འདི་ནི་གྲོང་གསེབ་ཀྱི་བཟོ་བོའི་རྩལ་ནུས་འགྲེམས་སྟོན་དང་སྤེལ་རེས་བྱེད་རིང་རང་ལྗོངས་ཀྱི་བཟོ་བོའི་འཐུས་མིས་རང་ཉིད་ཀྱི་བརྩམས་ཆོས་སྟོན་བཞིན་པ།

ཟླ་5ཚེས་8ནས་10ཉིན་བར་ཀུའེ་དབྱང་རྒྱལ་སྤྱིའི་འགྲེམས་ཚོགས་ལྟེ་གནས་དེ་རྒྱལ་ཡོངས་ཀྱི་དོ་ཁུར་བྱ་ཡུལ་དུ་གྱུར་བ་དང་དེ་གར་རྩལ་ནུས་འགྲན་བསྡུར་ཞིག་ཚ་ཚ་འུར་འུར་ངང་སྤེལ་བ་རེད། རྒྱལ་ནང་གི་གྲོང་གསེབ་དར་རྒྱས་ཀྱི་ལས་རིགས་རྩལ་ནུས་ཁྱབ་ཁོངས་ཀྱི་ཆུ་ཚད་མཐོ་བའི་འགྲན་བསྡུར་ནང་བོད་ཀྱི་བདམས་ཐོན་པ་22ཀྱིས་རྒྱལ་ཡོངས་ཀྱི་རྩལ་ནུས་པ་701དང་མཉམ་དུ་རྩལ་ནུས་ངོམ་པ་རེད།

ཟླ་5ཚེས་8ཉིན་གྱི་ཆུ་ཚོད་8པར། གློག་ལས་རྣམ་གྲངས་འགྲན་བསྡུར་བྱ་ཡུལ་དུ་བོད་ཀྱི་བདམས་ཐོན་པ་ཞིག་གིས་མི་མང་པོའི་ཡིད་དབང་བཀུག་ཅིང་། ཁོང་ནི་བོད་ལྗོངས་ལག་ཤེས་སློབ་གླིང་གི་ལས་བཟོ་ཚོགས་ཆུང་གི་ཚེ་རིང་སྒྲོན་ལགས་རེད། གློག་ལས་རྣམ་གྲངས་འགྲན་བསྡུར་གྱི་བུད་མེད་འབའ་ཞིག་ཡིན་པའི་ཁོང་འགྲན་རར་སླེབས་མ་ཐག་མི་མང་པོ་ཞིག་གི་ཡིད་དབང་བཀུག་ཡོད།

གསར་འགོད་པས་ཁོང་ལ་རྣམ་གྲངས་དེ་འདེམས་དགོས་དོན་གང་ཡིན་པ་འདྲི་སྐབས། ཚེ་རིང་སྒྲོན་ལགས་ཀྱིས“ངས་དངོས་གཞིའི་ཚན་ཁག་སྐབས་གློག་ཤུགས་ལས་གྲྭ་དང་རང་འགུལ་ཅན་གྱི་ཆེད་ལས་སྦྱངས་པ་ཡིན། ད་ཆ་འཕྲུལ་གློག་གཞི་གཅིག་ཅན་གྱི་སློབ་ཁྲིད་བྱེད་ཀྱི་ཡོད་པས། འགྲན་བསྡུར་བརྒྱུད་རང་ཉིད་ཀྱི་མཐོང་རྒྱ་ཆེ་རུ་བཏང་ནས་སློབ་ཁྲིད་ཆུ་ཚད་མཐོ་རུ་གཏོང་གི་ཡིན”ཞེས་བཤད།

“གྲོང་གསེབ་ཀྱི་བཟོ་བོ་གྲགས་ཅན་དང་སྐད་ཆ་ཤོད་རེས”ཀྱི་དྲ་རྒྱའི་ཐད་གཏོང་ཁང་དུ་བསྟན་འཛིན་འཕྲིན་ལས་ཀྱིས་གྲོང་གསེབ་ཀྱི་བཟོ་བོའི་རྩལ་ནུས་འགྲེམས་སྟོན་དང་སྤེལ་རེས་ཁྲོད་འགྲེམས་སྟོན་བྱས་པའི་བརྩམས་ཆོས་ངོ་སྤྲོད་བྱེད་བཞིན་ཡོད་ཅིང་། བརྩམས་ཆོས་དེ་ནི་གྲོང་གསེབ་ཀྱི་བཟོ་བོས་འཐག་པའི་སོར་རྩེའི་སྒྱུ་རྩལ་ཐོན་རྫས་རྒྱང་རྩེའི་བོད་རུམ་རེད།

“དགུ་བཅུའི་ནང་སྐྱེས”ཀྱི་བསྟན་འཛིན་འཕྲིན་ལས་2014ལོར་བོད་ལྗོངས་སློབ་ཆེན་གྱི་འཛུགས་སྐྲུན་ཇུས་འགོད་ཆེད་ལས་ཐོན་རྗེས་ས་གནས་དེ་གའི་གཞུང་ཞབས་པར་རྒྱུགས་འཕྲོད་ཀྱང་རང་ཉིད་ཀྱི་དགའ་ཕྱོགས་ཀྱི་དབང་གིས་ཟླ་བ་ལྔའི་རྗེས་སུ་ལས་ཁུར་དགོངས་ཞུ་བྱས་ནས་ཕ་ཡུལ་དུ་ལོག་སྟེ་ལས་གཏོད་བྱས། སྐབས་དེ་དུས་མི་མང་པོ་ཞིག་གིས་ཁོང་གི་གདམ་གར་བསམ་ཤེས་ཐུབ་ཀྱི་མེད་མོད། འོན་ཀྱང་བསྟན་འཛིན་འཕྲིན་ལས་ཀྱིས་བོད་རུམ་ལ་བརྟེན་ནས་ཡུལ་མི་རྣམས་ཀྱི་སྣེ་ཁྲིད་དེ་བྱ་གཞག་ཅིག་སྒྲུབ་འདོད་བྱེད་ཀྱི་ཡོད།

