དབྱངས་གསལ་སོ་བཞི། ངག་ནས་སྐད་ཆ་ཁྲལ་ཁྲོལ་སྨྲ་ཤེས་པ་ནས་བཟུང་སྟེ། དེ་དག་ཕན་ཚུན་འཕྲད་ཅིང་རྡེབ་པའི་དབྱངས་རྟར་བརྟེན་ནས་རང་གི་དགའ་སྐྱོ་ཆགས་སྡང་གི་མི་ཚེའི་མྱོང་བ་ཐམས་ཅད་གཞན་ལ་བཤད་ཅིང་རང་ཉིད་གཅིག་པུས་ཆིག་ལབ་ཀྱང་རྒྱག་མྱོང་། ལག་གིས་ཡི་གེ་ཁྱར་ཁྱོར་འབྲི་ཤེས་པ་ནས་བཟུང་སྟེ། རང་གི་དུང་བ་ཡོད་ཚད་དབྱངས་གསལ་སོ་བཞིའི་གཟུགས་སུ་སྤྲུལ་ནས་གཞན་ལ་ངོམས་ཤིང་རང་ཉིད་གཅིག་པུ་མཚན་མོ་ཇི་ཙམ་གཉིད་ལས་ལྷག་པའི་ཟིལ་ཤུགས་ཤིག་གིས་བསྐུལ་བ་ད་ལྟའང་ཡིད་ལ་གསལ་པོར་འཆར། ད་དུང་། ཁེར་རྐྱང་དང་གཞན་གྱིས་བསམ་ཤེས་བྲལ་བའི་གནད་དོན་རེ་རེར་འཕྲད་པའི་སྐབས་སུ་ཡང་། ཁྱེད་ཉིད་གཅིག་པུ་ཕྱོགས་རིས་བྲལ་བའི་ཉི་མའི་འོད་ཟེར་ཞིག་དང་འདྲ་བར། བདག་གི་སེམས་ཀྱི་མུན་ཁུང་རེ་རེ་བརྟོལ་ཏེ་གསལ་ཞིང་དྲོ་བར་བྱས་པའི་དབང་གིས་ད་བར་ང་རང་གདེང་ཚོད་དང་སྤོབས་པས་འཚོ་བའི་ཉེར་རྒྱུ་ཁོ་ན་ཉིད་དུ་གྲུབ།

རང་ཉིད་གཅིག་པུར་དཔེ་ཁང་ནང་དུ་དྲོ་སོབ་སོབ་ཀྱི་ཡིད་ཀྱི་འཇིག་རྟེན་ཞིག་སྐྲུན་ཆོག་ལ། སྔོ་ལྗང་གི་འཇིག་རྟེན་དང་བྱ་བྱེའུ་ཡི་སྐད་སྙན། ད་དུང་། ལྷུང་ལྷུང་དུ་བཞུར་བའི་ཆུ་མོ་དང་ཆུ་མོའི་ནང་དུ་རྩེད་འཇོར་རོལ་བའི་ཉ་ཆུང་གསེར་མིག་གི་རང་དབང་གི་འཁྱུག་རྩལ་གང་བདེར་བློས་བསླངས་ཀྱང་བྱས་ཆོག ཚ་གདུག་གིས་མནར་བའི་དབྱར་གཞུང་རིང་མོར་ཡང་། དབྱངས་གསལ་སོ་བཞིའི་བསིལ་གཡབ་ཆེན་པོ་དེ་ལ་བརྟེན་ཏེ་ཙན་དན་ཟླ་བ་ག་བུར་ལྟ་བུའི་བསིལ་བའི་བདེ་བ་ཞིག་ལ་རོལ་ཆོག་པས། ལུས་ནས་རྔུལ་ཆུ་ཁྲུམ་ཁྲུམ་བཞུར་ནའང་། སྨྱུ་གུའི་ཁ་ནས་བཞུར་ཏེ་ཡོང་བའི་དབྱངས་གསལ་སོ་བཞིའི་ཆབ་ཀྱིས་བྲན་པས། དབྱར་གཞུང་དེའང་ཡིད་ཀྱིས་རང་དགར་ཁ་ལོ་སྒྱུར་ཆོག་པའི་དུས་ཚིགས་ཉམས་སུ་དགའ་བ་ཞིག་ཏུ་གྲུབ། ཁེར་རྐྱང་གི་སྣང་བ་སྨུག་ཀློང་བཞིན་སེམས་ཀྱི་རི་ལྡེབས་སུ་ལང་ལིང་གིས་འཁོར་སྐབས། དབྱངས་གསལ་སོ་བཞིས་སྨུག་ཀློང་དེ་དག་གར་སྟབས་སྒྱུར་བའི་རི་དྭགས་མ་ཡི་སྐྲ་ལོ་མཁའ་རུ་འཕྱོ་བའི་གཟུགས་སུ་སྤྲུལ་ཆོག་ལ། རི་བོའི་བཞིན་ལ་གཡོགས་པའི་སེང་རས་ཤིག་དང་འདྲ་བར་ཡིད་དུ་འཁྱོག་ལ་འཕྱང་བའི་རྩོལ་བ་བསྐྲུན་ཐུབ་པས། ཡིད་ལས་བྱུང་བའི་ཁེར་རྐྱང་དེ་ཉིད་ཡིད་ཀྱི་བསྟར་ལ་བརྒྱུས་པའི་དབྱངས་གསལ་སོ་བཞིའི་ཉིན་བྱེད་ཀྱི་ནུས་མཐུས་སྡུག་གི་སྨུག་པ་རང་སངས་སོང་བའི་དཔེ་རུ་སོང་བ་གྲངས་མེད་ཡིན། ད་དུང་། སྐབས་འགར་སེམས་ལ་གྲང་ཤུར་རྒྱག་དུས་སུའང་། དཔེ་སྒྲོམ་ཐོག་ནས་དབྱངས་གསལ་སོ་བཞིའི་གཟུགས་སུ་སྤྲུལ་བའི་མགུར་མ་དེ་དག་ཀློག་ཐེངས་རེར། ཤིན་ཏུ་དབེན་པའི་རི་ཁྲོད་ཅིག་ཏུ་སླེབས་པ་འདྲ་ལ། རི་ཁྲོད་དེ་ཡི་ཁོ་ར་ཁོར་ཡུག་ཀུན་ཏུ་བཞད་ཅིང་བསུང་ཞིམ་འཐུལ་བའི་སྨན་རྩྭ་ལ་སོགས་རྩྭ་དང་རྩི་ཤིང་ཡིད་ཀྱི་ངོས་སུ་དྲངས་ཀྱང་ཐུབ། དེ་དག་གི་གསེབ་ནས་སྐབས་རེ་རི་དྭགས་ཤྭ་བས་མིག་གཉིས་གྲུང་ཤ་དོད་པོས་མགོ་བོ་ཀེར་ཙམ་ཀེར་ཙམ་བྱེད་པའི་སྣང་བརྙན་ཞིག་ཀྱང་ཐོན་སྲིད་པས། དར་ཅིག་ཡིད་ནི་ཆུ་ཕྲན་ལྟ་བུར་ཤང་ཤང་སྒྲོག་བཞིན་གྲོང་ཁྱེར་ཞིག་ནས་འབྱམས་ཤིང་བརླིང་ལ་ངོས་ཀྱང་ཤིན་ཏུ་སྙོམས་པའི་རྒྱ་མཚོ་ཞིག་གི་ངོགས་སུ་ཐོན་པའི་སྣང་བ་སྟེར་ཐུབ་སྟབས། མི་ཚེའི་འགྲུལ་བཞུད་ཀྱི་ལམ་དུ་འཕྲད་པའི་སུན་སྣང་དང་གཞན་གྱི་མཐོང་ཆུང་དེ་དག་ཀྱང་། གོས་ཀྱི་ཐོག་ཏུ་ཟགས་པའི་ཐལ་རྡུལ་བཞིན། སྤྲུག་ཙམ་སྤྲུག་ཙམ་བྱས་ན་ཆོག་པས་གླེང་རིན་གཏན་ནས་མེད་པ་ཞིག་ཏུ་མཐོང་།

