ཚྭ་མཚོའི་ངོགས་ཀྱི་སེམས་འགྱུ།
ཉེ་བའི་ལོ་ཤས་རིང་། ཚྭ་པའི་སྐོར་གྱི་དམངས་ཁྲོད་ཤོད་རྒྱུན་དང་། ཚྭ་མཚོ་དང་འབྲེལ་བའི་གཏམ་རྒྱུད་ངོ་མཚར་ཅན་མང་པོས་ངའི་ཡིད་སེམས་དབང་མེད་དུ་ཕྲོགས་ཏེ་ནམ་ཞིག་ཚྭ་མཚོའི་འགྲམ་དུ་བསྐྱོད་རྒྱུ་བྱུང་ན་ཅི་མ་རུང་ཨང་སྙམ་པའི་འདུན་པ་ཞིག་ངང་ངམ་ཤུགས་ཀྱིས་སྐྱེས་འོང་། ད་ལོའི་རྟེན་འབྲེལ་བཟང་བའི་ཉིན་ཞིག་ལ་འདོད་ཐོག་ཏུ་རྟ་བརྒྱུགས་ནས་ཡུན་རིང་རེ་སྒུག་བྱས་པའི་རྨི་ལམ་དེ་མངོན་དུ་གྱུར་པའི་གོ་སྐབས་བཟང་པོ་ཞིག་ཐོབ། དེ་ནི་ང་དང་ཚྭ་མཚོའི་དབར་ཆེས་བར་ཐག་ཉེ་བའི་མཇལ་འཕྲད་ཐོག་མ་དེ་ཡིན་ལ། ཚྭ་མཚོར་ཅུང་ཆ་ཚང་བའི་སྒོ་ནས་རྒྱུས་མངའ་ལོན་པའི་གོ་སྐབས་ཤིག་ཀྱང་ཡིན། དགོང་ཉིའི་འོད་ཟེར་ཚྭ་མཚོར་འཕྲོས་ཤིང་། མཚོ་མཐའི་སྤང་ཁས་སྔོ་ལྗང་གཡུ་མདོག་གི་ན་བཟའ་མཛེས་ཤིང་ལྟ་ན་སྡུག་པ་ཞིག་བཀླུབས་པ་དང་། གཡས་ཀྱི་ཁྱུང་རི་དང་། གཡོན་གྱི་ཟོག་རི། ཤར་གྱི་ཤེལ་ཡེར་སོགས་ཀྱི་རི་བོ་རྣམས་བྲག་རི་གཡང་གཟར་ཆེ་ཞིང་ཁ་རོང་དོག་པའི་ལྷོ་ཕྱོགས་ཀྱི་ས་བབ་ལྟར་མ་ཡིན་པར་རི་མ་སྤང་གི་བདེ་ཁོད་སྙོམས་པའི་སྤང་ལྗོངས་ཁོད་ཡངས་པ་ཞིག་འདུག་པ་ནི་མ་བཅོས་ལྷུན་གྱིས་གྲུབ་པའི་ཚྭ་པའི་གནས་མལ་ལྟར་དུ་སྣང་།
རྡོ་རྗེ་ཕ་ལམ་ཕྱེ་མར་བཏགས་ནས་ཐང་དུ་བརྡལ་བ་ལྟར་མཚོ་མོའི་ངོགས་ལས་ཉི་འོད་ཀྱི་ལྡོག་འཕྲོ་འོད་ཆེམ་ཆེམ་དུ་འཚེར་བའི་དཀྱིལ་ན། བྱ་ངང་ངུར་ཁྱུ་ཞིག་བག་ཕེབས་ངང་རྒྱུ་བཞིན་མཆིས། མཁའ་ཐོག་ཏུ་གཡང་དཀར་བལ་ལས་འཇམ་པའི་སྤྲིན་པ་བཀྲག་མདངས་ཆེ་བ་ཞིག་ཁ་བཏགས་ཡུག་གཅིག་བྱང་ནས་ལྷོ་རུ་འཕྲེད་ལ་གཡོགས་པ་ལྟར་སྣང་བས། བདག་ལ་མཚོ་མོའི་ཡིད་དུ་འོང་བའི་བཀོད་པ་དག་ཇི་མ་ཇི་བཞིན་ཡིག་ཐོག་ཏུ་འབེབས་པའི་སྨྱུག་རྩལ་དབེན་སྟབས། ཡ་གིའི་ཁྲི་ཐོག་གི་དཔོན་ནས་མ་གིའི་གྲོང་དཀྱིལ་གྱི་སྤྲང་པོ་བར་དང་། ནང་གི་ཕ་ཁུ་མ་སྲུ་ནས་ཕྱི་ཡི་དཀར་ནག་ཁྲ་གསུམ་བར་ཚང་མར་མེད་དུ་མི་རུང་བའི་ནོར་བུའི་ཐོན་ཁུངས་འདི་ཉིད་བརྙན་ལེན་པར་ཆས་ཀྱིས་ཡང་ཡང་པར་དུ་བླངས་རྗེས་འབྲལ་མི་འདོད་བཞིན་དུ་གྱེས་ཕྱག་ཕུལ། སྤྱིར་ན་རང་བྱུང་ཁམས་ཀྱི་གནམ་གཤིས་འགྱུར་ལྡོག་ཆེ་བས་དེང་སྐབས་ཚྭ་མཚོ་མང་ཆེ་བར་ཚྭ་ཆགས་ཀྱི་མེད། ནམ་དུས་དབྱར་ཁ་དེ་བས་ཀྱང་ཚྭ་ཆགས་ཀྱི་མེད་ཅེས་ཐོས་མོད། ངའི་བསམ་གཞིག་གི་ཐང་དཀར་སྔར་བཞིན་ཚྭ་མཚོའི་ཞིང་ཁམས་སུ་རང་དབང་ངང་ཅི་དགར་འཕུར་བཞིན་ཡོད། ཞིབ་པར་བསམས་ཚེ་ཚྭ་མཚོ་ནི་བྱང་འབྲོག་ཁུལ་དུ་འཚར་ལོངས་བྱུང་བའི་སྔོན་བྱོན་མེས་པོའི་སེམས་ཁོངས་ན་རྡོ་ལ་བརྐོས་པའི་རི་མོ་ལྟར་བསུབས་ནས་ཟུབ་རྒྱུ་མེད་པའི་དྲན་ཤེས་བརྟན་པོ་ཞིག་སྟེ། རྗེས་རབས་ཚོས་ཡེ་ནས་བརྗེད་མི་ཉན་པའི་ཐ་སྙད་ཅིག་ཡིན་ཞིང་། དུས་ཀྱི་འཕེལ་རིམ་དང་། ལོ་རྒྱུས་ཀྱི་དཀྱོག་མཚམས་ཁྲོད་ཨ་ཁུ་འབྲོག་པའི་ཁ་སང་གི་འཚོ་བར་རྒྱུས་མངའ་བྱ་བར་སུས་ཀྱང་འཁྱོག་བཤད་བྱ་ཐབས་བྲལ་བའི་ལོ་རྒྱུས་ཀྱི་སྐར་ཁུང་ཞིག་ཀྱང་རེད་ལ། མེས་པོའི་བློ་གྲོས་ཀྱི་རྩལ་ལས་འཁྲུངས་པའི་ཤེས་རབ་ཀྱི་མེ་དཔུང་ཞིག་སྟེ་སྣ་མང་ཕུན་སུམ་ཚོགས་ཤིང་། འོད་སྟོང་འབར་བའི་བྱང་འབྲོག་གི་རིག་གནས་ཁྱད་པར་བ་དེའི་འབྱུང་ཁུངས་ཤིག་ཀྱང་མ་ཡིན་ནམ་སྙམ།
