གཞི་རིམ་དུ་ཏང་གི་རིགས་པའི་གཞུང་ལུགས་ཀྱི་སྒྲོག་འགྲེལ་ལས་དོན་ཡག་པོར་སྤེལ་བའི་སྐོར་གྱི་བསམ་གཞིགས།
གཞི་རིམ་དུ་རིགས་པའི་གཞུང་ལུགས་ཀྱི་སྒྲོག་འགྲེལ་ལས་དོན་སྤེལ་བ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བྱ་གཞག་འཛུགས་སྐྲུན་ཁྲོད་བསམ་བློའི་སྐུལ་སློང་དང་བསམ་བློའི་འགན་ལེན་གྱི་ནུས་པ་གལ་ཆེན་ཞིག་ཡིན་ལ། ཏང་གི་གསར་གཏོད་རིགས་པའི་གཞུང་ལུགས་དང་གལ་ཆེའི་སྲིད་ཇུས་སོགས་མི་དམངས་མང་ཚོགས་ཁྲོད་ཁྱབ་སྤེལ་དང་མི་སེམས་སུ་ཟུག་པར་བྱེད་པའི་ཐབས་ལམ་གལ་ཆེན་ཞིག་ཀྱང་ཡིན། མི་དམངས་ནི་རྩ་བ་དང་གཙོ་སྙིང་ཡིན་པས་རིགས་པའི་གཞུང་ལུགས་གང་འདྲ་ཞིག་ཡིན་རུང་དེ་རྒྱ་ཆེའི་མང་ཚོགས་དང་འབྲེལ་བ་དམ་ཟབ་ཡོད་པ་དང་མང་ཚོགས་ཀྱིས་རིགས་པའི་གཞུང་ལུགས་ཀྱི་ནང་དོན་ཁོང་དུ་ཆུད་པར་བྱས་ན་གཞི་ནས་སྲིད་དབང་དང་རྒྱལ་ཁབ་ལ་སྟོབས་ཤུགས་ཆེན་པོ་ཐོན་ཐུབ། དེའི་ཐོག་ནས་རྒྱ་ཆེའི་མང་ཚོགས་ནི་རིགས་པའི་གཞུང་ལུགས་སྒྲོག་འགྲེལ་བྱེད་ཡུལ་གཙོ་བོ་དེ་ཡིན་པ་གསལ་པོར་ཤེས་ཐུབ།
རང་ལྗོངས་སུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། གཞི་རིམ་གྱི་ཏང་རྩ་འཛུགས་དང་དྲིལ་བསྒྲགས་ཚན་ཁག་གི་འགོ་ཁྲིད་དང་གཞི་རིམ་སྒྲོག་འགྲེལ་པ་ཚོའི་དཀའ་ངལ་ཁྱད་བསད་དང་འབད་བརྩོན་ལྷོད་མེད་འོག་ཏང་གི་རིགས་པའི་གཞུང་ལུགས་དང་སྲིད་ཇུས་རབ་དང་རིམ་པ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སོགས་ཀྱི་དགོངས་དོན་རྒྱ་ཆེའི་ཞིང་འབྲོག་མང་ཚོགས་ཁྲོད་ཁྱབ་སྤེལ་ཐུབ་ནས་མང་ཚོགས་ཀྱི་བསམ་པའི་གོ་རྟོགས་དང་བསམ་བློར་བཅིངས་འགྲོལ་གཏོང་བར་ཕན་ནུས་ཆེན་པོ་ཐོན་པ་དང་ལུགས་རྙིང་སྲོལ་ངན་དོར་ནས་ཡུལ་སྲོལ་ཡ་རབས་ཅན་དང་ཚན་རིག་དང་མཐུན་པའི་བསམ་བློའི་འདུ་ཤེས་ཟབ་ཏུ་ཕྱིན་ཡོད།
