ལོ་རྒྱུས་ཡུན་རིང་ལྡན་པའི་མངའ་རིས་ཀྱི་གར།
མངའ་རིས་ཁུལ་དུ་ཤོན་ནམ་གར་ཤོན་ཞེས་པ་ཞིག་དར་ཞིང་། ཤོན་ཞེས་པ་ནི་ཞང་ཞུང་གི་སྐད་དོད་ཡིན་པ་ལས་དོན་དུ་གླུ་གར་གྱི་དོན་ཡིན་ཞིང་། གུ་གེའི་ཤོན་ལ་ཤོན་ཆེན་བཅུ་གསུམ་ཞེས་དུམ་བུའམ་ལེ་ཚན་བཅུ་གསུམ་ལས་གྲུབ་པ་དང་འཁྲབ་ཆས་དང་། འཁྲབ་པའི་དུས་ཚོད། འཁྲབ་མཁན་མི་གྲངས་བཅས་ལ་ཚད་བཀག་ནན་པོ་ཡོད། དང་ཐོག་མཛད་སྒོ་ཆེ་གྲས་དང་ལོ་གསར་སོགས་ཀྱི་སྐབས་སུ་ཕོ་བྲང་ནང་འཁྲབ་པ་དང་། མཐོ་ལྡིང་དགོན་པའི་ཆོས་ཕྱོགས་ཀྱི་མཛད་སྒོ་ཆེ་གྲས་སྐབས་སུ་གཞི་ནས་འཁྲབ་པ་ལས་རྣམ་ཀུན་གང་འདོད་དུ་འཁྲབ་ཀྱི་མེད་པར་གྲགས། འོན་ཀྱང་ཕྱིས་སུ་རྩ་མདའ་དང་། རུ་ཐོག སྤུ་ཧྲེང་། སྒར་རྫོང་སོགས་ཀྱི་དམངས་ཁྲོད་དུའང་དར་ཁྱབ་ཆེན་པོ་བྱུང་བ་དང་འཁྲབ་སྟོན་གྱི་དུས་ཚོད་སོགས་ལ་ཡང་ཚད་བཀག་ཆུང་དུ་ཕྱིན་ཡོད། གནའ་ཉམས་དོད་པའི་འཁྲབ་ཆས་དང་། སྙན་འཇེབས་ལྡན་པའི་འགྱུར་ཁུག ངོ་མཚར་ཆེ་བའི་སྟངས་སྟབས་ལྡན་པའི་ཤོན་ལ་མདུན་ཤོན་དང་། རྒྱབ་ཤོན། བྲོ་ཤོན་བཅས་རིགས་གསུམ་ཡོད་པའི་མདུན་ཤོན་ནི་ལག་གདང་སྦྲེལ་ནས་འཁྲབ་རྒྱུ་དེ་ཡིན་པ་དང་། རྒྱབ་ཤོན་ནི་རྒྱབ་ལག་བྱས་ནས་འཁྲབ་པ། བྲོ་ཤོན་ནི་གཞས་གཏོང་བཞིན་འཁྲབ་པ་དེ་ཡིན། སྤྱིར་ཤོན་གྱི་ཕྱག་རྒྱ་དང་སྟངས་སྟབས་གཙོ་བོ་ནི་སྟར་ཕྲེང་སྒྲིག་པའམ་སྒོར་ཕྱེད་ཀྱི་རྣམ་པའི་ཐོག་ནས་རྐང་པ་རྐྱང་སྐུམ་དང་ལྡོག་འགྲོས་བྱེད་བཞིན་དུ་ལུས་སྟོད་རྒྱབ་མདུན་གཉིས་སུ་འགུལ་རྒྱུ་དེ་ཡིན་ཞིང་། རམ་འདེགས་རོལ་མོ་ནི་སྒྲ་སྙན་དང་། གཤང་། ཌ་མ་རུ། རྔ་བཅས་ཡིན། མདོར་ན་ཤོན་གྱི་གཞས་མདངས་སྙན་འཇེབས་ཡིད་དབང་འཕྲོག་ལ་སྟངས་སྟབས་གནའ་ཉམས་དོད་ཅིང་བྱིན་ཆགས་པ་ཞིག་ཡོད། མཁས་པ་ལ་ལས་ཤོན་ལ་ལོ་ངོ་སྟོང་གི་ལོ་རྒྱུས་ཡོད་ཚུལ་ཡང་གླེང་ཞིང་། དེའི་རྒྱུ་མཚན་ནི་ལོ་རྒྱུས་ཡིག་ཆ་ལས་སྟོན་