ས་ཡོམ་དང་འབྲེལ་བའི་སེམས་འགྱུ་ཐན་ཐུན།
ས་ཡོམ་རྗེས་ཀྱི་དིང་རི་དང་ལྷ་རྩེའི་སྤུན་ཟླར་ཕུལ།
སྐྱོ་གདུང་གི་སྨྲེ་སྔགས།
ཞོགས་པའི་གསེར་མདངས་བཀྲ་བའི་ཉི་འོད་ཀྱང་། །
མོག་པོར་བསྒྱུར་བའི་ས་གཡོའི་ཐལ་རྡུལ་གྱིས། །
དིང་རིའི་ཡུལ་གྲུ་བསྣུབས་ཉེའི་ལྟས་ངན་དེ། །
མངོན་ཤེས་དབེན་པའི་བདག་ཅག་ཅིས་མི་སྐྱོ། །
ཁྱད་ཆོས་ལྡན་པའི་ཁྱིམ་གཞིས་གྲོང་གི་སྡེ། །
དྲག་ཤུལ་ས་གཡོས་ལན་འགའ་སྐྱོམ་པ་ཡི། །
བྱ་ཚང་བྱེའུ་ཚང་འཐོར་བ་ཇི་བཞིན་དེས། །
ཀུན་གྱི་མིག་ཟུང་ཡིད་གདུང་མཆི་མས་བཀང་། །
ཁང་པ་བརྡིབས་ཏེ་ས་རྡོའི་ཕུང་པོར་གྱུར། །
རིན་བྲལ་ཚེ་སྲོག་སྐད་ཅིག་ཉིད་ལ་ཤོར། །
ཚེ་གང་བསགས་པའི་ནོར་རྫས་ཇི་སྙེད་ཅིག །
ཕྱེ་མར་བདལ་ཏེ་ཟོག་རོའི་ཕུང་པོར་གྱུར། །
ས་རྡོས་གནོན་པའི་མི་ཡི་ཚེ་སྲོག་ཉིད། །
འགའ་རེ་གྲོངས་ཤིང་འགའ་རེ་འཆི་མ་གསོན། །
དབུགས་རྒྱུ་ཆད་ལ་ཉེ་བའི་གདུང་བ་དེ། །
རྣ་བས་ཐོས་པ་ཙམ་གྱིས་སྙིང་ཁ་གཙེས། །
ས་གཡོའི་དབང་ཤེད་བཙན་པོས་སྐར་ཆ་འགར། །
བཟའ་ཚོ་མ་བུ་ཁ་འཕྲལ་ཡ་ང་བའི། །
བརྙན་ལམ་རེ་རེ་མིག་ངོར་འཆར་བ་ཡིས། །
ཀུན་གྱི་སེམས་པ་གདུང་བས་བཟོད་བསྲན་དཀའ། །
མནོ་བསམ་ཅི་ཡང་དབེན་པའི་གནག་ཕྱུགས་དག །
གཟན་རྩྭ་ཁ་ཡིས་ཟ་བའི་ལས་རྫོགས་སམ། །
ས་རྡོའི་ཁུར་གྱིས་མནན་ཏེ་དབུགས་ཆད་པའི། །
བེམ་པོའི་གཟུགས་སུ་གྱུར་པ་ཅིས་མི་སྐྱོ། །
རང་ཁ་རང་གསོ་གཡང་དཀར་མ་མོའི་ཁྱུ། །
བལ་འཇམ་སྐྱེས་སུ་འབུལ་བའི་དྲིན་ཆེན་ཚོགས། །
ཉི་གཞོན་འཆར་ཁར་ས་ཡོམ་འཇིགས་པ་ཡིས། །
ལུག་ར་ཕུང་པོས་བཀང་དེ་ཅིས་མི་སྐྱོ། །
མིག་ཟུང་གར་བལྟས་ཁང་ཁྱིམ་ཞིག་རོ་མངོན། །
རྣ་བ་གར་གཏད་སྨྲེ་སྔགས་འཆོར་བའི་སྒྲ། །
ཡིད་ལ་སྤུན་ཟླར་བརྩེ་བའི་དུང་སེམས་འཆར། །
ལྷག་བསམ་སྙིང་རྗེའི་སྤུ་ལོང་མི་གཡོ་སུ། །
བཟློག་པར་དཀའ་བའི་རང་བྱུང་གནོད་འཚེ་ཡིས། །
གནས་སྐབས་འཚོ་བའི་ལུས་སྲོག་རིན་པོ་ཆེ། །
བཙན་གྱིས་ཕྲོགས་པའི་སྙིང་ཉེ་སྤུན་ཟླ་ཚོ། །
བདེ་བར་གཤེགས་ཤིག་འདས་མཆོད་སྨོན་ལམ་ཞུ། །
