ཨ་མའི་བྱམས་བརྩེ།
འཛམ་གླིང་འདིའི་ཐོག་ཉིན་མཚན་མེད་པར་ང་ལ་སེམས་ཁྲལ་དང་ངའི་ཆེད་དུ་ཡོད་ཚད་བློས་གཏོང་གནང་མཁན་ཞིག་ཡོད་པ་དེ་ནི་ང་རང་ཆུང་བྱིས་པའི་དུས་ནས་གསོ་སྐྱོང་གནང་མཁན་དང་། ང་ལ་ཟ་ལུགས་འགྲོ་ལུགས་སྡོད་ལུགས་སློབ་གནང་མཁན་གྱི་ཨ་མ་ལགས་ཡིན། ཁོང་གིས་ཆུང་བྱིས་པའི་དུས་ནས་ང་ལ་སེམས་པ་བཟང་བ་དང་ལས་ལ་བརྩོན་པའི་མི་ཞིག་བྱེད་དགོས་པའི་སློབ་གསོ་གང་མང་གནང་གི་ཡོད།
ཨ་མ་ལགས་ནི་ངའི་དགེ་རྒན་ཐོག་མ་དེ་ཡིན། གང་ཡིན་ཞེ་ན། ང་ལ་དཀའ་ངལ་འཕྲད་སྐབས་ཁོང་གིས་རོགས་རམ་དང་རྒྱབ་སྐྱོར་ཚད་མེད་གནང་གི་ཡོད། ཁོང་ནི་སྒྲོན་མེ་ཞིག་དང་འདྲ་བར་ངའི་མི་ཚེའི་ལམ་བུར་འོད་སྣང་སྩོལ་བཞིན་ཡོད། ཐེངས་ཤིག་སློབ་མཇུག་ཡིག་ཚད་སྐབས་ངའི་རྩིས་རིག་གི་སྦྱངས་འབྲས་ཧ་ཅང་ཞན་པས་སེམས་ལ་དངངས་འཚབ་ཆེན་པོ་ལངས་ཏེ་ཁྱིམ་དུ་ལོག་མི་ནུས་པར་ལུས། ཡུད་ཙམ་ནས་ཁྱིམ་དུ་ལོག་པ་ན་ཨ་མ་ལགས་ཀྱིས་ད་ཐེངས་ཡིག་ཚད་ཡག་པོ་བཏང་འདུག་གམ་ཞེས་བཀའ་འདྲི་གནང་བྱུང་། ངས་ཅུང་ཞེད་སྣང་དང་བཅས་ཨ་མ་ལགས་ལ་ད་ཐེངས་རྩིས་རིག་གི་སྦྱངས་འབྲས་ཞན་ཙམ་འདུག་ཅེས་ཞུས་པ་ཡིན། ངའི་སེམས་ལ་ད་ཐེངས་ཨ་མ་ལགས་ཀྱིས་ང་ལ་གཤེ་གཤེ་དྲག་པོ་གཏོང་ངེས་རེད་སྙམ། ཡིན་ནའང་ཨ་མ་ལགས་ཀྱིས་ང་ལ། སྐྱོན་མེད། ཡིག་ཚད་རྗེས་མར་ཤུགས་རྒྱོབ་ཅིག བུ་མོ་རང་གིས་ནམ་རྒྱུན་དུ་རང་གི་སྦྱངས་འབྲས་ཞན་པའི་སློབ་ཚན་ལ་འབད་བརྩོན་མང་ཙམ་དང་སློབ་ཚན་ནན་ཏན་ཉན་དགོས་ཞེས་གསུངས་བྱུང་བས། ངའི་སེམས་ལ་ཨ་མས་གསུངས་པའི་བཀའ་མོལ་དེར་རྒྱུ་མཚན་ཆེན་པོ་འདུག་ཨང་སྙམ་བྱུང་། ཨ་མ་ལགས་ནི་འཛམ་གླིང་འདིར་ངས་དགའ་ཤོས་བྱེད་སའི་མི་དེ་ཡིན། ནམ་རྒྱུན་འཚོ་བའི་ཁྲོད་ང་ལ་རོགས་རམ་གནང་མཁན་གྱི་མི་མང་པོ་ཞིག་ཡོད་ཀྱང་། ཨ་མ་ལགས་ནི་ཆེས་བརྗེད་ཐབས་མེད་པའི་མི་ཞིག་ཡིན། ཁོང་གིས་ང་ལ་ཚེ་སྲོག་གནང་བ་དང་མཛེས་སྡུག་ལྡན་པའི་ཁྱིམ་ཚང་ཞིག་གནང་བྱུང་བས། ངས་ཁོང་ལ་བཀའ་དྲིན་ཆེ་ཞེས་ཞུ་གི་ཡིན་ལ། ངས་མུ་མཐུད་བརྩོན་པ་བརྒྱ་དང་འབད་པ་སྟོང་གིས་སློབ་སྦྱོང་ཧུར་ཐག་བྱས་ནས་ཨ་མ་ལགས་ཀྱི་བཀའ་དྲིན་གསོལ་ཐུབ་པ་བྱེད་ཀྱི་ཡིན།