རིག་གཞུང་ལ་གཅེས་འཛིན་བྱེད་དགོས།
མི་དང་མི་མ་གཅིག་པ་བཞིན་མི་དང་མིའི་དབར་གྱི་རིན་ཐང་ལྟ་བའང་མི་འདྲ་བ་ལྟ་ཅི་སྨོས། དེ་ལྟར་མི་རྣམས་ལ་རིན་ཐང་ལྟ་བ་མི་འདྲ་བ་ཇི་སྙེད་ཅིག་མཆིས་ནའང་། མི་ཞིག་ལ་མཚོན་ན་རང་ཉིད་ཀྱི་རིན་ཐང་ལྟ་བ་གང་ཡང་དག་པ་དང་དོན་དངོས་དང་མཐུན་པ་ཞིག་བྱ་རྒྱུ་ནི་གལ་འགངས་ཧ་ཅང་ཆེ། འཛམ་གླིང་ཧྲིལ་པོ་གཞི་གཅིག་ཏུ་འདྲེས་པའི་དུས་རབས་ཀྱི་དཀྱོག་མཚམས་འདིར་འགྲེང་ནས་མནོ་བསམ་རེ་བཏང་ཚེ། ད་ལྟའི་དུས་རབས་འདི་ནི་ཤེས་དཔལ་གྱི་དུས་རབས་ཤིག་དང་། རིག་གནས་དཔལ་འབྱོར་གྱི་དུས་རབས་ཤིག་ཡིན་པ་ཀུན་གྱིས་ཁས་ལེན་བྱས་དང་བྱེད་བཞིན་པ་ཡིན་ལ། འདི་ནི་ད་ལྟའི་སྤྱི་ཚོགས་འཚོ་བའི་དོན་དངོས་ཀྱི་དགོས་མཁོ་དང་མཐུན་པ་ཞིག་ཀྱང་ཡིན་གཤིས། རིགས་པའི་གཞུང་ལུགས་ནི་ད་ལྟའི་དུས་སྐབས་སུ་ཆེས་རིན་ཐང་ཆེ་བའི་ནོར་བུ་མཆོག་ཏུ་གྱུར་པ་དེ་ཡིན་པའི་ངོས་འཛིན་ཐུན་མོང་གཅིག་གྱུར་བྱུང་ཡོད།
རེད་དེ། ཤེས་རིག་ནི་མིའི་རིགས་ཀྱི་སྤྱི་ཚོགས་ལོ་རྒྱུས་ཀྱི་ཆེས་ངོ་མཚར་འབར་བའི་དན་རྟགས་ཤིག་ཡིན་པ་དང་། དེ་ནི་མིའི་རིགས་དུད་འགྲོའི་རིགས་ལས་ཁྱད་དུ་འཕགས་པའི་མཚོན་རྟགས་གལ་ཆེ་ཤོས་དེ་ཡིན། དེར་བརྟེན་ཤེས་རིག་ནི་མི་རྣམས་འཚོ་གནས་བྱེད་པའི་དོན་སྙིང་དང་འབད་བརྩོན་བྱེད་པའི་སྒུལ་ཤུགས་ཡིན་ལ། མིའི་རིགས་ཀྱིས་རང་ཉིད་ཀྱིས་གསར་གཏོད་བྱས་པའི་ཤེས་རིག་ལ་གསོག་འཇོག་དང་དབྱེ་ཞིབ། ཕྱོགས་སྡོམ་བྱས་པ་ལས། ད་གཟོད་རང་རང་རང་གི་ཁྱད་ཆོས་ལྡན་པའི་རིག་གཞུང་གི་མ་ལག་རེ་བསྐྲུན་པ་མ་ཟད། མིའི་རིགས་རང་ཉིད་ཀྱི་དངོས་པོའི་འཚོ་བ་དང་བསམ་པའི་དཔལ་ཡོན་ཐད་ཕན་འབྲས་ཟམ་མི་ཆད་པ་བཏོད་དང་གཏོད་བཞིན་པ་ཡིན། དཔེར་ན། འདས་པའི་ལོ་རྒྱུས་ལ་མཚོན་ན། མིའི་རིགས་ཀྱིས་རང་གི་ཤེས་རིག་གསར་གཏོད་ཀྱི་ལམ་བུ་ལ་བརྟེན་ནས་མིའི་རིགས་ལ་དངོས་པོའི་འཚོ་བའི་མཁོ་དགུ་སྣ་ཚོགས་པ་སྟེ། དེང་རབས་ཀྱི་འགྲིམ་འགྲུལ་མ་ལག་བསམ་གྱིས་མི་ཁྱབ་པ་དང་། ཐོན་སྐྱེད་ཡོ་བྱད་ངོ་མཚར་སྟོང་གིས་ཕྱུག་པ། འཚོ་བའི་མཁོ་ཆས་བརྒྱ་གོ་གཅིག་གིས་ཆོད་པ་ལྟ་བུ་ཟོར་ཡང་ལ་སྤྱོད་ཆེ་བ་ཇི་སྙེད་པ་ཞིག་བསྐྲུན་ཏེ། དེང་རབས་ཀྱི་སྤྱི་ཚོགས་འདི་ཉིད་འཕྲུལ་ཆས་ཀྱི་འཇིག་རྟེན་ལྟ་བུ་ཞིག་ཏུ་མངོན་འགྱུར་བྱས་པ་མ་ཟད། སྔར་ལྷའི་མིག་གི་མངོན་ཤེས་དང་ལྷའི་རྣ་བའི་མངོན་ཤེས་ལ་ཐོགས་པའི་དཀའ་ངལ་བློ་ལས་འདས་པ་མང་དག་ཅིག་འབྱུང་བ་དག་ད་ཆ་དྲ་རྒྱའི་ལག་རྩལ་ལ་བརྟེན་ནས་ཡོངས་སུ་བསལ་བར་བགྱིས་པ་བཞིན་མི་རྣམས་ལ་ངོ་མཚར་དཔག་མེད་བསྩལ་ཡོད། དེ་ལྟར་དེང་རབས་ཀྱི་ཤེས་རིག་ལམ་བུས་ང་ཚོ་ལ་ཚན་རིག་ལག་རྩལ་གྱི་སྒོ་འཕར་ཆེན་པོ་ཞིག་ཕྱེ་བ་ལས། མིའི་རིགས་ཀྱི་ཟས་གོས་སྡོད་གསུམ་ལ་སོགས་པའི་དངོས་པོའི་འཚོ་བ་ལ་ལེགས་སྐྱེས་ཧ་ཅང་ཆེན་པོ་ཕུལ་ཡོད་པས། ང་ཚོས་དེའི་རིན་ཐང་དང་དོན་སྙིང་ལ་དོགས་པ་དང་ཐེ་ཚོམ་བྱེད་དགོས་དོན་ཅི་ཡོད།
དེ་ལྟར། འཛམ་གླིང་ཤར་ཕྱོགས་པས་ཀྱང་འདས་པའི་ལོ་རྒྱུས་ཀྱི་དུས་ཡུན་རིང་པོའི་ནང་སྐྱིད་ཆགས་ཟས་ཉལ་བྱས་ཏེ་མ་བསྡད་པར། རང་སོའི་རྣམ་དཔྱོད་དང་དཀའ་སྤྱད་འབད་བརྩོན་ལ་བརྟེན་ནས་མིའི་རིགས་ཀྱི་ཤེས་རིག་གསར་གཏོད་ཀྱི་བྱ་གཞག་ཆེན་པོ་མངོན་འགྱུར་བྱེད་པའི་བརྒྱུད་རིམ་ནང་རང་ཉིད་ཀྱི་གསར་གཏོད་དང་འཚོལ་ཞིབ་ཀྱི་ལམ་བུ་ཞིག་བཤངས་ཡོད་པ་མ་ཟད། ལྷག་པར་དུ། མིའི་མི་ཚེ་དང་ཚེ་སྲོག་ལ་དོ་སྣང་དང་ལྟ་ཞིབ། ཞིབ་འཇུག