གཉའ་གཅོག་དང་འབྲེལ་བའི་སེམས་འགྱུ།
ད་ནངས་ཞོགས་པ་གཅུང་མོས་སྐད་འཕྲིན་དུ་བརྙན་ཐུང་ཞིག་བསྐུར་འདུག བརྙན་ཐུང་ལས་བདག་ཚོའི་ཕ་ཡུལ་དུ་གཉའ་སྤྲོའི་ཆོ་ག་བྱེད་པ་མཐོང་བས། སླར་ཡང་ལོ་གཅིག་དུས་གཅིག་གི་རྨོ་འདེབས་ཀྱི་དུས་ཚོད་ཤར་བ་ཤེས།
རོང་ཁུལ་དུ་དཔྱིད་རྨོད་མ་ཟིན་གོང་། རྟ་དང་རྨོན་མཛོ་དོར་བསྡེབས་ཏེ་ཞིང་ཐང་དུ་ཁྲིད་ཡོང་ནས་གཉའ་གཅོག་བྱེད་སྲོལ་ཡོད། གཉའ་སྤྲོའི་ཆོ་གའི་འབྱུང་ཁུངས་དངོས་གང་ཡིན་ཁོ་བོར་གསལ་ཆ་མེད་རུང་། དེ་ནི་གནའ་སྔ་མོའི་སྲོལ་རྒྱུན་ཞིག་ཡིན་པ་ཐག་བཅད་ནས་བཤད་ཆོག
ཁོ་བོ་ཧ་གཉིད་སད་ཙམ་ལ། པཱ་ལགས་ཀྱིས་གསུང་ངག་འཇམ་པོས། གནའ་སྔ་མོ་སྔ་མོར་བྱ་རྒྱལ་ཁྱུང་ཆེན་འཇིགས་སུ་རུང་བ། རི་དབྲག་གི་བར་ལ་གཤོག་པ་ནག་ལིང་ངེར་བཀལ་ནས་ཡོད་པ་ཞིག་གིས་སོས་ཀའི་དུས་སུ་རྨོན་མཛོའི་ཐོད་པའམ་སོག་པར་བཏགས་པའི་རྔ་མ་དམར་པོ་ལྷེབ་ལྷེབ་ཏུ་གཡོ་བ་གང་མཐོང་མ་ཐག རླུང་ཤུགས་ཀྱི་འུར་སྒྲ་དང་བཅས་ནམ་མཁའི་མཐོངས་ནས་འཕུར་ཡོང་སྟེ། རྨོན་མཛོ་བར་སྣང་མཐོངས་སུ་བཀྱག་འགྲོ་གི་ཡོད་ལུགས་སྐོར་གྱི་ལྷ་སྒྲུང་ཐེངས་མང་གསུངས་མྱོང་། མ་གཞི་དེ་ནི་སྒྲོ་འདོགས་ཧ་ཅང་ཆེ་བའི་ལྷ་སྒྲུང་ཞིག་ཡིན་རུང་། ཤོད་རྒྱུན་དུམ་བུ་དེ་ལས་གནའ་སྔ་མོ་རྨོན་མཛོ་དོར་བསྡེབས་ནས་ཞིང་ཁ་རྨོ་སྲོལ་ཡོད་པ་ཟུར་ཙམ་རྟོགས་ཐུབ།
ཞིང་ཐང་གྲུ་བཞིའི་སྒང་ལ། །
འཕྲུལ་གྱི་ལྕགས་གླང་བཏང་བས། །
གྲོ་ནས་སྲན་མའི་སྟོན་ཐོག །
རི་བོའི་གཏོས་དང་མཉམ་སོང་། །
སྤྱི་ཚོགས་བྱ་འཕུར་བ་ལྟར་འཕེལ་རྒྱས་འགྲོ་བ་དང་བསྟུན་ནས། ཞིང་ལས་ཐོན་སྐྱེད་ནུས་ཤུགས་ཟམ་མི་ཆད་པར་གོང་མཐོར་སོང་བ་དང་། ཏང་གི་དམངས་ཕྱུག་སྲིད་ཇུས་བཟང་པོའི་དྲིན་ལས། གངས་ལྗོངས་ས་མཐོའི་སོ་ནམ་ཞིང་ལས་སྒོ་ཀུན་ནས་འཕྲུལ་ཆས་ཅན་དུ་འགྱུར་བཞིན་ཡོད།
ཁོ་བོ་རང་ལོ་བཅོ་བརྒྱད་ལ་ཁ་ལོག་པ་དང་མཐོ་འབྲིང་མ་ཐོན་ཙམ་ལ། ང་ཅག་གཙང་ཁུལ་དུ་རྟ་དང་གླང་། མཛོ་བཅས་རེས་མོས་སུ་བཀོལ་ནས་ས་ཞིང་རྨོ་བའི་སྲོལ་དེ་རང་འཇགས་སུ་གནས་ཡོད་རུང་། རིང་པོར་མ་སོང་བར་གཙང་ཁུལ་གྱི་ས་གཞི་ཆེན་པོར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་ཆེན་པོ་བྱུང་ཞིང་། གང་སར་ཐོ་ཕྲུག་གིས་གཙོས་པའི་སྤྱོད་སྒོ་ཤིན་ཏུ་ཆེ་བའི་ཞིང་འཕྲུལ་ཡོ་བྱད་སྣ་ཚོགས་དར་ཁྱབ་ཏུ་སོང་།
ཨ་ཁུ་ཞིང་པའི་དཔུང་རོགས་ལ་ག་བཏང་གོ་ཆོད་ཀྱི་ཐོ་ཕྲུག་དམར་གོག་གོ་མག་ཏུ་བྱོན་པས། རྟ་བོང་རྨོན་གླང་དང་བཅས་པ་ལོ་རྒྱུས་ཀྱི་གར་སྟེགས་ནས་རྒན་ཡོལ་ཞུ་དགོས་ཐུག གཙང་ཁུལ་གྱི་མི་དམངས་ཀྱིས་ཐོ་ཕྲུག་ལ་དགའ་ཞེན་ཆེན་པོ་བྱེད་པ་ནི། རང་གི་ཤ་ལས་བཅད་པའི་གཅེས་ཕྲུག་ལ་བརྩེ་བ་ཟབ་མོ་བཅངས་པ་དང་འདྲ།
དེང་གི་ཆར། བོད་ཀྱི་ཞིང་ཁུལ་གྱི་ཕྱོགས་གང་སར་ཐོ་ཕྲུག་དམར་ཆིལ་ལེར་ཁྱབ་པས། གཉའ་སྤྲོའི་ཆོ་གར་ཡང་ཐོ་ཕྲུག་སྤྱོད་མཁན་ཇེ་མང་ནས་ཇེ་མང་དུ་གྱུར།