དཔྱིད་ཀའི་མཛེས་པ།
ནམ་ཟླ་དྲོད་ཀྱི་མཚན་ཁ་འབར་བའི་སྟབས། །
རི་ཀླུང་ཐང་གཞུང་ཁངས་དཀར་འཁྱག་དར་ཚོགས། །
རྩྭ་ལྗང་རྩི་ཤིང་བརྟས་པའི་སེམས་བསྐྱེད་ཚུལ། །
དབྱིག་འཛིན་རི་སྒང་པང་དུ་རླན་གཤེར་སྟོབ། །
ལྷོད་དབྱངས་རྫོཊ་ལྡན་དཔྱིད་འགོའི་ཟིམ་ཟིམ་ཆར། །
ནོར་འཛིན་དགའ་མའི་ཞལ་ངོགས་ཐལ་རྡུལ་ཚོགས། །
དག་བྱེད་བྱབས་ཁྲུས་ཆོ་གའི་མཐོང་སྣང་གིས། །
དགུན་མཐའི་སྨན་ཤར་སྒེག་མོ་གནས་དབྱུང་བྱས། །
ལང་ལོང་བསང་དུད་འཁྲིགས་པའི་ཞིང་ཁ་རུ། །
སྐྲ་དཀར་ཁུག་པ་ལྷས་པའི་བསམ་དཀར་རྒན། །
ཁ་གཡང་སྨོན་འདུན་འཐེན་པའི་སྒྲ་གདངས་སྙན། །
སོ་ནམ་ལས་ཀྱི་མགོ་མའི་དབུ་ཁྱུད་བྲིས། །
གཟའ་སྐར་འཕྲོད་སྦྱོར་བཟང་བའི་ཉིན་མ་དེར། །
ཞིང་ཁ་རེའུ་མིག་གྲུ་བཞི་སྟར་བསྒྲིགས་པར། །
རོང་གི་སྒེག་ལྡན་མཛངས་མའི་དགའ་ཚོར་གྱིས། །
མ་འདྲེས་འབྲུ་དྲུག་རེ་ལྟོས་ས་བོན་འདེབས། །
ཚངས་ཐིག་སྐུད་པ་ལས་དྲང་ལམ་འགྲམ་གྱི། །
མེ་ཏོག་འཛུམ་ཁ་ལྷོད་པའི་ཁམ་སྡོང་གསེང་། །
རང་བྱུང་དྲི་ཞིམ་སོ་མ་སྐྱི་སེར་རླུང་། །
ལམ་ཆེན་ལམ་ཕྲན་མ་ལུས་འཐུལ་བར་བྲན། །
ལུ་གུས་རྣ་སྐྲིད་བརྒྱབ་པའི་པང་ཐང་ན། །
གསར་སྐྱེའི་རྩྭ་ཕྲན་བསྒྲུགས་པའི་བལ་དཀར་ལུག །
འབའ་སྒྲ་ལྷང་ལྷང་འབྱིན་པའི་དབྱངས་འགྲོས་ཀྱིས། །
སྨན་ཤར་རྫི་གླུ་འགུག་པར་རམ་འདེགས་བགྱིས། །
གཤོག་འགྱུ་ལྡེམ་ལྡེམ་གཡོ་བའི་ངང་སེར་ཁྱུས། །
དགུན་གསུམ་ལས་ཀྱིས་བྱེས་པའི་མཚོའི་མོའི་པང་། །
ཡིད་དགའི་ཆུ་རྩེད་རོལ་བའི་མཐོང་སྣང་ལས། །
མ་བཅོས་བརྩེ་འདང་མེ་ལོང་གསལ་བར་སྟོན། །
ཆར་སྤྲིན་བ་གམ་བརྩེགས་པའི་ཁང་བཟང་ལས། །
དཔྱིད་མགོའི་དིར་དིར་འབྲུག་སྐད་གསར་མའི་སྒྲས། །
བག་འཁུམས་གཉིད་དུ་ཡུར་བའི་ན་རོ་སྤུན། །
མཐོང་སྣང་འཇིག་རྟེན་མཛེས་པར་ལྟད་མོར་བསུས། །