ལྷག་བསམ།
གཅིག
ཤེས་རབ་ཀྱི་བློ་ཁ་རྣོ་བའི་རྩོམ་པ་པོ་ཡུའུ་ཀུའོ་ཡིས་ལྷག་བསམ་ནི་ཉི་མ་ཡིན་ཞེས་གསུངས་མྱོང་། དངོས་གནས། སྐྱེ་བོ་ཡོད་ཚད་ཉི་མར་དགའ་བ་ནང་བཞིན་ལྷག་བསམ་ཅན་ལ་མི་དགའ་བའི་སེམས་ཅན་ཞིག་འཇིག་རྟེན་འདི་རུ་ཕལ་ཆེར་ཡོད་མི་སྲིད། ང་ལ་དགེ་རྒན་གྲོགས་མོ་ཞིག་ཡོད། མོ་ལོ་བཞི་བཅུར་སོན་པའི་ཁོ་མོར་བཟའ་ཟླ་མེད་ལ་བྱིས་པའང་མེད། རང་ནུས་ཡོད་ཚད་གཞན་དོན་ལ་ཕུལ་བའི་ཁོ་མོས་ཤ་ཁྲག་གི་འབྲེལ་བ་ཅི་ཡང་མེད་པའི་སློབ་མ་རྣམས་རང་གི་ཤ་ལས་མཆེད་པ་ལྟ་བུའི་བུ་ཕྲུག་ཏུ་བརྩི་བཞིན་ཡོད། གལ་ཏེ་ཁྱེད་ཀྱིས་ཁོ་མོའི་སློབ་མ་ཞིག་གི་ཁྱིམ་བདག་ལ་མོའི་མིང་གླེང་ཚེ། ཕ་རོལ་པོའི་གདོང་ལ་ལམ་སེང་རྗེས་སུ་ཡི་རང་གི་རྣམ་འགྱུར་ཞིག་ཤར་བ་དང་ཁ་ནས། མོ་ནི་ལྷག་བསམ་ཟླ་བ་བཞིན་དཀར་བའི་མི་ཞིག་ཡིན་ཞེས་བརྗོད་ངེས། བདེན་ཏེ། མོ་ནི་མིའི་སེམས་ཀྱི་ལྡིང་ཁང་ལ་དྲོད་ཁོལ་གྱི་མེ་ཕུང་སྦྱིན་ཐུབ་པའི་བུད་མེད་ལྷག་བསམ་ཅན་ཞིག་ཡིན་པས། སློབ་གྲྭ་དེའི་དགེ་སློབ་ཡོངས་ཀྱིས་དགའ་པོ་བྱེད་བཞིན་ཡོད། དགེ་རྒན་གྱི་ལས་གནས་སུ་མོས་ལོ་བཅོ་ལྔའི་རིང་ལྷག་བསམ་ཟོལ་མེད་ཀྱིས་རང་གི་སློབ་མ་རེ་རེ་མིག་གིས་འཚོས་ཤིང་སེམས་ཀྱིས་བསྐྱངས་པའི་བརྒྱུད་རིམ་ཐམས་ཅད་ང་ལ་གསལ་ཆ་ཡོད་པས། མོ་དང་འཕྲད་ཐེངས་རེར། མོའི་ལུས་སྟེང་ནས་ངས་མི་གཤིས་ཀྱི་ཆེས་མཛེས་པའི་འོད་སྣང་ཞིག་འཕྲོ་བ་མཐོང་ཐུབ།
གཉིས།
ལས་འབྲས་ཚད་མའི་མེ་ལོང་སེམས་ན་གསལ་བའི་མི་ཞིག་ཡིན་ཕྱིན། བསམ་པ་བཟང་ན་ས་དང་ལམ་ཡང་བཟང་བའི་ལེགས་བཤད་ལ་ཁས་འཆེས་ཤིང་། རང་བཞིན་གྱིས་བཟང་པོའི་ལས་ལ་འབད་ངེས། བདག་གི་ཨ་ཕ་ནི་རང་དཔེ་གཞན་སྟོན་གྱིས་བྱིས་པ་རྣམས་ལ་སློབ་གསོ་གཏོང་མཁན་ཞིག་ཡི
ན། ཁོང་ལ་མཚོན་ན། ལས་གང་ཞིག་བགྱིས་རུང་། ལྷག་བསམ་བཅངས་ནས་བསྒྲུབ་རྒྱུ་དེ་མི་ཚེའི་རྩ་བ་རུ་འཛིན་པས། གྲོང་དཔོན་གྱི་འགན་འཁྲི་ཁུར་བའི་ཨ་ཕའི་རོགས་སྐྱོར་འོག་དཀའ་ཁག་གི་འགག་སྒོ་ལས་གྲོལ་བའི་ཁྱིམ་ཚང་ནི་ཤིན་ཏུ་མང་། སྲོག་ལ་བབས་ཀྱང་འགྱུར་བ་མེད་པའི་རྣམ་དག་གི་སེམས་པ་དཀར་པོ་མངའ་བའི་ཨ་ཕས་དུས་རྒྱུན་དུ། ཁོ་རང་འཆི་བར་གཏན་ནས་མི་སྐྲག་སྟེ། ཚེ་གང་གཞན་ལ་ལྷག་བསམ་བཅངས་ནས་རོགས་བྱས་པ་ལས་གཞན་ལ་གནོད་པའི་ལས་ཤིག་སྒྲུབ་མྱོང་མེད་པས་འཆི་དུས་བློ་བདེ་པོས་ཕྱིན་ཆོག་ཅེས་ཟེར། འདི་ནི་རང་ཁེ་གཞན་ལ་སྟེར་བར་ཐེ་ཚོམ་མེད་པའི་ཨ་ཕར་དམིགས་སུ་ཡོད་པའི་འཇིག་རྟེན་གྱི་སྐྱེ་འཆིའི་འགྲེལ་ལུགས་ཤིག་རེད། འདི་ལྟར་ཨ་ཕའི་ཤུགས་རྐྱེན་འོག་གཞན་གྱི་སྡུག་བསྔལ་ལ་བསམ་ཤེས་དང་རང་བདེ་གཞན་སྐྱིད་ཡོང་ཐབས་སུ་གཞན་ཕན་ལྷག་བསམ་འཆང་རྒྱུ་དེ་ངེད་ཚང་གི་ཁྱིམ་སྲོལ་དུ་གྱུར་ཞིང་། ངེད་མིང་སྲིང་རྣམས་ཀྱིས་ཀྱང་གཞན་ཕན་ལྷག་བསམ་གྱི་བསམ་སྤྱོད་བཟང་པོ་དང་འགྲོགས་ཏེ། རང་རང་གི་མི་ཚེའི་བགྲོད་ལམ་ནས་རང་ནུས་ལ་གཞིགས་ཏེ་གཞན་ཕན་གྱི་ལས་རེ་རྩོམ་གྱིན་མདུན་དུ་སྐྱོད་བཞིན་ཡོད་ལ། ང་ཡང་ཨ་མ་ཞིག་ཡིན་པའི་ཆ་ནས་ཀྱང་བུ་ཕྲུག་གཉིས་ཀར་རྗེས་མ་ཡ་རབས་སྤྱོད་པའི་ལས་ལ་མངོན་པར་ཕྱོགས་པའི་ལྷག་བསམ་ཅན་ཞིག་བྱས་ཏེ། རང་གི་འདོད་མོས་དང་མཐུན་ཞིང་ཀུན་ལ་ཕན་པའི་ལས་ཀ་ཞིག་བསྒྲུབ་རྒྱུ་བྱུང་ན་མི་ཚེ་འདིའི་བདེ་སྐྱིད་ཡིན་པའི་སློབ་གསོ་གཏོང་བཞིན་ཡོད།
གསུམ།
བདག་ལས་གཞན་གཅེས་ཀྱི་མི་ལྷག་བསམ་ཅན་ལ་མཆོག་ཏུ་གྱུར་པའི་ཤེས་རབ་ཡོད་དེ། ཁོང་ཚོས་གཞན་ལ་གནོད་པ་སྐྱེལ་བ་ནི་རང་ཉིད་ལ་གནོད་བྱེད་པ་དང་གཅིག་མཚུངས་སུ་བརྩིས་ནས། ཁུ་སིམ་མེར་འཇིག་རྟེན་གྱི་གྲུ་ཁ་སོ་སོ་ན་རྣམ་དཀར་དགེ་བའི་ལས་ལ་བརྩོན་བཞིན་མཆིས་ཏེ། དགེ་རྒན་ལྷག་བསམ་ཅན་གྱིས་སློབ་མར་ཕན་བདེ་མཆོག་གི་དགེ་ལེགས་སྩོལ་ལ། སྨན་པ་ལྷག་བསམ་ཅན་གྱིས་གཞན་ཕན་གྱི་ཁུར་ཆེན་འདེགས་པར་སྐྱོ་ངལ་སྤངས་ནས་མི་སྲོག་སྐྱོབ། དཔོན་པོ་ལྷག་བསམ་ཅན་གྱིས་མི་དམངས་ཀྱི་ཕན་བདེ་དོན་དུ་གཉེར་ནས་རང་ལུས་འབུལ་ཞིང་། ཚན་རིག་པ་ལྷག་བསམ་ཅན་གྱིས་རང་སྲོག་འབེན་ལ་བཙུགས་ནས་སྤྱི་དོན་འབའ་ཞིག་ལ་གཞོལ། མཁས་པ་ལྷག་བསམ་ཅན་གྱིས་མིའི་རིགས་ཀྱི་ལས་དབང་དང་བདེ་སྡུག་གི་ཆེད་ཚེ་གཅིག་རིང་འབད་པ་སོགས་གཞན་ཕན་གྱི་ལས་ལ་བརྩོན་པའི་ལྷག་བསམ་ཅན་དེ་དག་གིས་བབ་ཆགས་པའི་གྱོན་ཆས་གྱོན་རུང་མཛེས་པར་མཐོང་།
བཞི།
