སྤྱིར་སྐད་མཛོད་ཟེར་བ་འདི་སྐད་ཆ་རིག་པ་བས་ཞིབ་འཇུག་གི་ཐབས་ལམ་གཙོ་བོར་གྱུར་ཡོད་ལ། སྐད་མཛོད་ལ་བརྟེན་པའི་ཞིབ་འཇུག་ནི་རྩིས་འཁོར་ཆེད་མཁས་པའི་ཁེར་སྤྱོད་ཀྱི་ཞིབ་འཇུག་ཐབས་ལམ་ཞིག་མ་ཡིན་པར་དེས་སྐད་ཆ་ཞིབ་འཇུག་གི་ཕྱོགས་མང་པོར་ཤན་ཤུགས་ཐེབས་ཚད་ཇེ་ཆེར་འགྲོ་གིན་ཡོད་པར་མཁས་པ་ཀུན་ཞལ་མཐུན་པར་སྣང་། ཉེ་བའི་ལོ་དེ་དག་རིང་། སྐད་མཛོད་སྐད་ཆ་རིག་པ་དང་འདྲ་བའི་བཤད་སྲོལ་རྒྱུན་མི་ཆད་པར་གླེང་གཞི་དང་ཐབས་ལམ་རིག་པའི་ཆེད་རྩོམ། བསླབ་གཞི་སོགས་ཀྱི་ནང་དུ་མཐོང་རྒྱུ་འདུག་པ་དང་། སྐད་ཆ་རིག་པའི་ཁྱབ་ཁོངས་སུ་ཐུན་མོང་གིས་ཁས་ལེན་ཐོབ་ཀྱི་ཡོད་པ་ནི། སྐད་མཛོད་སྐད་ཆ་རིག་པས་སྐད་ཆ་ཞིབ་འཇུག་དང་དེའི་གཡུར་ཟའི་གྲུབ་འབྲས་ཀྱིས་སྤྱི་ཚོགས་ཀྱི་ལས་སྒོ་གང་རུང་འཕེལ་རྒྱས་འགྲོ་བར་ནུས་པ་ཐོན་གྱི་ཡོད་འདུག

གཅིག སྐད་མཛོད་དང་སྐད་མཛོད་སྐད་ཆ་རིག་པའི་གོ་དོན།

ཕྱི་ཡིག་Corpusནི་ལ་ཏིང་སྐད་དུ་ལུས་པོའི་དོན་ཡིན་པ་དང་། དུས་རབས་15པ་ནས་དབྱིན་སྐད་ནང་སྤྱོད་འགོ་ཚུགས་ཤིང་། དུས་རབས་18པའི་ནང་མིང་འདིའི་སྲོག་ལ་ད་ལྟའི་སྐད་མཛོད་ཀྱི་དོན་ཞུགས་ནས་སྤྱད་པར་གྲགས། རྒྱ་ཡིག་གིས་Corpusལ་语料库ཟེར་འདུག བོད་སྐད་ལ་སྐད་མཛོད་ཅེས་བསྒྱུར་ན་འགྲིག་པར་སྙམ། ཡིན་ཡང་། བོད་ཡིག་གི་རིག་དེབ་ཁ་ཤས་སུ་མཐོང་བའི་དཔྱད་རྩོམ་ནང་“ཡིག་མཛོད་”ཅེས་བསྒྱུར་བ་ཡང་མཐོང་རྒྱུ་འདུག དེ་ལ་ཞིབ་ཏུ་བསམས་ན་“ཡིག་མཛོད”ནི་Corpusཡི་ཐོག་མའི་རྒྱུ་ཆ་ཡིག་རྐྱང་ཡིན་པས་དེ་ལྟར་བཏགས་པ་དང་། ད་ལྟའི་དུ་Corpusནང་ཡིག་རྐྱང་ཕུད་པའི་སྐད་གདངས་སོགས་གཞི་གྲངས་སམ་རྒྱུ་ཆ་འདུ་བས། དེའི་ནུས་པ་དང་ཁེབས་ཚད་ཀྱི་ཆ་ནས་“སྐད་མཛོད”ཟེར་ན་དོན་ལ་གནས་པར་མཐོང་། འདིར་གླེང་གཞིར་གྱུར་པའི་སྐད་མཛོད་སྐད་ཆ་རིག་པ་འདི་ནི་སྐད་ཆ་རིག་པ་བས་བཀོལ་བའི་ཞིབ་འཇུག་ཐབས་ལམ་ཞིག་ཡིན་ལ་ལོ་རྒྱུས་རིང་པོ་ཡོད། ཡིན་ན་ཡང་། སྐད་མཛོད་སྐད་ཆ་རིག་པའི་ངོས་འཛིན་ཐད། མི་རྣམས་ནས་ཁས་ལེན་པ་ནི་མི་རྣམས་ཀྱིས་འཚོ་བའི་སྤྱོད་པའི་སྐད་ཆའི་དཔེ་དངོས་རྨང་གཞིར་བཟུང་ནས་སྐད་ཆར་ཞིབ་འཇུག་བྱེད་པ་ལ་སྐད་མཛོད་སྐད་ཆ་རིག་པ་དང་། ཡང་ན་སྐད་ཆའི་རྒྱུ་ཆ་དེ་སྐད་ཆ་ཞིབ་འབྲི་བྱེད་པའི་དམིགས་འབེན་ནམ་དེ་སྐད་ཆ་ཞིག་ལ་ཆ་འཇོག་སྨྲ་བའི་སྒྲུབ་ཐབས་བདེན་དཔང་བྱེད་པ་ལ་སྐད་མཛོད་སྐད་ཆ་རིག་པ་ཟེར་བའི་ལྟ་བ་འདི་གཉིས་ནི་རྒྱུགས་ཆེ་བའི་ངོས་འཛིན་ཡིན་འདུག་ལ། འདི་ནི་བརྡ་སྤྲོད་རིག་པ་དང་བརྡ་དོན་རིག་པ་ལྟ་བུའི་སྐད་ཆའི་གྲུབ་ཆའི་ཆ་ཤས་རེ་ལ་ཞིབ་འཇུག་བྱེད་པ་མིན་པར། རང་བྱུང་སྐད་ཆའི་རྒྱུ་ཆར་ཁ་སྣོན་དང་མཆན་འགོད་བྱེད་པ། མཆན་འགོད་བྱས་པའི་ཐབས་སྣ་ཚོགས་ལ་བརྟེན་ནས་སྐད་ཆ་ཞིབ་འཇུག་གི་དགོ་མཁོ་བཞིན་སྐད་མཛོད་ལ་བརྟེན་ནས་ཞིབ་འཇུག་བྱེད་པའི་ཐབས་ལམ་ཞིག་རེད།

གཉིས། སྐད་མཛོད་སྐད་ཆ་རིག་པའི་འཕེལ་རིམ་དང་ཞིབ་འཇུག་གནས་བབ། 

སྐད་མཛོད་སྐད་ཆ་རིག་པ་ནི་སྐད་ཆ་ཞིབ་འཇུག་གི་ཐབས་ལམ་ཞིག་ཡིན་པས་ཆ་ནས་དེར་དུས་རབས་གོང་མའམ་དེ་ལས་རིང་པའི་ལོ་རྒྱུས་ཡོད་པར་ངེས། ཡིག་ཚངས་སུ་སྐད་མཛོད་རིག་པའི་སྐོར་ལ་བཤད་སྲོལ་མང་པོ་ཡོད་མོད། འདི་ནས་ཆོ་མ་སི་ཀིའི་འཕེལ་འགྱུར་བརྡ་སྤྲོད་རིག་པའི་དར་རྒུད་ཀྱི་ལོ་རྒྱུས་གཞི་བཟུང་ནས་སྐད་མཛོད་སྐད་ཆ་རིག་པའི་དར་འཕེལ་བཤད་ལ། སྔ་མའི་སྐད་མཛོད་སྐད་ཆ་རིག་པ་ནི་ཆོ་མ་སི་ཀིའི་འཕེལ་འགྱུར་བརྡ་སྤྲོད་རིག་པའི་གཞུང་ལུགས་མ་བཏོན་པའི་སྔོན་ལ་སྐད་ཆའི་རྒྱུ་ཆར་བརྟེན་ནས་སྐད་ཆར་ཞིབ་འཇུག་བྱེད་པ་ལ་ཟེར། དེའི་སྐད་ཆ་གོམས་ལོབ་ཐད་དུས་རབས་19པའི་ལོ་རབས70པར། ཡོ་རོབ་གླིང་དུ་དར་བའི་བྱིས་པའི་སྐད་ཆའི་གོམས་ལོབ་ཀྱི་ཞིབ་འཇུག་ལ་སྐད་མཛོད་སྤྱོད་པའི་མཐོ་རླབས་རྒྱས་པ་དང