རོགས་མཐུན་གྱི་བརྩེ་དབྱངས།
ཆར་པ་ཆར་པ་མ་གསུངས། །
ཆར་པའི་ཐིགས་པ་རེ་རེར། །
རོགས་མཐུན་སེམས་ཀྱི་ལྷ་མོའི། །
མིག་ཆུའི་བདུད་རྩི་འདྲེས་ཡོད། །
མེ་ཏོག་མེ་ཏོག་མ་གསུངས། །
མེ་ཏོག་ཟེའུ་འབྲུ་རེ་རེར། །
ཞེ་མཐུན་སྙིང་གི་བྱམས་པའི། །
འཛུམ་ཆུང་མེ་ཏོག་བཞད་ཡོད། །
ཁུ་བྱུག་ཁུ་བྱུག་མ་གསུངས། །
ཁུ་བྱུག་གསུང་སྐད་རེ་རེར། །
བློ་དཀར་སྐར་མ་ལྷ་མོའི། །
དྲུག་འགྱུར་གླུ་སྐད་འདྲེས་ཡོད། །
རྨ་བྱ་རྨ་བྱ་མ་གསུངས། །
རྨ་བྱའི་གཤོག་སྒྲོ་རེ་རེར། །
དགའ་ལོ་སྙིང་གི་སྐྱ་ཡའི། །
མཚར་སྡུག་གཟུགས་བྱད་འདུས་ཡོད། །
ནོར་གནག་ནོར་གནག་མ་གསུངས། །
ནོར་གྱི་རྩིད་པ་རེ་རེར། །
མཛེས་ལྡན་ཡིད་ཀྱི་ལྷ་མོའི། །
སྐྲ་ལོའི་རང་མདངས་བསྲེས་ཡོད། །
ཆུ་མོ་ཆུ་མོ་མ་གསུངས། །
ཆུ་མོ་རྒྱུག་ཐེངས་རེ་རེར། །
ཡིད་མཐུན་ན་ཆུང་སྒྲོལ་མའི། །
ངག་རྒྱུན་མཉམ་དུ་གནས་ཡོད། །
གཡང་དཀར་གཡང་དཀར་མ་གསུངས། །
གཡང་དཀར་བལ་ཁ་རེ་རེར། །
ལས་མདུད་ཐེབས་པའི་བུ་མོའི། །
གཤིས་རྒྱུད་ལྷན་དུ་གནས་ཡོད། །
དཔེ་དེབ་དཔེ་དེབ་མ་གསུངས། །
དཔེ་དེབ་ཤོག་ལྷེ་རེ་རེར། །
ང་དང་སྙིང་གི་མཛའ་མོའི། །
བརྩེ་བའི་ལོ་རྒྱུས་འཁོད་ཡོད། །
སྒྲ་སྙན་སྒྲ་སྙན་མ་གསུངས། །
སྒྲ་སྙན་སྟོང་སྐུད་རེ་རེར། །
ང་དང་སྐར་མ་ལྷ་མོའི། །
མཛའ་བརྩེའི་སྙིང་གཏམ་བརྒྱུས་ཡོད། །