ད་ལོ་ལོ་42ལ་སླེབས་པའི་མིག་སྒྲོན་2009ལོར་ཧུའུ་ནན་མི་རིགས་ལས་རིགས་སློབ་གླིང་ནས་ཐོན་ཞིང་། སློབ་གྲྭ་ནས་ཐོན་རྗེས་མཚོ་ཆེན་རྫོང་ཆུ་ལྷོ་ཤང་སློབ་ཆུང་དུ་ལས་བགོས་བརྒྱབ། དགེ་རྒན་བྱས་ནས་ལོ་14སོང་རིང་། ཁོང་གིས་དཀའ་སྤྱད་འབད་འབུངས་དང་ལྷག་བསམ་རྣམ་དག་གིས་སློབ་གསོ་སློབ་ཁྲིད་ཀྱི་ལས་ལ་གཞོལ་ཏེ་རེ་བའི་མེ་ཏོག་ས་མཐོའི་འབྲོག་ཁུལ་དུ་རབ་ཏུ་བཞད་པར་བྱས།

མངའ་རིས་ས་ཁུལ་སེང་གེ་ཁ་འབབ་གྲོང་རྡལ་དང་བར་ཐག་སྤྱི་ལེ་700ལྷག་ཙམ་ཆོད་པའི་མཚོ་ཆེན་རྫོང་གི་ཆ་སྙོམས་ས་བབ་མཐོ་ཚད་སྨི་4850ཟིན་གྱི་ཡོད་པས། ས་བབ་མཐོ་ཞིང་གྲང་ངར་ཆེ་ལ་གསོ་རླུང་ཧ་ཅང་དཀོན་པོ་ཡོད། མིག་སྒྲོན་གྱིས་ཆུ་ལྷོ་ཤང་སློབ་ཆུང་དུ་སླེབས་མ་ཐག་པའི་གནས་ཚུལ་ལ་ཕྱིར་དྲན་བྱེད་བཞིན་དུ། སྐབས་དེ་དུས་སློབ་གྲྭར་ངོ་དྲག་པའི་སློབ་ཁྲིད་ཐོག་ཁང་གཅིག་ཀྱང་མེད་པས། སློབ་མ་ཚོ་ཁང་པ་གོག་ཧྲུལ་ནང་སློབ་ཚན་ཉན་རྒྱུ་ལས་མ་འདས། སློབ་ཁང་གི་ཉེ་འཁོར་ཚང་མ་རྩྭ་ཐང་དང་སྐྱ་ཐེར་ཐེར་གྱི་ལམ་ཡིན་པས། རྒྱུན་དུ་ཐལ་རླུང་ལྡང་བ་དང་། ཆར་པ་འབབ་སྐབས་འདམ་རྫབ་ཀྱིས་ཁེངས་པ་མ་ཟད། ཆུ་དང་གློག་ཆད་པ་ནི་རྒྱུན་གཏན་གྱི་གནས་ཚུལ་ཞིག་རེད་ཅེས་བརྗོད།

ལས་ཀའི་ཆ་རྐྱེན་དང་འཚོ་བའི་ཁོར་ཡུག་དཀའ་ཚེགས་ཇི་ལྟར་ཆེ་རུང་། མི་སྣ་གསོ་སྐྱོང་བྱེད་པའི་འགན་འཁྲི་དང་ལྷད་མེད་ཀྱི་ལྷག་བསམ་ཞིག་གིས་མིག་སྒྲོན་གྱིས་མིག་མདུན་གྱི་དཀའ་ཚེགས་མཐའ་དག་སྙིང་རུས་ཀྱིས་ཕ་མཐར་བཤགས་ཏེ། གཞི་རིམ་གྱི་སློབ་གསོ་སློབ་ཁྲིད་ཀྱི་འཐབ་ས་དང་པོར་གཞི་ཚུགས་ནས་ཧུར་ཐག་འབད་ཐག་ཀྱིས་རང་གི་ནུས་པས་ཡུལ་དེའི་སློབ་གསོའི་ལས་དོན་ལ་ལང་ཚོ་སྐྱེས་སུ་འབུལ་བཞིན་ཡོད།

རྒན་མིག་སྒྲོན་ལགས་ཀྱིས་སློབ་ཚན་ཁྲིད་སྐབས་རྟག་ཏུ་རྣམ་པ་དེ་འདྲ་ཞིག་ཐོན་པ་སྟེ། དགེ་རྒན་གྱིས་སྤྲོ་སེམས་ཆེན་པོས་སློབ་ཁྲིད་བྱེད་པ་དང་སློབ་ཕྲུག་ཚོས་སྤྲོ་སྣང་ཆེན་པོས་སློབ་ཚན་ཉན་པ་དེ་རེད། མིག་སྒྲོན་གྱིས། དགེ་རྒན་ཞིག་གི་ངོས་ནས་དང་ཐོག་རང་གི་ལས་ཀར་སྤྲོ་སྣང་དང་དགའ་ཞེན་ཆེན་པོ་ཡོད་དགོས་ལ། སློབ་མ་རྩ་བར་འཛིན་ནས་སློབ་ཕྲུག་ལ་ཡིད་ཆེས་དང་བསམ་ཤེས་གང་ལེགས་བྱེད་དགོས། དེ་ལྟར་བྱས་ཚེ་གཞི་ནས་སློབ་ཕྲུག་ཚོས་སློབ་སྦྱོང་ལ་དགའ་ཞེན་སྐྱེས་ནས་སློབ་སྦྱོང་བྱེད་སེམས་ཆེ་རུ་འགྲོ་གི་རེད་ཅེས་བརྗོད།

བསླབ་དེབ་ལག་ཏུ་ལེན་སྐབས་རང་ཉིད་ནི་དགེ་རྒན་ཞིག་ཡིན་པ་དང་དེབ་མར་འཇོག་སྐབས་རང་ཉིད་ནི་ཨ་མ་ཞིག་རེད། འབྲོག་ཁུལ་གྱི་སློབ་གྲྭ་མང་ཆེ་བར་ཞག་སྡོད་ལམ་ལུགས་ལག་ལེན་བསྟར་བཞིན་ཡོད་པས། དགུན་གསེང་དང་དབྱར་གསེང་ཕུད་སློབ་མ་ཚང་མ་སློབ་གྲྭར་ཞག་སྡོད་བྱེད་དགོས་པར་བརྟེན། ཕྲུ་གུ་ཚོའི་བཟའ་བཏུང་དང་འགྲོ་འདུག་ཚང་མ་དགེ་རྒན་ལ་བརྟེན་དགོས། སློབ་གྲྭའི་ནང་མིག་སྒྲོན་གྱིས་སློབ་མའི་འཚོ་བ་དང་འགྲོ་འདུག་ལ་ལྟ་རྟོག་བྱེད་པའི་ལས་འགན་རང་འགུལ་ངང་བསྒྲུབས་ནས། ཁ་ལག་གཏོང་རིམ་བཞིན་ཁོང་གིས་དུས་ཐོག་ཏུ་ཟ་ཁང་དུ་ཡོང་ནས་ཕྲུ་གུ་ཚོར་ཁ་ལག་ཡག་པོ་ཟ་དགོས་པའི་དྲན་སྐུལ་བྱེད་ཀྱི་ཡོད། དེ་སྔོན་སློབ་གྲྭར་གོས་འཁྲུད་འཕྲུལ་ཆས་མེད་པས་ཕྲུ་གུ་ཚོའི་གྱོན་ཆས་རང་ཉིད་ཀྱི་ཁྱིམ་དུ་འཁྱེར་ནས་འཁྲུད་བཞིན་ཡོད། ཕྲུ་གུ་ཚོ་གཉིད་དུ་ཡུར་སྐབས་ཁོང་གིས་གློག་བཞུ་ཁྱེར་ནས་ཉལ་ཁང་རེ་རེ་བཞིན་ཞིབ་བཤེར་བྱས་ཏེ་ཕྲུ་གུ་ཚོར་ཉལ་ཆས་གཡོག་རོགས་བྱེད་ཀྱི་ཡོད།

ཁོང་གི་ངང་རྒྱུད་རིང་ཞིང་ཞིབ་ཚགས་པའི་གཤིས་ཀར་སློབ་མ་དང་འབྲོག་ཁུལ་གྱི་ཁྱིམ་བདག་ཚོའི་ཡིད་ཆེས་ཐོབ་ཡོད་ལ། ཁོང་གིས་ཁྲིད་པའི་འཛིན་གྲྭ་ཡང་སྒྲིག་སྲོལ་ཡ་རབས་དང་སློབ་སྲོལ་བཟང་བས་ལས་དོན་ཁག་ཚང་མ་སློབ་གྲྭའི་མདུན་གྲལ་དུ་སླེབས་ཤིང་། ཁོང་ལ་སྔ་རྗེས་སུ་མངའ་རིས་ས་ཁུལ་དང་མཚོ་ཆེན་རྫོང་གི་དགེ་རྒན་ཕུལ་བྱུང་དང་། འཛིན་གྲྭའི་འགན་ཁུར་དགེ་རྒན་ཕུལ་བྱུང་། དགེ་རྒན་གྲགས་ཅན་སོགས་ཀྱི་གཟི་བརྗིད་མཚན་སྙན་ཐེངས་མང་ཐོབ་མྱོང་། 2023ལོར་ཁོང་ལ་སླར་ཡང་ལྗོངས་ཡོངས་ཀྱི་དགེ་རྒན་ཕུལ་བྱུང་གི་གཟི་བརྗིད་མཚན་སྙན་ཐོབ་པ་རེད།