ཁ་པར།
ཏིར། ཏིར།
ཏིར། ཏིར།
ཉིན་དེ་དག་ཨ་ཇོ་དཔལ་ལྡན་ལ་ཆ་མཚོན་ནས་བཤད་ན། ཤིན་ཏུ་ནས་འུར་ཟིང་གིས་ཁེངས་པའི་ཉིན་མ་འགའ་རེད། ཤིན་ཏུ་ནས་ལྷིང་འཇགས་ཐབས་བྲལ་བའི་བྲེལ་འཚུབ་ཀྱི་ཉིན་མ་འགའ་རེད། ཉིན་དེ་དག་གི་རིང་། ཁོའི་ལུས་པོ་ངལ་དུབ་ཀྱིས་ཡོངས་སུ་མནར་ཞིང་། ཡིད་སེམས་ཧྲིལ་པོ་ཤིན་ཏུ་ནས་ཨ་ཐང་ཆད་ཡོང་། འདོད་མོས་ཅི་ཡང་མེད་པར་གཞན་གྱི་གམ་དུ་མགོ་བོ་སྒུར་སྒུར་དང་ལྕེ་སྣར་སྣར་བྱ་རྒྱུ། གཟུགས་ཁམས་མི་བདེ་ཡང་ཨུ་ཚུགས་ཀྱིས་ཁ་ནང་དུ་ཆང་རག་ལྡུད་རྒྱུ། དོན་དངོས་དང་འགལ་ཏེ་གཞན་ལ་ཁ་ཡག་ངོ་དགའི་ཟློས་གར་འཁྲབ་རྒྱུ། གྲོད་པ་ལྟོགས་ཏེ་སྡུག་སྐད་ཤོར་ཡང་ཟས་ཀྱི་དང་ག་མེད་པ་སོགས་མདོར་ན་ཉིན་དེ་དག་གི་རིང་ཁོའི་སེམས་པ་དངངས་འཚབ་ཅིག་དང་བྲེལ་འཚུབ་ཅིག་གིས་ཡོངས་སུ་མནན་ནས། རང་སེམས་རྣལ་ལ་དབབ་དཀའ། དེ་དག་ཡོད་དོ་ཅོག་ཁ་པར་ཞེས་པའི་གདོན་འདྲེ་དེས་ལན་པ་རེད། ཁ་པར་གྲུ་བཞི་ནར་མོའི་དབྱིབས་ཅན་དེ་ཁུག་མའི་ནང་དུ་བཅུག་པ་ནས་བཟུང་། ཁོ་ལ་ཁོམ་པ་ཉིན་གཅིག་ཀྱང་བྱུང་མེད་པ་འདྲ། ད་ལྟ་ཁ་པར་གྱི་སྐད་སྒྲ་དེ་ཁོའི་རྣ་ལམ་དུ་གྲགས་ཐེངས་རེར། ཁོའི་སེམས་པ་དེ་མ་ཉིད་དུ་སུན་སྣང་ཞིག་གིས་ཡོངས་སུ་བཅིངས་འགྲོ
ཁོ་རང་རྒན་ཡོལ་ཞུས་རྗེས། མ་གཞི་བྱས་ན་ཁྱིམ་དུ་བཟའ་མི་བུ་ཕྲུག་ཚོ་དང་ལྷན་དུ་སྒྲོག་རྩེ་གཅིག་གི་ཐོག་ཏུ་རུབ་རུབ་བྱས་ནས་ཁ་ལག་ཞིམ་པོ་ཞིག་བཟའ་དགོས་བསམས་ཀྱང་། ཚགས་པར་དང་དུས་དེབ་འགའ་རེར་ལྟ་ཞོར་ལྷིང་འཇགས་ཀྱི་འཚོ་བ་ཞིག་མཛེས་སྡུག་ངང་ཕར་ལ་སྐྱེལ་དགོས་སྙམ་ཡང་། བཟའ་མི་བུ་ཕྲུག་ཚོ་ཁྲིད་དེ་ཡུལ་སྐོར་དུ་འགྲོ་བའི་འཆར་གཞི