དབུ་ཤོག>བོད་ཀྱི་རིག་གནས།>བོད་ཀྱི་རྩོམ་རིག
  • རབ་བྱུང་གཅིག་གི་འཕོ་འགྱུར་གཏམ་བཟང་།

    —— བོད་རང་སྐྱོང་ལྗོངས་དབུ་བརྙེས་ནས་ལོ་ངོ་དྲུག་ཅུ་འཁོར་བར་རྟེན་འབྲེལ་ཞུ།

  • ཡོང་ཁུངས།  ཀྲུང་གོའི་བོད་ཀྱི་གསར་འགྱུར་དྲ་བ།   |     རྩོམ་པ་པོ།  བསོད་ནམས།   |     སྤེལ་དུས།  2025-07-06

    སྔོན་པོ་སྔོ་བསངས་བཻཌཱུརྱ་ཡི་མདོག །

    དཀར་པོ་དཀར་གཙང་ཁ་བའི་མདངས་འཛིན་པ། །

    ནམ་མཁར་ཆུ་འཛིན་མཛེས་པའི་གངས་ལྗོངས་འདིར། །

    དུས་སྟོན་གྲ་རྒྱས་བཀྲ་ཤིས་ཉི་ཟླ་ཤར། །


    རང་སྐྱོང་སྲིད་གཞུང་དངོས་སུ་དབུ་བརྙེས་ཏེ། །

    བགྲང་བྱ་དྲུག་ཅུའི་རབ་ལོ་གཅིག་བརྒལ་ཚེ། །

    ངོ་མཚར་རྨད་བྱུང་གྲུབ་འབྲས་ཁྲི་མ་འབུམ། །

    འཛམ་གླིང་སྤྱི་བོའི་རྒྱན་དུ་ལྗིད་ཏིག་ཏིག །


    རྣ་ཐོས་བརྒྱ་ལས་མིག་མཐོང་གཅིག་དགའ་ཞེས། །

    དོན་ལ་འཕྲོད་པའི་ངེས་འབྱུང་རྙེད་པའི་གཏམ། །

    འཛམ་གླིང་ཡང་རྩེ་སུམ་རྩེན་གཉིས་པའི་དཔེར། །

    བཀོད་དེ་མི་འཚམ་སུས་ཀྱང་བརྗོད་མི་ཐུབ། །


    མི་ཡུལ་འཕོ་འགྱུར་ཆེན་པོའི་དོན་ངོ་མ། །

    བརྗོད་འདོད་བློ་ཡི་ཁ་ལོ་མི་འཆུན་པར། །

    ཤྭ་འོད་ཐུར་དུ་ལན་མང་རྒྱུག་པ་འམ། །

    དོན་ངོ་ཡིད་ཀྱི་མཚོ་མོ་རང་དགར་བརྡོལ། །


    ཀླུང་ཐང་བྱེ་མའི་གཞོང་པ་གང་ས་གང་། །

    རྩི་ཤིང་གཞོན་ནུ་ཚོགས་པའི་གླིང་གར་བསྒྱུར། །

    མ་བོས་མགྲོན་དུ་ཁུག་པའི་སྤུ་སྡུག་ཚོགས། །

    ཁོར་ལྗོངས་ལེགས་པའི་ཁྱིམ་ཚང་གསར་པར་འཚོ། །


    གནའ་ནས་གྲགས་པའི་གྲོང་ཁྱེར་ལྷ་ས་ནས། །

    འཛུཊ་སྐྲུན་རིམ་པ་འཕར་བའི་ས་གནས་རྣམས། །

    གཅིག་རྗེས་གཉིས་བསྙེཊ་གྲོང་ཁྱེར་གསར་པ་ཡི། །

    མཚན་སྙན་མིང་དོན་མཚུངས་པས་ཀུན་ཡིད་རངས། །


    གཟུགས་མེད་དྲི་མེད་ཤུགས་ཅན་འབྱུང་བ་རླུང་། །

    དབང་དུ་བསྡུས་པའི་རླུང་ཤུགས་གློག་དྲ་སྦྲེལ། །

    ཕྱོགས་བཞི་མཚམས་བརྒྱད་ཁ་ཐོར་གྲོང་སྡེར་ཡང་། །

    རླུང་ཤུགས་གློག་གི་སྐར་ཚོགས་རྣམ་པར་བཀྲ །


    དེའི་ཚེ་གོ་ལ་ཉི་མར་ཐག་ཉེ་བའི། །