འོན་ཀྱང་གཞི་རིམ་དུ་རིགས་པའི་གཞུང་ལུགས་སྒྲོག་འགྲེལ་བྱེད་པའི་བརྒྱུད་རིམ་ཁྲོད་དུ་གཅིག་ནས་སྒྲོག་འགྲེལ་གྱི་ནང་དོན་རེ་འགའ་མང་ཚོགས་ཀྱི་དངོས་ཡོད་འཚོ་བ་དང་མི་མཐུན་པ། དཔེར་ན་ཞིང་ལས་དང་འབྲོག་ལས་ལ་བྲེལ་ཟིང་ཆེ་བའི་སྐབས་གཅིག་སྡུད་སྒྲོག་འགྲེལ་བྱས་ཚེ་མང་ཚོགས་ཀྱི་རྒྱུན་ལྡན་འཚོ་བར་འགལ་རྐྱེན་བཟོ་བ་དང་། ད་དུང་སྒྲོག་འགྲེལ་གྱི་ནང་དོན་མང་ཆེ་བ་ཡིག་ཆ་སྒྲོག་སྦྱོང་བྱེད་པ་ལས་མང་ཚོགས་ཀྱིས་དོ་ཁུར་བྱེད་པའི་རྒན་གསོ་དང་། སྨན་བཅོས་རོགས་སྐྱོབ། སློབ་གསོའི་འགན་ལེན་སོགས་དམངས་ཕན་སྲིད་ཇུས་དང་འབྲེལ་བ་བྱེད་མི་ཐུབ་པས། མང་ཚོགས་ཀྱི་སྒྲོག་འགྲེལ་བྱེད་སྒོར་ཞུགས་པའི་སེམས་ཤུགས་ལ་ཤུགས་རྐྱེན་ཐེབས་ཀྱི་ཡོད། གཉིས་ནས་གཞི་རིམ་སྒྲོག་འགྲེལ་པའི་རིག་གནས་ཆུ་ཚད་ཀྱི་ཧེ་བག་ཆེ་བ། གཞི་རིམ་སྒྲོག་འགྲེལ་པ་ནི་ཏང་གི་གསར་གཏོད་རིགས་པའི་གཞུང་ལུགས་དང་གལ་ཆེའི་སྲིད་ཇུས་སོགས་མང་ཚོགས་ཁྲོད་ཁྱབ་སྤེལ་གཏོང་མཁན་གྱི་སྟོབས་ཤུགས་གཙོ་བོ་དེ་ཡིན། ཁོང་ཚོའི་རིག་གནས་ཀྱི་ཆུ་ཚད་མཐོ་དམའ་ནི་སྒྲོག་འགྲེལ་གྱི་ཕན་འབྲས་དང་ཐད་ཀར་འབྲེལ་བ་ཡོད། གཞི་རིམ་གྱི་སྒྲོག་འགྲེལ་པ་མང་ཆེ་བ་ནི་རྒྱ་ཆེའི་ཞིང་འབྲོག་མང་ཚོགས་ཁྲོད་ནས་བདམས་པ་ཡིན་པས། ཁོང་ཚོའི་རིག་གནས་ཆུ་ཚད་ཡོངས་ཁྱབ་ཏུ་དམའ་ཙམ་ཡོད། དེའི་རྐྱེན་གྱིས་སྒྲོག་འགྲེལ་གྱི་མ་ཡིག་གི་དོན་སྙིང་ལ་གོ་བ་ལེན་མ་ཐུབ་པར་སྒྲོག་འགྲེལ་གནད་བསྡུས་དེ་ཐེངས་གཅིག་བཀླགས་པ་ཙམ་ལས། ནང་དོན་དེ་ཁ་གསལ་གོ་བདེ་དང་ཤེས་སླ་བའི་ངང་ཁྱབ་སྤེལ་བྱེད་ཐུབ་ཀྱི་མེད། ད་དུང་ལོ་ན་རྒན་པའི་སྒྲོག་འགྲེལ་པ་ཁ་ཤས་སྤྱི་ཚོགས་ཀྱི་ཉམས་མྱོང་ཕུན་སུམ་ཚོགས་པོ་ཡོད་ཀྱང་སྒྲོག་འགྲེལ་བྱེད་དུས་ནང་དོན་དང་ཁ་བྲལ་བའི་གནས་ཚུལ་སོགས་ཐོན་གྱི་ཡོད། གསུམ་ནས་སྒྲོག་འགྲེལ་བྱེད་ཐབས་དང་སྒྲོག་འགྲེལ་གྱི་རྣམ་པ་སྣ་གཅིག་རང་བཞིན་དང་ཁ་ནས་ཐེངས་གཅིག་ཀློག་པ་ཙམ་ལས་སྒྲོག་འགྲེལ་གྱི་རྣམ་པ་དང་བྱེད་ཐབས་གསར་གཏོད་བྱ་རྒྱུ་མི་འདང་བ་སྟེ། གཞི་རིམ་དུ་སྒྲོག་འགྲེལ་བྱེད་པའི་ཁྲོད་སྒྲོག་འགྲེལ་པ་ཚོས་རང་ཉིད་ཀྱི་འཇོན་ནུས་དང་ཉམས་མྱོང་། ཡུལ་ལུང་གི་ཁྱད་ཆོས་དང་ཡུལ་སྲོལ་གོམས་གཤིས། དེ་མིན་སྲོལ་རྒྱུན་རིག་གནས། དྲ་རྒྱ་སོགས་དང་ཟུང་འབྲེལ་བྱས་ནས་སྒྲོག་འགྲེལ་བྱེད་ཐབས་དང་རྣམ་པ་གསར་གཏོད་བྱས་པ་ཧ་ཅང་ཉུང་ངུ་རེད་འདུག དེར་བརྟེན་མང་ཚོགས་ཀྱི་སྒྲོག་འགྲེལ་བྱེད་སྒོར་ཞུགས་པའི་ཧུར་བརྩོན་དང་སྒྲོག་འགྲེལ་གྱི་ཕན་འབྲས་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པས་གཤམ་གྱི་དོན་ཚན་གསུམ་ལ་ཡིད་འཇོག་བྱེད་དགོས།
གཅིག་ནས་གཞི་རིམ་དུ་སྒྲོག་འགྲེལ་ལས་དོན་སྤེལ་དུས་གོ་བདེ་ལ་ཤེས་སླ་བ་དང་མང་ཚོགས་ཀྱི་དངོས་ཡོད་འཚོ་བ་དང་འབྲེལ་བ་དམ་ཟབ་བྱས་ནས་སྒྲོག་འགྲེལ་བྱེད་དགོས། རིགས་པའི་གཞུང་ལུགས་ཀྱི་དགོངས་དོན་དེ་ཕུན་སུམ་ཚོགས་པའི་མང་ཚོགས་ཀྱི་ཐོན་སྐྱེད་བྱེད་སྒོ་ཁག་དང་ཟུང་འབྲེལ་བྱས་ཏེ་གང་དུ་བྱེད་སྒོ་ཡོད་ན་དེ་རུ་སྒྲོག་འགྲེལ་བྱེད་པ་དང་། དེས་མ་ཚད་སྒྲོག་འགྲེལ་གྱི་ནང་དོན་དེ་ཟས་གོས་སྡོད་གསུམ་དང་། སློབ་གསོ། རྒན་གསོ་སོགས་མང་ཚོགས་ཀྱིས་དོ་སྣང་ཆེན་པོ་བྱེད་པའི་གནད་དོན་དང་འབྲེལ་བ་བྱས་ནས་སྒྲོག་འགྲེལ་བྱས་ཚེ། སྒྲོག་འགྲེལ་བྱེད་སྒོ་ཁག་ལ་ཞུགས་པའི་མང་ཚོགས་ཀྱི་སེམས་ཤུགས་དང་ཧུར་བརྩོན་ཡང་ཆེ་རུ་འགྲོ་ངེས་ཡིན།