་། ཡུལ་སྐད་རིག་པའི་ཐད་རང་རྒྱལ་གྱི་ཤིས་ཧན་ཡང་ཤོང་(扬雄)གིས་ལོ་ངོ་ཉེར་བདུན་རིང་ལ་བསྡུ་རུབ་དང་དག་བསྒྲིགས་བྱས་པའི་《ཕོ་ཉས་རྒྱལ་ཁམས་གཞན་གྱི་ཡུལ་སྐད་ལ་བསྐལ་བའི་གཏམ་གྱིས་འགྲེལ་བ》ནི་རང་རྒྱལ་གྱི་ཡུལ་སྐད་རིག་པའི་ལོ་རྒྱུས་སུ་རིག་གཞུང་དང་རིག་གནས་ཀྱི་རིན་ཐང་གཞལ་དུ་དཀའ་བའི་བརྩམས་ཆོས་ཡིན་པ་མ་ཟད། འཛམ་གླིང་ཡུལ་སྐད་རིག་པའི་ལོ་རྒྱུས་ཐོག་གལ་ཆེའི་གནས་བབ་ཟིན་ཡོད་པ། སྐད་ཆ་སློབ་ཁྲིད་ཀྱི་ཐད་དུས་རབས་20པའི་སྔ་མའི་ལོ་རབས་50ནང་། སྐད་མཛོད་དང་ཕྱི་སྐད་སློབ་ཁྲིད་གཉིས་ལ་འབྲེལ་བ་དམ་ཟབ་ཡོད་གསུངས་པ་ལྟར། ཕྱི་སྐད་སློབ་ཁྲིད་ནང་སྤྱད་པའི་ཐ་སྙད་རེའུ་མིག་ཇི་སྙེད་པ་དེ་སྐད་མཛོད་ལས་བསྡོམས་རྩིས་བགྱིས་ནས་བྱུང་བའི་ཟློས་ཚད་མཐོ་ཤོས་ཀྱི་རྒྱུན་སྤྱོད་མིང་ཚིག་སྤྱད་པས། བསླབ་ན་ཤེས་སླ་ཞིང་། ཤེས་ནས་སྤྱོད་ཐུབ་པར་གྱུར་བའི་ནུས་པ་མི་དམན་པ་ཐོབ་སོགས་སྐད་ཡིག་ཞིབ་འཇུག་ལ་གྲུབ་འབྲས་ཡག་པོ་བླངས་ཡོད། ཆོ་མ་སི་ཀིས་《ཚིག་སྒྲུབ་རིགས་པ》དང་དེ་འབྲེལ་གྱི་དཔྱད་བརྗོད་ནང་། སྐད་མཛོད་ཀྱིས་སྐད་ཆའི་ཕྱིའི་རྣམ་པ་ཙམ་ལས་སྐད་ཆའི་ནང་གི་འགྱུར་བ་མཚོན་མི་ཐུབ་པའི་ཐད་“སྐད་ཆ་རིམ་ཟློས་ཆོས་ཉིད”ཀྱི་ལྟ་བ་བཏོན་ནས་སྐད་མཛོད་ཞིབ་འཇུག་གི་ཐབས་ལ་བརྟེན་ན་སྐད་ཆའི་ནུས་པའི་ཆ་ཤས་ཤིག་ལ་འགྲེལ་བཤད་ཐུབ་ཙམ་ཡིན་པས། སྐད་མཛོད་ནི་སྐད་ཆ་རིག་པ་བས་སྐད་ཆར་ཞིབ་འཇུག་བྱེད་པའི་ལག་ཆ་བཟང་པོར་བརྩི་མི་རུང་བའི་བཞེད་པས། དུས་སྐབས་ཤིག་གི་ནང་སྐད་མཛོད་སྐད་བརྡ་རིག་པ་དེ་ཅུང་འཕེལ་དལ་བའི་གནས་སུ་ལྷུང་བ་རུང་། དུས་རབས་20པའི་ལོ་རབས་50ནའི་ནང་རྩིས་འཁོར་དར་བ་དང་ཆབས་ཅིག སྐད་མཛོད་ཡང་རྩིས་འཁོར་བརྟེན་ནས་བཟོ་བསྐྲུན་བྱེད་པའི་ལམ་ཁར་སྐྱོད་དེ། ཡིག་མཛོད་ལ་རིགས་དབྱེ་དང་མཆན་འགོད། མིང་རྡང་། བྱ་ར་སོགས་ཀྱི་ནུས་པ་ལྡན་པའི་སྐད་མཛོད་ཆེན་པོ་བྱུང་བའི་ནང་ཆེས་ཚབ་མཚོན་དུ་གྱུར་བ་ནི། 1916ལོར་བྱུང་བའི་མིང་ས་ཡའི་གྲངས་ཅན་གྱི་དབྱིན་ཡིག་གི་པུ་རོན་སྐད་མཛོད་ཅེས་པ་དེ་རེད། 