མྱུར་སྐྱོབ་ཀྱི་ངར་ཤུགས།
ས་གཡོའི་འཇིགས་པ་འཕྲད་པའི་མི་སྙན་གཏམ། །
སྐད་ཅིག་ཉིད་དུ་ཕྱོགས་བཞིར་ཁྱབ་པའི་ཚེ། །
སྤྱི་ཁྱབ་ཧྲུའུ་ཅིའི་ཐབས་མཁས་མཛད་བཟང་ལས། །
མྱུར་སྐྱོབ་བཀའ་སློབ་ཀྲུང་ཧྭའི་ཁྱོན་ལ་བསྒྲགས། །
མྱ་ངམ་ཐང་དང་སྐྱ་བོའི་རི་འདབས་སུ། །
གེགས་བར་རླུང་བུ་དྲག་ཏུ་འཚུབ་གྱུར་ཀྱང་། །
སྐར་ལྔའི་དར་དམར་རང་མདངས་བཀྲ་བའི་འོག །
གེགས་སེལ་གུང་ཁྲན་ཏང་མིའི་གདོང་མཆོང་བརྗིད། །
ལེ་དབར་ཁྲི་ཚོ་བརྒྱ་སྟོང་ཆོད་པ་ཡི། །
རྒྱལ་ཡོངས་མི་དམངས་སྒེར་སེམས་བྲལ་དང་ལྷན། །
བདེ་སྡུག་མཉམ་དུ་མྱོང་བའི་བྱ་སྤྱོད་ཀྱིས། །
གེགས་སེལ་ལེགས་སྐྱེས་ཕུལ་མཁན་བགྲང་ལས་འདས། །
བཀྲེས་སྐོམ་གྲང་འཁྱག་ཅིས་ཀྱང་ཞུམ་དཀའ་བའི། །
ཉེན་རྟོག་དཔོན་དམག་ལས་རིགས་སྣ་ཚོགས་པ། །
དཔུང་ཆེན་གཅིག་མཇུག་གཉིས་མཐུད་ཡོམ་ཁུལ་གྱི། །
མི་ཁྲི་སེམས་གཅིག་སྟོབས་ཤུགས་འགྲན་ཟླ་བྲལ། །
ས་རྡོས་ཡོངས་སུ་མནན་པའི་ཉམ་ཐག་ཚོ། །
དྲོན་མོའི་པང་དུ་བཏབ་སྟེ་སྐྱོབ་བཅོས་ཀྱི། །
མི་ཡུལ་བརྩེ་སེམས་ཟབ་མོ་འདི་ལྟ་བུ། །
ཀྲུང་ཧྭ་མི་རིགས་སྲོལ་རྒྱུན་བླ་ན་འཕགས། །
མེས་རྒྱལ་སྐྱེད་མའི་བུ་ཕྲུག་ང་དྲུག་ཚོགས། །
གཅིག་སེམས་གཅིག་སྦྲེལ་སྤུན་ཟླའི་འདུ་ཤེས་ཉིད། །
གང་མཁོ་ཅི་ཡོད་འཇུངས་པ་བྲལ་བ་ཡི། །
གནོད་འཚེའི་ཁུལ་དུ་འདྲེན་པས་མི་སེམས་འགུལ། །
རྒྱ་བོད་ཧུད་རིགས་ཤིན་ཅང་ལ་སོགས་ཀྱིས། །
ལག་གདང་དཔུང་སྦྲེལ་ཕྱི་གོས་ནང་ཟས་ཐད། །
མཁོ་དགུ་མ་ལུས་སྦྱིན་པའི་ལས་བཟང་དག །
སྤུན་ཟླ་བརྩེ་སེམས་ཟབ་མོའི་མཚོན་བྱེད་དངོས། །
རྒྱབ་རྟེན་ས་འཛིན་ཇི་བཞིན་བརླིང་བ་ཡི། །
སྟོབས་ལྡན་ཀྲུང་གོ་ནམ་ཡང་མི་འགྱུར་ཕྱིར། །
འབྱུང་བཞིའི་གནོད་འཚེ་བགེགས་བར་ཅི་འཕྲད་རུང་། །
འཇིགས་དངངས་མི་དགོས་ཀུན་སེམས་ལྷོད་ལ་བབས། །
ས་གཡོས་རི་སྒུལ་མཚོ་སྐྱོམ་ཇི་ལྟར་ཡང་། །
གཉའ་རུས་མི་ཆག་གདོང་མཆོང་དཔུང་ལེན་གྱི། །
མི་སེམས་དབང་མེད་འགུལ་བའི་འཐབ་རྩལ་དེས། །
ཀྲུང་གོའི་སྟོབས་ཤུགས་མྱུར་ཚད་དཔང་པོ་བྱེད། །
