བྱིས་དུས་ཀྱི་སྣང་ངོར། ཕ་ཡུལ་ནི་སྐྱ་ཐེར་ཐེར་གྱི་གྲོང་པ་དང་། རྡོ་ཁང་སྨུག་པོའི་ཐོག་ཁ་ལས་འཕྱུར་བའི་སྔོ་ལྷོག་ལྷོག་གི་དུ་བའི་འཇའ་རིས་དེ་ཡིན་ཞིང་། སྐབས་དེ་དུས་སྲང་ཟུར་དུ་ཉི་མ་ལྡེ་བའི་ཡུལ་མི་སྤུན་མཆེད་ཚོས་བག་ཕེབས་ཀྱི་ལོ་ཟླའི་ལྷིང་འཇགས་ཁྲོད་དུ་བདེ་སྐྱིད་ལ་གཡབ་མོ་ཡང་ཡང་བྱེད།

ཕ་ཡུལ་དུ་རྩེད་འཇོར་རོལ་བའི་བྱིས་པའི་དགོད་སྒྲ་དང་ངུ་ངག་ཡོད་ལ། ཕ་ཡུལ་དུ་གཞོན་དུས་ཀྱི་གྲོགས་པོ་ཚོའི་ལྷད་མེད་ཀྱི་དམ་ཚིག་ཡོད། ཕ་ཡུལ་དུ་ཨ་མའི་བྱམས་བརྩེ་ཡི་འོད་སྣང་ཡོད་ལ། ཕ་ཡུལ་དུ་ཨ་ཕའི་རྒྱབ་གཟུགས་ཀྱི་མེ་ལོང་ཡོད།

ཕ་ཡུལ་ཞེས་པའི་ཡིག་འབྲུ་གཉིས་པོ་འདིར་བསམས་ན། ཕ་ཡུལ་ནི་ཆེས་ཤིན་ཏུ་ཆུང་ཆུང་ལྟ་བུ་ཞིག་ཏུ་སྣང་ཡང་། སྐྱེ་བོ་སུ་ཞིག་ཡིན་རུང་། རང་ཉིད་ཀྱི་ཕ་ཡུལ་ནི་ཆེས་མཛེས་སྡུག་ལྡན་པ་ཞིག་ཡིན་པ་སྨོས་ཅི་དགོས། དོན་ངོ་མར། ཕ་ཡུལ་ནི་ཤིན་ཏུ་ཆེན་པོ་ཞིག་སྟེ། ང་ཚོའི་བྱིས་དུས་ཀྱི་ཕྱིར་དྲན་ཡོངས་རྫོགས་གནས་དེར་ལུས་ཤིང་། ང་ཚོའི་ལང་ཚོའི་གོམ་སྟབས་གནས་དེ་ནས་སྤོ་འགོ་ཚུགས།

ཕ་ཡུལ་ནི་ངའི་ཚེ་འདིའི་ཆེས་ཐོག་མའི་གནས་མལ་དང་། ཆེས་མཐའ་མཇུག་གི་ཕྱི་མིག་འཕེན་ས་དེའང་ཡིན། ཕ་ཡུལ་དུ་ངའི་དགའ་ཤོས་ཀྱི་མི་ཡོད་ལ། ང་ལ་བརྩི་ཤོས་གནང་མཁན་གྱི་ཕ་མ་སྤུན་མཆེད་ཀྱང་ཡོད་པས། ཕ་ཡུལ་ནི་ངའི་གོམ་པ་དང་པོ་སྤོ་ཡུལ་དང་ངའི་ཕུགས་བསམ་གྱི་མྱུ་གུ་སྦྲུམ་སའང་ལོས་ཡིན།