ནམ་མཁའ་གཡའ་དག་ཅིང་ཉི་འོད་དྲོ་ཞིང་འཇམ་པའི་ཉིན་ཞིག་ལ། ཡངས་པའི་རྩྭ་ཐང་ཞིག་གི་སྟེང་དུ་གནའ་དེང་ཡིག་ཆས་འགའ་ཞིག་རང་གི་དགེ་མཚན་གླེང་ཞོར་ཀླན་ཀ་འཁྲུག་པོ་ཞིག་བྱེད་བཞིན་འདུག

གཟུགས་སྟོབས་ཆེ་ཞིང་སྐུ་ཉམས་དོད་པའི་སྦྱང་ཤིང་ན་རེ། “ང་ནི་སྤྱོད་ཡུན་རིང་ཞིང་ཡིག་གཟུགས་བྱང་གོམས་སུ་འགྲོ་བར་ཕན་ནུས་ལྡན་པའི་སྲོལ་རྒྱུན་གྱི་ཡིག་ཆས་ཁྱད་དུ་འཕགས་པ་ཞིག་ཡིན་པས། སུ་ཞིག་གིས་ང་ལ་འགྲན་ནུས”ཞེས་བརྗོད་པར། དེའི་དུས་སུ་དཀར་ལ་གཙང་བའི་ཤོག་བུ་ཞིག་མདུན་དུ་འཕུར་ཡོང་སྟེ་ན་རེ། “འོན་ཀྱང་། ཁྱེད་རང་མི་ཚོས་འཁྱེར་སྟབས་དཀའ་ཞིང་བེད་སྤྱོད་མི་བདེ་བས། དེ་ལས་གཙང་ཞིང་ཡང་ལ་སྟབས་བདེ་ཆེ་བའི་ང་རང་ནི་ཚང་མའི་དགོས་མཁོ་དང་ཤིན་ཏུ་འཚམ”ཞེས་བཤད་པར་སྦྱང་ཤིང་རབ་ཏུ་ཁྲོས། དེའི་སྐབས་སུ་གློ་བུར་དུ་སྨྱུག་མ་ལས་བཟོས་པའི་བོད་སྨྱུག་ཅིག་དང་ཟངས་ལས་གྲུབ་པའི་སྣག་བུམ་ཞིག ད་དུང་རིང་ཐུང་སྙོམས་ཤིང་ཡ་ཡོ་མེད་ལ་ལྕགས་རིགས་བཟང་ཞིང་རྣོ་ངར་ཆེ་བའི་སྨྱུག་གྲི་ཞིག་བཅས་ཐོན་ཡོང་སྟེ་ན་རེ། “ཤོག་བུ་ཆུང་ཆུང་ཁ་ཕོ་མ་ཤོད། ང་ཚོ་ནི་གནའ་མིའི་བློ་གྲོས་ལས་འཁྲུངས་པའི་ཕུལ་བྱུང་གི་ཡིག་ཆས་ཤ་སྟག་ཡིན་ཞིང་། སྤུས་ཚད་དང་རིན་ཐང་བསམ་གྱིས་མི་ཁྱབ་པ་ཡོད”ཅེས་ལབ་པར། ལྕགས་སྨྱུག་དང་ཤེལ་ལས་གྲུབ་པའི་སྣག་བུམ། བཟོ་ལྟ་འདྲ་མིན་གྱི་གཞོག་གྲི་སོགས་དུས་གཅིག་ལ་ཁོ་ཚོའི་མདུན་དུ་ཡོང་ནས་ན་རེ། “འུད་ཤོབ་མ་ཤོད། རྙིང་དྲི་ཁ་བའི་སྲོལ་རྒྱུན་གྱི་ཡིག་ཆས་ཁྱོད་ཚོ་ད་དུས་ཚོད་ཡོལ་ཟིན་པ་རེད། ད་ནི་དུས་རབས་གསར་པའི་རིག་གནས་ཀྱི་དགའ་ཚལ་ནང་ང་ཚོ་ལས་ལྷག་པའི་ཡིག་ཆས་ཤིག་མེད”ཅེས་ངར་ངར་རྫིག་རྫིག་གིས་བཤད།

མཚམས་དེར། ཐག་མི་རིང་བའི་ས་ནས་ལོ་ན་བགྲེས་པའི་དཔེ་ཁུག་ཅིག་ཡོང་སྟེ། “བུ་ཕྲུག་ཚོ། དོན་དངོས་ཐོག་སྲོལ་རྒྱུན་ཡིག་ཆས་ནི་དེང་རབས་ཡིག་ཆས་ཀྱི་ཨ་མ་ལྟ་བུ་ཡིན་ལ། དེང་རབས་ཀྱི་ཡིག་ཆས་རྣམས་ཀྱང་སྲོལ་རྒྱུན་ཡིག་ཆས་ཀྱི་གཅེས་ཕྲུག་ལྟ་བུ་ཡིན་པས། ཁྱོད་ཚོས་སྲོལ་རྒྱུན་དང་དེང་རབས་ཀྱི་ཡིག་ཆས་ལ་ཡག་སྡུག་གི་དབྱེ་བ་མ་ཕྱེ་བར་ལོ་ཆུང་བྱིས་པ་རྣམས་ལ་ཤེས་རིག་གི་བདུད་རྩི་འཐུ་རོགས་བྱེད་མཁན་གྱི་གྲོགས་པོ་ཡག་ཤོས་དེར་གྱུར་པ་བྱེད་དགོས”ཞེས་གསུངས་མ་ཐག ཡིག་ཆས་རྣམས་ཀྱིས་མགྲིན་གཅིག་ཏུ“ལགས་སོ”ཞེས་ཟེར་ཞོར་བགྲེས་སོང་དཔེ་ཁུག་གི་རུམ་དུ་འཛུལ་ལོ།