ལོ་རྒྱུས་ཀྱི་ཤོག་ལྷེའི་ངོས་སུ་གནམ་རི་སྲོང་བཙན་གྱི་བློན་པོ་ཞིག་བྱང་དུ་རི་དྭགས་རྔོན་ནས་ཕྱིར་འཁོར་བའི་ལམ་ཁར། འབྲོང་ཤ་བཞི་ལིང་གཅིག་ཐང་དུ་ལྷུང་བ་དེར་དམིགས་བསལ་བྲོ་བ་ལྡན་པ་ཤེས་ཚོར་བྱུང་བས་དུས་དེ་ནས་བཟུང་མཐོ་སྒང་དུ་འཚོ་བའི་མིས་ཚྭ་མཚོ་རྙེད་ཅེས་གསལ་བ་དང་། དམངས་སྒྲུང་ནང་དྭའུ་ངོ་ངན་གྱིས་གཉན་ཆེན་ཐང་ལྷའི་མཛོད་ཁུག་ནས་བཏོན་ཏེ་བྱང་ཕྱོགས་སུ་གཏོར་བའི་གཏེར་ཁ་ཞིག་ཡིན་ཞེས་ཀྱང་བརྗོད། ཇི་ལྟ་བུ་ཞིག་ཡིན་རུང་། དེ་ནི་གནའ་བོའི་མིས་འབྲོང་རྒོད་ཤོད་ལ་ཕབ་ནས་སྒོ་ཟོག་ཏུ་བཏུལ་བ་དང་། ཐང་རྒོད་གྱེན་ལ་བསློགས་ནས་ལོ་ཏོག་འདེབས་པ། རྩུབ་བརྡར་གྱི་རྩོལ་བར་བརྟེན་ནས་མེ་སྟག་བླངས་པའི་དུས་ནས་བཟུང་མིའི་རིགས་ཀྱི་འཚོ་བ་དང་ཁ་འབྲལ་ཐབས་མེད་པར་གྱུར་ཡོད། ཚྭ་མཚོ། ཁྱེད་ནི་སྙན་ངག་མཁན་པོའི་སྨྱུག་རྩེས་མ་བྲིས་ཀྱང་ཡིད་དབང་འཕྲོག་པའི་སྙན་ངག་ཅིག་དང་འདྲ་ལ། རི་མོ་མཁས་པའི་པིར་རྩལ་ལས་མ་འཁྲུངས་ཀྱང་མཛེས་སྡུག་ལྟ་བས་མི་ངོམ་པའི་རི་མོ་ཞིག་དང་མཚུངས། ལྟོས་དང་། ཨམ་ཁྱུང་རི་གཡས་དང་ཟོག་རི་གཡོན། གངས་ཤེལ་ཡེར་མཐོན་པོའི་ནུབ་ཁུག་ལ། བྱང་ཚྭ་མཚོ་མ་གང་བུ་གང་རེད། འདི་ནི་བོང་ཡེར་ཚྭ་མཚོའི་ཕྱིའི་བཀོད་པ་མཚོན་པའི་ཚྭ་གླུ་དུམ་བུ་ཞིག་སྟེ། ཨམ། གནའ་བོའི་ཞང་ཞུང་གི་སྐད་ཡིན་ནམ་བརྡ་རྙིང་གང་ཡིན་ཆ་མ་འཚལ་རུང་བྲག་རི་གཟེངས་མཐོ་ལ་གཟར་ཆེ་བར་ངོས་འཛིན་བྱ་དགོས་པས་ན། གཡས་སུ་ཁྱུང་རི་ཞེས་པའི་བྲག་རི་གཟར་པོ་དེ་ཙམ་མེད་པའི་ཙོག་ཙོག་ཅིག་དང་། གཡོན་དུ་ཟོག་རི་ཞེས་པའི་རི་ཐོད་བྲག་དང་རི་སྐེད་རྫ་ཡིན་པ་ཞིག