འཇུར་རྩི་གཏོང་མཁན་གྱི་ཕོ་གཞོན།
ར་མོ་ཆེ་གཙུག་ལག་ཁང་གི་མདུན་ངོས་ཀྱི་རྡོ་གཅལ་སྟེང་གཞོན་ནུ་ཁ་ཤས་ཤིང་སྒམ་གྲུ་བཞིའི་ཐོག་ཏུ་བསྡད་དེ། དྲོད་འཇམ་ཉི་འོད་ཀྱི་འོག་ཏུ་འཇུར་རྩི་གཏོང་བཞིན་མཆིས། ཁོ་ཚོའི་ཁྲོད་གཟུགས་སྟོབས་འབྲིང་ཙམ་ཡིན་པའི་ཕོ་གཞོན་ཞིག་འདུག་ཅིང་། ཁོ་པའི་སྒམ་ཞིང་བརླིང་ལ་དྭངས་ཤིང་གསལ་བའི་མིག་ཟུང་ནི་རང་ཉིད་ཀྱི་མི་ཚེའི་གཏམ་རྒྱུད་གསལ་བའི་མེ་ལོང་ཞིག་དང་འདྲ།
བྱིས་དུས་པྲ་ཚགས་ཆེ་ཞིང་སློབ་ལ་མི་དགའ་བས། ཡུན་རིང་མ་སོང་བར་སློབ་གྲྭ་ལས་ཕྱིར་བཤོལ་བྱས་ཏེ་ཁྱིམ་དུ་ལུག་རྫི་བྱས་ནས་སྡོད་དགོས་བྱུང་སྟབས་ཐག་རིང་གི་ཡུལ་དུ་འགྲོ་བའི་སྐལ་བ་བྲལ་ཞིང་། རིམ་གྱིས་སེམས་ཀྱི་ཁ་ལོ་རི་བོའི་ཕར་ཕྱོགས་ཀྱི་རྒྱུས་མེད་ཡུལ་ལ་ཤོར། ཕོ་ལོ་བཅུ་དགུར་སླེབས་པའི་ལོ་དེར། འགྲུལ་སྐྱེལ་རླངས་འཁོར་ལ་བསྡད་དེ་རི་ཆུ་གྲངས་མེད་བརྒལ་རྗེས་གཞི་ནས་ལྷ་སར་སླེབས། བརྗིད་ཆགས་ཀྱི་ཕོ་བྲང་དང་། ཡིད་དབང་འཕྲོག་པའི་མཚན་ལྗོངས་སོགས་ཀྱིས་ཁོ་པའི་ཡིད་དབང་ཅིག་ཅར་དུ་འཕྲོག་པར་བྱས།
ཕྱིས་སུ། གྲོང་ཁྱེར་ནུབ་འདབས་འགྲུལ་སྐྱེལ་ས་ཚིགས་སུ་བདེ་སྲུང་བའི་ལས་ཀ་ཞིག་རག་སྟེ། ཁོ་པའི་ལུས་སེམས་གཉིས་ཀར་གནས་མལ་དྲོན་མོ་ཞིག་རྙེད། སྐབས་དེ་དུས། ཁོ་པར་ཟླ་རེར་གླ་ཆ་སྒོར་700ཡོད་མོད། འོན་ཀྱང་། ལོ་ཆུང་རྩེད་མོར་དགའ་བའི་ཆོས་ཉིད་ལྟར། ཟླ་མཇུག་སླེབས་རིམ་བཞིན་དངུལ་ཁུག་སྟོང་རྐྱང་ཆགས་ཀྱི་ཡོད། བར་ གསེང་བྱུང་ཚེ། ཇ་ཁང་དུ་ཏག་སེ་རྒྱག་པའམ་ནང་མ་ཁང་དུ་ཆང་བཏུང་རོལ་རྩེད་ལ་གཡེངས་ནས་དངུལ་གསོག་རྒྱུ་བསམ་པའི་ཡུལ་ལའང་མ་འཁོར། ད་ལྟ་བསམ་བློ་འཁོར་དུས། སྐབས་དེ་དུས་ཧ་གཉིད་མ་སད་པར་གནོང་འགྱོད་ཅུང་ཆེ། འོན་ཀྱང་། ཧ་གཉིད་མ་སད་པའི་དུས་འདིས། ཁོ་པར་བདེ་སྡུག་གི་དྲན་འཆར་མང་པོ་སྦྱིན།
