ཚེ་རིང་འབྲུག་གྲགས་ནི་ཀྲུང་གུང་ཏང་ཡོན་དང་བོད་ལྗོངས་ནག་ཆུ་ནས་ཡིན་ལ་དམག་ཞབས་ཐིམ་པའི་དམག་མི་ཞིག་ཀྱང་རེད། 2018ལོར་ཚེ་རིང་འབྲུག་གྲགས་དམག་ཞབས་ཐིམ་རྗེས་ཕ་ཡུལ་དུ་ལོག་ནས་ལས་གཏོད་བྱེད་འགོ་ཚུགས་ཏེ་བོད་ཀྱི་ལུས་སྦྱོང་ལ་དགའ་མཁན་ཚོར་དམིཊ་པའི་ཆུ་རྐྱལ་སྤྲོ་སྐྱིད་ཁང་ཞིག་བཙུགས་ནས་བྱང་ཐང་དུ་ཆུ་ཐོག་ལུས་རྩལ་ཁྱབ་གདལ་བཏང་སྟེ། ནག་ཆུའི་དམངས་ཡོངས་ཀྱི་ལུས་སྦྱོང་བྱ་གཞག་ལ་ལེཊ་སྐྱེས་ཕུལ་བ་དང་དམག་མི་རྙིང་པའི་བློ་བརྟན་འགྱུར་མེད་ཀྱི་སྙིང་སྟོབས་ལ་བརྟེན་ནས་ཕ་ཡུལ་དུ་ངོ་མཚར་ཆེ་བའི་ལས་གཏོད་གཏམ་རྒྱུད་བརྩམ་འགོ་ཚུགས།

2015ལོར་ཚེ་རིང་འབྲུག་གྲགས་ཕུལ་བྱུང་གི་སྦྱངས་འབྲས་ཐོག་ནས་རང་ཉིད་འགྲོ་འདོད་ཆེ་བའི་དམག་མིའི་སློབ་གྲྭར་རྒྱུགས་འཕྲོད་དེ་དམག་དཔུང་གི་འཚོ་བ་སྐྱེལ་འགོ་ཚུགས་པ་དང་། དམག་མི་བྱེད་རིང་2016ལོའི་G20ཧང་ཀྲོའུ་དབུ་ཚོགས་དང་2017ལོའི་འབོ་གསེར་རྒྱལ་ཁབ་ཀྱི་འགོ་ཁྲིད་པའི་ཞ་མོན་ཐུག་འཕྲད་ཀྱི་བདེ་སྲུང་ལས་དོན་ནང་ཞུགས་མྱོང་ཡོད། འོན་ཀྱང་མི་ཚེའི་ནང་བློ་ཕམ་སྐྱེ་བའི་བྱ་བ་མང་པོ་འཕྲད་སྲིད་དེ། ཚེ་རིང་འབྲུག་གྲགས་ལ་གློ་བའི་འདུས་འདྲིལ་གཅོང་ནད་ཕོག་པས་རང་ཉིད་དགའ་ཤོས་ཀྱི་དམག་དཔུང་གི་འཚོ་བ་དང་ཁ་མི་བྲལ་ཀ་མེད་བྱུང་།

ལོ་22ལས་སོན་མེད་པའི་གཞོན་ནུ་ཚེ་རིང་འབྲུག་གྲགས་ལ“འབྱུང་འགྱུར་ཇི་ལྟར་བྱེད་དགོས། ངས་གང་ཞིག་སྒྲུབ་ཐུབ་བམ”སྙམ་པའི་བསམ་བློ་མང་པོ་འཁོར་ནས། སྐབས་ཤིག་རིང་སེམས་སྡུག་གིས་མནར།

འཐབ་གྲོགས་དང་སློབ་གྲོགས་ཚོས་སྐུལ་ལྕག་ཐེངས་མང་བྱས་མཐར། ཚེ་རིང་འབྲུག་གྲགས་ལ་བསྐྱར་དུ་ཡིད་ཆེས་རྙེད་ནས་བློ་ཁོག་ཆེ་ལ་དོན་སྙིང་ལྡན་པའི་སེམས་ཐག་ཅིག་བཅད་པ་སྟེ།

