ལོ་རེའི་ཟླ་3ཚེས་28ཉིན་ནི་བོད་ཀྱི་མི་དམངས་ཚོའི་ངོས་ནས་བརྗོད་ན། དམིགས་བསལ་གྱི་ཉིན་མོ་ཞིག་དང་བདེ་སྐྱིད་ལྡན་པའི་ཉིན་མོ་ཞིག དོན་སྙིང་དང་གལ་འགངས་ཤིན་ཏུ་ཆེ་བའི་ཉིན་མོ་ཞིག བོད་ཀྱི་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་པའི་དྲན་གསོའི་ཉིན་མོ་བཅས་རེད།

དུས་དེ་ནས་བཟུང་། ཡུན་རིང་རེ་སྒུག་བྱས་མཐར། ནམ་མཁའི་སྤྲིན་པ་དྭངས་སོང་། དུས་དེ་ནས་བཟུང་། ཡུན་རིང་རེ་སྒུག་བྱས་མཐར། རྐང་པའི་ལྕགས་སྒྲོག་དུམ་བུར་ཆད་སོང་། དུས་དེ་ནས་བཟུང་། དུས་རབས་མང་པོའི་རིང་གི་རེ་འབྲས་དོན་དུ་སྨིན་ཏེ། ཡར་ལངས་བཅིངས་འགྲོལ་ཐོབ་པའི་མི་དམངས་ཁྲི་ཚོ་བརྒྱ་ཡི་སེམས་པར་གཤོག་པ་ཐོགས་ནས། གཡའ་དག་པའི་མཁའ་དབྱིངས་མཐོན་པོར་འཕུར་དུས། ནམ་མཁའ་འདི་འདི་ལྟར་མུ་མཐའ་ཡངས་ཤིང་། འཇིག་རྟེན་འདི་འདི་ལྟར་ཁ་ཞེང་ཆེ་བ་གཞི་ནས་རྟོགས། དུས་དེ་ནས་བཟུང་། རྐང་ལག་གི་ལྕགས་སྒྲོག་དུམ་བུར་གྱུར་བས། རང་ལུས་ལ་རང་དབང་ཐོབ་པའི་ཞིང་བྲན་ཁྲི་ཚོ་བརྒྱས། རྟོད་ཐག་ལས་གྲོལ་བའི་རྟ་ཕོ་བཞིན་དུ་ས་གཞི་ཡངས་པོ་རིམ་གྱིས་སྐོར་དུས། མི་ཡུལ་འདི་འདི་ལྟར་ངོ་མཚར་ཆེ་ཞིང་། རང་དབང་ནི་འདི་ལྟར་གལ་ཆེ་ཞིང་བདེ་སྐྱིད་ཀྱི་རྩ་བ་ཡིན་པ་གཞི་ནས་རྟོགས། དུས་དེ་ནས་བཟུང་། སེམས་པ་རང་ལ་བདག་སོང་། ལུས་པོའང་རང་ལ་བདག་སོང་།

ངན་ངོན་གྱི་ཟས། ཧྲལ་ཧྲུལ་གྱི་གོས། སུ་ཡིས་སྤྱོད་མྱོང་བའི་ཟས་གོས་གཉིས་ཀྱི་མིང་ཚབ་ཡིན། སྡོད་ཁང་མཛོ་མོའི་སྣ་ཁུང་། སྦར་མཐིལ་ཙམ་གྱི་ས་ཞིང་། སུ་ཞིག་གི་འཚོ་རྟེན་ཡིན། ད་དུང་རྟ་བོང་དང་སྦྱག་ཁྱེམ་སོགས། སྔ་ས་ནས་ལོ་རྒྱུས་ཀྱི་དཔང་རྟགས་སུ་གྱུར་བའི་ཐོན་སྐྱེད་དང་འགྲིམ་འགྲུལ་གྱི་ཡོ་བྱད་དེ་དག ཞིང་བྲན་ཁྲི་ཚོ་བརྒྱ་ཡི་སེམས་ལ་གསལ་བའི་རི་མོ་རེད། མི་ལོ་དྲུག་ཅུ་རེ་དྲུག་གི་ལམ་བུའི་ཐོག མཁས་མཛངས་ཏང་གི་ཐུགས་རྗེའི་བཀའ་དྲིན་འོག བོད་ལྗོངས་གསར་པའི་བདེ་སྐྱིད་ཀྱི་འཛུམ་མདངས་ཞོགས་པའི་ཉི་གཞོན་བཞིན་གངས་ལྗོངས་ཀྱི་ས་མཐོར་བཞད་སོང་།