་བཀོད་ཀྱང་། རོང་ཁུལ་དུ་ལོག་སྟེ་ལོ་ན་བགྲེས་པའི་ཕ་མ་གཉིས་ལ་སྲི་ཞུ་བསྒྲུབ་དགོས་བསམས་ཀྱང་། ཁ་པར་གྱི་སྐད་སྒྲ་གྲགས་ཐེངས་རེར། ཁོའི་མི་ཚེ་འདིའི་འཆར་གཞི་མང་དག་ཅིག་དེ་ལྟར་ཉིན་མ་རེ་རེ་བཞིན་ནར་འགྱངས་སུ་མི་གཏོང་ཀ་མེད་དུ་གྱུར།
མཚོ་མོ། ད་ཁ་པར་ལ་མགོ་འཁོར་ནས་མ་སྡོད། མགྱོགས་པོ་ཁ་ལག་ཟོས་ཤིག ཁོས་ཁྲོ་ཉམས་ཤིག་བསྟན་ཞོར་ཆུང་མར་ཁ་ལག་བཟོ་དགོས་པའི་དྲན་སྐུལ་བྱས།
བུ། ཁ་པར་ལ་བལྟས་ནས་ཡོན་ཏན་ཞིག་ག་ལ་ཤེས། མགྱོགས་པོ་སྦྱོང་ཚན་ཕྲིས་ཤིག ཁོས་དེ་སྐད་སྨྲ་བཞིན་བྱིས་པར་ཁ་པར་ལ་དབྱིངས་མ་ཞུགས་པར་སྦྱོང་ཚན་འབྲི་དགོས་པའི་སྐུལ་མ་གཏོང་བཞིན་ཡོད། མ་གཞི་བྱས་ན་ཁོ་དང་ཆུང་མའི་དབར་ལ་བརྩེ་བ་ཟབ་མོ་ཡོད། འོན་ཀྱང་། ཁ་པར་ལ་ཕུར་ཕུར་བྱ་རྒྱུ་དགའ་དྲགས་ན་ཁོ་དང་ཆུང་མའི་དབར་ལའང་དོན་མེད་ཀྱི་ཁ་རྩོད་མང་དག་ཅིག་ཤོར་འོང་། ལྷག་པར་དུ། དེང་སང་གི་གཞོན་ནུ་མང་པོས་ཁ་པར་བརྒྱུད་ཕན་ཚུན་ངོ་ཤེས་བསྒྲིགས་ཏེ་སྙིང་གཏམ་ཕར་བཤད་ཚུར་བཤད་ལ་མགོ་འཁོར་བཞིན་ཡོད་པ་དང་། བཟའ་ཚོ་མང་དག་ཅིག་ཁ་པར་གྱི་དབང་གིས་བཟའ་ཚང་ཁ་བྲལ་དུ་སོང་བ་ཁོ་རང་གིས་དངོས་སུ་གོ་ཐོས་བྱུང་བས། དུས་དེ་ནས་བཟུང་། ཁོ་རང་ཁ་པར་ལ་ཤིན་ཏུ་ནས་སྡང་། ཁ་པར་ལ་ཤིན་ཏུ་སྡང་བས། ཁོས་རང་གི་ཁུག་མ་ནས་ཁ་པར་ཕྱིར་བཏོན་ཏེ་ཁ་པར་གྱི་ཁ་བཀག་སོང་།
ཁ་པར་མེད་པའི་ཉིན་མ་དེ་དག་ཨ་ཇོ་དཔལ་ལྡན་ལ་ཆ་མཚོན་ན་ཤིན་ཏུ་ནས་ལྷིང་འཇགས་རེད། ད་ནི་གཞན་གྱིས་མགྲོན་དུ་འབོད་མཁན་མེད་ལ། གཞན་གྱིས་སྐྱབས་ཞུ་རེ་འབོད་བྱེད་མཁན་ཡང་མེད། ཁ་པར་དང་རྒྱང་དུ་གྱེས་པས། ཁོས་ཉིན་གང་ཁྱིམ་དུ་ལུས་སེམས་རྣལ་ལ་ཕབ་སྟེ་དཔེ་ཆ་ལྟ་ཀློག་བྱས་ཆོག་ལ། དུས་རྒྱུན་ཇི་བཞིན་ཆང་རག་བཏུང་དྲགས་ནས་མགོ་བོ་ན་བའི་སྡུག་བསྔལ་ཡང་མེད། ཁ་པར་མེད་པའི་ཉིན་མ་དེ་དག་ནི་ཤིན་ཏུ་ནས་དབེན་འཇགས་ཡིན་ལ་ཤིན་ཏུ་ནས་སྟོང་འཇགས་ཀྱང་རེད། ཁོ་ལ་མཚོན་ན། ད་ལྟ་དེ་ལྟ་བུའི་ཁུ་སིམ་གྱི་འཚོ་བར་དགའ་ཞིང་ཞེན་པར་གྱུར། ཁ་པར་མེད་པའི་ཉིན་མ་དེ་དག་གི་རིང་། ཁོས་ཁྱིམ་དུ་ཁོ་རང་ཆེས་ལྟ་བར་སྤྲོ་བའི་དཔེ་ཆ་མང་དག་ཅིག་ལ་ལུས་སེམས་རྣལ་མོས་ལྟ་ཐུབ་པ་བྱུང་ལ། ཁ་པར་མེད་པའི་ཉིན་མ་དེ་དག་རིང་། ཁོས་བཟའ་མི་བུ་ཕྲུག་ཚོ་ཁྲིད་དེ་ལྷ་ས་དང་། ལྷོ་ཁ། གཞིས་ཀ་རྩེ་སོགས་སུ་གནས་ཆགས་པའི་གནས་བཟང་མང་པོར་མཇལ་སྐལ་བྱུང་། ད་དུང་ཁོས་རང་ཉིད་སྐྱེ་ས་འཚར་སའི་རོང་ཁུལ་དུ་ལོག་ནས་ཁ་ཁུ་སིམ་པའི་ཞིང་གྲོང་གི་འཚོ་བ་ལ་རོལ་ཞོར་དྲིན་ཆེན་ཕ་མ་གཉིས་ལ་བསྙེན་བཀུར་ཞབས་ཏོག་ཀྱང་བསྒྲུབས་ཐུབ་པས། ཁོའི་སེམས་པ་དལ་གྱིས་ལྷོད་ལ་བབས།
ཁ་པར་མེད་པའི་ཉིན་མ་དེ་དག་གི་རིང་། ཁོས་ལྷ་སའི་ཉེ་འཁོར་དུ་འཚོ་བའི་བགྲེས་སོང་གཞན་དང་འདྲ་བར་ཞོགས་པ་སྔ་པོ་ནས་མལ་ལས་ལངས་ཏེ་གླིང་སྐོར་ལ་འགྲོ་ཐུབ་པ་བྱུང་ལ། ཇ་ཁང་དུ་རང་དང་ན་མཉམ་གྱི་བགྲེས་སོང་འགའ་རེ་དང་ལྷན་དུ་གསོལ་ཇ་མངར་མོ་འཐུང་ཞོར་ཁ་བརྡ་བྱེད་པར་གོམས་ཡོད། ཁ་པར་དང་རྒྱང་དུ་གྱེས་པ་ནས་བཟུང་། ཁོ་རང་ངོ་མ་མི་རྒྱུན་གཏན་ཅིག་ཏུ་གྱུར་འདུག
