འཁྲེང་སེམས་མེ་ཏོག་ཆུན་པོ།
སྤྲིན་དཀར་ལུག་ཁྱུ་འདྲེས་པའི་སྤང་ཐང་ན། །
སྣང་བའི་རྟ་ཁ་འཆོར་བའི་ལོ་རྒྱུས་ཡོད། །
ཞེ་རྩ་བལ་ལས་འཇམ་པའི་འབྲོག་མོ་ཡིས། །
དེ་གར་ལུག་ཁྱུ་འཚོས་ཏེ་ལང་ཚོ་ངོམ། །
མཚམས་སྤྲིན་ན་བཟའ་བཀླུབས་པའི་རི་སུལ་ན། །
རྒྱང་མིག་ཡང་ཡང་འཕངས་པའི་ལོ་རྒྱུས་ཡོད། །
བརྩེ་སེམས་མེ་བཞིན་འབར་བའི་འབྲོག་མོ་ཡིས། །
རི་དེར་ནོར་ཁྱུ་འཚོ་ཞོར་རྫི་གླུ་ལེན། །
ངང་ཆུང་ཁྱོ་ཤུག་འགྲོགས་སའི་མཚོ་འགྲམ་ན། །
ཉི་མཚན་མང་པོ་འདས་པའི་ལོ་རྒྱུས་ཡོད། །
སྐྱེ་གཟུགས་ལྷ་ལས་མཚར་བའི་འབྲོག་མོ་ཡིས། །
ཆུ་ནང་ཉ་མོར་སྙིང་གཏམ་ཡང་ཡང་གླེང་། །
སྦྲ་གུར་མེ་ཏོག་མཛེས་པའི་གཡང་ས་ན། །
སེམས་ཀྱི་སྦྲང་ཆུང་འཕུར་བའི་ལོ་རྒྱུས་ཡོད། །
སེམས་པ་སེམས་ཀྱིས་བརླན་པའི་འབྲོག་མོ་ཡིས། །
གནས་དེར་ལང་ཚོའི་མྱུ་གུ་ཡང་ཡང་བཏབ། །
འབྲོག་མོ་མེ་ཏོག་ལྟ་བུའི་ལང་ཚོ་ཅན། །
གཞོན་པའི་སྣང་བ་འཁྲུལ་བའི་སྦྲང་ཆུང་ཡིན། །
སྟོན་རླུང་བསིལ་བསིལ་བྲེལ་བྲེལ་མ་གནང་རོགས། །
དབྱར་ཟླ་གསུམ་པོར་མཉམ་དགའ་མཉམ་སྐྱིད་བྱེད། །