དབྱངས་གསལ་སོ་བཞི། ལོ་ངོ་སྟོང་ཕྲག་གཅིག་ཙམ་རིང་། མང་དུ་མ་སོང་ལ་ཉུང་དུའང་ཕྱིན་མེད་པའི་ཡིག་གྲངས་ཤིན་ཏུ་ཉུང་ཉུང་དེས། བཀའ་བསྟན་གླེགས་བམ་སུམ་བརྒྱ་ལྷག་གི་སྙིང་དོན་མེ་ལོང་ངོས་སུ་གཟུགས་བརྙན་འཆར་བ་ཇི་བཞིན་ལྷམ་མེར་གསལ་བར་ནུས་པ་དེ་ནི་ཁྱེད་ལ་མངའ་བའི་བློ་རྒྱ་ཡིན་ལ། དེ་ལས་ཕྱུང་བའི་ཕྱི་དང་ནང་གི་གནས་ལུགས་མཐར་ཐུག་རིགས་པའི་ལམ་ནས་བརྡར་ཤ་བཅད་དེ་ཕུ་ཐག་ཆོད་པའི་ཚིག་གིས་གཏན་ལ་ཕབ་པ་དེ་ནི་ཁྱེད་ལ་མངའ་བའི་ཟབ་ཚད་ཡིན། མཐོ་སྒང་གི་གནམ་གཤིས་ཀྱིས་ལུས་པོ་གྲང་རེག་གིས་གཙེས་ཏེ་འདར་ལྕུག་ལྕུག་བྱས་ནའང་། དབྱངས་གསལ་སོ་བཞིས་བསྐྲུན་པའི་དྲོད་ཁོལ་དེས་ལུས་པོ་ཚ་སོབ་སོབ་ཏུ་གྱུར་བཞིན་ཡོད་པ་མ་ཡིན་ནམ། དེ་བཞིན། རྣམ་ཐར་དང་རྟོགས་བརྗོད། ལེགས་བཤད་དང་མགུར་གླུ། སྙན་ངག་དང་སྐྱེས་རབས། ལོ་རྒྱུས་དང་རྩིས་གཞུང་། དམའ་བ་ཟོ་ཟོ་འཐུང་འཐུང་ནས། མཐོ་བ་ཐལ་ལན་རྣམ་ཐར་སྒོ་བཞིའི་བརྒྱུད་རིམ་ཀུན་ལ་དབྱངས་གསལ་སོ་བཞི་ཁྱེད་ཀྱི་མཐའ་ལས་གྲོལ་ཐབས་གཏན་ནས་མེད་པས། ཕ་མེས་ཀྱི་ཡིད་ཁོང་དུ་གྲུབ་པའི་ཤེས་རབ་དང་འཇོན་ནུས་ཡོད་ཚད། ཁྱེད་ཀྱིས་སྒྲ་དང་གཟུགས་སུ་སྤྲུལ་ཏེ་ད་ལྟའི་བར་དུའང་འཛམ་གླིང་གི་མཁའ་དབྱིངས་སུ་འཚེར་བཞིན་པ་ནི་ཅི་འདྲའི་ཡིད་དུ་འོང་བ་ཞིག་རེད་ཨང་།

