འདིར་ང་ཚོས་སྡེར་ནང་ས་བྲིས་ཀྱི་གཞུང་མ་བཤད་པའི་སྔོན་ལ། སྡེར་ནང་ཞེས་པའི་ཐ་སྙད་འདི་ལ་ངོས་འཛིན་ནམ་རྒྱུས་ལོན་ཞིག་བྱས་ན། སྡེར་ནང་ཟེར་བ་ནི་ས་མིང་དགོན་ལ་ཐོགས་ཤིང་། རིམ་བཞིན་དགོན་མིང་སྡེ་ལ་ཐོགས་པར་སྣང་སྟེ། 《རྨ་ཡུལ་སྡེར་ནང་དགོན་གྱི་གདན་རབས་དང་སྡེར་ནང་ས་བྲིས་ཀྱི་ལོ་རྒྱུས་རུས་མཛོད》ལས“ད་ལྟའི་རྨ་ཡུལ་སྡེར་ནང་དགོན་ནི་སྔོན་སྡེར་རྒྱབ（ད་ལྟའི་པདྨ་རྫོང་ཁོངས་དབང་རོལ་གྱི་ས་ཆ་ཡིན）ཏུ་ཡོད་ལ། དེ་ནི་སྤྱི་ལོ1785ལོར་སྡེར་རྒྱབ་བླ་མ་ཡོན་ཏན་རྒྱ་མཚོ་མཆོག་གིས་གསར་དུ་ཕྱག་བཏབ་པ་ཡིན་ལ། རྗེས་སུ་ཡུལ་སྡེའི་ས་ཆའི་གནས་སྤོར་གྱི་སྟབས་དང་བསྟུན་ནས་རྨ་ཡུལ་སྡེར་ནང་དུ་གནས་སྤོས་ཏེ་དར་ཞིང་རྒྱས་པའི་སྐབས་སོ”ཞེས་པ་ལས་ཤེས་པར་སྣང་ངོ་། ། མགོ་ལོག་སྡེར་ནང་ས་བྲིས་ཀྱི་ནང་དུ་ད་ལྟ་རྨ་ཡུལ་སྡེར་ནང་ཡུལ་ཚོ་ཞེས་སྲིད་འཛིན་ཡུལ་ཚོ་གཅིག་ལ་འབྲོག་པ་ཁྱིམ་ཚང་བཞི་བརྒྱར་ཉེ་བ་ཡོད་ཅིང་། སྡེར་ནང་དགོན་པ་ལ་ཡང་རྒྱུན་བཞུགས་བླ་གྲྭ་300ལྷག་ཡོད་པ་དང་། ལོ་རེ་བཞིན་དབྱར་གནས་དང་། སྤྱི་སྲུང་། གསང་རྙིང་། སྒྲུབ་ཆེན། སྨྱུང་གནས། ཐོས་གྲོལ་སྒྲུབ་མཆོད། དགུ་གཏོར་སོགས་ཆོས་ལུགས་ཀྱི་ཆོ་ག་མང་དུ་ཡོད་ལ། དེ་མིན་གཞུང་མཚན་ཉིད་དང་། སྡེར་ནང་ས་བྲིས་སོགས་ཀྱི་ཁྲིད་འཆད་ཉན་ཡང་ཡོད།

སྡེར་ནང་ས་བྲིས་ཞེས་མིང་ཐོགས་དོན་ནི་བྲིས་འདི་ཐོག་མར་ཡུལ་མགོ་ལོག་གི་སྡེར་ནང་ཚོ་བར་དར་བས་ན་སྡེར་ནང་དང་། བྲིས་ཁུངས་གཙོ་བོ་ནི་ས་ངན་བསྟན་འཛིན་ཡིན་པས་ན་ས་བྲིས་སུ་བཏགས་པ་ཡིན། དེའང་ཡུལ་དབུས་སོ་སོར་དར་ཚུལ་གྱི་དབང་གིས་ཐ་སྙད་ཆེ་བ་གསུམ་སྔོན་དུས་སུ་མཆེད་པ་ནི། ས་ངན་ས་བྲིས་དང་། ཀཿ་བྲིས། ཁྲ་བྲིས་བཅས་ཡིན། འོན་ཀྱང་ཉིས་སྟོང་བརྒྱད་ཀྱི་ལོར་རྒྱལ་ཡོངས་ལ་ཡར་ཞུ་བྱེད་པའི་དགོས་དབང་གིས་སྡེར་སྣང་ས་བྲིས་ཞེས་པའི་ཐ་སྙད་འདི་བཏགས་སོ། གཞན་ཡང་ཟུར་བརྒྱུད་ཁུངས་དག་མང་དུ་མཆིས་པ་ཡང་སྨོས་མ་དགོས་ཏེ། སྔོན་ཚེར་ས་བྲིས་འདི་འབྲི་སྐབས་ས་མགོ་ཆེ་བར་འབྲི་དགོས་པས་ས་བྲིས་ཟེར་སྲོལ་ཡོད་ལ། རྗེས་སུ་ཡི་གེའི་ཆ་ཚད་དང་སྤྱི་ཁོག་སོགས་ལ་དམིགས་ནས་ས་མགོ་ཆུང་བར་བྱས་མོད་ཀྱང་མིང་དེ་ལྟར་ལུས་པའི་བཤད་སྲོལ་ཞིག་ཡོད་ཅེས《མགོ་ལོག་སྡེར་ནང་ས་བྲིས》ནང་དུ་འཁོད་འདུག་གོ