1990ལོ་ནས་2000ལོའི་བར་གྱི་ལོ་ངོ་བཅུ་ནི་སྐད་མཛོད་ཀྱི་སྤུས་ཀ་དང་རྒྱ་ཁྱོན་གང་ཅི་ཐད་ནས་འཕེལ་རྒྱས་མགྱོགས་པའི་དུས་ཚོད་ལ་སླེབས་པར་འདོད། སྐབས་འདིའི་མིང་གྲངས་དུང་ཕྱུར་ཟིན་པའི་སྐད་མཛོད་དབྱིན་ཇིའི་རྒྱལ་ཁབ་ཀྱི་སྐད་མཛོད་ལྟ་བུ་དང་། ཐོག་མར་སྐད་མཛོད་ལ་བརྟེན་པའི་དབྱིན་སྐད་སློབ་སྦྱོང་གི་ཚིག་མཛོད་བྱུང་བ། དེ་ནས་རྩིས་འཁོར་ལག་རྩལ་ཇེ་ལེགས་སུ་ཕྱིན་པས་རང་འགུལ་མིང་དབྱེ་དང་ཚིག་གྲུབ་མཆན་འགོད་དར་བས། རང་རྒྱལ་གྱི་རྒྱ་ཡིག་གི་སྐད་མཛོད་ལ་པེ་ཅིང་སློབ་གྲྭ་ཆེན་མོའི་སྐད་མཛོད་དང་། རིམ་བཞིན་འཕྲུལ་ཆས་ལོ་ཙཱ་དང་སྐད་གདངས་ངོས་ཟིན་གྱི་ལག་རྩལ་ཀྱང་དར་བ་རེད། འདིའི་ཐད་བོད་ཡིག་འཕྲུལ་ཆས་ཡིག་བསྒྱུར་ལ་བོད་ལྗོངས་སློབ་གྲྭ་ཆེན་མོའི་དགེ་རྒན་ཆེན་མོ་དང་ཀྲུང་གོའི་བཟོ་སྐྲུན་གླིང་གི་ཡོན་ཧྲི་ཉི་མ་བཀྲ་ཤིས་ཀྱིས་དབུ་མཛད་གནང་བའི་ཉི་འོད་བོད་རྒྱའི་འཕྲུལ་ཆས་ཡིག་བསྒྱུར་མ་ལག་(2016)དང་། བོད་བསྒྱུར་ལོ་ཙཱ་(2019)སོགས་ཡོད།

གསུམ། སྐད་མཛོད་སྐད་ཆ་རིག་པ་དང་སྤྱི་ཚོགས་འཚོ་བ།

སྐད་མཛོད་སྐད་ཆ་རིག་པས་ཞིབ་འཇུག་གི་དམིགས་གཏད་ནི་ཡིག་ཆ་རེད། ཡིག་ཆ་འདི་དག་ནི་སྐད་ཆ་ཞིབ་འབྲི་དང་སྒྲུབ་རིམ་གྱི་སྒྲུབ་བྱེད་འབྱུང་ཁུངས་ཡིན། དེ་ལས་སྐད་རྡང་language entries གིས་སྐད་མཛོད་ནང་དུ་ཁྱབ་ཚུལ་ལ་ཚད་རྩིས་ཞིབ་འབྲི་བྱེད་པ་རིམ་གྱིས་སྐད་ཆ་ཞིབ་འཇུག་གི་ངེས་མཁོའི་གྲུབ་ཆའི་ཡན་ལག་ཏུ་གྱུར། འདི་ནི་ལི་ཆིས་བསྟན་པ་ལྟར་སྐད་ཆ་ཞིབ་འཇུག་བྱེད་པའི་དམིགས་ཡུལ་ནི་སྐད་ཆ་བེད་སྤྱོད་བྱེད་པ་ཞིབ་འབྲི་བྱེད་ཆེད་ཡིན་པ་ལས་སྐད་ཆའི་ནུས་པ་ཞིབ་འབྲི་བྱེད་པ་མིན། བེད་སྤྱོད་སྒང་གི་སྐད་ཆར་ཞིབ་ལྟ་བྱས་པ་ལས་གཞུང་ལུགས་གྲུབ་པར་བྱེད། དེ་ལས་ལྡོག་པ་མིན་གསུངས། དེ་ན། སྐད་མཛོད་སྐད་ཆ་རིག་པ་དེ་འཕེལ་འགྱུར་སྐད་ཆ་རིག་པའི་གཞུང་ལུགས་དང་འདྲ་བར། སྐད་ཆ་རིག་པའི་གཞུང་ལུགས་མ་ཡིན་ལ་སྐད་ཆ་རིག་པའི་ཡན་ལག་གི་རིག་ཚན་ཞིག་ཀྱང་དེ་བས་མ་ཡིན། དེ་སྐད་ཆ་རིག་པ་བས་སྐད་ཆའི་ཞིབ་འཇུག་ཁྲོད་དུ་སྤྱོད་པའི་ལག་ཆ་ཞིག་ཡིན་ལ། སྐད་ཆ་རིག་པ་བས་སྐད་ཆའི་ངོ་བོ་དང་གྲུབ་ཚུལ། གྲུབ་ཆ། ནུས་པ་སོགས་ལ་ཞིབ་འཇུག་བགྱི་སྐབས་སྐད་ཆའི་བདེན་དཔང་སྤྱད་དེ་སྐད་ཆའི་ནང་གི་གང་ཞིག་ཡིན་པར་ཞིབ་བརྗོད་བྱེད་དགོས། དུས་སྐབས་མི་འདྲ་བའི་ནང་གི་བདེན་དཔང་འདི་དག་ནི་སྐད་ཆ་རིག་པ་བ་རང་ཉིད་ཀྱི་ཐད་ཀའི་ཚོར་བ་དང་ཕྱིར་རྟོགས་ལ་བརྟེན་པ་འམ། རྟག་དཔྱད་དང་ཕྱོགས་བསྡུ། ཁ་སྐད་དང་ཡིག་ཐོག་སོགས་ལས་ལྟ་ཞིབ་དང་ཞིབ་འབྲི་བྱས་པ་ཞིག་རེད། སྐད་མཛོད་ལ་བརྟེན་པའི་ཞིབ་འཇུག་ནང་དུ་སྐད་ཆའི་ངོ་བོ་སོགས་ཐད་ཀར་ཡིག་ཆ་ལས་ཐོབ་ཐུབ། འདི་ལས་སྐད་མཛོད་སྐད་ཆ་རིག་པ་ནི་སྐད་ཆ་རིག་པ་བའི་ཐད་ཀའི་མྱོང་ཚོར་དང་ཕྱིར་རྟོགས་ལྟ་གྲུབ་ཀྱི་བདེན་དཔང་ལ་བརྟེན་ནས་གྲུབ་པའི་སྐད་ཆ་རིག་པའི་གཞུང་ལུགས་དང་མི་འདྲ། སྐད་མཛོད་སྐད་ཆ་རིག་པའི་སྐད་ཆའི་ཁྲོད་ཀྱི་ཐ་སྙད་གྲུབ་ཚུལ་དང་བེད་སྤྱོད་ནང་འཕྲད་སྲིད་པ་དག་ཞིབ་འཇུག་ཐུབ་པ་མ་ཟད། དེ་དག་ཐོན་པའི་ཚོད་གྲངས་ལ་བསྡོམས་རྩིས་ཞིབ་འཇུག་བྱེད་ཀྱིན་ཡོད། སྐད་ཆ་རིག་པའི་གཞུང་ལུགས་གཞན་དང་འདྲ་བར་སྐད་མཛོད་སྐད་ཆ་རིག་པས་སྐད་ཆའི་ངོ་བོ་དང་གྲུབ་ཚུལ་། བེད་སྤྱོད། སྐད་ཆའི་གོམས་ལུགས། སྐད་ཆ་གཞན་འགྱུར་དང་སྐད་ཆས་བསྒྱུར་བ་སོགས་ལ་ཞིབ་འཇུག་བྱེད་ཐུབ། གཙོ་བོ་ཐ་སྙད་དང་ཐ་སྙད་ཀྱི་བརྡ་སྲོལ་ལ་ཞིབ་འཇུག་བྱེད་པ་ལས་ཚིག་གི་བརྡ་སྲོལ་མ་ཡིན་ནོ། །སྐད་ཆའི་ཞིབ་འཇུག་ཁྲོད་དུ་སྐད་མཛོད་སྐད་ཆ་རིག་པའི་ཐབས་ལམ་སྤྱད་པའི་ཞིབ་འཇུག་ཁ་ཕྱོགས་ལ་ཁ་སྐད་ཞིབ་འཇུག་དང་ཐ་སྙད་ཞིབ་འཇུག བརྡ་སྤྲོད་ཞིབ་འཇུག བརྡ་དོན་ཞིབ་འཇུག གཏམ་གྱི་དབྱེ་ཞིབ་དང་སྤྱི་ཚོགས་སྐད་ཆ་རིག་པ་སོགས་འདུས་ཡོད། 