ཤེས་རྟོགས་ཟབ་མོ་བྱས་ཏེ། མི་རང་ཉིད་ཀྱི་ལུས་སེམས་ཀྱི་བདེ་ཐང་དང་ནང་སེམས་ཀྱི་བདེ་སྐྱིད་འཚོལ་བའི་ཐབས་ལམ་རབ་དང་རིམ་པར་ཉམས་ཞིབ་དང་ལག་ལེན། མཉམ་སྤྱོད། བགོ་འགྲེམས་བཅས་བྱས་དང་བྱེད་བཞིན་པ་ཡིན། ཡང་སྒོས་དེང་རབས་སྤྱི་ཚོགས་ཀྱི་འཕོ་འགྱུར་དང་འཕེལ་རྒྱས་ཀྱི་དགོས་མཁོའི་མདུན་དུ་འདིའི་རིན་ཐང་ནི་ཆེས་བླ་ན་མེད་པའི་ཚད་དུ་སླེབས་མོད། དེང་འདིར་འཛམ་གླིང་ཤར་ནུབ་ཀྱི་མི་ཚང་མས་རྩོམ་རིག་སྒྱུ་རྩལ་དང་། རོལ་དབྱངས། གློག་བརྙན་སོགས་འཛད་སྤྱོད་ཀྱི་སྒོ་མི་འདྲ་བ་དུ་མའི་ལམ་ནས་དེའི་རིན་ཐང་གི་སྙིང་པོ་དག་ལོངས་སུ་སྤྱད་དང་སྤྱོད་བཞིན་པ་དང་། ད་དུང་མ་འོངས་པར་སྤྱོད་པར་འགྱུར་བ་ཤ་སྟག་ཡིན།
མདོར་ན། ཤེས་རིག་ནི་མིའི་འཚོ་བའི་དགོས་མཁོ་ལྟར་དར་བ་ཞིག་ཡིན་པ་དང་། ཤེས་རིག་ལ་བརྟེན་ནས་དབུལ་པོ་ཕྱུག་པོར་སྒྱུར་ཆོག་ལ། ཤེས་རིག་ལ་བརྟེན་ནས་ཉམ་ཆུང་སྟོབས་ལྡན་དུའང་སྒྱུར་ཆོག ཤེས་རིག་ལ་བརྟེན་ནས་རྗེས་ལུས་སྔོན་ཐོན་དུ་སྒྱུར་ཆོག་ལ། ཤེས་རིག་ལ་བརྟེན་ནས་སྡུག་བསྔལ་བདེ་སྐྱིད་དུའང་སྒྱུར་ཆོག དེས་ན་ཤེས་རིག་ནི་མིའི་རིགས་ཀྱི་དགོས་འདོད་ཀུན་འབྱུང་གི་ནོར་བུ་ཞིག་ལྟར། མིའི་རིགས་ཀྱིས་ཤེས་རིག་གི་རིན་ཐང་མི་ཉམས་ཤིང་མ་བརླགས་པའི་སླད་རིགས་པའི་གཞུང་ལུགས་མང་དག་ཅིག་ཀྱང་བརྩམས་ཡོད། ང་ཚོས་རིགས་པའི་གཞུང་ལུགས་ལ་སློབ་གཉེར་བྱེད་དོན་ཡང་དོན་དམ་དུ་མིའི་རིགས་ཀྱི་ཤེས་རིག་ལོ་རྒྱུས་ལ་གཙིགས་ཆེན་དང་དེའི་དོན་སྙིང་ལ་སློབ་སྦྱོང་དང་གཅེས་འཛིན་བྱེད་པ་ཤ་སྟག་ཡིན་ནོ།
སྙིང་ཉེ་བའི་སློབ་མ་ཚོ། ངས་འདི་ནས་ཁྱེད་ཚོར་རིག་གཞུང་ལ་གཅེས་འཛིན་གྱིས་ཤིག་ཅེས་སྐུལ་མ་བྱེད་བཞིན་ཡོད་པས། ཁྱེད་ཚོས་གནས་ལུགས་འདིའི་ལམ་ནས་རང་ཉིད་ཀྱི་མི་ཚེའི་རིན་ཐང་སྔོག་འདོན་གྱི་ལས་ལ་གཞོལ་རྒྱུ་གལ་ཆེའོ།།