དབུ་ཤོག>བོད་ཀྱི་རིག་གནས།>བོད་ཀྱི་རྩོམ་རིག
  • ལོ་གསར།

  • ཡོང་ཁུངས།  ཀྲུང་གོའི་བོད་ཀྱི་གསར་འགྱུར་དྲ་བ།   |     རྩོམ་པ་པོ།  བུ་ཚེ་རིང་རྒན་པ།   |     སྤེལ་དུས།  2025-02-28

    ལོ་གསར་ནི་དུས་ཀྱི་གོམ་འགྲོས་ཀྱིས་འཇལ་བའི་ལམ་ཚད་ཀྱི་རྡོ་རིང་ཞིག་དང་། དུས་བཞིའི་འཁོར་ལོས་བསྐོར་བའི་མི་ཚེའི་རྐང་རྗེས་ཙམ་ལས། འཚོ་བའི་ལྗིད་ཚད་དང་ཚེ་སྲོག་གི་རིན་ཐང་གཞལ་བའི་རྒྱ་སྲང་མ་རེད་ལ། མི་ཚེའི་ཀྱོག་མཚམས་དང་ལས་དབང་གི་ཁ་ལོ་སྒྱུར་སའི་ལམ་མདོ་ཁ་དེ་བས་ཀྱང་མ་རེད།

    ལོ་གསར་ནི་བྱིས་དུས་སུ་རྨིས་པའི་རྨི་ལམ་མཚར་པོ་ཞིག་སྟེ། གཟབ་མཆོར་དང་ཁ་ཟས་ལ་སྒུག་པའི་ཉིན་རེའི་མཛུབ་རྩིས་དེ་དང་། ཉི་ཤུ་དགུ་ཡི་དགུ་ཐུག་དང་ཤོག་སྦག ཚེས་པ་གཅིག་གི་ཆང་སྐོལ་དང་ལུག་མགོ ད་དུང་རྩེད་རའི་ནང་གི་ཨ་ཅུག་དང་ཐེ་པེད་དེ་རེད་ལ། ལོ་གསར་ནི། བྱིས་པའི་ལུས་ལ་མཛེས་པའི་གཟབ་མཆོར་དང་། བྱིས་པའི་ཁ་ལ་ཞིམ་པའི་ཀ་ར་དང་བུ་རམ། བྱིས་པ་རྩེད་འཇོར་རོལ་བའི་དགའ་སྣང་དང་སྐྱིད་སྣང་དེ་དང་། ན་གཞོན་ཤོ་རྩེད་ལ་འཇུག་པའི་ཤོ་བཤད་སྙན་མོ། ན་གཞོན་དགའ་སྟོན་ལ་རོལ་བའི་ཆང་གཞས་སྙན་མོ། རྒན་རྒོན་གཏམ་གླེང་ལ་འཇུག་པའི་ཧ་ཧ་དང་ཧུ་ཧུ། ཨ་ཕ་གྲལ་མགོར་ལྷོད་ཀྱིས་བཞུགས་པའི་ཉམས་བཟང་དེ་དང་། ཨ་མ་ཞལ་ལག་གཡོས་སྦྱོར་ལ་བྲེལ་བའི་འཚུབ་ཆ་དེ་རེད།

