མཛའ་བརྩེའི་རླུང་བུ།
སེམས་ཀྱི་ན་བུན་ཚལ་དུ། །
ཁྱོད་རང་མགྲོན་དུ་ཕེབས་བྱུང་། །
སྙན་ངག་སྐྱེམས་ཆང་བདུད་རྩི། །
མཉམ་དུ་འཐུང་དགོས་བྱུང་སོང་། །
བརྩེ་འདང་ལས་ཀྱི་མེ་ཏོག །
འདབ་མ་འཐོར་བ་མ་གནང་། །
ཉི་མ་ནུབ་ཏུ་བཞུད་ན། །
སེམས་ཀྱི་དྲོད་ཁོལ་ཡལ་འགྲོ། །
དགོང་གི་ཉི་མའི་གོམ་སྟབས། །
ཁྱོད་རང་ཕྱོགས་སུ་བསྒྱུར་སོང་། །
སྲོད་ཀྱི་བྱ་ཁྱུ་དག་ལ། །
འཕྲིན་པ་ལན་གཅིག་བསྐུར་ཡོད། །
གཙང་ཆུའི་རབ་ཁ་བརྒལ་ནས། །
ཁྱོད་རང་ཕྱོགས་ལ་བཅར་ཡོད། །
ལན་གཅིག་འཆར་བའི་བསྡུས་གཟུགས། །
ཡིད་ནས་བོར་རྒྱུ་མི་འདུག །
བརྩེ་བའི་མིག་ཟུང་གཏད་ས། །
ཁྱོད་རང་གཅིག་པུ་ཡིན་སོང་། །
བརྩེ་འདང་ལས་ཀྱི་མེ་ཏོག །
ང་ལ་ཕྱོགས་ནས་བཞད་བྱུང་། །
མིག་ཟུང་འཁོར་སྟངས་ཤིག་གིས། །
ཁྱོད་རང་ཡིད་ལ་འཁོར་སོང་། །
རྒྱབ་གཟུགས་འཁོར་སྟངས་ཤིག་གིས། །
ཕྱིར་དྲན་གྲངས་མེད་བཞག་སོང་། །
ཡིད་འདྲིས་ན་ཆུང་ཁྱོད་ལ། །
སེམས་ཀྱི་ཕྱི་ནང་བསྟན་ཡོད། །
མཛའ་བརྩེའི་རླུང་བུ་དྲོན་མོ། །
ང་ཡི་ཕྱོགས་སུ་ལྡང་རོགས། །