མི་ཞིག་གི་ཆེས་བཟང་བའི་བསམ་བློ་ཀུན་སྤྱོད་ནི་རྩ་བ་སེམས་གཏིང་དུ་ཟུག་པའི་ལྷག་བསམ་དེ་ཡིན་ལ། ལྷག་བསམ་གྱིས་འཇིག་རྟེན་འདི་ཉིད་གནམ་ས་བླ་འོག་བརྗེས་པ་ལྟ་བུའི་འགྱུར་བ་གཏོང་མི་ཐུབ་རུང་། རོགས་རམ་ཐོབ་སའི་མི་དེར་འགྱུར་བ་གཏོང་ཐུབ། ན་ནིང་གི་ལོ་འགོར། ང་ལ་ཆ་ལུགས་མཛེས་ཤིང་སྤྱོད་ལམ་བཟང་ལ། ཀུན་ལ་ཕན་པའི་བུད་མེད་འགོ་ཁྲིད་ཅིག་དང་མཉམ་དུ་ལས་ཀ་བྱེད་པའི་གོ་སྐབས་ཐོབ། ཁོང་གིས་ཚོགས་འདུ་ཚོགས་ཐེངས་རེར་བཤད་རྒྱུར། ང་ཚོ་ནི་ལས་རོགས་ཙམ་མ་ཡིན་ཏེ། མི་ཚེ་ཕྱེད་ཀ་མཉམ་དུ་སྐྱེལ་དགོས་པས། ཁྱིམ་ཚང་གཅིག་གི་ནང་མི་ལྟ་བུ་ཡིན་ཞེས་ཟེར། ལོ་གཉིས་ཀྱི་འདྲིས་གཤིབ་བརྒྱུད། ཡོན་ཏན་གྱི་དྲི་བསུང་ཀུན་ནས་འཐུལ་བའི་མོའི་ཧུར་བརྩོན་འོག་ལས་ཁུངས་ནི་དངོས་གནས་རང་ཁྱིམ་ལྟ་བུར་གྱུར་ལ། ལས་རོགས་དབར་གྱི་འབྲེལ་བའང་ཡིད་རྟོན་འཕེར་བའི་ནང་མི་ལྟར་གྱུར་ཞིང་། ནམ་རྒྱུན་འཁང་ར་དང་རྒྱབ་བཤད། ཕྲག་དོག་དང་ཞེ་སྡང་སོགས་བྱེད་པར་དགའ་བའི་མི་དེ་དག་ཀྱང་མོའི་ལྷག་བསམ་འོག་ཡ་རབས་གཙུག་ཏུ་བཀུར་ཞིང་གུས་ལུགས་ལ་བརྩི་མཁན་དུ་གྱུར་བས། ལས་ཁུངས་ནི་དྲོད་ཁོལ་འཛོམས་པའི་གཞིས་ཁྱིམ་དང་འདྲ་བར་དྲོ་སོབ་སོབ་བྱེད། དངོས་གནས་མོ་དང་མཉམ་དུ་ལས་ཀ་བསྒྲུབ་རྒྱུ་ནི་ལོངས་སྤྱོད་ཅིག་ཡིན་ཏེ། ལས་གྲོགས་ཡོངས་ཀྱིས་འཁང་ར་དང་གནོན་ཤུགས་མེད་པར་རང་གི་ཕྲག་ཏུ་བབས་པའི་འགན་འཁྲི་དེ་དགའ་དགའ་སྤྲོ་སྤྲོའི་ངང་ཁུར་སྲིད་པས། ད་བར་དུ་གཤིབས་ཡོང་བའི་འགོ་ཁྲིད་མང་པོའི་ཁྲོད། ཁོང་ནི་ལས་ཁུངས་རང་ཁྱིམ་དུ་སྒྱུར་མཁན་ཨང་དང་པོ་དེ་ཡིན།
ལྔ།
མི་ཚེའི་ཁྲོད་ཆེས་མཛེས་སྡུག་ལྡན་པ་ནི་ལྷག་བསམ་བཅངས་ནས་འཚོ་བར་རོལ་རྒྱུ་དེ་ལས་མ་འདས་ཤིང་། ལྷག་བསམ་གྱི་སློབ་དེབ་ནི་གཞན་གང་དུའང་མེད་དེ། རང་གི་སེམས་དབུས་སུ་ཡོད། ལྷག་བསམ་གྱི་སློབ་དཔོན་ནི་གཞན་སུ་ཡང་མིན་ཏེ་རང་ཉིད་ཡིན། དེར་བརྟེན། མི་ཚེའི་རིན་ཐང་མངོན་འགྱུར་ཡོང་ཆེད། དེ་རིང་ནས་འགོ་བརྩམས་ཏེ་ང་ཚོས་ལྷག་བསམ་གྱི་རང་མདངས་དུང་ལྟར་དཀར་བའི་མི་ཞིག་བྱེད་ཨེ་ཐུབ་ལ་འབད་བརྩོན་བྱེད་དགོས་སོ།