ང་རང་དཔེ་དེབ་ལྟ་བར་དགའ།
མི་ཚང་མར་རང་རང་གི་དགའ་ཕྱོགས་རེ་ཡོད་ལ། དགའ་ཕྱོགས་དེ་ལ་སོ་སོས་དང་དོད་དང་སྣང་ཆེན་ཡང་བྱེད་ངེས་རེད། ང་རང་གི་དགའ་ཕྱོགས་ནི་དཔེ་དེབ་ལྟ་་ཀློག་བྱ་རྒྱུ་དེ་ཡིན།
དགའ་ཕྱོགས་དེ་ནི་ང་རང་གི་གཅེན་མོའི་བག་ཆགས་ལས་བྱུང་བ་སྟེ། དེ་དུས་ངའི་གཅེན་མོ་ནི་ཤང་གི་སློབ་ཆུང་ལོ་རིམ་དྲུག་པའི་སློབ་མ་ཞིག་རེད། སྐབས་དེར་ཤང་སློབ་ཆུང་གི་ལོ་རིམ་དྲུག་པའི་སློབ་མ་རྣམས་རྫོང་ལ་འགྲོ་དགོས་ཀྱི་མི་འདུག དགོང་མོ་ཞིག་ལ་གཅེན་མོ་ཁྱིམ་དུ་སླེབས་དུས་དཔེ་ཁུག་ནས་སྒྲུང་དེབ་འགའ་བཏོན་པ་དང་། དེ་དག་ལས་གང་རུང་ཞིག་ལག་ཏུ་བླངས་ཏེ་བལྟས་སོང་བས། ངས་སྒྲུང་དེབ་ཐོག་ཏུ་མཛུབ་མོ་འཛུགས་བཞིན། དེ་ཚོ་སུས་སྟེར་བྱུང་ངམ་ཞེས་སྐད་ཆ་དྲིས། མོ་རང་གིས། དེ་ཚོ་སློབ་གྲོགས་ཀྱིས་གཡར་བྱུང་ཟེར། དེ་ནས་མོ་རང་གིས་སྒྲུང་དེབ་ཀློག་གིན་བསྡད་སོང་། ངས་དེའི་འགྲམ་དུ་ཉན་ནས་བསྡད། ཅུང་ཙམ་ནས་གཅེན་མོས་སྒྲུང་དེབ་མར་བཞག་ནས་སྦྱོང་ཚན་འབྲི་རྩིས་བྱས། ངས་མོ་རང་ལ་ཞུ་བ་འཐེན་ཏེ། བུ་མོ་ཆུང་ཆུང་དེ་ཆུའི་ནང་དུ་ལྷུང་བ་རེད་དམ། དེའི་རྒྱབ་ནས་མར་ཀློག་རོགས་ཞེས་ཞུས་པ་ཡིན། མོས་ང་ལ། ཁྱོད་ཀྱིས་སློབ་སྦྱོང་ཡག་པོ་བྱས་ན། སྒྲུང་དེབ་འདི་ལྟ་ཤེས་ཀྱི་རེད། མ་ཟད་ང་སྦྱོང་ཚན་མ་བྲིས་ན། སང་ཉིན་རྒན་ལགས་ཀྱིས་བཀའ་བཀྱོན་གནང་ངེས་རེད་ཅེས་ཟེར། དེ་ནས་ངས་ཧ་གོ་ལ་མ་གོ་བའི་ངང་ནས་ཅུང་ཟད་བཀླགས་པ་ཡིན། དེ་དུས་གཅེན་མོས་ང་ལ་རྒྱ་ཡིག་སློབ་ཀྱི་ཡོད་པ་དང་། ཨ་ཕའི་གཅུང་པོ་སྟེ་ཨ་ཁུས་ང་ལ་བོད་ཡིག་སློབ་ཀྱི་ཡོད།
