བཤེས་གཉེན་གྱི་བསྟོད་པ་པད་དཀར་ཆུན་པོ།
མི་ཤེས་ཐ་སྙད་འདམ་དུ་བྱིངས་པའི་བགྲང་བྱ་དུ་མའི་སློབ་གཉེར་ཀུན། །
ཐབས་ཤེས་ཉི་ཟླ་ཐུགས་ཀྱི་བརྩེ་བས་མ་རིག་མུན་པའི་གྲུ་ཁ་ཡོངས། །
བསལ་བའི་བློ་གྲོས་སྤྲིན་གྱི་མེ་ཏོག་སྐལ་ལྡན་བུ་ཡི་བློར་འདེབས་པ། །
ལས་ཅན་དམ་པ་གང་དང་ཕྲད་པ་དམ་ཚིག་གཙང་མའི་འབྲས་བུར་སེམས། །
སློབ་ཐུན་རེ་རེའི་དུས་ན་འཇོ་བའི་གདམས་ངག་ཆར་གྱི་སློབ་ཁྲིད་ཁྲོད། །
བླང་དོར་རྨོངས་པའི་སྐལ་ལྡན་ཁྱུ་ཚོགས་དབྱར་གྱི་སྤང་ལྗོངས་མེ་ཏོག་བཞིན། །
གསོན་ཤུགས་རྒྱས་པའི་རང་མདངས་དེ་ཉིད་དམ་པ་གང་གི་དྲིན་དུ་སྒོམ། །
དེ་ཕྱིར་ཕྲན་ཡང་རང་དབང་མེད་པར་བཤེས་གཉེན་ཁྱེད་ལ་བསྟོད་པར་ཐལ། །
རིག་གནས་རྒྱ་མཚོའི་ནོར་བུ་ལེན་ཞིང་བརྡ་གཞུང་གློག་གི་རྣམ་དཔྱོད་ཅན། །
ཐོས་བསམ་སྒོམ་གྱི་བགྱི་བ་སྣ་ཚོགས་དཀའ་སྤྱད་ཁུར་གྱིས་བཞེས་ནུས་ཤིང་། །
འཆད་རྩོད་རྩོམ་ལ་ཐོགས་པ་མེད་པ་མཁས་པ་གཞན་ཡང་ཡིད་སྨོན་ཤོར། །
ང་རྒྱལ་ཕྲག་དོག་མ་རིག་སྤངས་ཏེ་ཞི་དུལ་རྒྱ་མཚོའི་ཕ་མཐར་བགྲོད། །
བྱ་སྒྲོ་རླུང་ཁྱེར་དོ་ཟླ་ཇི་བཞིན་མི་ཚེའི་ཁ་ཕྱོགས་འཛོལ་བ་ཡི། །
ན་གཞོན་སློབ་བུ་སྐར་མའི་ཚོགས་ཀྱི་ཡིད་ཀྱི་ཞིང་ས་གཤིན་པོ་རུ། །
ལེགས་བཤད་བདུད་རྩིའི་གྲུ་ཆར་ཕབ་སྟེ་ཡང་དག་ལམ་བུ་སྟོན་པ་དང་། །
ཐབས་ཤེས་ཟུང་གི་མན་ངག་བསླབས་ནས་དགོས་འདོད་འབྲས་བུ་སྨིན་པར་མཛད། །
གཡོ་བསླད་བཅོས་མའི་རང་མདངས་མེད་པར་སྙིང་གི་ཤ་ཚ་ཆེན་པོ་ཡིས། །
སྣོད་དུ་གྱུར་པའི་སློབ་མའི་ཚོགས་ལ་དཔེ་ཁྲིད་མི་སྐྱོང་མཛད་པ་དང་། །
འཇིག་རྟེན་མི་ཆོས་བསླབ་བྱ་གནང་སྟེ་ཕ་ལྟར་བྱམས་ཀྱིས་སྐྱོང་མཛད་པ། །
བློ་དཀར་བཤེས་གཉེན་དམ་པ་ཁྱེད་ལ་ལུས་ངག་ཡིད་ཀྱིས་གུས་འདུད་ཞུ། །