ལྟོས་དང་། བོད་ལྗོངས་གསར་པའི་འཕོ་འགྱུར་འདི་ལ་བསམས་ན། སྐྱིད་པོའི་རྨི་ལམ་བཞིན་དུ་བསམ་ཚོད་ལས་འདས་སོང་། སྔོན་ཆད་གཞན་གྱི་ཟ་རུའི་འོག་ནས་རྒྱགས་ཕྱེད་ལྟོགས་ཆེད་ངང་འཚོ་བའི་ཞིང་བྲན་རྣམས། ད་ཆ་ཟས་ལ་ཞིམ་མངར་ལྟ་ཞིང་། སྔོན་ཆད་གོས་ཀྱིས་ལུས་པོ་མི་དྲོས་པའི་བྲན་གཡོག་དེ་དག ད་ཆ་གང་དགའ་གང་སྐྱིད་ཀྱི་འཚོ་བ་གསར་པར་རོལ་བཞིན་འདུག གཞན་ཡང་། ཀླུ་ཡི་ཕོ་བྲང་འདྲ་བའི་སྡོད་ཁང་དེ་དག རྒྱལ་པོའི་བང་མཛོད་དང་མཉམ་པའི་རྒྱུ་ནོར་དེ་དག བཙུན་མོའི་གཟབ་མཆོར་དང་མཚུངས་པའི་རྒྱན་གོས་དེ་དག དེ་སྔོན་བྲན་གཡོག་སུ་ཡི་རྨི་ལམ་ལའང་འཆར་ཕོད་དམ། ད་དུང་། སྔོན་ཆད་འཆར་སྣང་ལའང་ཡོད་མ་མྱོང་བའི་བདེ་ཞིང་སྙོམས་པའི་གཞུང་ལམ། མགྱོགས་ལ་མྱུར་བའི་རླངས་འཁོར། མཁའ་དབྱིངས་ཀྱི་མཚོ་གྲུ་འདྲ་བའི་གནམ་གྲུ། དོག་མོ་ས་གཞིའི་ཁམས་ལ་གཡུ་འབྲུག་སྔོན་མོ་དང་མཚུངས་པའི་མེ་འཁོར། སྨག་རུམ་མུན་པའི་དུས་སུ་ནམ་མཁའི་སྐར་ཚོགས་ལྟ་བུའི་གློག་སྒྲོན། འཇིག་རྟེན་གྱི་གསང་བ་རྟོགས་པའི་བརྙན་འཕྲིན་དང་ཁ་པར་སོགས། དུས་རབས་དང་ལམ་ལུགས་མི་འདྲ་བ་གཉིས་ཀྱི་དཔང་རྟགས་ཀྱི་ཚུལ་དུ། མི་དམངས་རྣམས་ཀྱི་འཚོ་བའི་ཁྲོད་དུ་ལུས་དང་གྲིབ་མ་བཞིན་དུ་འགྲོགས་ནས་འདུག

3·28 ལས་དབང་ཞིག་གི་ཁ་ལོ་བསྒྱུར་བའི་ཉིན་མོ་དེ་ནས། ང་ཚོས་སྲོལ་ངན་དང་རྗེས་ལུས་ཀྱི་ལམ་ལུགས་དེ་དག་རྡོག་རོལ་བཏང་ཞིང་། རང་གཉའ་དམའ་ལ་རང་ལ་ཡིད་ཆེས་ཞན་པའི་བསམ་བློ་རྒྱང་དུ་བསྐྱུར་ཏེ། དབུ་འཕང་མཐོན་པོ་དང་ཡིད་ཆེས་བརྟན་པོས། སྤྱི་ཚོགས་རིང་ལུགས་ཀྱི་ལམ་ཆེན་ཐོག་ཏུ་བསྐྱོད་པས། འཇིག་རྟེན་གསར་པ་ཞིག་གི་ངོ་མཚར་ལྟད་མོ་མེ་ཏོག་བཞིན་གངས་ལྗོངས་ས་མཐོའི་པང་དུ་བཞད་སོང་།

3·28 ལམ་ལུགས་རྙིང་པའི་སྒོ་མོ་བཀག་ཅིང་། ལམ་ལུགས་གསར་པའི་སྒོ་མོ་འབྱེད་པའི་ཉིན་མོ་འདི་ལ། རང་དབང་དང་ཡར་ལངས་བཅིངས་འགྲོལ་ཐོབ་པའི་མི་དམངས་ཚོས། དགའ་བའི་འཛུམ་དང་སྤྲོ་བའི་སེམས་པ། མཛེས་པའི་གོས་རྒྱན་དང་སྙན་པའི་གླུ་དབྱངས་ཀྱི་ཁྲོད་དུ། མགོན་སྐྱབས་ཏང་ལ་བཀའ་དྲིན་ཞུ་ཞིང་། སྲིད་ཇུས་བཟང་པོར་བསྟོད་གླུ་ལེན་ནོ།