ཕ་ཡུལ་དུ་ལོག་ནས་ས་བབ་སྨི་4500ལྷག་ཙམ་ཡོད་པའི་ནག་ཆུར་ཆུ་རྐྱལ་ཁང་ཞིག་བསྐྲུན་རྒྱུ་དེ་རེད།

བསམ་ཚུལ་འདིར་ནང་མི་དང་གྲོགས་པོ་ཚོས་མོས་མཐུན་དེ་ཙམ་བྱས་མེད། ནག་ཆུའི་གནམ་གཤིས་ཞན་པས་མིང་དོན་མཚུངས་པའི“ས་མཐོའི་ས་མཐོ་རང”རེད། དེ་གར་ཆུ་རྐྱལ་ཁང་བཙུགས་ན་ས་བབ་ཕུད། ཕོན་ཆེ་བའི་མ་རྩ་གྲབས་གསོག་ལ་བསམ་བློ་གཏོང་དགོས།

འོན་ཀྱང་ཚེ་རིང་འབྲུག་གྲགས་ཀྱིས་སོ་སོའི་བསམ་ཚུལ་དེ་མཐའ་འཁྱོངས་བྱེད་དགོས་དོན་ནི་ཁོང་ལྗོངས་ཕྱིར་སློབ་ཆེན་འགྲིམ་སྐབས་མྱོང་ཚོར་ཟབ་མོ་ཞིག་བྱུང་བས་ཡིན་ཏེ། སྐབས་དེ་དུས་ཆུ་རྐྱལ་སློབ་ཚན་འཚོགས་སྐབས་བོད་ནས་ཡོང་བའི་སློབ་གྲོགས་རྣམས་ལ་ལུས་རྩལ་ར་བ་དང་སྒྲིག་བཀོད་དེ་ཙམ་འཐུས་སྒོ་ཚང་པོ་མེད་པའི་དབང་གིས་ཆུ་ཐོག་ལུས་རྩལ་གྱི་ཉམས་མྱོང་ཧ་ལམ་མེད་པས་ཆུ་རྐྱལ་སློབ་ཚན་གྱི་སྦྱངས་འབྲས་རྟག་ཏུ་དམའ་ཤོས་ཡིན་པ་རེད། སྣང་ཚུལ་དེ་དག་ནི་ཁོང་གི་བློ་ཕམ་ཞིག་ཡིན་ལ་ཁོང་ལ་ད་ཐེངས་ལས་གཏོད་ཀྱི་མྱུ་གུ་འབུས་སའི་ས་བོན་ཞིག་ཀྱང་རེད།

ནག་ཆུ་བ་རང་ཉིད་ལ་དབང་བའི་ཆུ་རྐྱལ་ཁང་བསྐྲུན་ཆེད། ཚེ་རིང་འབྲུག་གྲགས་ཀྱིས་ཆེད་མངགས་ཚོགས་པ་བཙུགས་ནས་དུས་འགོའི་ཁྲོམ་རའི་གནས་ཚུལ་ལ་བརྟག་ཞིབ་གང་ལེགས་བྱས་པ་མ་ཟད། གང་ས་གང་ནས་མ་དངུལ་གྲབས་གསོག་ཀྱང་བྱས་པ་རེད།

2020ལོའི་ཟླ་5པར། ཁོང་གིས་མ་དངུལ་སྒོར་ཁྲི་3000བཏང་ནས་སེམས་ནུས་ཡོད་རྒུས་བསྐྲུན་པའི་སྨི་ངོས་གྲུ་6000ཟིན་པའི་ཆུ་རྐྱལ་ཁང་དངོས་སུ་ལས་གཉེར་བྱེད་འགོ་ཚུགས་པ་དང་ཚེ་རིང་འབྲུག་གྲགས་ཀྱི་ལས་གཏོད་ཚོགས་པ་སྐབས་ཤིག་རིང་ནག་ཆུར་སྐད་གྲགས་ཆོད།

གྲོང་ཁྱེར་ཡོངས་ཀྱི་ཚད་ལྡན་དྲོད་སྙོམས་ལུས་སྦྱོང་ཆུ་རྐྱལ་ཁང་དང་པོ་ཡིན་པའི་ངོས་ནས་སྨྱན་སྦྱོར་མི་ཉུང་བ་ཞིག་གིས་གསར་འགྱུར་གཅིག་རྗེས་གཉིས་མཐུད་དུ་སྤེལ་བས། འཛམ་གླིང་དུ་ས་བབ་མཐོ་ཤོས་ཀྱི་ཆུ་རྐྱལ་ཁང་དེ་ཉིད་བྱང་ཐང་ས་གཞིའི་མཛེས་སྡུག་ལྡན་པའི“མིང་བྱང”ཞིག་ཏུ་གྱུར་པ་མ་ཟད། མི་མང་པོ་ཞིག་གིས་བསམ་བློ་གཏོང་ཕོད་པ་དང་། སྒྲུབ་ཕོད་པ། འབད་འཐབ་བྱེད་ཕོད་པའི་ན་གཞོན“དམག་མི་རྙིང་པ”ཚེ་རིང་འབྲུག་གྲགས་ངོ་ཤེས།

ལོ་དེའི་ཟླ་11པར་ཚེ་རིང་འབྲུག་གྲགས་ཀྱི“འཛམ་གླིང་དུ་ས་བབ་མཐོ་ཤོས་ཀྱི་ཆུ་རྐྱལ་ཁང”གི་རྣམ་གྲངས་ལ་ནག་ཆུ་གྲོང་ཁྱེར་གྱི་མཐོ་སློབ་སློབ་ཐོན་སློབ་མའི་ལས་གཏོད་འགྲན་བསྡུར་ཆེ་མོ་སྐབས་གཉིས་པའི་བྱ་དགའ་ཨང་དང་པོ་ཐོབ་པ་དང་སྦྲགས། ལས་གཏོད་ལམ་བུར་དཀའ་ངལ་ཇི་ཙམ་བརྒྱབ་པ་གཟེངས་བསྟོད་རྟགས་མ་དེ་ལས་གསལ་བཤད་བྱེད་ཐུབ།

གཉེར་སྐྱོང་རིམ་བཞིན་རྒྱུན་གཏན་ཅན་དུ་གྱུར་པ་དང་བསྟུན་ནས། ཚེ་རིང་འབྲུག་གྲགས་ཀྱིས་ཆེད་ལས་ཀྱི་སྟོབས་ཤུགས་གསོ་སྐྱོང་དང་སྤྱི་ཚོགས་ལ་དྲིན་ལན་འཇལ་བའི་ཐད་བསམ་བློ་དེ་བས་མང་བ་གཏོང་འགོ་ཚུགས།

ད་ཆ་ནག་ཆུའི་མང་ཚོགས་ལ་ཆུ་རྐྱལ་སྐོར་གླེང་ན། དེ་ནི་ཁོང་ཚོ་དང་འབྲེལ་བ་མེད་པ་དང་ཆ་རྒྱུས་མེད་པའི་བྱ་བ་ཞིག་མིན། ཚེ་རིང་འབྲུག་གྲགས་དང་ཁོང་གི་ཆུ་རྐྱལ་ཁང་ལ་ཡོང་འབབ་བྱུང་བ་ཙམ་མ་ཟད། བྱང་ཐང་ས་གཞི་ཆེན་པོར་དམངས་ཡོངས་ཀྱི་ཆུ་རྐྱལ་ལུས་སྦྱོང་གི་གནམ་ས་གསར་པ་ཞིག་དེ་བས་ཀྱང་བཏོད་ཐུབ་ཡོད།