སྤྱིར་ན། ནགས་ཤོད་སྟག་ཕུའི་ཨར་གཞས་དང་བེ་རི་དགེ་སྟག་ཚང་གི་གཞས་ཚིག་གི་ཁ་བྱང་གཉིས་ཀ་ས་མིང་དང་མི་མིང་སྦྱར་ནས་བཏགས་པ་དང་། དཔེ་བྱང་གཉིས་ཀར“གཞས”ཞེས་པའི་འབྲུ་ཡོད་པ། ནང་དོན་འགའི་མཚན་བྱང་ཡོངས་སུ་འདྲ་བ་སོགས་འདྲ་བའི་ཆ་མི་ཉུང་བ་ཞིག་ལྡན་ཡང་། དེ་གཉིས་ལ་མི་འདྲ་བའི་ཆ་ཡང་ཤིན་ཏུ་མང་སྟེ།

དང་པོ། ནང་དོན་ཁ་ཤས་ཀྱི་ཁ་བྱང་འགོད་སྟངས་མི་འདྲ་བ།

སྟག་ཕུའི་ཨར་གཞས་ལ་མཚན་བྱང་དམིགས་གཏད་ཡོད་པའི་སྒོ་ནས་བཏགས་ཡོད་དེ། དཔེར་ན། སྲིད་པ་ཆགས་གླུ་དང་། གྱང་འཁྲབ། ཡུལ་ལྷའི་གསོལ་མཆོད། བྲོ་མཆོད། གནས་བསྟོད། སྤྱོད་ལམ་དྲན་སྐུལ་ལྟ་བུ། དགེ་སྟག་གཞས་ཚིག་ཡིན་ན་མཚན་བྱང་ཁ་ཤས་ཤིག་སྟག་ཕུའི་ཨར་གཞས་ནང་གི་ཚིག་རྐང་དང་པོ་དེ་བཞག་འདུག དཔེར་ན། དགེ་སྟག་གཞས་ཚིག་གཉིས་པ་དང་། དྲུག་པ། བདུན་པ། དགུ་པ། བཅུ་གསུམ། བཅུ་བཞི། བཅོ་ལྔ། བཅུ་དྲུག ཉེར་གཉིས། ཉེར་གསུམ་བཅས་ཀྱི་དཀར་ཆག་ནང་བཀོད་པའི་མཚན་བྱང་ལྟ་བུ། འོན་ཀྱང་། ནང་དོན་དངོས་ནང་ཁ་བྱང་མ་བཀོད་པར་ཐད་ཀར་ཨང་ཀིས་མཚོན་འདུག

གཉིས་པ། རྗོད་བྱེད་ཚིག་གི་ཁྱད་པར།

གཅིག འདྲ་བའི་ཆ།

འདི་གཉིས་ནང་རྗོད་བྱེད་ཚིག་འདྲ་བ་མང་པོ་ཞིག་ཡོད་དེ། དཔེར་ན། སྟག་ཕུའི་ཨར་གཞས་ནང་གི་ལེའུ་དང་པོ་དང་དགེ་སྟག་གཞས་ཚིག་བཅུ་གསུམ་པར་ཆ་བཞག་ན། ཚིག་རྐང་ཉེར་བརྒྱད་དེ་སྟག་ཕུའི་ཨར་གཞས་ནང་ལྷོ་ཕྱོགས་རི་བོ་ཏ་ལ་དང་དགེ་སྟག་གཞས་ཚིག་ནང་ལྷོ་ཕྱོགས་གྲུ་འཛིན་རི་བོ་ཞེས་ཡིག་འབྲུ་ཁ་ཤས་ཤིག་མ་གཏོགས་ཡོངས་སུ་མཚུངས་ཞེས་ཁ་ཚོན་བཅད་རུང་ཐལ་མི་དྲག་སྙམ། དེ་བཞིན་སྟག་ཕུའི་ཨར་གཞས་ཀྱི་ལེའུ་གཉིས་པ་དང་གསུམ་པ། བཞི་པ། རིམ་བཞིན་དགེ་སྟག་གཞས་ཚིག་བཅོ་ལྔ། བཅུ་བཞི། བཅུ་དྲུག་གི་སྔ་ཕྱིར་འཁོད་པའི་རྟ་ངོ་དང་རྟ་ཕོ། སྐད་ཆ་གཅིག་གི་ཚིག་རྐང་གཉིས་པ་དེ་བསྐྱར་བཟློས་བྱས་མིན། ཚིག་རྐང་རེ་རེའི་མཐའ་ལ་བསྭོ་བསྭོ་ལ་བྲིས་ཡོད་མེད་ལས་གཞན་ཕལ་ཆེར་གཅིག་མཚུངས་སུ་ཡོད། དེ་དང་འདྲ་བ་མང་པོ་ཞིག་ཡོད་རུང་། འདིར་ཡིག་རྙོག་མང་བར་དོགས་ཏེ་རེ་རེ་བཞིན་གླེང་བར་མི་བྱ།