གཉིས་ནས་ལྕགས་རྡུང་བར་ཐོ་བ་མཁྲེགས་དགོས་ཞེས་པའི་དཔེ་ལྟར་གཞི་རིམ་སྒྲོག་འགྲེལ་པ་ཚོའི་སྤྱི་ཡོངས་ཀྱི་བྱང་ཚད་ལེགས་སུ་གཏོང་དགོས། སྒྲོག་འགྲེལ་བྱེད་མཁན་གྱིས་ཏང་གི་རིགས་པའི་གཞུང་ལུགས་དང་སྲིད་ཇུས། ལམ་ཕྱོགས། བྱེད་ཕྱོགས་བཅས་ལ་སློབ་སྦྱོང་དང་གོ་བ་གཏིང་ཟབ་ལེན་དགོས་ལ། སྒྲོག་འགྲེལ་གྱི་ནང་དོན་ལ་ཕྱོགས་སྡོམ་དང་གཙོ་གནད་ལ་དམ་འཛིན་བྱེད་པའི་ནུས་པ་ཆེ་རུ་བཏང་སྟེ། མང་ཚོགས་ཀྱིས་དོ་ཁུར་བྱེད་པའི་ནང་དོན་དང་གཙོ་གནད་ཁག་སྒྲོག་འགྲེལ་ལེགས་པོ་བྱེད་ཐུབ་ཚེ། སྒྲོག་འགྲེལ་དེ་གསོན་ཉམས་ལྡན་པ་ཞིག་དང་། མང་ཚོགས་ཀྱིས་དང་ལེན་དང་གོ་བ་ཡང་དག་ལེན་ཐུབ་པ་ཞིག་ཡོང་།
གསུམ་ནས་སྒྲོག་འགྲེལ་བྱ་ཐབས་ལ་གསར་གཏོད་ཀྱི་རང་བཞིན་ལྡན་དགོས། མང་ཚོགས་ཀྱི་དངོས་ཡོད་གནས་ཚུལ་ལ་དམིགས་ནས་སྒྲོག་འགྲེལ་བྱེད་པའི་བརྒྱུད་རིམ་ཁྲོད་བློ་སྒོ་ཆེར་སྐྱེད་ཀྱི་ཐབས་ལམ་མང་ཙམ་གསར་གཏོད་བྱེད་དགོས། དཔེར་ན་སྲོལ་རྒྱུན་རིག་གནས་དང་རིགས་པའི་གཞུང་ལུགས་ཟུང་འབྲེལ་བྱས་ཏེ། ཞིང་འབྲོག་ཁུལ་དུ་དར་ཁྱབ་ཆེ་བའི་སྲོལ་རྒྱུན་གཏམ་དཔེ་དང་། ཤོད་རྒྱུན་དང་གཏམ་རྒྱུད་སོགས་དང་ཟུང་འབྲེལ་དམ་ཟབ་བྱེད་པ་དང་། སྒྲོག་འགྲེལ་པ་རྒན་གྲས་ཚོས་རང་ཉིད་ཀྱི་ཕུན་སུམ་ཚོགས་པའི་ཉམས་མྱོང་དང་ཟུང་འབྲེལ་བྱེད་པ། གཞོན་པ་ཚོས་དེང་རབས་ཀྱི་དྲ་རྒྱ་སོགས་བེད་སྤྱོད་བཏང་སྟེ་ཏང་གི་རིགས་པའི་གཞུང་ལུགས་དང་གལ་ཆེའི་སྲིད་ཇུས་ཁག་རྒྱ་ཆེའི་མང་ཚོགས་ཁྲོད་ཁྱབ་སྤེལ་བཏང་ནས་ཏང་གི་རིགས་པའི་གཞུང་ལུགས་གཞི་རིམ་དུ་རྩ་བ་ཚུགས་ནས་མྱུ་གུ་འབུས་ཐུབ་པར་བྱེད་དགོས།
（འདམ་གཞུང་རྫོང་ཨུད་ཏང་གི་སློབ་གྲྭའི་འཕྲིན་ལས་རྣམ་རྒྱལ）