དཔྱིད་ཀའི་བསུ་མ།
གངས་ཆར་འཚུབ་མའི་གར་གྱི་སྟངས་སྟབས་ལས། །
གསར་སྐྱེས་མྱུ་གུའི་ཚོགས་ནི་བཞད་མོད་ཀྱང་། །
སྟག་ཤིང་སྡོང་པོ་མཛེས་པའི་སྣང་རིས་འདིས། །
སྐབས་གསུམ་གནས་ཀྱང་སྐྱེངས་པའི་གཞི་མར་གྱུར། །
གངས་ཆུ་དྭངས་མ་གཙང་ཆུར་བཞུར་བ་འདི། །
རྟ་བདུན་དབང་པོའི་འཕྲིན་ལས་སྤེལ་ཚུལ་ཏེ། །
གཞན་ཡང་རྩི་ཤིང་མགོ་ལྕོག་ལྡེམ་པ་དང་། །
འབུ་སྲིན་གྲངས་མེད་ཚེ་སྲོག་རྒྱས་པས་ཀྱང་། །
དཔྱིད་ཀྱི་ཕོ་ཉའི་སྙན་འགྱུར་དབྱངས་རྟ་ལ། །
ཁེངས་པ་རྒྱས་པའི་བུང་བའི་ཚོགས་དག་ཀྱང་། །
ཉིན་མཚན་ལྟོས་མེད་ལྡིར་སྒྲའི་དབྱངས་དང་བཅས། །
ཟླུམ་གཟུགས་གོ་ལ་སྐོར་བའི་ངང་ཚུལ་བཟུང་། །
ནས་ཞིང་ཀློང་གི་མལ་གླུའི་འགྱུར་ཁུག་ལས། །
འབྲས་ལྡན་དུས་ཀྱི་འདོད་འཇོའི་དཔལ་ཡང་མངོན། །
གཏམ་བཟང་རྣ་བའི་བུ་གར་གྱེར་འདོད་དེ། །
ཞིང་པའི་ལོངས་སྤྱོད་དབྱར་གྱི་མཚོ་ལྟར་རྒྱས། །
འདབ་གྲོལ་མེ་ཏོག་འཛུམ་པའི་དཔལ་གྱི་གཞིར། །
རྐང་དྲུག་བུང་བའི་རེ་འདོད་སྣ་ཚོགས་འཆར། །
སྦྲང་ཆར་ཟིམ་མའི་ངལ་མེད་བྱ་བ་དེས། །
ཡངས་པའི་ས་གཞིའི་ཁྱོན་འདི་གཙང་མར་བཅོས། །
གཡང་དཀར་ལུ་གུའི་འབའ་སྒྲ་སྙན་མོ་ཡིས། །
གསར་སྐྱེས་མྱུ་གུ་དགའ་བས་མྱོས་པའམ། །
ཡང་ན་བསིལ་བུར་ལྡང་བའི་དཔྱིད་རླུང་དེར། །
བསུ་མའི་ཚུལ་དུ་བྲོ་གར་འཁྲབ་པ་ཅི། །
ཕུན་ཚོགས་དཔྱིད་ཀྱི་དགའ་སྟོན་བཤམས་པའི་མོད། །
ཚོར་འདུ་ལྷོད་མེད་མྱོང་བའི་གྲབས་ལ་ངལ། །
ན་བུན་སྐྱ་བོའི་ཀློང་གི་སྡེ་གྲོང་དེར། །
ཡིད་མཐུན་ཞེ་ཚིག་སྙན་མོའི་དབྱངས་ལ་བཀུག །