གཉིས། མི་འདྲ་བའི་ཆ།

དེ་ཡང་ཨར་གཞས་དེ་གཉིས་ནང་རང་རང་སོ་སོར་མངའ་བའི་ཁྱད་ཆོས་ཁ་ཤས་ཡོད་དེ། དེ་དག་ཐོག་མར་རྗོད་བྱེད་ཚིག་གི་ཐད་ནས་མངོན་ཞིང་། རིམ་གྱིས་ནང་དོན་མི་འདྲ་བའི་ཐད་ནས་མཚོན་ཡོང་། སྟག་ཕུའི་ཨར་གཞས་ཀྱི་ལེའུ་ལྔ་པ་ནས་དགུ་པ་དང་། བཅུ་གཅིག་ནས་བཅུ་དྲུག བཅོ་བརྒྱད། བཅུ་དགུ། ཉེར་གཉིས་ནས་ཉེར་ལྔ་བཅས་དང་། དགེ་སྟག་གཞས་ཚིག་བཅུ་པ་ནས་བཅུ་གཉིས། བཅོ་བརྒྱད་ནས་ཉེར་གཅིག ཉེར་བཞི་བཅས་ནི་ནང་དོན་ཕན་ཚུན་འདྲ་ཕྱོགས་སུ་མེད་པས། ཚིག་ཁ་ཤས་རྟེན་དབང་གིས་འདྲ་བ་བྱུང་ན་མ་གཏོགས་ཕལ་ཆེར་ཐ་དད་དུ་སྣང་།

གསུམ་པ། བརྗོད་བྱའི་ནང་དོན་ཐད་ཀྱི་ཁྱད་པར།

སྤྱིར་ན་བརྗོད་བྱའི་ནང་དོན་ཐད་མི་འདྲ་བ་མང་དུ་ཡོད་མོད། འདིར་རང་གི་བསམ་ཚུལ་ལས་དམིགས་བསལ་ཡོད་པ་གཅིག་གཉིས་ཤིག་དྲངས་འདོད་དེ། དེ་ཡང་། སྟག་ཕུའི་ཨར་གཞས་ནང་སྐྱེ་བོའི་སྤྱོད་ལམ་དྲང་ཕྱོགས་སུ་འདྲེན་པར་དྲན་སྐུལ་གནང་བ་དེ་དགེ་སྟག་གཞས་ཚིག་ནང་མེད་པས་དམིགས་བསལ་ཞིག་ཏུ་མཐོང་། ཨར་གཞས་དེ་མཛད་དུས་སྤྱི་ཚོགས་སམ་དུས་རབས་ཀྱི་དགོས་མཁོ་དང་བསྟུན་ནས་མཛད་པ་དེ་མཛད་པ་པོའི་མཁྱེན་དཔྱོད་དང་རྩོམ་རིག་བརྩམས་ཆོས་ཀྱི་ནུས་པ་ཡང་ཡིན། གཞན་སྟག་ཕུའི་ཨར་གཞས་ནང་གི་ལེའུ་ལྔ་པ་དང་། དྲུག་པ། བདུན་པ། བརྒྱད་པ་སོགས་མང་པོ་ཞིག་དགེ་སྟག་གཞས་ཚིག་དང་མི་འདྲ་བར་རང་རང་གི་དམིགས་བསལ་གྱི་ཁྱད་ཆོས་འགའ་ཤས་འདུས་ཡོད།