མཇུག་བསྡོམས། 

སྐད་མཛོད་སྐད་བརྡ་རིག་པར་བརྟེན་པའི་ཚིག་གྲུབ་དབྱེ་ཞིབ་དང་། མིང་བརྡ་དབྱེ་ཞིབ། བརྡ་དོན་གསལ་འགྲེལ་སོགས་ལ་སྔར་མེད་ཀྱི་འཕེལ་རྒྱས་ཕྱིན་ནས་སྐད་ཆ་ཞིབ་འཇུག་དང་དེ་འབྲེལ་གྱི་རིག་ནུས་ཐོན་རྫས་གསར་གཏོད་ལ་བྱས་རྗེས་བཞག་ཡོད་པ་དཔེར་ན། DeepSeek V3སྦྱོང་བརྡར་གཞི་གྲངས་ཀྱི་གཞི་རྒྱ་14.8TBབརྒལ་བས། ད་སྐབས་ཀྱི་མིའི་བཟོས་རིག་ནུས་ཐོན་རྫས་དེ་ཁ་བརྡའི་འཕྲུལ་མི་ནས་གནས་ཚུལ་རྙོག་འཛིང་ཅན་ཁག་གཅོད་ཐུབ་པའི་རིག་འདེད་འཕྲུལ་མིར་གྱུར་བའི་བྱས་རྗེས་བཞག་འདུག དེ་མིན། སྐད་མཛོད་ལ་བརྟེན་པའི་གཞི་རྒྱ་ཆེ་བའི་སྐད་གཉིས་ཡིག་བསྒྱུར་རྒྱུ་ཆའི་སྐད་མཛོད་ཀྱིས་འཕྲུལ་ཆས་ཡིག་བསྒྱུར་ལ་དགོས་ངེས་ཀྱི་གཞི་གྲངས་ཀྱིས་རྒྱབ་སྐྱོར་ཐོབ་པས་ལོ་ཙཱའི་རིག་ནུས་ཆུ་ཚད་མཐོ་རུ་བཏེགས་ཡོད་ལ། སྐད་མཛོད་ཀྱི་བསྡོམས་རྩིས་དང་འཕྲུལ་ཆས་སློབ་སྦྱོང་གི་མ་དཔེས་ལོ་ཙཱའི་ཡང་དག་རང་བཞིན་དང་མྱུར་ཚད་མཐོར་འདེགས་ཀྱི་སྲོལ་རྒྱུན་ཚིག་དུམ་ལ་བརྟེན་པའི་འཕྲུལ་ཆས་ལོ་ཙཱའི་མ་ལག་གི་ལས་ཕྱོད་དལ་བའི་སྐྱོན་ཆ་སེལ་ནས་ལོ་ཙཱའི་སྤུས་ཚད་ཇེ་ལེགས་སུ་འགྲོ་བར་བྱས་རྗེས་བཞག་པ་སོགས། མདོར་ན། སྐད་མཛོད་ནི་མིའི་བཟོས་རིག་ནུས་ཀྱི་འཕེལ་རྒྱས་སྐུལ་འདེད་བྱེད་པའི་ནུས་པ་ཆེ་བའི་གྲས་ཡིན་ལ། དེའི་སྐད་རིགས་སྣ་ཚོགས་ཀྱི་གཞི་གྲངས་དང་རྒྱུ་ཆ་ཐག་གཅོད་དང་རིག་ནུས་མ་ལག་གི་དགོས་ངེས་ཀྱི་གཞི་གྲངས་རྨང་གཞི་དང་ལག་རྩལ་མཁོ་འདོན་ལ་བྱས་རྗེས་བླ་ན་མེད་པ་ཡོད།

འགྱུར་མེད་རབ་བརྟན། བོད་ལྗོངས་སློབ་གྲྭ་ཆེན་མོའི་ཏང་ཨུད་དྲིལ་བསྒྲགས་པུའུ།