    ས་ཁམས་ཁྱད་ཡོན་ཚན་རིག་རྩལ་གྱིས་འཛིན། །

    ཚ་ཟེར་ཅན་གྱི་འོད་ནུས་བསྐུལ་བས་ཀྱང་། །

    གློག་འོད་མུན་སེལ་དཔུང་རོགས་གསར་དུ་བསུས། །


    ལ་ཉག་སྐེད་པའི་ངོགས་ནས་འཆར་བ་ཡི། །

    རླངས་འཁོར་འགྲོ་ལམ་ཀྱག་ཀྱོག་པ་ཊའི་རིས། །

    སྔོན་བྱུང་འགྲིམ་འགྲུལ་དཀའ་ཚེཊ་ལོ་ཟླ་ཡི། །

    གཏམ་རྒྱུད་གསལ་པོར་འཆད་པའི་ལོཊ་རིས་བཞིན། །


    ཏོག་ཏོག་སྐད་སྒྲས་ཕྱུགས་ལ་འདྲོགས་འགོ་བསླངས། །

    མདུན་གྱི་འཁོར་ལོའི་སོ་ཡིས་ལམ་བུ་བྲད། །

    ལག་སྐྱོར་འདྲུད་འཁོར་ཞིང་པའི་ལག་རོགས་རྣམས། །

    བཀོལ་སྤྱོད་བདེ་བའི་གཟུཊ་བྱད་ལེགས་པོར་བསྒྱུར། །


    ཚན་རིག་རྩལ་གྱིས་གྲུབ་པའི་འཕྲུལ་ཆས་རྣམས། །

    སོ་ནམ་ཞིང་པས་ཁྱིམ་གྱི་བག་མར་བསུས། །

    ཕྱུག་པོའི་བང་མཛོད་ཕྱུག་ཏུ་གཏོང་བ་ཡི། །

    འཕྲུལ་ཆས་ནུས་པས་ལས་ཆོད་ལྡབ་འགྱུར་འཕར། །


    སྔོན་ཚེ་འདྲུད་འཐེན་འཁོར་ལོའི་ཁ་ལོ་བ། །

    ཞིང་པའི་ཕོ་གཞོན་ན་སོ་དར་ལ་བབས། །

    མི་ཚེའི་ཕྱེད་དུ་རླངས་འཁོར་ཁ་ལོ་བསྒྱུར། །

    དུས་རབས་གོང་འཕེལ་རླུང་གཤོག་རྟ་ཕོར་བཅིབས། །


    གྲུ་བཞི་ནར་མོ་རྒྱ་རྡོ་བརྩིགས་པའི་སྤོ། །

    ངར་ལྕགས་རྩིབས་མའི་སྒྲོམ་གྱིས་མཐོར་བཏེཊ་པའི། །

    ཡིད་འོང་དྲོ་སྐྱིད་ལྡན་པའི་ཁང་བཟང་རྣམས། །

    ལམ་ཟུར་ཀུན་ནས་ཚེམས་ཕྲེང་དགོད་པ་བཞིན། །


    ལྕགས་ཀྱི་གླང་གོག་ཆེ་ཆུང་སྣ་ཚོགས་པ། །

    ཞིང་ཐང་འདུལ་བར་དཔའ་བའི་ཤུགས་མི་ཆག །

    རྨོན་པའི་བྱེ་བྲག་གཡག་དང་མཛོ་ཕོ་སོགས། །

    སྤང་དང་རྫ་རིའི་སྟེང་དུ་ལྗོངས་རྒྱུར་ཆས། །


    ལྷེབ་ལྷེབ་མཆུ་འགུལ་སྐབས་རེ་མགྲིན་གསང་བཏེཊ། །

    “འོང་འོང”ཁ་ཡི་དུང་ཆེན་འབུད་བཞིན་དུ། །

    ཆུ་ལ་རྩམ་པ་བརྒྱབ་པའི་སྐོམ་སེལ་ཉིད། །

    གནང་བར་སྩོལ་ཞེས་བོང་བུས་སྦྱིན་བདག་འབོད། །


    སྔོན་ཚེ་གང་ལ་དེ་མཁོ་སྡུག་བསྲན་ཆེ། །

    བོང་བུར་ཞིང་པ་ཕྱུག་པོས་སྒོ་ཁ་རུ། །

    སྔར་བྱས་དྲིན་ལན་གཟོ་བཞིན་སྐྱོང་བ་དེ། །

    ལས་འབྲས་མ་རྙོག་ཚུལ་བཞིན་སྲུང་བ་བཞིན། །


    གཏིང་མཐའ་མི་དཔོག་ནམ་མཁའི་མཐོངས་ཡངས་པོར། །

    གནམ་གྲུས་རེག་ཐོགས་མེད་པའི་གཤོག་རྩལ་ངོམས། །

    སྤྲིན་དང་བང་རྩལ་འགྲན་ཏེ་བྱེས་འགྲུལ་ཚོ། །

    སེམས་ཉིད་ཕྱོགས་སར་ལུས་པོ་སྐྱེལ་བར་བྲེལ། །


    ས་གཞིའི་པང་དུ་སྟོབས་ལྡན་མེ་འཁོར་བགྲོད། །

    དངོས་ཟོག་བྱུར་བུར་གཏམས་པའི་རྡོག་ཁྲེས་ཁུར། །

    ཤེད་ཤུགས་ངོམས་ཏེ་ལ་ཀླུང་ཡུད་ཀྱིས་བཅད། །

    རླངས་འཁོར་རྣམས་ནི་རྒྱང་གཟིཊ་ལྟད་མོར་གཡེངས། །


    དྲོད་ཀྱིས་ལང་ཚོ་རྙིད་ལ་དོགས་པ་ཡི། །

    མར་གསར་ཀྲོ་ཁས་འཁྱག་སྒམ་ཕོ་བྲང་འཛིན། །

    གློག་སྒུལ་མདོང་མོའི་སིར་སྒྲར་འགྲོཊ་འདོད་ཅིང་། །

    ཇ་ཁུར་འདྲེས་པར་དགའ་བའི་ཚུལ་ཡང་མངོན། །


    འབྱམས་ཀླས་འཛམ་བུའི་གླིང་བཞི་གླིང་ཕྲན་གྱི། །

    བརྟག་མིན་བྱེད་འགུལ་དགའ་སྐྱོ་ཆགས་སྡང་སོགས། །

    མ་ལུས་སྦར་མོའི་མཐིལ་དུ་བླངས་པ་བཞིན། །

    ཁྱིམ་ཚང་སོ་སོའི་བརྙན་འཕྲིན་ངོས་ལས་གསལ། །


    སྔར་སོང་ལོ་ཟླའི་འཕྲིན་ཡིག་འགྲུལ་བཞུད་དེ། །

    རུས་སྦལ་རྒན་པོས་གོག་བགྲོད་རྒྱག་པ་བཞིན། །

    དེང་རབས་ལག་ཐོགས་ཁ་པར་སྐད་འཕྲིན་གྱི། །

    ཆ་འཕྲིན་མྱུར་སྐྱེལ་སྐར་མདའ་འཁྱུག་དང་མཚུངས། །


    ཀྲུང་ཕྱི་བོད་བཅས་ལུགས་གསུམ་གསོ་རིག་གི །

    ནད་བཅོས་གནད་སྨིན་དྲ་བ་ཕྱོགས་བཞིར་ཁྱབ། །

    ཚེ་སྲོག་བར་དུ་གཅོད་པའི་ནད་ཀྱི་གདོན། །

    སྨན་རྩལ་སྟ་རེས་དུམ་བུ་ལན་བརྒྱར་ཕྲལ། །


    ལུས་སེམས་རྣལ་ལ་བབས་པའི་སྐྱེ་འགྲོའི་ལུས། །

    ཟ་འོག་རི་མོ་མཛེས་པའི་གོས་ཀྱིས་བརྒྱན། །

    གསེར་དངུལ་མུ་ཏིག་བྱུ་རུའི་རྒྱན་གྱིས་མཆོར། །

    སྤྲོ་བའི་གདོང་ལ་འཛུམ་པའི་མེ་ཏོག་བཞད། །


    གདུང་བ་མིང་གི་ལྷག་མར་གྱུར་པ་ཡི། །

    སེམས་པའི་འགུལ་ཤུགས་རྐང་ལག་བཞི་ལ་ཁྱབ། །

    གླུ་གར་རྒྱ་མཚོའི་མཚན་དོན་ངོ་སྤྲོད་ཀྱི། །

    གླུ་གར་གཡང་ཞག་ས་མཐོའི་པང་དུ་འཁྱིལ། །


    གང་དང་ཅི་ཡང་ལོངས་སུ་སྤྱོད་པ་ཡི། །

    བདེ་སྐྱིད་སྟོན་གྲངས་ཞེས་པའི་མིང་ཚིག་དེས། །

    དབུལ་པོ་ཞི་སྟེ་ཕྱུག་འགྱུར་གཏམ་གྱི་ཐོ། །