དེ་ནས་དགེ་སྟག་གཞས་ཚིག་ལ་སྟག་ཕུའི་ཨར་གཞས་དང་དམིགས་བསལ་ལམ་མི་འདྲ་བའི་ཁྱད་ཆོས་གང་འདུག་ཟེར་ན། དགེ་སྟག་གཞས་ཚིག་ཉེར་བཞིའི་ནང་གཅིག་ནས་དགེ་སྟག་སྤྲུལ་སྐུ་བཞུགས་སའི་གནས་ལ་བསྟོད་པ་ཕུལ་བའི་ནང་དོན་ཡོད་ལ། གཉིས་ནས་དགེ་སྟག་ཁོང་ལ་བསྟོད་པ་ཕུལ་བའི་ནང་དོན་ཡང་ཡོད་དེ། དཔེར་ན། གཞས་ཚིག་ཏུ། བསོད་ནམས་ཡར་འགྲོ་ལ། །དགེ་སྟག་སྟོན་པའི་མཆོག་སྤྲུལ། །རྒྱབ་རིའི་བྲག་ལ་བཞུགས་ཡོད། །བསོད་ནམས་ཡར་འགྲོ་ལ། །ལྷ་བསང་གཏོང་དགོས་མི་འདུག །ལྷ་ཤིང་ཤུག་པས་བསྐོར་ཡོད། །བསོད་ནམས་ཡར་འགྲོ་ལ། །བསྟན་པ་དར་པ་ཨེ་རེད། །བདེ་སྐྱིད་ཕུན་སུམ་ཚོགས་བྱུང་། །ཞེས་པ་སོགས་གནས་ཀྱི་བཀོད་པ་དང་། དགེ་སྟག་སྤྲུལ་སྐུའི་ཡོན་ཏན་སོགས་བརྗོད་འདུག གཞས་ཚིག་གི་མཇུག་བྱང་དུ། བདེ་སྐྱིད་ཕུན་སུམ་ཚོགས་པ་བྱུང་། །ཞེས་པ་འདི་ཡང་དགེ་སྟག་གླིང་བསྲེ་སྤྲུལ་སྐུ་བློ་བཟང་བསྟན་འཛིན་གྲགས་པ་མཐའ་ཡས་ནས་སྦྱར་བའོ། །ཞེས་བྲིས་འདུག གལ་སྲིད་དགེ་སྟག་ཁོང་གིས་བྲིས་པ་ཡིན་ན། འདིའི་བསྟོད་ཡུལ་ནི་སྐུ་ཕྲེང་གོང་མ་དག་ཡིན་པའི་ངེས་པ་ཆེ་ལ། གལ་སྲིད་འདི་སྒྲིག་པ་པོ་དག་གིས་བསྣན་པ་ཡིན་ན། བསྟོད་ཡུལ་དེ་སྐུ་ཕྲེང་འདི་དང་གོང་མ་གང་ཡིན་ཡང་ཆོག་པ་ཞིག་འདུག གང་ལྟར་གཞས་ཚིག་འདི་སུས་སྦྱར་རུང་ནང་དོན་ལ་འགལ་བ་མི་འདུག་སྙམ། རྒྱུ་མཚན་ནི། དགེ་སྟག་སྤྲུལ་སྐུ་གོང་མ་དག་ཀྱང་ཕལ་ཆེར་བེ་རི་དགོན་དུ་བཞུགས་ཡོད་ཚོད་འདུག་ལ། བསྟོད་སའི་གནས་སམ་དགོན་ནི་དེ་རང་ཡིན་པ་དང་བསྔགས་ཡུལ་ཡང་དགེ་རྟགས་ཁོང་ཡིན། གཞས་ཚིག་འདི་ལྟ་བུ་ནི་སྟག་ཕུའི་ཨར་གཞས་ནང་མི་འདུག་པས་དམིགས་བསལ་དུ་བརྩི་ཆོག་སྙམ།

(བོད་ལྗོངས་སློབ་ཆེན་2022ལོའི་བོད་སྐད་ཡིག་དགེ་འོས་འཛིན་གྲྭ་གཉིས་པའི་གཡུ་ལོ་སྒྲོལ་མ། 2024ལོའི་བོད་ལྗོངས་སློབ་ཆེན་གྱི་སློབ་ཆེན་སློབ་མའི་ལས་གཏོད་རྣམ་གྲངས། རྣམ་གྲངས་ཨང་གྲངས། S202410694005)