ་ཇོ་བཞི་ཆུང་། །
གནམ་ལ་འཁོར་བའི་སྤྲིན་པ། །
ཚེ་རིང་རྒྱལ་མོ(མོ་དྲེལ)འདྲ་ལ། །
ཚེ་རིང་རྒྱལ་མོ་ཨོ་ཤེ །
པད་སྒྲོན་བསུ་རོགས་གནང་དང་། །
མདོག་གཞུང་ལ་མོའི་ལ་རྫས། །
པ་སངས་མཆོག་ལའི་འདྲ་ཤས། །
རྟ་རྒྱུད་ཐོག་ཁུང་འདྲ་ལ། །
མཐོང་རྒྱུ་གནམ་ལས་མི་འདུག །
གཞན་དག་དྲན་རྒྱུ་མི་འདུག །
ལྷ་ཞོལ་འདུ་ཁང་དྲན་བྱུང་། །
ལྷ་ཞོལ་འདུ་ཁང་སྟེང་གི །
རང་བྱོན་གསེར་སྐུ་དྲན་བྱུང་། །
ནོར་ཁང་སྤ་རའི་སྦུག་ན། །
པད་སྒྲོན་སྐྱོ་གླུ་ལེན་གྱིས། །
སྐྱོ་བའི་སྐྱོ་གླུ་མ་རེད། །
དྲན་པའི་དྲན་གླུ་རེད་འདུག །
ནོར་ཁང་སྤ་རའི་ནང་ནས། །
འཇོལ་མོས་གཅོང་སྐད་སྐྱོན་བྱུང་། །
འཇོལ་མོ་གཅོང་པ་མ་རེད། །
པད་སྒྲོན་གཅོང་པ་ཡིན་འདྲ། །
མི་ཚོའི་ཚོང་པ་ཡིན་ཟེར། །
ཟླ་གཅིག་ཟླ་གཉིས་འཁོར་གྱི། །
ནོར་ཁང་སྲས་ཆུང་སྐུ་ཞབས། །
ལོ་ལ་སྒོ་ལྕགས་བསྐྱོན་སོང་། །
ཡར་ལ་བལྟས་ན་བྲག་རེད། །
མར་ལ་བལྟས་ན་ཆུ་རེད། །
བུ་མོ་ཅེ་ཅེའི་པད་སྒྲོན། །
སུ་ལ་བལྟས་ནས་སྡོད་པ། །
མདོག་ལོ་ལ་མོས་གཙོ་བྱས། །
རི་ལ་རི་རྒྱུད་དྲན་བྱུང་། །
ཡབ་ཡུམ་གཉིས་ཀྱིས་གཙོ་བྱས། །
གཉེན་ལ་གཉེན་རྒྱུད་དྲན་བྱུང་། །
དྲན་བྱུང་མ་ལ་དྲན་བྱུང་། །
ལྷ་ཞོལ་འདུ་ཁང་དྲན་བྱུང་། །
འདུ་ཁང་སྤ་རའི་ནང་གི།
ཅེ་ཅེའི་དབྱངས་ཅན་དྲན་བྱུང་། །
དྲན་བྱུང་ལ་དང་དྲན་བྱུང་། །
ཚེ་རིང་རྒྱལ་མོ་དྲན་བྱུང་། །
ཨ་ཇོ་བཞི་ཆུང་ཨོ་ཤེ །
པད་སྒྲོན་བསུ་རོགས་གནང་དང་། །
འབྲེལ་ཡོད་གསར་འགྱུར།