འདི་ནི་བོད་ཀྱི་ལོ་ཆུང་བྱིས་པའི་གར་སྟེགས་འཁྲབ་གཞུང་གི་ལྷ་མོ་ཐོག་མ《དོན་ཡོད་དོན་གྲུབ》འཁྲབ་སྟོན་བྱ་ཡུལ་ཡིན་པ།

འདི་ནི་འཁྲབ་སྟོན་པ་ཆུང་ཆུང་ཞིག་གིས་རྔ་སྦུག་དཀྲོལ་བཞིན་པ།

འདི་ནི་བོད་ཀྱི་ལོ་ཆུང་བྱིས་པའི་གར་སྟེགས་འཁྲབ་གཞུང་གི་ལྷ་མོ་ཐོག་མ《དོན་ཡོད་དོན་གྲུབ》འཁྲབ་སྟོན་བྱ་ཡུལ་དུ་བློ་བཟང་རྣམ་རྒྱལ（གཡས་ཀྱི་གསུམ་པ）གྱིས་དོན་ཡོད་འཁྲབ་བཞིན་པ།

འདི་ནི་བོད་ཀྱི་ལོ་ཆུང་བྱིས་པའི་གར་སྟེགས་འཁྲབ་གཞུང་གི་ལྷ་མོ་ཐོག་མ《དོན་ཡོད་དོན་གྲུབ》འཁྲབ་སྟོན་བྱ་ཡུལ་ཡིན་པ།

འདི་ནི་བོད་ཀྱི་ལོ་ཆུང་བྱིས་པའི་གར་སྟེགས་འཁྲབ་གཞུང་གི་ལྷ་མོ་ཐོག་མ《དོན་ཡོད་དོན་གྲུབ》འཁྲབ་སྟོན་བྱ་ཡུལ་དུ་བློ་བཟང་རྣམ་རྒྱལ（གཡས）གྱིས་དོན་ཡོད་དང་བསྟན་འཛིན་སྨོན་ལམ་གྱིས་དོན་གྲུབ་འཁྲབ་བཞིན་པ།

འདི་ནི་བློ་བཟང་རྣམ་རྒྱལ（གཡོན་གྱི་དང་པོ）གྱིས་མཛེས་འཆོས་ཁང་དུ་རྣ་རྒྱན་འདོགས་བཞིན་པ།

འདི་ནི་འཁྲབ་སྟོན་མཇུག་འགྲིལ་རྗེས་འཁྲབ་སྟོན་པ་ཆུང་ཆུང་ཚོས་ནང་མི་དང་དྲན་རྟེན་པར་རྒྱག་བཞིན་པ།

འདི་ནི་ལྟད་མོ་བས་འཁྲབ་སྟོན་པ་ཆུང་ཆུང་ཚོའི་འཁྲབ་སྟོན་ལ་དགའ་བསུ་ཞུ་བཞིན་པ།

འདི་ནི་འཁྲབ་སྟོན་པ་ཆུང་ཆུང་ཚོས་གར་སྟེགས་འཁྲབ་གཞུང་གི་ལྷ་མོ་ཐོག་མ《དོན་ཡོད་དོན་གྲུབ》འཁྲབ་བཞིན་པ།

ཉེ་ཆར། བོད་ཀྱི་ལོ་ཆུང་བྱིས་པའི་ལྷ་མོའི་གར་སྟེགས་ཟློས་གར་ཐོག་མ་སྟེ《དོན་ཡོད་དོན་གྲུབ》དངོས་སུ་བོད་ལྗོངས་ལྷ་མོ་ཚོགས་པར་འཁྲབ་འགོ་ཚུགས་པ་རེད།

ཤེས་རྟོགས་བྱུང་བར་གཞིགས་ན། 2022ལོ་ནས་བཟུང་འཁྲབ་ཁྲིད་པས་ཚ་ཚ་འུར་འུར་གྱིས་འཁྲབ་མི་འདེམས་འགོ་ཚུགས་ཤིང་། བྱིས་པ་སྟོང་ཕྲག་ལྷག་ཙམ་གྱི་ཁྲོད་ནས་འཁྲབ་རྩལ་ཕུལ་དུ་བྱུང་བའི་བྱིས་པ་ཁ་ཤས་བདམས་ཡོད། ཁོ་ཚོས་གཟའ་མཇུག་ལ་བོད་ལྗོངས་མང་ཚོགས་སྒྱུ་རྩལ་ཁང་གི་ལས་ཞོར་ལྷ་མོའི་གཟབ་སྦྱོང་འཛིན་གྲྭར་བསྐྱོད་དེ་ལྷ་མོ་སྦྱངས་ནས་དུས་ཡུན་ཟླ་9ཙམ་སོང་། དེ་རྗེས་ས་ཕྱོགས་གང་སར་འཁྲབ་སྟོན་བྱེད་ཀྱིན་འཁྲབ་གཞུང་དང་འཁྲབ་རྩལ། གར་སྟེགས་ཇུས་འགོད་སོགས་མི་འདང་བའི་སར་འགྱུར་ལྡོག་དང་ལེགས་བཅོས་རབ་དང་རིམ་པ་བྱས་མཐར། 2024ལོར་རྒྱལ་ཁབ་སྒྱུ་རྩལ་ཐེབས་རྩའི་ལོ་འཁོར་གྱི་གར་སྟེགས་ཟློས་གར་ཆེ་གྲས་དང་བརྩམས་ཆོས་གསར་རྩོམ་གྱི་རོགས་དངུལ་རྣམ་གྲངས་ལ་ཚུད། 2025ལོའི་ཟླ་2ཚེས་11ཉིན་སླར་ཡང་རང་ལྗོངས་ཀྱི་གཟིགས་མོ་བའི་སྤྱན་ལམ་དུ་འབུལ་ཐུབ་པ་བྱུང་ཡོད།