ཉིན་ཞིག་གི་ཞོགས་པར་ཁོ་རང་རྒྱུན་གཏན་ཇི་བཞིན་མལ་ལས་ལངས་ཏེ་འཆམ་འཆམ་ལ་སོང་། གློ་བུར་དུ་ཁོའི་རྒྱབ་ཕྱོགས་ནས་མི་ཞིག་གིས་ཁོ་རང་གི་མིང་ནས་འབོད་ཀྱིན་འདུག མི་དེའི་སྐད་གདངས་ལ་ཉན་ན་ཁོ་ལ་ཆ་རྒྱུས་ཧ་ཅང་ཆེ། ཁོས་ཁ་ཕྱིར་བསྐོར་ནས་ལན་ཅིག་ལྟ་དུས། དེ་ནི་ཁོ་རང་གི་གྲོགས་པོ་བློས་ཐུབ་ཨ་ཇོ་བཀྲ་ཤིས་རེད། ཨ་ཇོ་བཀྲ་ཤིས་ཀྱིས་ཧ་ཅང་ཡ་མཚན་པའི་མིག་ཟུང་གིས་ཁོའི་གདོང་ལ་ལྟ་ཞོར། དངོས་གནས་གྲོགས་པོ་རང་རེད་འདུག ངོ་མ་བསམ་ཡུལ་ལས་འདས་སོང་ཞེས་དགའ་སྣང་དང་ཡ་མཚན་གྱི་རྣམ་འགྱུར་ཅིག་ཅར་དུ་སྟོན་བཞིན་དེ་ལྟར་བཤད་པར། ཨ་ཇོ་དཔལ་ལྡན་གྱིས་དེ་མ་ཉིད་དུ། ཅི་རེད། ང་འཆམ་འཆམ་ལ་འགྲོ་བ་མཐོང་དུས་ཁྱོད་རང་ཧང་སངས་བྱུང་ངམ་ཞེས་དྲིས་པར། བཀྲ་ཤིས་ཀྱིས་སྐད་གདངས་ཧ་ཅང་དམའ་མོས། མ་རེད་ལགས། མི་ཚོས་ཟེར་ན་ཁྱོད་རང་སྔ་མོ་ནས་གྲོངས་ཚར་བ་རེད་ཟེར་གྱི་འདུག་ཅེས་ཤོད་ཞོར་མིག་མཐར་དགའ་སྐྱོ་འདྲེས་མའི་མིག་ཆུ་ཞིག་ཀྱང་ངང་གིས་འཁྱིལ། བཀྲ་ཤིས་ཀྱི་སྐད་ཆར་ཉན་རྗེས། ཨ་ཇོ་དཔལ་ལྡན་ཡོངས་སུ་ཁྲོས་སོང་། ཁོས་དེ་ལྟར་བཀྲ་ཤིས་ཀྱི་གདོང་ལ་སྡིག་མཛུབ་བསྟན་ནས། ཧེ་ཧེ། རང་གིས་ང་འཆི་བར་སྒུག་ཡོད་ཀྱང་། ང་རང་གི་བསོད་ནམས་ཀྱི་སྟོབས་ལ་བརྟེན་ནས་མ་ཤི་ཙམ་ཞིག་བྱུང་། ཕལ་ཆེར་ཁྱོད་རང་བློ་ཕམ་སྐྱེ་ཡོད་ངེས་རེད་ཅེས་ཁྲོ་ཚིག་སྨྲས་པར། ཨ་ཇོ་བཀྲ་ཤིས་ཀྱང་ཁོའི་སྐད་ཆར་ཉན་རྗེས་སེམས་ལ་ཁོང་ཁྲོ་ཞིག་ངང་གིས་ལངས་ནས། དེ་འཕྲལ་སྐད་ཆ་ཚིག་གཅིག་ཀྱང་མ་བཤད་པར་ཨ་ཇོ་རྣམ་རྒྱལ་དང་འགྲོགས་ཏེ་རྒྱང་དུ་གྱེས།
ཕྱི་ཉིན་ཚགས་པར་རལ་པ་ཞིག་གི་ཐོག་ནས་ཨ་ཇོ་དཔལ་ལྡན་གྱིས་བསམ་ཡུལ་ལས་འདས་པའི་གསར་འགྱུར་ཅིག་མཐོང་བྱུང་བ་སྟེ། གསར་འགྱུར་དེའི་ནང་དོན་ལ་བལྟས་རྗེས། ཨ་ཇོ་དཔལ་ལྡན་གྱིས་ད་གཟོད་རང་ཉིད་སྔ་མོ་ནས་འཇིག་རྟེན་འདི་ལས་རྒྱང་དུ་གྱེས་ཟིན་པ་གཞི་ནས་རྟོགས།