ཁ་བ་ཐེངས་ཤིག་བབས་རྗེས། དྲན་པའི་ཕྱི་ནང་གསང་གསུམ་སྒེའུ་ཁུང་གི་ཕྱི་རོལ་ན་འཕུར་ཞིང་ལྡིང་།

ཁ་བ་ཐེངས་ཤིག་ལྷབ་ལྷུབ་ཏུ་བབས་རྗེས། ཡོད་ཚད་ལྷིང་འཇགས་སུ་གནས་པའི་གྲོང་སྡེ་འདི། ཨ་མའི་ཐུ་འོག་ན་སད་མ་ཐག་པའི་བྱིས་པ་ཇི་བཞིན་ཡི་གར་འོང་།

རི་རྩེའི་དར་ལྕོག་དེ་ཡང་། གཙེས་དྲགས་ཏེ་རྩབ་ཧྲལ་དུ་སོང་བའི་སེམས་པ་འདི་བཞིན། ཁ་བའི་ལྷིང་འཇགས་ཁྲོད་ཅི་ཡང་འགུལ་རྒྱུ་མི་འདུག ཞོགས་པའི་ཁ་བ་འདི་མི་ཞིག་གི་མི་ཚེའི་ནང་སྣང་འཇོག་བྲལ་བའི་རབ་བྱེད་ཐུང་ངུ་ཞིག་ཡིན་ཆོག་ན། མི་ཚོགས་ཀྱི་བཞུར་རྒྱུན་གསལ་བའི་ཞབས་རྗེས་དེ་དག འཚོ་བའི་ཁ་དོག་གསལ་བའི་རི་མོ་ཙམ་ཞིག་ལས་འོས་པ་མེད།

ཁ་བ་ནི་ཁ་བ་རང་རེད། བརླན་ཞིང་གཤེར་བའི་གྲུབ་ཚུལ་གཞན་ཞིག་ལས་ཅི་ཡང་མ་རེད། ཁ་བ་ནི་ཁ་བ་མ་རེད། སེམས་ཀྱི་ཕྱི་ནང་འགྲེལ་ཐུབ་པའི་མེ་ལོང་གཞན་ཞིག་རེད། ཚངས་དབྱངས་རྒྱ་མཚོས་ས་སྲོད་ཀྱི་དྲན་པ་བཤགས་ཏེ་བྱམས་པ་བཙལ་མྱོང་བའང་། ཁ་བས་སེམས་ཀྱི་ཕྱི་ནང་རི་མོར་འགྲེལ་བ་ཙམ་རེད།