གསར་བཞད་མེ་ཏོག་ཁྲ་ཆུང་།

《དོན་ཡོད་དོན་གྲུབ》》ཀྱི་འཁྲབ་མི་ཆུང་ཤོས་ལོ་5དང་ཆེ་ཤོས་ལོ་18ཡིན་པ་དང་། བྱིས་པ་ཆུང་ཤོས་དེའི་མིང་ལ་བསྟན་འཛིན་འཇིགས་བྲལ་ཟེར། བུ་དེ་ལྷ་མོ་སྦྱངས་ནས་ལོ་2ལྷག་ཙམ་སོང་ཡོད། གསར་འགོད་པས་ལྷ་མོར་དགའ་པོ་བྱེད་དོན་ཅི་ཡིན་ཞེས་འདྲི་སྐབས། བུ་དེས་སྤོབས་པ་དང་སྤྲོ་སྣང་ཆེན་པོས“སྐྱིད་པོ་འདུག”ཅེས་ལན་སྟབས་བདེ་ཞིག་བརྒྱབ་བྱུང་། བུ་དེའི་པཱ་ལགས་ཀྱིས“བུ་ལྷ་མོར་ཧ་ཅང་དགའ་པོ་བྱེད་ཀྱི་འདུག སློབ་གྲྭའི་དགེ་རྒན་གྱིས་ཀྱང་ཕྲུ་གུའི་དགའ་ཕྱོགས་གསོ་སྐྱོང་བྱེད་རྒྱུ་ནི་གལ་ཆེན་རེད་ཟེར་གྱི་འདུག་པས། དུས་རྒྱུན་ལས་ཀ་བྲེལ་བ་ཇི་ལྟར་ཆེ་ཡང་བུ་ལྷ་མོ་སྦྱོང་སར་སྐྱེལ་བར་འགྲོ་གི་ཡོད”ཅེས་བརྗོད།

སྤོ་བོ་ལགས་དང་རྨོ་བོ་ལགས་མཉམ་དུ་ནོར་བུ་གླིང་ཁར་ལྷ་མོའི་འཁྲབ་སྟོན་ལྟ་བར་འགྲོ་བ་དང་བརྙན་ལམ་ནས་ལྷ་མོ་ལྟ་རྒྱུར་དགའ་བ་སོགས་བྱིས་པ་ཚོ་ལྷ་མོའི་འཁྲབ་སྟོན་ལ་སྤྲོ་སྣང་ཆེན་པོ་སླེབས་དོན་ནི་ཁྱིམ་ཚང་གི་ཤུགས་རྐྱེན་བཟང་པོར་རག་ལས་ཡོད།

མཐུན་རྐྱེན་སྦྲང་ཆར་ཟིལ་མ།

ཟླ་2ཚེས10ཉིན། འཁྲབ་སྟོན་པ་ཡོངས་ཀྱིས་ནང་སྦྱོང་འཁྲབ་སྟོན་མཐའ་མ་དེ་བྱས། ཁོང་ཚོའི་སྐད་གདངས་དང་སྟངས་སྟབས་ལས་ཡིད་ཆེས་དང་སྤོབས་པའི་གདེང་ཚོད་ཁེངས་ཤིིང་། འཁྲབ་གཞུང་གི་ལྟ་སྐུལ་བ་དང་འཁྲབ་ཁྲིད་པ། ལས་མི་དང་ཁྱིམ་བདག་སོགས་ཀྱི་བྱད་བཞིན་ལས་རེ་བའི་འཛུམ་མདངས་འཕྱུར། བོད་ལྗོངས་ལྷ་མོ་ཚོགས་པའི་ཚོགས་གཙོ་དཔལ་ལྡན་དབང་ཕྱུག་ལགས་ཀྱིས་འཁྲབ་ཆས་གྱོན་སྟངས་དང་རྒྱབ་ལྗོངས་རོལ་དབྱངས་སྤྱོད་སྟངས་སོགས་བསླབས་པ་མ་ཟད། “ད་ཐེངས་ཀྱི་འཁྲབ་གཞུང་དེར་གོང་རིམ་ནས་ཚད་མཐོའི་མཐོང་ཆེན་གནང་གི་ཡོད་ལ་མི་དམངས་མང་ཚོགས་ཀྱིས་ཀྱང་དགའ་པོ་བྱེད་ཀྱི་ཡོད་པས། ཁྱེད་ཚོས་རེ་བ་ཆུད་ཟོས་སུ་གཏོང་མི་ཉན། ཚང་མས་རང་ནུས་ཡོད་རྒུས་འབད་འཐབ་བྱས་ནས་ཀུན་ལ་ངོམ་རིན་ཡོད་པའི་བྱས་རྗེས་ཤིག་འཇོག་རོགས”ཞེས་མངགས་བཅོལ་ཡང་ཡང་བྱས།