སྡེར་ནང་ས་བྲིས་ལ་དབྱེ་ན་དབུ་མེད་ཀྱི་ཡིག་ཆེན་དང་ཡིག་ཆུང་། ཡིག་འབྲིང་། འབྲི་ཚ། དབུ་ཅན། ལན་ཝར་སོགས་ཀྱི་ཁྲིད་རྒྱུན་དང་ལྡན་པ་ཞིག་ཡོད། དེའི་ནང་ནས་ཅུང་གྲགས་ཆེ་བའམ་བཀོལ་སྤྱོད་མང་བ་ནི་དབུ་མེད་ཀྱི་སྐོར་དེ་དག་ཡིན། དེ་རྣམས་ཀྱང་རང་ངོས་ཀྱི་ཁྱད་ཆོས་འབུར་དུ་ཐོན་པ་ཞིག་ཡོད་དེ། དཔེར་ན། ཡིག་ཆེན་ལ་མཚོན་ན་སྒམ་ཆེ་ཞིང་དཀྱུས་ཡངས་བ། ཉམས་བརྗིད་ལྡན་ལ་བརྟན་ཞིང་བརླིང་བ། ཚགས་དམ་ཞིང་གྲལ་འགྲིག་པ་སོགས་ཀྱི་ཁྱད་ཆོས་ལྡན་ཡོད། ཡིག་འབྲིང་ལ་མཚོན་ན་འགྲོས་གཙང་ཞིང་སྟངས་སྟབས་མྱུར་བ་དང་། སྙོམ་འགྲིག་ལ་འབྲི་བདེ་ཞིང་སྤྱོད་སླ་བ། ཆ་ཚད་འགྲིག་པ་སོགས་ཀྱི་ཁྱད་ཆོས་ལྡན་ཡོད། ཡིག་ཆུང་ནི་འབྲི་སླ་ཞིང་འདོན་བདེ་བ། སྒྱུ་རྩལ་གྱི་ཉམས་འབུར་དུ་ཐོན་པ་ཞིག་ཡོད་པར་སྣང་། འབྲུ་ཚ་ནི་རྐང་འགྲིག་ཅིང་འགྲོས་གཙང་བ། བྲིས་ཁོག་ཡངས་ཤིང་བྲིས་ཉམས་དོད་པ་སོགས་ཀྱི་ཁྱད་ཆོས་ལྡན་ཡོད་དོ། དེ་ཡང་ཡི་གེ་བྲི་བའི་ཚེ་ན། ལག་གཡས་བརྐྱངས་བཀུམ་ལྷོད་གསུམ་འཚམ་ཞིང་། ལག་པའི་སྤར་ཁྱིམ་དུ་ཕུག་རོན་གྱི་སྒོ་ང་ཚུད་ཙམ་ལྟ་བུའི་ཁོང་སྟོང་བཞག་པའི་སོར་མོའི་བསྐུམས་ཚད་རན་ན། སོར་མོའི་རྩ་ཁམས་རྣམས་རྣལ་དུ་འབབ་པས་བྲི་ཡུན་རིང་ཡང་སོར་ཚིགས་དང་མཁྲིག་ཚིགས་མི་ན་བར་ཕན་པར་མ་ཟད་ཡིག་གཟུགས་ཀྱང་ཡག་པོ་ཐོན་པར་ཕན། སྨྱུ་གུ་བཟུང་བའི་ཚེ་ན། མཐེབ་མཛུབ་གཉིས་ཀྱི་དམ་ལྷོད་རན་པ་དང་། ཡི་གེ་འབྲི་གཞི་དེ་རང་རང་གི་བྲང་གཡས་པའི་ཐད་དམ་དཀྱིལ་ཀྲུང་གི་སྐབས་སུ་པུས་མོ་གཡས་པའི་སྟེང་དུ་བཞག་སྟེ། ལུས་སྟོད་སྲོང་པོར་བྲིས་ན་འཕྲེང་མི་ཡོ་བ་དང་། ཡིག་གཟུགས་དྲང་པོའམ་ཀྲོང་ངེར་འབྲི་ཐུབ་པར་ཕན།