ཁོ་པ་རྒྱུན་དུ་ལྷ་སར་བསྡད་ནས། ཁྲོམ་སྲང་ཆེ་ཆུང་མེད་པར་མྱུལ་བཞིན་ཡོད། སྐབས་རེ་བདེ་སྲུང་བ་བྱེད་པ་དང་། སྐབས་རེ་ཨར་པོ་རྒྱུག་པར་འགྲོ་བ། ཡང་སྐབས་རེ་འཇུར་རྩི་བཏང་ནས་སྡོད་ཀྱི་ཡོད། མ་གཞི་ལྷ་སར་ཁོ་པ་རང་ཉིད་ལ་དབང་བའི་ཁང་པ་མེད་ཀྱང་། གྲོང་ཁྱེར་འདིས་ཁོ་པར་ཁྱིམ་ཚང་ལྟ་བུའི་དྲོ་སྐྱིད་ཅིག་སྦྱིན་བཞིན་ཡོད་ལ། ཁོ་པ་ལྷ་སའི་ཁུག་ཁུག་ཀྱོག་ཀྱོག་གང་དུ་གནས་ཀྱང་། ལྷ་ས་ནི་ཁོ་པའི་བློ་སེམས་ཕྱོགས་སའི་ཞིང་ཁམས་ཡིན་པས། ལུས་པོ་ཡུལ་གྱར་འདྲ་ཡང་སེམས་ལ་སྔར་བཞིན་རེ་བས་བརྟས།
ལོ་དེ་ལ་ཁོ་པ་ཕོ་ལོ་ཉི་ཤུར་སླེབས། གཡའ་དག་པའི་ནམ་མཁའ་ལས་ཉི་འོད་རབ་ཏུ་འཚེར་བའི་ཉིན་ཞིག ཁོ་པ་ཇ་ཁང་ཞིག་ཏུ་ཇ་མངར་མོ་འཐུང་བར་བསྐྱོད་ནས་བུལ་ཐུག་ཕོར་པ་གང་མངགས། ཇ་ཁང་དེ་ནས་ཁོ་པའི་ཚེ་དེའི་བཟའ་ཟླ་དང་ངོ་ཤེས། ཁོ་མོ་ནི་ཇ་ཁང་དེའི་ཞབས་ཞུ་མ་ཡིན་ཞིང་། སྐབས་དེར་ཁོ་མོས་ལག་ཏུ་བུལ་ཐུག་ཕོར་པ་གང་འཁྱེར་བཞིན་ཁོ་པར་སུར་པན་དགོས་མིན་སྐད་ཆ་དྲིས། ཁོ་མོའི་སྐད་ངག་སྙན་མོ་དང་བྱད་བཞིན་མཛེས་པོས་ཁོ་པའི་སྙིང་ཁ་ལུ་གུ་ལྡིང་ལྡིང་བྱས། མ་གཞི་ཁོ་པར་ངོ་ཤེས་བུ་མོ་མང་པོ་ཡོད་ཀྱང་། སྣང་བར་རང་སེམས་ཤོར་སའི་བུ་མོ་དེ་ཐག་རིང་དུ་ཡོད་པའི་སྣང་བ་འཆར། དེ་ཉིན། ཐག་རིང་གི་བུ་མོ་དེ་ཁོ་པའི་མིག་མདུན་དུ་འཆར།
