སེམས་པ་མ་སྐྱོ། དིང་རི་བ།
བན་ཤུལ་དཔལ་ལོ།
ས་ཆེན་བརྡབ་གསིག་ཐེབས་པའི་གཡོ་སྐྱོམ་གྱིས། །
ང་ཡི་དིང་རི་དེ་རིང་རྡུལ་འཚུབ་ཁྲོད། །
ལུས་སེམས་གཉིས་ལ་མི་འདོད་རྨ་ཁ་བཟོས། །
ཚེ་སྲོག་མང་པོ་སྡུག་གི་དམྱལ་བར་བརྫངས། །
སྐད་ཅིག་སེ་གོལ་གཏོགས་པའི་ཡུན་ཙམ་ལ། །
ཕ་གཞིས་དྲོན་མོར་རླུང་འཚུབ་དྲག་པོ་ལྡང་། །
སྤུན་ཟླ་མིང་སྲིང་རང་བྱུང་གནོད་པས་གཙེས། །
བྱིས་པ་རྣམས་ཀྱང་ངུ་སྒྲའི་ཁྲོད་དུ་ལུས། །
སྨྱན་བྱེད་ཡོལ་བའི་ངོས་ཀྱི་དིང་རི་བ། །
ད་ལྟ་སྐྱོ་གདུང་མཆི་མའི་ཀློང་དུ་ངུ་། །
བཟློག་མེད་རང་བྱུང་གནོད་འཚེར་སྙིང་རྗེ་མེད། །
གྱང་ཆག་ཞིག་རོའི་ཀློང་གི་གོད་ཆག་ལྕི། །
རང་བྱུང་གནོད་འཚེས་ཁྱུར་མིད་བཏང་བ་ཡི། །
ཚེ་སྲོག་མང་པོ་ཤི་གསོན་བར་ན་རྒྱུ། །
ངུ་འབོད་ཆོ་ངེའི་ཁྲོད་ཀྱི་གྱེས་བྲལ་འདི། །
སྙིང་ཆུང་ཚལ་བར་གཤགས་པའི་གཞི་མ་རེད། །
འོན་ཏེ་སེམས་པ་མ་སྐྱོ་དིང་རི་བ། །
ང་ཚོ་ནམ་ཡང་ཁྱེད་དང་མཉམ་དུ་ཡོད། །
ས་ཆེན་བདག་པོར་སྙིང་རྗེ་མེད་ན་ཡང་། །
མིའི་རིགས་ཀུན་ལ་བརྩེ་བའི་ལྷག་བསམ་ཡོད། །
གངས་དཀར་ཏི་སེའི་དབུ་འཕང་མཐོན་པོ་ཡིས། །
ཁྱེད་ལ་ཞུམ་མེད་སྙིང་རུས་གོ་ཆ་སྤྲས། །
ཡར་ཀླུང་གཙང་པོའི་ཕྱག་འཇུ་རིང་མོ་ཡིས། །
ཁྱེད་ལ་བྱམས་བརྩེའི་བྱིལ་བྱིལ་གནང་ནས་ཡོད། །
གོང་གི་གཙོ་འཛིན་གཤམ་གྱི་མི་དམངས་དང་། །
བཅིངས་འགྲོལ་དམག་དང་གོས་དཀར་ལྷ་རྗེ་སོགས། །
གོང་འོག་ཚང་མའི་རྒྱབ་སྐྱོར་ཡོད་པས་ན། །
སྙིང་རུས་མ་ཉམས་སྡུག་རུས་གནང་ཤོག་ཨང་། །
སྡུག་ལ་གདོང་གཏད་དགོས་སོ་དིང་རི་བ། །
ཆར་རླུང་རྗེས་སུ་འཇའ་ཚོན་ཤར་ངེས་ཡིན། །
རྐྱེན་ངན་གྲོགས་སུ་ཤར་བའི་ཆོས་ཉིད་ལྟར། །
ཁྱིམ་གཞིས་གསར་པ་གང་མགྱོགས་སྐྲུན་ངེས་ཡིན། །