འདི་ནི་ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱི་2025ལོའི་ཀོང་པོའི་ལོ་གསར་དང“གྲོང་ཚོའི་མཚན་ཚོགས”ཀྱི་མཉམ་སྤྲོའི་འདུ་ཚོགས་སྐབས་གསུམ་པ་འཚོག་ཡུལ་ཡིན་པ།

རྒྱལ་ཡོངས་སུ་ལོ་གསར་སྔ་ཤོས་གང་དུ་གཏོང་གི་ཡོད་དམ་ཞེ་ན། དེ་ནི་བོད་ལྗོངས་ཉིང་ཁྲིའི་ཀོང་པོའི་ལོ་གསར་རེད།

སྤྱི་ཟླ་12པའི་ཚེས་2ཉིན་ནི་བོད་ཟླ་བཅུ་པའི་ཚེས་གཅིག་ཡིན་ལ་ཀོང་པོའི་ལོ་གསར་གྱི་ཚེས་གཅིག་ཀྱང་རེད།

ལོ་རྙིང་ཕར་ལ་སྐྱེལ་ཞིང་ལོ་གསར་དགའ་བས་བསུ་བའི་མཛེས་སྡུག་ལྡན་པའི་དུས་མཚམས་འདིར་ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱི་ལས་བྱེད་པ་དང་མང་ཚོགས་མཉམ་དུ་འཛོམས་ནས་གླུ་ལེན་གར་འཁྲབ་ཀྱིས་རྟེན་འབྲེལ་གྱི་རྣམ་པ་ཟབ་ལ་འཁྲུག་ཆ་དོད་པའི་གྲོང་ཚོའི་མཚན་ཚོགས་འཚོགས་ཏེ། ལོ་གཅིག་གི་གྲུབ་འབྲས་ལ་དགའ་བས་རོལ་བ་དང་ལོ་གཅིག་གི་དཀའ་སྤྱད་འབད་བརྩོན་བྱས་པ་དག་གླུ་གར་གྱི་ཐོག་ནས་མཚོན་པར་བྱས་ཏེ་ད་ཆའི་བདེ་སྐྱིད་ཚོར་ཐུབ་པ་དང་དུས་སང་དེ་བས་བདེ་སྐྱིད་ཁམས་བཟང་ཡོང་བའི་སྨོན་འདུན་ཞུས་པ་རེད།

ཟླ་11ཚེས་30ཉིན་གྱི་སྔ་དྲོར། ཉིང་ཁྲི་གྲོང་ཁྱེར་བྲག་ཡིབ་ཆུས་ཨུད་དང་ཆུས་སྲིད་གཞུང་གིས་གཙོ་གཉེར་བྱས་པའི་2025ལོའི་ཀོང་པོའི་ལོ་གསར་དང་གྲོང་ཚོའི་མཚན་ཚོགས་ཀྱི་མཉམ་སྤྲོའི་འདུ་ཚོགས་སྐབས་གསུམ་པ་བྲག་ཕྱི་གྲོང་ཚོར་འཚོགས་པ་རེད། གྲོང་ཚོ་ཨུ་ལྷན་གྱི་སྒོ་རའི་ཕྱོགས་བཞི་མཚམས་བརྒྱད་ནས་ལྟད་མོ་ལྟ་བར་ཡོང་བའི་མི་རིགས་ཁག་གི་མང་ཚོགས་ཀྱིས་ཁེངས་པ་དང་ཚང་མས་མཉམ་དུ་ལོ་གསར་དགའ་གཏོང་བྱེད་བཞིན་མཆིས།

གླུ་སྒྲས་སྤྲོ་སྣང་སྦྱིན། ཞབས་བྲོས་སྨོན་འདུན་མཚོན། འཁྲབ་སྟོན་སྣ་མང་ཕུན་སུམ་ཚོགས་ཤིང་། སྒྲིག་བཟོ་ཞིབ་ཚགས་བྱས་པའི་ལེ་ཚན་རེས་མོས་ངང་འཁྲབ་སྟོན་བྱས་ནས་ལོ་གཅིག་གི་ལྟད་མོ་ཆེ་བའི་ལེ་ཚན་དེ་གར་ཡོད་པའི་ལྟད་མོ་བ་ཚོར་བསྟན་པ་རེད།

ས་གནས་དེ་གའི་མང་ཚོགས་སྒྲོལ་མ་ལྷ་མོས་སྤུས་ལེགས་ཀྱི་བོད་ཆས་སྤྲས་ནས་ཕྲུ་གུ་ཁྲིད་དེ་སྔ་པོ་ནས་ལྟད་མོ་ལྟ་བར་སླེབས་ཡོད། ཁོང་གིས“དགོང་ཚོགས་ཧ་ཅང་འཁྲུག་པོ་འདུག་ལ་ལྟད་མོའང་ཆེན་པོ་འདུག དེས་ང་ཚོ་ཀོང་པོའི་ལོ་གསར་ལ་རིག་རྩལ་གྱི་སྟོན་མོ་གཟབ་རྒྱས་ཤིག་བཤམས་པས་ཚང་མ་དགའ་པོ་བྱུང་འདུག ལོ་གསར་པའི་ནང་ཚང་མ་སྐུ་གཟུགས་གསལ་ཐང་དང་། ཁྱིམ་ཚང་འཆམ་མཐུན། ཇེ་བཟང་ཇེ་ཡག་ཏུ་འགྲོ་བའི་སྨོན་འདུན་ཞུ་རྒྱུ་ཡིན”ཞེས་བཤད་པ་རེད།