པ་གཤེན་རབ་མི་བོ་ཆེ་གདན་དྲངས་སྐབས་ཤོན་འཁྲབ་ཚུལ་འཁོད་པ་སྒྲུབ་བྱེད་དུ་འཇོག་གི་ཡོད། གང་ལྟར་ཤོན་ནི་ལོ་རྒྱུས་རིང་ལ་བོད་ཀྱི་གནའ་རབས་ཀྱི་གླུ་གར་གལ་ཆེན་ཞིག་ཡིན་པ་སྙོན་དུ་མེད། ཤོན་ལ་གར་ཤོན་ཞེས་འབོད་དོན་ནི་རྒྱ་ཆེ་ས་ནས་བཤད་ན་ཤོན་ནི་གར་གྱི་རིགས་སུ་གཏོགས་པ་མ་ཟད། སྐབས་དེར་གར་དང་ཤོན་མཉམ་དུ་འཁྲབ་སྲོལ་དར་བས་དེ་ལྟར་འབོད་ཚུལ་ཆགས་པ་ཞིག་ཡིན། སྐབས་ཤིག་རིང་མངའ་རིས་ཀྱི་སྤུ་ཧྲེང་དང་། རུ་ཐོག རྩ་མདའ་སོགས་སུ་སྒྱུ་རྩལ་དེ་དར་འཕེལ་ཆེན་པོ་བྱུང་། དེ་རྗེས་བོད་ཀྱི་ལོ་རྒྱུས་ཨ་སྔོན་ཡངས་པོར་ལོ་ཟླའི་འཆར་ནུབ་མང་དུ་འདས་རྗེས་ཀྱི་གཙང་པ་རྒྱལ་པོའི་དུས་སུ་མངའ་རིས་གུང་ཐང་གི་ས་ཁུལ་རྣམས་དབང་དུ་བསྡུས་རྗེས་མངའ་རིས་ཀྱི་བྲོ་གར་པ་རྣམས་ཕོ་བྲང་དུ་བསྐོངས་ནས་འཁྲབ་སྟོན་བྱེད་དུ་བཅུག་པའི་ལོ་རྒྱུས་ཡོད་པ་དང་། ཏཱ་ལའི་བླ་མ་སྐུ་ཕྲེང་ལྔ་པའི་དུས་སུ་སྡེ་སྲིད་སངས་རྒྱས་རྒྱ་མཚོས་1688ལོར་བྲོ་གར་དང་། གླུ་དབྱངས། རོལ་ཆ་བཅས་སྔར་ཡོད་ཞུ་དག་དང་། ཉམས་པ་སླར་གསོ། སྔར་མེད་གསར་གཏོད་བཅས་བྱས་པའི་ཐོག་ལ་དྭགས་ཁུལ་ནས་རྒད་པོ་མ་ཎི་དེ་བ་སོགས་རོལ་མོའི་སྒྱུ་རྩལ་སྤྱི་ལ་མཁས་པ་དང་། ཞབས་གཞས་ལ་མཁས་པ། སུར་རྣ་དང་གླིང་བུ་གཏོང་མཁས་པ། སྒྲ་སྙན་གཏོང་མཁས་པ་བཅས་མི་གྲངས་ལྔ་མཉམ་བསྡུས་ཀྱིས་ཁོང་ཚོས་ཕུལ་བའི་ཟིན་བྲིས་གཞིར་བཟུང《གནའ་བོའི་ལུགས་བཟང་ཡ་རབས་སྲོལ་གཏོད་པའི་དེབ་ཐེར་མིག་ཡིད་རྣ་བའི་དགའ་སྟོན》ཞེས་པའི་དེབ་གསར་རྩོམ་མཛད་དེ་བྲོ་གར་དང་། གླུ་གཞས། རོལ་ཆ་བཅས་གཅིག་ཏུ་བསྡུས་པའི་དེབ་ཐོག་མར་བཏོན། གང་དེས་སྔར་ཡོད་མངའ་རིས་ཀྱི་བྲོ་གར་འཁྲབ་མཁན་རྣམས་གཅིག་སྡུད་ཐོག་གར་པའི་ཆེད་ལས་ཚོགས་པ་ཞིག་བཙུགས་པར་མིང་གྲགས་མང་པོ་བྱུང་བས། དུས་ཕྱིས་བར་གནས་པའི་རྩེ་ཕོ་བྲང་གི་གར་པའི་ཚོགས་པ་དེ་ཡིན།