ཤིན་ཧྭ་གསར་འགྱུར་ཁང་པེ་ཅིང་ནས་ཟླ་5ཚེས་23ཉིན་གློག་འཕྲིན་འབྱོར་གསལ། ཟླ་5ཚེས་23ཉིན། བོད་བརྒྱུད་ནང་བསྟན་གྱི་སྐབས་ཉི་ཤུ་པའི་མཐོ་རམས་པའི་མཚན་གནས་སྤྲོད་པའི་མཛད་སྒོ་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་དུ་འཚོགས་ཤིང་། བོད་བརྒྱུད་ནང་བསྟན་གྱི་དགེ་ལུགས་པ་དང་། བཀའ་རྒྱུད་པ། ཇོ་ནང་པ་བཅས་ཀྱི་དགེ་འདུན་པ་28ཀྱིས་ལོ་གསུམ་རིང་སྦྱངས་པ་ལྷུར་ལེན་གནང་བས། སྦྱང་བྱའི་གནས་ཚང་མ་མཐར་ཕྱིན་ནས་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་མཐོ་རིམ་མཚན་གནས་འཛིན་གྲྭའི་སློབ་ཐོན་ལག་ཁྱེར་རག་པ་དང་། ཐོབ་ཐང་ཞིབ་བཤེར་དང་། རྟགས་གསལ་གཏོང་བ། དཔྱད་རྩོམ་ལ་རྩོད་ལན་འདེབས་པ་བཅས་ཀྱི་གོ་རིམ་ནན་པོ་བརྒྱུད། དགེ་འདུན་པ་28ཚང་མར་བོད་བརྒྱུད་ནང་བསྟན་གྱི་མཐོ་རམས་པའི་མཚན་གནས་ཐོབ་པ་རེད།

ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་། བོད་བརྒྱུད་ནང་བསྟན་མཚན་གནས་ལས་དོན་མཛུབ་ཁྲིད་ཨུ་ཡོན་ལྷན་ཁང་གི་ཀྲུའུ་རེན། ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་ཡོན་ཀྲང་བཅས་ཡིན་པའི་འཇམ་དབྱངས་སྤྲུལ་སྐུས“མཐོ་རམས་པའི”མཚན་གནས་ཐོབ་མཁན་ལ་མཚན་གནས་ལག་ཁྱེར་གནང་བ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་བོད་བརྒྱུད་ནང་བསྟན་མཚན་གནས་ལས་དོན་མཛུབ་ཁྲིད་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་སྤྲུལ་སྐུ་སྒྲུབ་ཁང་ཐུབ་བསྟན་མཁས་གྲུབ་ཀྱིས་མཐོ་རམས་པའི་མཚན་གནས་ཐོབ་མཁན་ལ་བཀྲ་ཤིས་བདེ་ལེགས་ཞུས་ཤིང་། ཁོང་གིས་མཐོ་རམས་པའི་མཚན་གནས་ཐོབ་མཁན་ཚོས་མུ་མཐུད་ཐོས་བསམ་སྒོམ་གསུམ་ལ་འབད་པ་ལྷུར་ལེན་གྱིས་རང་རྟོགས་ངང་བོད་བརྒྱུད་ནང་བསྟན་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས་དང་བོད་བརྒྱུད་ནང་བསྟན་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་སྐུལ་འདེད་ཧུར་ཐག་བཏང་སྟེ། བོད་ལྗོངས་དང་ཞིང་ཆེན་བཞིའི་བོད་འབྲེལ་ཀྲོའུ་དང་རྫོང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འབུལ་དགོས་ངེས་ཀྱི་ལེགས་སྐྱེས་འབུལ་རྒྱུའི་ཐུགས་རེ་གནང་བ་རེད།

དེ་ཉིན་ཕྱི་དྲོ། ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གིས་བོད་བརྒྱུད་ནང་བསྟན་གྱི“རིམ་གསུམ་མཚན་གནས”ལམ་ལུགས་ལག་ལེན་བསྟར་ནས་ལོ་20འཁོར་བའི་བཞུགས་མོལ་ཚོགས་འདུ་འཚོགས་ཏེ། ལམ་ལུགས་ལག་ལེན་བསྟར་ཚུན་གྱི་ཉམས་མྱོང་དང་གྲུབ་འབྲས་ཕྱོགས་སྡོམ་བྱས་ནས་བོད་བརྒྱུད་ནང་བསྟན་གྱི་དགེ་འདུན་ཤེས་ཡོན་ཅན་སྐྱོང་བའི་ལས་དོན་ལ་སྔར་བས་ཤུགས་སྣོན་རྒྱག་རྒྱུར་ཞིབ་འཇུག་བྱས་པ་རེད།

ཤེས་རྟོགས་བྱུང་བར་གཞིགས་ན། ལོ་20ཡི་རིང་འཚོལ་ཞིབ་དང་ལག་ལེན་བྱས་པ་བརྒྱུད། བོད་བརྒྱུད་ནང་བསྟན་གྱི་དགེ་འདུན་ཤེས་ཡོན་ཅན་གྱི་དཔུང་ཁག་འཛུགས་སྐྱོང་ལ་དགེ་མཚན་ལྡན་པའི་གྲུབ་འབྲས་ཐོབ་ཡོད། 2024ལོའི་ཟླ་5པའི་བར་བོད་བརྒྱུད་ནང་བསྟན་སློབ་གླིང་ཁག་གིས“རིམ་གསུམ་མཚན་གནས”ཐོབ་མཁན་2990བསྐྱངས་པའི་ནང“མཐོ་རམས་པ”363དང་། “འབྲིང་རམས་པ”1367 “གྲྭ་རམས་པ”1260བཅས་ཡོད་པ་རེད།

བོད་བརྒྱུད་ནང་བསྟན་གྱི་སྲོལ་རྒྱུན་ཆོ་ག་ལྟར། པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་རྒྱུགས་ལེན་མ་གནང་གོང“མཐོ་རམས་པའི”མཚན་གནས་ཀྱི་རྒྱུགས་སྤྲོད་དགེ་འདུན་པ་ཡོངས་ལ་མཇལ་ཁ་གནང་བ་རེད།