མེ་ཟོན་ཉེན་རྟོག་བཅིངས་འགྲོལ་དཔུང་སྡེ་དང་། །
གོས་དཀར་ལྷ་རྗེ་ལས་རིགས་གྲངས་མང་གིས། །
སྲོག་བསྡོས་སྒོ་ནས་མྱུར་སྐྱོབ་དཔུང་སྒྲིལ་དེ། །
བྱས་རྗེས་རྡོ་རིང་བཞེངས་པའི་རྩོལ་ཤུགས་དངོས། །
མ་འོངས་པའི་དཔྱིད་དཔལ།
འཇིག་རྟེན་བདེ་སྡུག་ཁོད་སྙོམས་མ་ཡིན་གྱི། །
གྲང་གསུམ་དྲོ་གསུམ་སྐྱིད་སྡུག་རེས་འཁོར་ཉིད། །
ལྡོག་མེད་འཁོར་བའི་ཆོས་ཉིད་ཡིན་གྱུར་ན། །
གེགས་ཁུལ་དམངས་རྣམས་ཡིད་སེམས་མ་སྐྱོ་རོགས། །
སྟོབས་ལྡན་ཀྲུང་ཧྭ་རྒྱལ་ཁབ་ཆེན་པོ་འདི། །
མི་རྒྱུ་གཉིས་ཕོངས་གཏན་ནས་མ་ཡིན་ཕྱིར། །
ཁྱིམ་གཞིས་བསྐྱར་སྐྲུན་ཐོན་སྐྱེད་སླར་གསོ་བའི། །
མཁས་མཛངས་འཐབ་ཇུས་མྱུར་དུ་འགོད་པར་བྲེལ། །
ཏང་དར་རྒྱལ་དར་དམག་དར་དིང་རིར་གཡོ། །
གོང་འོག་སེམས་པ་རྡོག་རྩ་གཅིག་ཏུ་བསྒྲིལ། །
རྡུལ་འཚུབ་ཀློང་གི་ཞིག་རོའི་ཁང་ཤུལ་དུ། །
འཆར་འགོད་གསར་པའི་པིར་རིས་འགོད་བཞིན་མཆིས། །
ལོ་ཟླ་གསར་པའི་དུས་བཞིའི་ཐོག་མའི་དུས། །
ཁམ་བུའི་མེ་ཏོག་ས་མཐོར་ཤར་དང་ལྷན། །
ཚ་ཚ་འུར་འུར་ཁྱིམ་གཞིས་བསྐྱར་སྐྲུན་གྱི། །
ཐོག་མའི་གོམ་སྟབས་སྤོ་བར་ཐེ་ཚོམ་མེད། །
སྒྲིག་བཀོད་ཚགས་ཚུད་གོ་ཆོད་སྲ་བརྟན་གྱི། །
ཨར་འདམ་ལྕགས་རྩིབས་ལས་གྲུབ་ཁྱིམ་ཚང་སྟེ། །
ཚར་དུ་དངར་བས་དིང་རིར་ཆེས་གསར་པའི། །
གྲོང་གསེབ་མཛེས་ལྗོངས་ཡིད་དུ་འོང་བར་ངེས། །
ས་ཆེན་གློ་བུར་འཁྱོམས་པའི་བརྡབ་གསིག་དེ། །
ཀྲུང་གོའི་སྟོབས་ཤུགས་ནུས་པར་ཚད་འཇལ་ཡིན། །
ནམ་ཡོང་ངེས་མེད་བར་ཆད་སྣ་ཚོགས་ལ། །
ཁ་གཏད་གཅོག་པའི་འགན་ནུས་སྲིད་འདིར་རྒྱལ། །
ཨ་ཧོ་ཏང་དང་མི་དམངས་སྲིད་གཞུང་གི །
འཕྱུགས་མེད་འཐབ་ཇུས་ཡང་དག་བཀོད་སྒྲིག་དང་། །
རྒྱལ་ཡོངས་དམག་དམངས་མཐུན་སྒྲིལ་ངར་ཤུགས་ཀྱི། །
གེགས་སེལ་རྒྱལ་ཁའི་གཏམ་བཟང་གང་སར་ཁྱབ། །
དིང་རིའི་པི་ཝང་དབྱངས་དང་འགྲོགས་པ་ཡི། །
ལྷོ་གཞས་གནའ་བོའི་ཉམས་དང་ལྡན་པ་སྟེ། །
ལྷ་རྩེའི་སྒྲ་སྙན་སྟོད་གཞས་སྙན་གྲགས་ཆེ། །
ཁྱིམ་གསར་རྟེན་འབྲེལ་མཛད་སྒོར་ཞུགས་པར་ངེས། །