ད་ལོ་ལོ་37ལ་སླེབས་པའི་ཡོན་ཏན་ནོར་བུ་ནི་ད་ཐེངས་ལྷ་མོའི་འཁྲབ་གཞུང་གི་འཁྲབ་ཁྲིད་པ་རེད། ཁོང་ལྷ་མོ་སྦྱངས་ནས་ལོ་20ལྷག་ཙམ་སོང་ཞིང་། ཁོང་གིས། “ཐེངས་འདིའི《དོན་ཡོད་དོན་གྲུབ》ནི་ང་ཚོས་གསར་དུ་བསྒྲིགས་པ་ཞིག་ཡིན། བྱིས་པར་འཁྲབ་ཏུ་བཅུག་དོན་ནི་ཁོ་ཚོ་དང་འཁྲབ་གཞུང་ནང་གི་མི་སྣའི་ལོ་ཚོད་འཚམ་པོ་ཡོད་པས་ཡིན་ལ། 《དོན་ཡོད་དོན་གྲུབ》ནང་གི་གཅེན་གཅུང་དབར་གྱི་བརྩེ་བ་དང་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་རྣམ་པ་དག་ཕྲུ་གུ་བརྒྱུད་ནས་ཀུན་གྱི་སྤྱན་སྔར་བསྟར་ཐུབ་ཚེ། ཤུགས་རྐྱེན་བཟང་པོ་ཐོན་ཐུབ་པ་དང་ལྷ་མོའི་ཟློས་གར་རྒྱུན་འཛིན་དང་འཕེལ་རྒྱས་ལའང་ཕན་ཐོགས་ཡོང་གི་རེད་བསམ་གྱི་འདུག” ཅེས་བརྗོད།

ཕུལ་བྱུང་ངོ་མཚར་ལྟད་མོ།

ཟླ་2ཚེས་11ཉིན་གྱི་དགོང་མོའི་ཆུ་ཚོད་བདུན་དང་ཕྱེད་ཀར《དོན་ཡོད་དོན་གྲུབ》དངོས་སུ་འཁྲབ་འགོ་ཚུགས། འཁྲབ་རར་མི་ཚོགས་ཀྱི་འདུ་འཛི་ཆེ་བས། རྐུབ་སྟེགས་700ཡོད་པ་ཚང་མ་ཁེངས་ཏེ། མི་མང་པོ་ཞིག་ཐ་ན་ཟུར་གཉིས་ཀྱི་ས་སྟེང་དུ་སྐྱིལ་ཀྲུང་བཅས་ནས་བསྡད་འདུག

ལོ་ཆུང་བྱིས་པ་ཚོས་མི་རིགས་ཀྱི་རིག་གནས་ལ་འཛིན་པའི་རྣམ་འགྱུར་དང་། སྒྱུ་རྩལ་ལ་བཅངས་པའི་དགའ་ཞེན། དེ་བས་ཀྱང་འཁྲབ་འཁྱེར་དོད་པའི་སྟངས་སྟབས་དང་མགྲིན་ཁུག་སངས་པའི་སྐད་གདངས། རྣམ་རིག་སྐྱེན་པའི་གཞུང་སྲོང་ལུགས་བཅས་པའི་རྒྱུད་རིམ་རེ་རེ་ལས་རྒྱ་ཆེའི་གཟིགས་མོ་བ་རྒན་དར་གཞོན་གསུམ་ལ་ཕ་མེས་ཀྱི་ཤུལ་འཛིན་དང་རིག་གནས་ཀྱི་རྐང་འཛིན་དུ་གྱུར་བའི་ཁོང་ཚོའི་སྤོབས་སེམས་དང་རིག་གནས་ཀྱི་གདེང་ཚོད་མངོན་པར་བྱས་ལ། མངོན་མིན་རིག་གནས་ཤུལ་བཞག་ཡིན་པའི་བོད་ཀྱི་ལྷ་མོའི་རིག་གཞུང་གི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་དང་རིག་གནས་ཀྱི་གདེང་ཚོད་ཀྱང་གང་ལེགས་མངོན་ཡོད།