    ཆུང་དུས་སུ། ལོ་གསར་ནི་འཆར་དཀའ་བའི་ཐག་རིང་གི་འཇའ་ཚོན་སྣ་ལྔ་དེ་ཡིན་པས། ཡིད་འོང་གི་འཇའ་ཚོན་དེ་འཆར་རྒྱུར་རེ་སྒུག་ཡང་ཡང་བྱེད་མྱོང་ལ། ཐལ་རྩེད་དང་འཁྱག་རྩེད་ཁྲོད་དུ། ལུས་ཀྱི་གཟབ་མཆོར་སྣུམ་པོ་རྐུབ་བརྡོལ་ལ་བཏང་མྱོང་། སྐྱིད་པའི་ལོ་གསར་ཉིན་མོར་ཁ་ཟས་དང་རྩེད་ཆས་བརྗེ་མྱོང་ལ། ལྐོག་ཏུ་ཆང་ལ་རོལ་ནས་སྐྱུག་པའི་འདམ་ལ་དིམ་མྱོང་། རྩེད་མོ་སྐྱིད་རང་དྲགས་ནས་ཉིན་གང་བཀྲེས་ལྟོགས་ལ་སྡོད་མྱོང་ལ། བྱིས་པ་ཕན་ཚུན་འཐབ་ནས་ཁ་ཆག་སྣ་རལ་ཡང་བཟོ་མྱོང་། བྱིས་པ་ཕན་ཚུན་འཐབ་སྟེ་མི་རྒན་འཁྲུག་རྩོད་ལ་སྦྱར་མྱོང་ལ། གཞས་དང་ཞབས་བྲོ་འཁྲབས་ཏེ་གཞན་གྱིས་མཐེ་བོང་ཡང་བསྒྲེངས་མྱོང་། དེ་ནི་ལོ་གསར་རེད། ང་ཚོའི་བྱིས་དུས་ལ་དབང་བའི་ཐུན་མོང་གི་དྲན་ཤེས་དང་། མི་ཚེའི་ཡིད་ངོར་བཞད་པའི་དྲན་ཤེས་ཀྱི་མེ་ཏོག་རེད།

    ལོ་གསར་ནི་ལོངས་སྤྱོད་ལ་རེ་བའི་སེམས་ཀྱི་འདུན་པ་དང་། མ་འོངས་ལ་ཕྱོགས་པའི་ཕུགས་བསམ་གྱི་རི་མོ་རེད། ལོ་གསར་གྱི་དུས་སུ་ནམ་རྒྱུན་མེད་པའི་ཞལ་ཟས་ཞིམ་པོ་ཟ་ཆོག་ལ། རྒྱུན་དུ་མེད་པའི་གཟབ་མཆོར་མཚར་པོ་སྤྲས་ཆོག་པ་མ་ཟད། སླེལ་པོ་དང་དཔེ་ཁུག་རིང་དུ་དོར་ཏེ། ཆུང་གྲོགས་སམ་རྩེད་གྲོགས་ཚོ་དང་མཉམ་དུ། ལུས་སེམས་དལ་པོས་ཉིན་གང་རྩེད་འཇོར་རོལ་ཆོག

    ན་སོ་རྒས་དུས། ལོ་གསར་ནི་ལོ་གསར་མིན་པའི་ལས་གསར་རེད། འདས་སོང་ལོ་ཟླར་འཕེན་པའི་ཕྱི་མིག་རེད། མཚར་སྡུག་ལང་ཚོར་ཤོར་བའི་ཞེན་ཆགས་རེད། སྤུན་མཆེད་མཉམ་དུ་འཛོམས་པའི་རྟེན་འབྲེལ་རེད། ལུས་ལ་ན་ཚ་མེད་པའི་བཀྲ་ཤིས་རེད། ན་ཆུང་བྱིས་པའི་རྩེད་ར་གྲུ་བཞི་རེད། ན་གཞོན་ཕོ་མོའི་ལང་ཚོའི་ཐེམ་སྐས་རེད། རྒད་པོ་རྒད་མོའི་མི་ཚེའི་ཉམས་མྱོང་རེད། འདས་སོང་ལམ་བུར་བཀོད་པའི་རྫོགས་ཚིག་རེད། མ་འོངས་ལམ་ལ་ཕྱོགས་པའི་སྟ་གོན་རེད།

    ལོ་གསར་ནི། ཤིས་ཚིག་དང་རྟེན་འབྲེལ་མང་བའི་ནམ་དུས་ཤིག་དང་། བཀྲ་ཤིས་གཡང་རྟེན་གྱི་མཛོད་སྒོ་འབྱེད་པའི་ལྡེ་མིག་རེད་ལ། ལོ་གསར་ནི་འདས་སོང་ལ་ཕེབས་སྐྱེལ་དང་མ་འོངས་ལ་བསུ་བ་ཞུ་བའི་དུས་ཚིགས་བཟང་པོ་ཞིག་རེད།

    འགན་འཁུར་རྩོམ་སྒྲིག་པ། བདེ་སྐྱིད་བུ་ཁྲིད།

མཉམ་སྤྱོད།

འབྲེལ་ཡོད་གསར་འགྱུར།