ཉི་འོད་སྣུམ་པའི་ཟེར་མདངས་འཕྲོ་ས། །

ལྗང་ལོ་གཡུ་ཡི་འདབ་ལོ་བསྙིལ་ས། །

ཕ་ས་ཕ་ཡུལ་བདེ་ལྡན་ཡུལ་གྱི། །

འདས་དང་ད་ལྟའི་སྒལ་གཤོངས་ཡངས་པ། །

ལོ་ཟླའི་ཁུར་པོས་ཡང་ཡང་བརྙས་ཀྱང་། །

གནག་སྣུམ་སྐྲ་ལོའི་ཚོན་མདངས་འགྱུར་ཡང་། །

ལྡབ་ལྡིབ་སྨྲ་ལྕེའི་གོམ་འགྲོས་འཁྱོར་ཡང་། །

རྒན་རྒོན་ཚེ་མཇུག་བདེ་བར་རོལ་ས། །

ང་དང་ཁྱོད་ཅེས་ཞེ་འཁོན་དབེན་ཞིང་། །

མཁྲེགས་འཛིན་རྨོངས་པའི་རྣམ་རྟོག་མེད་པའི། །

འགྲོ་དྲུག་སེམས་ཅན་བརྩེ་བས་སྐྱོང་ས། །

ཕ་ས་ཕ་ཡུལ་བདེ་ཅན་ཞིང་ཡིན། །

ཡར་ན་ལྷ་ཞེས་སྐྲག་དོན་མི་འདུག །

ཕར་ན་བཙན་ཞེས་དངངས་དོན་མེད་འདི། །

འབྱོར་འབྲིང་འཚོ་བའི་གྲུ་ཟུར་འདི་ན། །

གཞས་དང་ཞབས་བྲོའི་འདུ་ལོང་འཁྲུག་པ། །

སྒྲོ་འདོགས་ཐན་པའི་ལོ་ཏོག་སྐམ་ས། །

སྐུར་འདེབས་ཤྭ་འོད་ཆུ་ལོག་འཇགས་ས། །

གཡའ་དག་སྔོ་བསངས་ནམ་མཁའི་མཐོངས་ནས། །

སྦྲང་ཆར་ཟིལ་མའི་འཛུམ་མདངས་བཀྲ་ས། །

ཡོད་ཡོད་བརྒྱ་ཡི་བྲོ་གར་འཁྲབ་ས། །

ཕྱོགས་བཞིའི་སྐུ་མགྲོན་གཅིག་ཏུ་འཛོམས་ས། །

ཆུ་ནང་ཉ་མོ་ཆུ་ཁར་འཕྱོ་བའི། །

གནས་སྐབས་འདི་ཡི་སེམས་པ་གསོ་རོགས། །

ཡིད་ཀྱི་སྡོང་པོར་བསེར་རླུང་ལྡང་བས། །

སེམས་ཀྱི་འདབ་ལོ་ལྷབ་ལྷུབ་གཡོས་སོང་། །

འཚོ་བ་གསར་པའི་སྦྲང་ཆར་བབས་པས། །

བདེ་སྐྱིད་མེ་ཏོག་བྲོ་གར་ལྡེམ་སོང་། །