དཔྱིད་ཀྱི་ཁ་བ།
ས་སྐྱིད་པོ་ཉི་མ་ལྷ་ས་ཞེས་གནའ་གྲོང་ལྷ་སར་བསྔགས་བརྗོད་ཀྱི་མེ་ཏོག་གཏོར་མཁན་ཧ་ཅང་མང་ལ། གང་དེའི་མཚན་སྙན་དྲི་བཞོན་བཞིན་འཛམ་གླིང་ས་ཕྱོགས་ཁག་ཏུ་རང་དགར་ཁྱབ་བཞིན་ཡོད།
ཁ་བ་ཐེངས་འགའ་བབས་རྗེས། གནའ་བོའི་གྲོང་ཁྱེར་གྱི་རི་ཀླུང་དག་ལ་བྱབས་ཁྲུས་ལན་མང་བྱས་པ་ལྟར་རྣམ་པ་གསར་རྐྱང་དུ་གྱུར་ཞིང་། དེས་ནག་ནོག་གི་དྲི་མས་མ་སྦགས་པའི་གངས་ཅན་ཁ་བའི་ལྗོངས་ཀྱི་སྒེག་ཉམས་མ་ལུས་སྐྱེ་བོའི་ཚོགས་ཀྱི་འདྲེན་བྱེད་ཀྱི་དགའ་སྟོན་དུ་གཤོམ་པ་ལྟར་སྣང་།
ཉིན་ཤས་བསྟུད་མར་ཁ་བ་སྐྱ་ཆིལ་ཆིལ་དུ་བབས་པས། ད་ནི་འཛིན་མའི་ལྟོ་བར་གནས་བཅའ་བའི་སྲོག་ལྡན་གྱི་སྐྱེ་དངོས་ཡོད་དོ་ཅོག་འཁྱགས་ལྟོགས་ཀྱིས་རབ་ཏུ་མནར་བར་དོགས་ནས། རྟ་བདུན་དབང་པོས་བར་སྣང་མཐོངས་ནས་ས་གཞི་ཆེན་པོའི་ལྟོ་བར་ཉི་མའི་འོད་ཀྱི་ཟེགས་མ་བྱེ་བ་ཕྲག་ཁྲིག་དུས་གཅིག་ཏུ་བྲན་པ་ལྟར་སྣང་།
མཁའ་དབྱིངས་ནས་དྲོད་འཇམ་ཉི་འོད་འཕྲོས་སྟབས། གྲང་ངད་ཀྱིས་ཡུན་རིང་མནར་བའི་སྐྱེ་དངོས་ཡོངས་ཀྱི་ལུས་ལ་བདེ་དྲོད་སྨྲ་མི་ཤེས་པ་ཞིག་སྦྱིན་པ་དང་། ཉི་མའི་ཚ་དྲོད་ཀྱིས་ཁ་བའི་བང་རིམ་རིམ་བཞིན་བཞུར་འགོ་བརྩམས།
བྱ་བྱེའུ་རྣམས་ལྗོན་པའི་གསེབ་ཏུ་བག་ཡངས་པོས་འཕུར་ལྡིང་བྱེད་ཅིང་། སླར་ཡང་ལྗོན་པའི་རྩེ་མོར་དལ་གྱིས་བབས་ཏེ་མགྲིན་པའི་རྫ་རྔ་བར་མེད་རྡུང་གིན་སྐད་སྙན་མང་དུ་སྒྲོག་བཞིན་ཡོད་པ་དང་། བྱེའུ་ཆུང་འཇོལ་མོས་ལྕང་གླིང་གྲུ་བཞིར་གྲེ་འགྱུར་ངོམ་བཞིན་ཡོད་པ་དེ་ནི་ལོ་གཅིག་གི་ཐོག་མར་གྱུར་པའི་དཔྱིད་ཀའི་ནམ་དུས་ཤར་སོང་ཞེས་ཀུན་ལ་བརྡ་གཏོང་བ་དང་ཨ་ན་མ་ནར་འཁུམས།