ཞེན་ཆགས་ཆེ་ལ། དུང་བ་ཟབ་པའི་ཁྱོད། འོ་ཆུ་བཞིན་འདྲེས་ལ། བསིལ་རླུང་ལྟར་འཇམ་ཞིང་། འཇའ་ཚོན་བཞིན་མཛེས་པའི་བརྩེ་བའི་སྲས་མོ། བློས་ཐུབ་ཀྱི་ལྷ་མོ་ལགས།

དོ་ནུབ། ངས་སྨིན་དྲུག་ལྟ་བུའི་བུ་མོ་ཁྱོད་རང་དྲན་ལ། ཁྱོད་ཉིད་གླེང་བཞིན་ཡོད། ཁྱོད་ལ་བཤད་ཐུབ་མེད་པའི་སྐད་ཆ་མང་པོ་ཞིག་ངས་རླུང་བུར་ལབ་ཅིང་ཆུ་མོར་རྗོད་བཞིན་ཡོད། ད་དུང་ས་གཞི་ལ་འཆད་ཅིང་ནམ་མཁའ་ལ་གློད་བཞིན་ཡོད། རི་རབ་དང་གཙང་པོས་བར་མཚམས་བཅད་པའི་འུ་གཉིས་ལ་ཐུག་འཕྲད་དཀོན་ཡང་། ཁེར་རྐྱང་གི་ང་རང་ཁེར་རྐྱང་མ་ཡིན་པའི་སྟོང་འདང་གི་འཇིག་རྟེན་ཞིག་ཏུ་འུ་གཉིས་ཀྱི་གཏམ་རྒྱུད་ལ་དྲན་གསོ་ཡང་ཡང་བྱེད་བཞིན་ཡོད། ཚིག་ཟུར་གྱི་རྨ་ཁ་རེ་རེ་དལ་གྱིས་གསོ་བཞིན་ཡོད།

Zལགས། རི་སྐེད་དང་ལ་སྟོད་ཀྱི་སྨུག་པ་མ་དྭངས་པའི་ཡར་སྔོན་དུ། ཆར་པ་འབབ་མཚམས་མ་བཞག་པའི་སྔ་རོལ་ཏུ། ངས་ཁྱོད་རང་ལྷག་ཏུ་དྲན་འོང་། ཡ་ཆུང་གཏིང་རིམ་ནས། གངས་དཀར་སེམས་ཁོང་ནས། ཁྲ་ཆུང་མིག་ཀོང་ནས། རུས་ལ་ཟུག་ཅིང་སྙིང་ཁར་ཐིམ་པའི་ཁྱོད་ཉིད་དུས་ངེས་མེད་དུ་དྲན་ཡོང་། ཡིད་ལ་བཞད་ཡོང་། ཁྱོད་ཀྱི་སྐྱེས་གཟུགས་ཚིགས་དྲུག་སྨྱུག་མ། མཛེས་སྡུག་གི་ཞལ་འཛུམ་དེ། ང་ཡི་དྲན་པའི་ངོས་ལ་ག་ལེར་ག་ལེར་གསལ་འོང་ལ། ཝ་ལེར་ཝ་ལེར་འཆར་ཡོང་།

Zལགས། མཇལ་འཛོམས་ཀྱི་ལས་སྐལ་ཕྲ་ཡང་། ཕན་ཚུན་མ་བརྗེད་པའི་ལོ་ཟླའི་ནང་། དྲན་གདུང་གིས་མནར་ཞིང་། རྫོགས་མི་ཚར་བའི་འཁྲེང་ཞེན་རིང་མོ་དག་ཕ་ཡུལ་གྱི་རི་རྩེར་བུད་ནས་རྒྱང་རིང་ཕྱོགས་ཀྱི་སྙིང་ཉེ་བའི་ཁྱོད་ལ་འཆད་འདོད། ཁྱོད་ཀྱི་ཕྱི་མིག་ལ་རེ་ལྟོས་བྱེད་ཕྱིར། ཡང་དང་བསྐྱར་དུ་ཁྱོད་ལ་ཀི་འབོད་གཏོང་འདོད།

Zལགས། སྒུག་མི་ཚར་བའི་རེ་སྒུག་ཁྲོད། བརྗེད་མི་ཐུབ་པའི་དུས་ཚིགས་ནང་། འུ་གཉིས་ཀྱིས་ལས་དབང་ལ་ཡིད་ཆེས་བྱེད་ཀྱིན་ཡུན་གྱིས་མཇལ་ཡོང་། སྙིང་དུ་སྡུག་ཅིང་ཡིད་དུ་འོང་བའི་ཁྱོད་དང་འུ་གཉིས་ཀྱི་ལས་དབང་གི་རྒྱུད་སྐུད་ཕྲ་མོ་མ་ཆད་པའི་བར། འུ་གཉིས་ལ་བདེ་སྐྱིད་ལྡན་ངེས། གཡང་གི་མཚོ་མོ་འཁྱིལ་ངེས། ཡིད་འོང་གི་སྲས་མོ། བརྩེ་དུང་གི་ལྷ་མོ་ལགས།