དབྱངས་གསལ་སོ་བཞི། ཁྱེད་ཀྱི་གཟུགས་བརྙན་མཐོན་པོའི་བྲག་གི་སྟེང་དུ་རྟག་བརྟན་ཚུལ་གྱིས་བརྗིད་ཅིང་འགྱིང་བའི་རྣམ་པས་གནས་ཡོད་ལ། དལ་འགྲོ་ཆུ་མོའི་གཞུང་དུ་དཔར་བས་མཚོ་མོའི་ལྟོ་བར་ག་ལེར་བཞུར་བཞིན་འབྱམས་ཤིང་ཀླས་པའི་ངང་དུ་འཁྱིལ་ནས་ཡོད། བར་དུ་རླུང་རྟའི་གཟུགས་ཀྱིས་བསེར་བུ་རླུང་དང་བསྡོངས་ཏེ་ཕྱི་སྣོད་ཀུན་གྱི་ལུས་ལ་བྱབ་བྱབ་བྱེད་བཞིན་འདུག ཕ་ཡུལ་གྱི་རི་ཆུ་ཀླུང་གསུམ། དབྱངས་གསལ་ཁྱེད་ཉིད་ཡོད་པས་གཞི་ནས་རི་བོ་དེ་ནི་རི་བོ་མིན་ལ། ཆུ་མོ་དེའང་ཆུ་མོ་མིན། རླུང་བུ་དེའང་རླུང་བུ་མིན་པར། དེ་དག་ཡོད་ཚད་སྨྲ་ཤེས་ཤིང་འགུལ་ནུས་པ། བསམ་བློའི་རྒྱུ་བ་ལྷོག་ལྷོག་ཏུ་འཁོལ་བའི་སྲོག་གི་རྩ་བ་ཤིན་ཏུ་བརྟན་པའི་སྐྱེས་བུ་སྟོབས་ལྡན་ཞིག་གི་ངོ་བོར་གྲུབ་པ་ཀུན་གྱི་མཐོང་ཆོས་སུ་གྱུར།

དབྱངས་གསལ་སོ་བཞི། ཁྱེད་ཀྱི་ལོ་རྒྱུས་ནམ་མཁའི་མཐའ་ལྟར་ཤིན་ཏུ་རིང་ཡང་། བདག་ལ་མཚོན་ན། ཤིན་ཏུ་བསྡུས་པར་གྲུབ་པའི་དབྱངས་གསལ་སོ་བཞི་དེ། ད་ལྟ་བདག་གི་གམ་ན་འོད་དུ་འཚེར་བའི་མུ་ཏིག་རྡོག་པོ་ཞིག་ཏུ་གྲུབ་འདུག་པས། ལྷོག་ལྷོག་ཏུ་ལྡིང་བའི་ཙིཏྟའི་ཚུལ་གྱིས་སྙིམ་པས་ཤིན་ཏུ་གཟབ་ནན་ངང་ནས་སྐྱོར་རྒྱུ་དེ་ཉིད་སྤྲོ་སྣང་ཞིག་ཏུ་གྱུར་ཡོད་ལ། མ་འོངས་བདག་གི་བུ་དང་ཚ་བོ་དང་ནི་ཡང་ཚའི་སྐབས་སུའང་། འབྲས་ལྡན་ཤིང་བཞིན་ཀུན་གྱིས་ལོངས་སུ་སྤྱོད་པའི་བགོ་སྐལ་ཉིད་དུ་འགྱུར་ཐུབ་ལ། དགའ་སྐྱོ་ཆགས་སྡང་ཡོད་ཚད་ཁྱེད་ཀྱི་གཟུགས་སུ་འགོད་པའི་བགྱི་བ་ལྷུར་གྱིས་ལེན་པ་དང་། ཁྱེད་ཉིད་སྔར་བས་རི་བོའི་ཐོད་དང་ཆུ་མོའི་པང་། རླུང་གི་རྩེ་མོར། འགྱིང་ངེར། ལྷོད་པོར། ཀྲོང་ངེར་གནས་རྒྱུ་དེ་ཉིད་ཁྱེད་ལ་བཅངས་པའི་དུང་བ་ཡིན་ལ། བདག་གི་འཚོ་བའི་གྲུབ་ཆ་གལ་ཆེན་ཞིག་ཀྱང་ཡིན་ནོ།།