ཁོ་མོའི་ཁ་པར་ཨང་གྲངས་ལག་ཏུ་རག་རྗེས། ཁོ་གཉིས་ཀྱི་བརྩེ་དུང་གི་སྒོ་མོ་དལ་གྱིས་ཕྱེ། དང་ཐོག་ཁོ་མོས་ཁ་ཡ་དེ་ཙམ་མི་བྱེད། ཕྱིས་སུ་ཁོ་པ་ཕ་ཡུལ་དུ་ལོག མཚན་མོ་ཞིག ཁོ་མོས་རང་ཉིད་ནད་ཀྱིས་མནར་གྱིན་འདུག་པས། ཁོ་པ་ལྷ་སར་ལོག་ཡོང་དགོས་པའི་རེ་བ་བཏོན། ཉིན་གཉིས་པར། ཁོ་པས་ལྐོག་ལྐོག་སུད་སུད་ངང་ཁྱིམ་ནས་ཐོན་ཏེ། འགྲུལ་སྐྱེལ་རླངས་འཁོར་ལ་བསྡད་ནས་ཉི་མ་ལྷ་སའི་ཕྱོགས་སུ་བཞུད། ཕན་ཚུན་ཐུག་འཕྲད་བྱུང་མ་ཐག ཁོ་མོར་དམ་དུ་འཐམས། དེ་ལྟར་ལས་ཀྱི་མདུད་པ་ཐེབས་ནས་མཉམ་འཛོམས་ཀྱི་དཔལ་ལ་རོལ། བརྒྱུད་རིམ་དེའི་ཁྲོད། མཚར་སྣང་གི་གཏམ་རྒྱུད་མེད་དེ། ཡོད་པ་ནི་བུ་མོའི་ངང་སྒུག་དང་ཕོ་གཞོན་གྱི་དྭངས་གཙང་གི་བརྩེ་སེམས་འབའ་ཞིག་གོ
ཁོ་པ་གྲག་འགུལ་ཅི་ཡང་མེད་པར་ཁྱིམ་ནས་ཐོན་པས། ནང་མི་ཁོང་ཁྲོ་ལངས་ཏེ་མི་མངགས་ནས་ཁོ་པ་འཚོལ་བར་བཏང་། དེས་རྐྱེན་པས་ཁོ་གཉིས་ནག་ཆུར་བྲོས། ནག་ཆུར་ཟླ་བ་གསུམ་སྡོད་རིང་། ཁོ་པ་ཨར་པོ་རྒྱུག་པར་ཕྱིན། ཁོ་མོས་སྒོ་རྩིས་ཚོང་ཁང་གི་ཞབས་ཞུ་མ་བྱས་ཏེ་སྒོར་ཁྲི་བཞི་བསགས་པ་དང་། མཐའ་མར་དཀའ་བས་བསགས་པའི་དངུལ་ཚང་མ་ནང་དུ་བསྐུར་ཏེ་ནང་མིའི་བསམ་ཤེས་ཐུབ་ཐབས་བྱས། ཡུན་རིང་མ་སོང་བར། ཁོ་མོར་མངལ་འཁོར།
ལོ་ཕྱེད་སོང་རྗེས། ཁོ་གཉིས་མཉམ་དུ་ཁོ་མོའི་ཁྱིམ་དུ་ལོག ཁོ་མོའི་ཡབ་ཀྱིས་མཉམ་དུ་བསྡད་ཟིན་པས་མི་ཚེ་ཡག་པོ་སྐྱེལ་དགོས་ཞེས་བརྗོད། དོན་དངོས་ཐོག ཁོ་མོའི་ཁྱིམ་ཧ་ཅང་དབུལ་ཞིང་ཕོངས་པས། རྒན་རབས་ཚོས་དེ་སྔོན་ཁོ་མོར་རྒྱུ་ཡོད་པའི་ཁྱོ་ག་ཞིག་རག་པའི་རེ་བ་བྱས། ཕྱིས་སུ། ཁོ་མོས་ཀྱང་ཁོ་པའི་ནང་ལ་ལོག་པ་དང་། ཁོ་པའི་ཨ་མས་བུ་ལ་གཟིགས་བཞིན། རང་གཞི་ནས་ལོག་སླེབས་བྱུང་ཞེས་བརྗོད། ད་བྱེད་དུས། ཁོ་པའི་ཨ་མས་ཁོ་མོའི་ཁྱིམ་ཚང་གི་གནས་ཚུལ་སྔ་ས་ནས་ཤེས་པས་ཁོ་པ་དཀའ་ལས་ཁག་པོ་ཡོང་དོགས་ཀྱི་སེམས་ཁྲལ་བྱུང་། འོན་ཀྱང་། ཁོ་པའི་བསམ་པར་ཁོ་མོ་མེད་ཚེ། དེ་བས་དཀའ་སྡུག་གི་གནས་སུ་གྱར་རྒྱུ་ཡིན་པ་ཚོར།