ད་ལྟ་པཱ་ལགས་དང་ཨ་མ་ལགས་ཀྱིས་ང་རང་ལ་དཔེ་དེབ་མང་པོ་ཉོ་རོགས་བྱེད་ཅིང་། དེའི་ནང་རྒྱ་ཡིག་གི་སྒྲུང་དེབ་ཡོད་ལ་བོད་ཡིག་གི་སྒྲུང་དེབ་ཀྱང་ཡོད་པས། ང་ལ་མཚོན་ན་རང་གིས་ཀློག་ཐུབ་ན་དཔེ་ཆ་ཀློག་རྒྱུ་མི་རྙེད་པའི་སེམས་ཁྲལ་མེད།
ད་ལོའི་དགུན་ཁའི་གུང་གསེང་སྐབས། ང་རང་དྲ་ཐོག་གི་དཔེ་ཀློག་འགྲན་བསྡུར་ཞིག་ལ་ཞུགས་པ་ཡིན། འགྲན་བསྡུར་གྱི་བརྡ་ཐོ་ནི་བོད་ཡིག་དགེ་རྒན་གྱིས་ང་ཚོའི་འཛིན་གྲྭའི་སྐད་འཕྲིན་ཚོགས་པའི་ནང་དུ་བསྐུར་བྱུང་བ་དང་། གལ་སྲིད་ཞུགས་འདོད་ཡོད་ན་བརྩམས་ཆོས་བསྐུར་རྒྱུ་སོགས་ལ་རྒན་ལགས་ཀྱིས་ཕྱག་རོགས་གནང་ཆོག་ཟེར། ངས་སྤྲོ་བ་ཆེན་པོས་རྒན་ལགས་ཀྱིས་བཙུགས་པའི་གནས་སྐབས་ཀྱི་སྐད་འཕྲིན་ཚོགས་པ་དེའི་ནང་འཛུལ་ཏེ་དཔེ་ཀློག་འགྲན་བསྡུར་ལ་ཞུགས་མོས་ཡོད་ཚུལ་ཞུས། རྒན་ལགས་ཀྱིས་བཀླག་བྱའི་ནང་དོན་མང་པོ་བསྐུར་བྱུང་བའི་ཁྲོད་ནས་ངས་ཀྲུའུ་ཙི་ཆིང་གི་ལྗགས་རྩོམ《དཔྱིད》ཅེས་པ་དེ་ཀློག་རྒྱུར་ཐག་བཅད། རྩོམ་ཡིག་དེ་ཐེངས་དང་པོ་ཀློག་དུས་དཀའ་ཙམ་བྱུང་མོད། རྗེས་སུ་ཐེངས་མང་པོར་བཀླགས་པས་བརྗོད་དོན་མང་ཆེ་བར་གོ་བ་ལོན་ཏེ་ཀློག་ལ་ཅུང་ཟད་བྱང་ཆུབ་པ་བྱུང་། དེའི་ཁར་དགེ་རྒན་གྱིས་ཀྱང་ཀློག་སྟངས་མི་འགྲིག་སར་མཛུབ་མོ་རི་སྟོན་གནང་བས། ང་རང་གི་དཔེ་ཀློག་ཆུ་ཚད་ཇེ་མཐོར་ཕྱིན། ང་ལ་ཐེངས་དེའི“ཨ་རང་བྱོན་རྟགས་མའི”བྱིས་པའི་དཔེ་ཀློག་འགྲན་བསྡུར་ནང་བྱ་དགའ་རིམ་པ་དང་པོ་ཐོབ་པས། སེམས་ལ་དགའ་བ་དཔག་མེད་སྐྱེས་བྱུང་ལ། མི་སུ་ཞིག་ཡིན་རུང་རང་གི་དགའ་ཕྱོགས་ཆེད་དུ་འབད་པ་བྱས་ན་གྲུབ་འབྲས་བཟང་པོ་འཐོབ་ངེས་ཡིན་པའི་གནས་ལུགས་ཀྱང་རྟོགས་བྱུང་།