ས་བྲིས་ཡིག་གཟུགས་ནི་དྲང་འཁྱོག་ཟུང་འབྲེལ་གྱི་མཁྲེགས་སྨྱུག་ཡིག་གཟུགས་ཡིན། དེར་བརྟེན་འདི་ཉིད་ཐོགས་ཐུག་མེད་པའི་འཁྱོག་ཐིག་དང་དྲང་ཐིག་གི་ཕན་འབྲས་ཤིག་གྲུབ་སླ། བརྐོས་གཟུགས་དང་ཧ་ལམ་གཅིག་མཚུངས་ཡིན། དེ་མིན་སྡེར་ནང་ས་བྲིས་ལ་དཀྱིད་ལུགས་རེ་རེ་རང་གི་འགྲོ་ལམ་ཚད་ལྡན་ཡོད་པ་དང་། ཡིག་འབྲུ་རེ་རེར་རང་གི་གནས་བབས་དང་བསྟུན་ནས་འབྲི་ཚུལ་རེ་ཡོད། དེས་ན་སྡེར་ནང་ས་བྲིས་ནི་བྲིས་ན་ཚགས་དམ་པ། བཏོན་ན་ཁོངས་ཡངས་བ། བལྟས་ན་གྲ་དག་པ་དང་། དཀྱིད་ལུགས་རེ་རེ་ལ་ཁུངས་བཙན་ཞིང་འབྲུ་མ་རེ་རེ་ལ་རུས་རྐང་ལྡན་པ། ཐིག་ཕྲེང་དང་ཐིག་ཕྲེང་གི་བར། ལྡེབ་མ་དང་ལྡེབ་མའི་བར་སོགས་མིག་ལ་བརྒྱུད་པ་ཙམ་གྱིས་འགྲོས་རྐང་འགྲིག་ཅིང་འཕྲེད་གཤོང་མཉམ་པ། དེ་ཡང་ས་ཆེན་འགྱིང་བའི་གཟི་རྔམས་དང་ལྡན་པས་ཡི་གེ་རེ་རེ་ལའང་རུས་རྐང་ལྡན་ཞིང་ཚེ་སྲོག་འབར་བ་སོགས་ཀྱི་ཐུན་མིན་ཁྱད་ཆོས་ཀྱིས་མཛེས་སོ།

མདོར་ན། སྡེར་ནང་ས་བྲིས་ཀྱིས་ཀྱང་བོད་ཀྱི་ཡིག་གཟུགས་སྤྱི་དང་འདྲ་བར་ཡི་གེའི་རུས་ཤ་མཛེས་གསུམ་ཤིན་ཏུ་ནས་བཞེད་དེ། དེ་ཡང་རུས་ཟེར་བ་ནི་ལས་དང་པོ་བས་ཐོག་མར་སྦྱང་བ་ལ་ཐིག་ལ་རུས་རྐང་ཚུགས་ཟེར་བ་དང་། སྦྱངས་ནས་ཚད་དུ་ལོན་པ་ལ་རུས་པར་ཤ་ཉམས་དོད་པོ་དགོས་པ། མཇུག་མཐར་སྒྱུ་རྩལ་གྱི་ཚད་གཞིར་བྱིན་པ་ལ་ཤ་ལ་མཛེས་ཉམས་ཆགས་པ་དེ་རིམ་པ་བཞིན་བསླབ་པ་ཡིན་ན། དེ་དུས་ཀྱི་ཡིག་གཟུགས་ལ་ནང་རུས་ཕྱི་ཤ་ཙམ་ཀྱི་ཚད་གཞི་ལས་བརྒལ་ཏེ། སྒྱུ་རྩལ་གྱི་ཚེ་སྲོག་ཞུགས་པ་ཡིན་པས་དེའི་དུས་ཀྱི་མཛེས་པ་དེ་ལ་ད་གཟོད་ཡིག་གཟུགས་ཀྱི་གཞི་རྐང་དང་བླ་སྲོག་ལྡན་པ་ཞིག་ཆགས་ངེས་ཡིན།

（བོད་ལྗོངས་སློབ་ཆེན་21ལོའི་བོད་དགེ་འོས་འཛིན་གྲྭ་གཉིས་པའི་བློ་བཟང་དོན་གྲུབ། བོད་ལྗོངས་སློབ་ཆེན་གྱི་སློབ་ཆེན་སློབ་མའི་ལས་གཏོད་རྣམ་གྲངས། རྣམ་གྲངས་ཀྱི་ཨང་གྲངས་ནི་202410694004ཡིན）