མཚམས་དེར། ཁོ་པས་མགོ་བོ་སྒུར་སྒུར་བྱས་ནས་འཇུར་རྩི་གཏོང་བཞིན་མཆིས། ཡིན་ནའང་། ལྷད་མེད་བརྩེ་དུང་གི་མདུན་དུ་ཁོ་པས་མགོ་བོ་གཏན་ནས་བསྒུར་མ་མྱོང་། རྒྱུ་དང་བར་ཐག་གི་དབང་གིས་ལྷད་མེད་ཀྱི་བརྩེ་དུང་གི་མདུན་དུ་དཔའ་ཞུམ་པའི་མི་མང་པོ་ཡོད་ལ། རྟག་ཏུ་བསམ་རྒྱུ་མང་དྲགས་པའི་དབང་གིས་སྐྱིད་པའི་ནམ་ཟླ་མིག་འོག་ནས་བརླགས་པའི་མི་དེ་བས་མང་།
ཕོ་ལོ་ཉེར་གཅིག་ལ་སླེབས་པའི་ལོ་དེར། ཁོ་མོར་བུ་མོ་ཞིག་སྐྱེས་པས་ཁོ་པའི་སེམས་པ་དགའ་བ་འབུམ་གྱིས་མྱོས་པ་དང་སྦྲགས། ཕྲག་ཐོག་གི་འགན་འཁྲི་ཡང་ཇེ་ལྕིར་སོང་། ཉིན་ལྟར། བུ་མོའི་གདོང་ལ་ལྟ་བཞིན། ཁོ་པར་སྨྲ་བརྗོད་ལས་འདས་པའི་འགན་སེམས་ཤིག་སྐྱེས་འོངས། གང་ལགས་ཤེ་ན། ཁོ་པས་བུ་མོ་སློབ་གྲྭར་བཏང་ནས་དཀའ་སྡུག་མྱོང་མི་དགོས་པ་ཞིག་བྱེད་དགོས་སྙམ།
ལོ་དེར། ཁོ་པ་ཕོ་ལོ་ཉི་ཤུ་རྩ་གཉིས་ལ་སླེབས། དཔྱིད་རྨོད་གྲུབ་རྗེས་ལྷ་སར་ལོག་ཡོང་། སྐབས་རེ་ཉང་བྲན་ལམ་རྒྱུད་དུ་ཨར་པོ་རྒྱུག་པར་འགྲོ་བ་དང་། སྐབས་རེ་ལྷ་ཀླུ་ཟམ་པའི་ཉེ་འགྲམ་དུ་ལས་ཀ་སྒུག་ནས་སྡོད་པ་ལས། དེ་སྔོན་ནང་བཞིན་རྩེད་མོར་དབྱིངས་ཞུགས་ནས་མ་བསྡད་པར་དཀའ་ལས་བརྒྱབ་ནས་དངུལ་གསོག་གིན་ཡོད། ལོ་ཕྱེད་རིང་ལ། སྒོར་ཁྲི་གཉིས་བསགས་ཏེ། ཐོ་ཕྲུག་ཅིག་ཉོས་པ་རེད།
