གསར་འགོད་པས་འབྲེལ་ཡོད་སྡེ་ཚན་ནས་ཤེས་རྟོགས་བྱས་པར་གཞིགས་ན། 2024ལོ་ནས་བཟུང་། རང་ལྗོངས་ཀྱིས་རིག་གནས་ཤུལ་བཞག་བེད་སྤྱོད་གསར་གཏོད་ལ་སྐུལ་འདེད་བཏང་བས་ཕོ་བྲང་པོ་ཏ་ལ་དང་། ནོར་བུ་གླིང་ཁ། བོད་ལྗོངས་རྟེན་མཛོད་ཁང་སོགས་གཙོ་གནད་རིག་གནས་རྟེན་མཛོད་ཚན་པར་ལྟ་སྐོར་བྱེད་མཁན་མི་ཐེངས་ཁྲི་320ལྷག་ཙམ་དང་། སྒོ་འཛིན་གྱི་ཡོང་འབབ་སྒོར་དུང་ཕྱུར་1.86ལྷག་ཙམ་ཟིན་ཏེ་ལྗོངས་ཡོངས་ཀྱི་ཐུན་མོང་མ་ཡིན་པའི་རིག་གནས་ཀྱི་ལེགས་ཆ་སྔར་བས་མངོན་ཡོད།

དེ་དང་ཆབས་ཅིག རང་ལྗོངས་ཀྱིས《རིག་དངོས་ཀྱི་དོན་གོ་ཆོད་དུ་བཅུག་ནས་ཀྲུང་ཧྭའི་རིག་གནས་ཀྱི་ཤུགས་རྐྱེན་ཆེ་རུ་གཏོང་བའི་སྐོར་གྱི་བོད་རང་སྐྱོང་ལྗོངས་ཀྱི་ལག་བསྟར་བསམ་འཆར》སོགས་ཀྱི་ཡིག་ཆ་སྔ་རྗེས་སུ་བཏོན་ནས་རྒྱལ་ཡོངས་ཀྱི་རིག་དངོས་ཡོངས་ཁྱབ་ཞིབ་བཤེར་ཐེངས་བཞི་པའི་ལས་དོན་ལ་སྐུལ་འདེད་ཏན་ཏིག་བཏང་བས། རིག་དངོས་ས་ཚིགས་3648ཀྱི་བརྟག་དཔྱད་ཐོ་འགོད་ལས་དོན་ལེགས་གྲུབ་བྱུང་བ་རེད། “ཡོངས་བཤེར་གསུམ་པའི”གཏན་འཇགས་རིག་དངོས་ས་ཚིགས་3511ལ་བསྐྱར་ཞིབ་ལེགས་གྲུབ་བྱས་པ་དང་། བརྟག་དཔྱད་བྱས་ནས་རིག་གནས་ཤུལ་བཞག་ས་ཚིགས་2062གསར་དུ་རྙེད་པ་རེད། མངའ་རིས་ས་ཁུལ་གྱི་རྫོང་7གྱི་ས་ཚིགས་70（ཁག་2158）དང་དེ་བཞིན་ཉིང་ཁྲི་གྲོང་ཁྱེར་གྱི་རྫོང་3གྱི་ས་ཚིགས་6（ཁག་377）གི་རིམ་ཁག་རིག་དངོས་སྲུང་སྐྱོབ་ཚན་པའི་ཉར་ཚགས་བྱས་པའི་སྤོ་རུང་རིག་དངོས་ཐོ་འགོད་ཡིག་ཚགས་བཟོ་བ་དང་ཆད་ལྷག་ཞིབ་བཤེར་དང་གསབ་པའི་ལས་དོན་ལེགས་གྲུབ་ཟིན་ཡོད། ལྗོངས་ཡོངས་ཀྱི་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོབ་ཚན་པ་70དང་རང་སྐྱོང་ལྗོངས་རིམ་པའི་རིག་དངོས་སྲུང་སྐྱོབ་ཚན་པ་518ཀྱི་ཚད་གཉིས་འབྱེད་པའི་ཐིག་ལེན་རིས་འབྲིའི་གྲུབ་འབྲས་ཞིབ་བསྡུར་ལེགས་གྲུབ་བྱུང་ཡོད། རིམ་རྩིས་བརྒྱབ་ན། གནའ་དཔེ་ཉར་ཚགས་ཚན་པ་1160དང་མི་སྒེར་གྱི་གནའ་དཔེ་པོ་ཏི་ཁྲི་1.8ལྷག་ཙམ་གྱི་ཐོ་འགོད་ལས་དོན་ལེགས་གྲུབ་བྱུང་བ་དང་། གནའ་དཔེ་ཚད་ལྡན་པོ་ཏི་587གྱི་གྲངས་འཛིན་ཅན་གྱི་ལས་དོན་ལེགས་གྲུབ་བྱུང་ཡོད། ལྗོངས་ཡོངས་ཀྱི་ཡུལ་སྐོར་ཐོན་ཁུངས་ཡོངས་ཁྱབ་ཞིབ་བཤེར་ལ་གོ་རིམ་ལྡན་པའི་སྒོ་ནས་སྐུལ་འདེད་བཏང་སྟེ། ཡུལ་སྐོར་ཐོན་ཁུངས་51228ལ་ཡོངས་ཁྱབ་ཞིབ་བཤེར་བྱས་པ་མ་ཟད། རིམ་ལྔའི་ཡུལ་སྐོར་ཐོན་ཁུངས་959ལ་ཐོག་མའི་ངོས་འཛིན་བྱས་པ་རེད།