    རིམ་བཞིན་བརྩེགས་པས་སྒོ་གསུམ་རབ་ཏུ་མྱོས། །


    རྒན་པོ་ཚོགས་པའི་སྤྱི་ཚོགས་མ་ཡིན་གྱི། །

    ཚེ་རིང་ལོ་རྒན་མང་བའི་དུས་རབས་ཡིན། །

    ལོ་རྒྱུས་ངག་ལས་འཇོ་བའི་བགྲེས་སོང་ཚོས། །

    སྐུ་ཚེ་བྲག་ལས་བརྟན་པའི་གཟུགས་བརྙན་འཛིན། །


    སློབ་གསོ་སློབ་གྲྭ་ཆེ་འབྲིང་ཆུང་གསུམ་གྱི། །

    ཤེས་བྱའི་མེ་ཏོག་ལྡུམ་ར་བག་ཡངས་པོར། །

    བློ་གསལ་ན་ཆུང་ཚོགས་ནི་བུང་བའི་ཁྱུ། །

    གེ་སར་བཅུད་ལ་མྱོང་བཞིན་ཤེས་བྱར་རྩེན། །


    སོར་རྩེའི་རྩལ་ལས་ཐོན་པའི་ངོ་མཚར་ཆེ། །

    ལུགས་མང་ཐང་གའི་འཇའ་ཚོན་བཀྲ་བ་སྟེ། །

    མངོན་མིན་རིག་གནས་ཤུལ་བཞག་མཛེས་རིས་སོཊ། །

    རྣམ་གྲངས་ཀུན་ཚང་དུས་བཞིར་དཔྱིད་དཔལ་བཞད། །


    སྔར་སོང་རྒྱུན་འཛིན་གོང་དུ་སྤེལ་བའི་ཕྱིར། །

    ཤུལ་བཞག་རྒྱུན་འཛིན་བྱེད་པོ་ཁྱུ་དང་ཁྱུར། །

    ལྗོངས་དང་རྒྱལ་ཁབ་གྲོང་ཁྱེར་རིམ་པར་བཅས། །

    གོ་བབ་མིང་ཐོབ་བསྐལ་བཟང་དགའ་སྟོན་ཤར། །


    ས་མཐོར་གཞིས་ཆགས་མི་རིགས་སྤུན་ཟླའི་ཚོཊ། །

    སེམས་མཐུན་དཔུང་ཤུགས་མཉམ་དུ་བསྒྲིལ་བ་ཡི། །

    རྒྱང་ལམ་གསར་པར་ཀྲུང་གོའི་ཕུགས་འདུན་ཆེ། །

    གངས་ལྗོངས་རྨད་བྱུང་གཏམ་རྒྱུད་རྩོམ་པར་བྲེལ། །


    རི་མཐོ་ཆུ་གཙང་ཞིང་ཁམས་སྐྱིད་པའི་ལྗོངས། །

    ལྗོངས་ཀུན་གསེར་དངུལ་ཟངས་སོགས་ལྕགས་ཀྱི་རིཊ། །

    རིཊ་ཀུན་གཏེར་རྫས་གཏམས་པའི་ཡུལ་གྱི་མཆོག །

    མཆོག་གྱུར་གངས་ཅན་སྐྱིད་ནས་སྐྱིད་དུ་གྱུར། །


    ས་མཐོའི་འཇིག་རྟེན་འཚོ་བའི་རྒྱ་མཚོ་རུ། །

    བདེ་སྐྱིད་རིན་ཆེན་དུ་མའི་མདངས་བཟང་བཀྲ། །

    དུས་རབས་གོང་འཕེལ་རླབས་རྒྱུན་མཁའ་ལ་འཕྱོ། །

    དགའ་བདེའི་དགོད་སྒྲ་འབྲུག་སྟོང་ལྡིར་དང་མཚུངས། །


    བཤད་ན་བཤད་པས་མི་ཚར་གྲུབ་འབྲས་དང་། །

    ཉན་ན་ཉན་པས་མི་ཚར་གཏམ་བཟང་པོ། །

    མང་པོ་ཉུང་ངུར་བསྡུས་པའི་བདུད་རྩིའི་བཅུད། །

    རྟེན་འབྲེལ་ཕྱྭ་གཡང་འགུགས་པའི་རྟགས་སུ་ཕུལ། །

    འགན་འཁུར་རྩོམ་སྒྲིག་པ། ཉི་མ་ཚེ་རིང་།

མཉམ་སྤྱོད།

འབྲེལ་ཡོད་གསར་འགྱུར།