ལོ་དེ་ལ། ཁོ་པ་ཕོ་ལོ་ཉི་ཤུ་རྩ་གསུམ་ལ་སླེབས་ཤིང་། ལོ་གསར་བཏང་རྗེས། རོགས་པ་ཁ་ཤས་ཤིག་ཁྲིད་ནས་ལྷ་སར་འཇུར་རྩི་གཏོང་བའི་ལས་ལ་འབད་འགོ་ཚུགས། ཉིན་ལྟར། མི་ཚོགས་ཀྱི་ཁྲོད་དུ་ཞབས་ཕྱག་འཕྱིས་གནང་ཞེས་སྐད་རྒྱག་བཞིན་ཡོད། འཇུར་རྩི་གཏོང་བཞིན་སྡོད་སྐབས། མ་གཞི་གཞན་གྱི་མཐོང་མི་འདོད་པའི་མིག་མདའ་འཕེན་པ་ཉུང་ཉུང་མིན། ཡིན་ནའང་། རང་ཉིད་ཀྱིས་རྐུ་ལ་མ་ཞུགས་སློང་མོ་མ་བྱས་སྟབས། དེ་ཐམས་ཅད་རྣ་རྒྱབ་ཀྱི་རླུང་བུར་བཏང་། འཇུར་རྩི་གཏོང་ཐེངས་རེར་སྒོར་ལྔ་ཡིན་པ་དང་། ཉིན་རེར་མང་ཤོས་ལ་འཇུར་རྟ་ཐེངས་བཞི་བཅུ་ཙམ་འཕྱིས་ཐུབ་པས། ཟླ་བ་གཅིག་ལ་ཆ་སྙོམས་ཡོང་འབབ་སྒོར་བཞི་སྟོང་ཙམ་རག་གི་ཡོད། དེའི་ནང་ནས་སྒོར་ཉིས་སྟོང་བཟའ་ཟླར་བསྐུར་བ་དང་། སྒོར་བརྒྱད་བརྒྱ་ཨ་མར་བསྐུར་ཞིང་། ལྷག་མ་རྣམས་རང་ཉིད་ཀྱི་འཚོ་བའི་འགྲོ་གྲོན་དུ་སྤྱོད་ཀྱི་ཡོད།
ཁོ་པས། དེང་གི་དུས་སུ་རང་ཉིད་ཀྱིས་བརྩོན་ལེན་བྱས་ན་ལས་ཀ་མ་རག་པའི་སེམས་ཁྲལ་མེད་ལ། འཚོ་བར་ཡང་སེམས་ཁྲལ་མི་འདུག་ཅེས་བརྗོད། ཁོ་པར་རོགས་པ་ཁྱུ་ཞིག་ཡོད་ཅིང་། ཁོ་ཚོ་དང་མཉམ་དུ་ཨར་པོ་རྒྱུག་པ་དང་། འཇུར་རྩི་བཏང་ནས་སྡོད་པའི་སྐྱིད་སྡུག་མཉམ་མྱོང་གི་ལོ་ཟླ་རེ་རེ་ནི་ཁོ་པའི་ངོས་ནས་བརྗོད་ན་ཧ་ཅང་དོན་སྙིང་ལྡན་པ་ཞིག་ཡིན་ཞིང་། ལྷ་སར་འཚོ་བ་སྐྱེལ་རིང་དྲོ་ཤོས་ནི་ལྷ་སའི་ཉི་འོད་ཡིན་ལ། ཡག་ཤོས་ནི་རོགས་པའི་དབར་གྱི་མཛའ་བརྩེ་ཡིན་པ་རེད།
འཇུར་རྟ་འཕྱིས་ཟིན་རྗེས། ངས་ཁོ་པར་སྒོར་ལྔ་སྤྲད་ནས་ཐུགས་རྗེ་ཆེ་ཞུས་པ་ཡིན། ཁོ་པས་ངའི་འཇུར་རྟ་འོད་ཐིང་ཐིང་འཕྱིས་པ་མ་ཟད། ངའི་སེམས་ཁམས་ལ་ཡང་བྱི་དོར་གཙང་མ་ཞིག་བྱས་སོང་།
(འཚོ་བས་བརྩམས། བུ་ཆུང་གིས་བསྒྱུར)