སྐུད་མེད་དྲ་བའི་ལམ་ནས། །

ལས་ཀྱིས་ཐུག་འཕྲད་བྱུང་བའི། །

རྒྱང་རིང་སྙིང་གི་བུ་མོར། །

སྙིང་གཏམ་ཚིག་གསུམ་ཞུས་ཡོད། །

བར་ཐག་རི་ཆུས་ཆོད་པས། །

མཇལ་འཛོམས་གོ་སྐབས་ཉུང་རུང་། །

དུང་ཞེན་ཡིད་ཀྱི་ཐག་པས། །

ཁྱོད་དང་རྟག་ཏུ་སྦྲེལ་ཡོད། །

སེམས་པ་ཁྱོད་ལ་ཤོར་ཤོར། །

སུ་དང་གང་ལ་མ་ཤོར། །

ཁྱོད་ཀྱི་བརྩེ་སེམས་དྭངས་མ། །

ང་ལ་ཐོབ་ན་བསམ་བྱུང་། །

མིག་ཟུང་ཁྱོད་ལ་འཁོར་འཁོར། །

སུ་དང་གང་ལ་མ་འཁོར། །

ཁྱོད་ཀྱི་ལང་ཚོའི་མེ་ཏོག །

ང་ལ་དབང་ན་བསམ་བྱུང་། །

ང་རང་ཐོས་བསམ་སླད་དུ། །

ཁྱོད་དང་གཤིབ་སྐལ་བྲལ་ཡང་། །

ཁྱོད་ལ་འཁྲེང་བའི་སེམས་པ། །

ནམ་ཡང་འགྱུར་བ་མེད་སོང་། །

སློབ་གཉེར་ལམ་བུར་ཞུགས་ནས། །

ཤེས་རིག་མེ་ཏོག་བཏུས་ཡོད། །

བརྩེ་སེམས་ཟླ་འོད་ཟེགས་མ། །

ཁྱོད་ཀྱི་ཕྱོགས་སུ་གཏོར་ཡོད། །

ང་ཡི་འཚོ་བའི་ཁྲོད་དུ། །

ཅི་ཡང་མེད་ན་ཆོག་མོད། །

ཡིད་སེམས་མདའ་མོ་ཤོར་སའི། །

ཁྱོད་རང་མེད་ཐབས་མི་འདུག །

མངོན་སུམ་མིག་གི་དབང་པོས། །

ཁྱོད་རང་མཐོང་ཐབས་མེད་ཀྱང་། །

སྒྱུ་འཕྲུལ་རྨི་ལམ་གཞུང་ནས། །

ཁྱོད་དང་མཇལ་བར་ཤོག་ཅིག །