ཤར་ངོས་སུ་ཤེལ་ཡེར་གངས་རི་རྩེ་མོ་གནམ་ལ་ཟུག་པ་ལྟར་འགྱིང་ངེར་གནས་པའི་དཀྱིལ་དབུས་ན་བོང་ཡེར་ཚྭ་མཚོ་ལྗང་ཐིང་ཐིང་དུ་གནས། མཚོ་མོའི་གཡས་གཡོན་གྱི་ཡུལ་ལྗོངས་ཆགས་ཚུལ་ཁག་རེ་རེ་བཞིན་འདྲེན་བྱེད་ལམ་དུ་གསལ་དུས། ད་གཟོད་ཚྭ་གླུ་དུམ་བུ་དེ་ནི་འཆར་ཡན་གྱི་བག་ཆགས་རབ་རིབ་ཙམ་ཞིག་མ་ཡིན་པར་མཚོ་དེའི་གཟུགས་ཀྱི་བཀོད་པ་ཕྱི་གསལ་ནང་གསལ་ངང་མཚོན་པར་ནུས་པའི་སྙན་ངག་དུམ་བུ་ཞིག་ཡིན་པའི་ངེས་ཤེས་ཤིག་གཞི་ནས་རྙེད་སྲིད། ད་དུང་། བྱ་ངང་པའི་སྐྱེ་བ་མ་ཡིན་ཏེ། །མཚོ་སྔོན་པོའི་དཀྱིལ་ལ་སྒུར་རུ་རུ། །གཙོད་གོག་པོའི་སྐྱེ་བ་མ་ཡིན་ཏེ། །བྱང་བྱེ་མའི་དཀྱིལ་ལ་སྒུར་རུ་རུ། །ཞེས་ཚིག་ཉུང་ལ་དོན་བསྡུས་ཤིང་། ཚྭ་ལེན་དུ་འགྲོ་མཁན་ཚོས་མྱ་ངམ་ཐང་ཆེན་ལྟ་བུའི་བྱང་སྟོང་དུ་རི་དྭགས་གཙོད་ལྟར་འགྲུལ་བཞུད་ཀྱི་དཀའ་བ་སྤྱད་ཅིང་། འཁྱག་གྲང་གིས་ཇི་ལྟར་གཙེས་ནའང་བཟོད་བསྲན་སྡུག་རུས་ཀྱིས་ཚྭ་མཚོའི་ནང་བྱ་ངང་པ་ལྟར་ཚྭ་འདོན་བཞིན་པའི་གཟུགས་ཀྱི་བཀོད་པ་མིག་ལམ་དུ་ཝ་ལེར་འཆར་བའི་ངང་ཚུལ་ཞིག་མཐོང་ཨེ་བྱུང་། དེ་དག་འབྲོག་གླུ་མཁས་ཅན་ནོར་བཟང་གི་ངག་ནས་མཐོན་པོའི་དབྱངས་སུ་བཀུག་པ་དང་། ཚྭ་འགྲུལ་གྱི་རྒྱབ་ལྗོངས་མངོན་པའི་རི་མོ་དང་པར་རིས་ཁག་མིག་ལམ་དུ་འཆར་དུས་མི་རབས་ཤིག་གི་འཚོ་བ་གསོན་ཉམས་ལྡན་པའི་ངང་མིག་ལམ་དུ་མངོན་ཡོང་། དེ་དང་དེ་འདྲ་བའི་ཚྭ་པའི་འགྲུལ་བཞུད་ཀྱི་གོ་རིམ་རེ་རེ་དང་། གཏམ་རྒྱུད་རེ་རེ། གྲུབ་ཆ་རེ་རེ་ཇི་མ་ཇི་བཞིན་ལྷམ་མེར་གསལ་ནུས་པའི་ཚྭ་གླུ་ཅི་འདྲའི་མང་པོ་ཞིག་ཡོད་ཨང་།
ཚྭ་མཚོ། ཁྱེད་ནི་བྱང་འབྲོག་གི་སྐྱེས་བུའི་བློ་གྲོས་ལས་འཁྲུངས་པའི་ཤེས་རིག་གི་ཉིང་བཅུད་ཅིག་དང་འདྲ་སྟེ། འབྲི་གཡག་གི་རྩིད་པ་འཁེལ་འཐག་བྱས་ནས་སྔ་དྲོ་གཡག་གི་སྒལ་པར་བཀལ་ཞིང་དགོང་མོ་ཐང་ལ་ཕབ་སྟེ་ཟླ་ལམ་ཁ་ཤས་བསྐྱོད་ནའང་བིག་རྡོལ་མེད་པའི་ཚྭ་སྒྱེ་གྭ་ཁྲ་དང་། ལྷོ་རོང་མཐིལ་གྱི་སྤར་མའི་ཤིང་དང་། འབྲི་གཡག་གི་རྩིད་ལས་གྲུབ་པའི་སྒ་སོགས་ཀྱི་ཡོ་བྱད་བཟོས་ཏེ། བྱང་ཚྭ་ལྷོ་རུ་དབོར། ལྷོ་འབྲུ་བྱང་དུ་འདྲེན་པའི་ལོ་རྒྱུས་བྲིས་ཡོད། ཚྭ་མཚོ། ཁྱེད་ནི་མི་རབས་ནས་མི་རབས་བར་གནས་འདིར་འཚོ་བའི་བྱང་འབྲོག་གི་འཚོ་བར་ཆུ་དང་འོ་མ་འདྲེས་པ་ཇི་བཞིན་དབྱེ་བ་འབྱེད་ཐབས་བྲལ་བའི་ཕྱི་འདྲེས་ནང་འདྲེས་ཀྱི་གོམས་སྲོལ་ཤིག་ཏུ་གྱུར་ཡོད་པ་སྟེ། ཕོ་ལོ་བཅོ་ལྔས་ཚྭ་ལོན། མོ་ལོ་བཅོ་ལྔས་བུ་སྐྱེ་ཞེས་སྟག་ཤར་པ་ཕོ་ལོ་ལྔ་གསུམ་བཅོ་ལྔར་སླེབས་ཚེ་ཚྭ་པར་འགྲོ་བའི་དུས་ཚོད་སླེབས་པ་དང་ལོ་ཚོད་དེ་མཉམ་གྱི་བུ་མོར་མངལ་སྦྲུམ་པའི་མཐུན་རྐྱེན་འཛོམས་པ། ཚྭ་ཁའི་ཁྱི་རོ་མཐའ་མ་ཚྭ་ལ་འགྲོ་ཞེས་ཕ་མ་དང་གྲོགས་པོ་བཟང་ངན་གང་འདྲ་ཞིག་ལ་གཤིབས་ཚེ་རང་ཉིད་ཀྱང་རིམ་བཞིན་དེའི་གཤིས་རྒྱུད་འཇགས་འགྲོ་བ། ཕོ་རབས་གཅིག་གིས་ཚྭ་དགུ་ལེན། ཙི་རབས་གཅིག་གིས་དོང་དགུ་གསོག་ཅེས་ཚྭ་ལེན་པར་ཐེངས་དགུ་འགྲོ་ཐུབ་ཚེ་སྐྱེས་ཕོ་རབ་གཅིག་ཏུ་བརྩི་བར་མ་ཟད། ཚྭ་ཐེངས་བཅུ་གསུམ་ལོན་ཚེ་དྲིན་ཅན་ཕ་མའི་དྲིན་ལན་བཅལ་བའི་ཤོད་སྲོལ་ཡང་མཆིས།
དེ་ལྟར་སྔར་གྱི་མེས་པོ་ཚོས་ད་ལྟའི་རླངས་འཁོར་གྱིས་ཉིན་གཉིས་གསུམ་འགྲོ་དགོས་པའི་ལམ་ཁར་མདུན་དུ་ཁལ་གཡག་དེད། རྒྱབ་ལ་ཁུར་པོ་ཁུར། ས་ནག་གོམ་པས་འཇལ། ཆུ་བོ་རྐང་པས་སྒྲོལ་བཞིན་བསྐྱོད་ནའང་དཔའ་ཞུམ་ནས་ཕྱིར་ལོག་བརྒྱབ་མེད་ལ། ལན་ཁག་དང་སྡུག་ཡུས་བཤད་ནས་མདུན་སྐྱོད་ཀྱི་གོམ་པར་མཚམས་འཇོག་མ་བྱས་པ་ནི་མགྲིན་པ་གཟེངས་སུ་བཏེགས་ནས་གླེང་ཆོག་པའི་མེས་པོ་ཚོའི་མཛད་རྗེས་བླ་ན་མེད་པ་ཞིག་མ་ཡིན་ནམ།