ཕ་ཡུལ་བྱང་ཐང་ལ་བསྟོད་པ།
འཛམ་གླིང་འཛིན་མའི་གཙུག་གི་ཏོག །
མཐོ་སྒང་འབྲོག་ར་ནོར་གྱི་གཞོང་། །
ཡིད་འོང་བྱང་ཐང་འདོད་འབྱུང་ནོར། །
ང་ཡི་གཅེས་པའི་ཕ་ཡུལ་ལགས། །
ཤན་རྩའི་ཉ་དེའུ་གནའ་ཤུལ་སོགས། །
ལོ་རྒྱུས་རིག་གནས་རྔམས་ཁ་མཐུག །
ནག་ཤོད་སུམ་པའི་ལྟེ་བ་བརྗིད། །
ཧོར་ཚོ་སོ་དགུའི་སྙན་གྲགས་ཆེ། །
སྲིད་བཟང་ལྷ་ལམ་ཡངས་མོའི་ངོར། །
བྱང་ཐང་འཕོ་འགྱུར་གློག་གི་གར། །
སློབ་གསོའི་སྦྲང་ཆར་ཟིལ་མ་ལས། །
བྱང་ཐང་ཤེས་རིག་སྐྱེད་ཚལ་མཛེས། །
ཉམས་དགའི་མུ་མེད་རྩྭ་ཐང་དུ། །
ཕྱུགས་རིགས་དཀར་ནག་སྐར་ཚོམ་གྲམ། །
ཤ་མར་འཛོམས་སའི་བྱང་ཐང་ཡུལ། །
འབྱོར་ཕྱུག་ཞི་མཐུན་འཕེལ་རྒྱས་ཡག །
གྲོང་གསེབ་དར་རྒྱས་སྐྱ་རེངས་ལས། །
ནག་ཆུར་འཕེལ་རྒྱས་ཉིན་བྱེད་ཤར། །
བྱང་ཐང་མི་དམངས་དགའ་སྤྲོའི་ངང་། །
རྫོགས་ལྡན་འཚོ་བའི་དཔལ་ལ་རོལ། །
ཨེ་མ་ཕ་ཡུལ་བྱང་ཐང་ལགས། །
དྭངས་གཙང་དྲི་མེད་རང་བྱུང་ཚལ། །
ཨེ་མ་ཕ་ཡུལ་བྱང་ཐང་ལགས། །
བུ་ངའི་ཁྱིམ་གཞིས་དྲོན་མོ་ལགས། །