“ངའི་སྤོ་བོ་ལགས་ནི་དེ་སྔ་ཡུལ་འདིར་སྐད་གྲགས་ཆོད་པའི་བོད་རུམ་ལག་ཤེས་མཁས་ཅན་ཞིག་རེད། སྲུ་མོ་སྒྲོན་ལགས་ནི་བོད་ཀྱི་ཁག་དང་པོའི་གྲོང་གསེབ་ཀྱི་བཟོ་བོ་གྲགས་ཅན་ཞིག་ཡིན་ལ་ད་ཐེངས་ཀྱང་བོད་ཀྱི་འཐུས་མི་ཚོགས་པའི་ཁོངས་མིའི་ངོས་ནས་འགྲན་བསྡུར་ལ་ཞུགས་པ་རེད། ཆུང་དུས་ནས་མཐོང་ཐོས་མང་བས་ང་རང་བོད་རུམ་དང་ལྷག་པར་དུ་བོད་རུམ་ཐོག་གི་རི་མོར་ཧ་ཅང་དགའ་པོ་ཡོད”ཅེས་བསྟན་འཛིན་འཕྲིན་ལས་ཀྱིས་བཤད།

བསྟན་འཛིན་འཕྲིན་ལས་དང་ཁོང་གི་སྲུ་མོ་སྒྲོན་ལགས་ཀྱིས“ཀུང་སི+མཉམ་ལས་ཁང+རྟེན་གཞི+དཀའ་ངལ་ཡོད་པའི་དུད་ཚང”དང“ཀུང་སི+མཉམ་ལས་ཁང+གསོ་སྦྱོང+སྟབས་བསྟུན་ལས་ཞུགས”ཀྱི་རྣམ་པ་སྤྱད་དེ་མང་ཚོགས་ལས་ཀར་བསྡུས་ནས་འབབ་འཕར་ཡོང་བར་སྐུལ་ཁྲིད་བྱས་པ་རེད། “སྲོལ་རྒྱུན་གྱི་ལག་རྩལ་དང་དེང་རབས་ཀྱི་མཛེས་དཔྱོད་ཟུང་འབྲེལ་བྱས་ནས་གསར་གཏོད་དེ་བས་ཆེ་བ་བྱས་ཏེ། བོད་རུམ་གར་སྟེགས་དེ་བས་ཆེ་བའི་ཕྱོགས་སུ་སྐྱོད་ཐུབ་པའི་རེ་བ་ཡོད”ཅེས་བསྟན་འཛིན་འཕྲིན་ལས་ཀྱིས་བཤད།

སྔ་དྲོའི་ཆུ་ཚོད་10པར་ཟ་ཁང་གི་ཞབས་ཞུའི་རྣམ་གྲངས་འགྲན་བསྡུར་བྱ་ཡུལ་དུ་ཉིང་ཁྲི་གྲོང་ཁྱེར་ལས་རིགས་ལག་རྩལ་སློབ་གྲྭའི་ཀྲའོ་ཅོན་གསོལ་སྟོན་སྒྲིག་གཤོམས་སོགས་ཀྱི་ལས་ཀར་བྱང་ཆུབ་ཅིང་། ད་ཐེངས་ཀྱི་འགྲན་བསྡུར་དེར་ཁོང་གིས་ད་དུང་ཕྱུ་པ་སྙིང་རྗེ་པོ་ཞིག་གྱོན་པའི་ཁར་གུས་ལུགས་ཀྱང་ལེགས་པས་བབ་ཆགས་ལ་ཡིད་ཆེས་ཀྱིས་ཁེངས་འདུག

“ན་ནིང་ཐེན་ཅིན་དུ་གཉེར་བའི་རྒྱལ་ཁབ་འགྲན་བསྡུར་ལ་ཞུགས་ནས་ཉམས་མྱོང་ཕྲན་བུ་བསགས་ཡོད་མོད། འོན་ཀྱང་ན་ནིང་གི་གྲུབ་འབྲས་དེ་ཙམ་ཡག་པོ་བྱུང་མེད་སྟབས། ད་ལོ་གྲ་སྒྲིག་ཡག་པོ་བྱས་ཡོད་པས་གྲུབ་འབྲས་ཡག་པོ་ཞིག་ཐོབ་རྒྱུའི་རེ་བ་ཡོད”ཅེས་འགྲན་ར་ནས་དོན་མ་ཐག་པའི་ཀྲའོ་ཅོན་གྱིས་རང་ཉིད་ལ་རེ་བ་ཆེན་པོ་བྱེད་བཞིན་དུ་བཤད།

ཉེ་བའི་ལོ་ཤས་རིང་། རང་ལྗོངས་ཀྱིས་མངོན་མིན་རིག་གནས་ཤུལ་བཞག་དང་སྲོལ་རྒྱུན་ལག་རྩལ་རྒྱུན་འཛིན་སྲུང་སྐྱོང་ལས་དོན་ལ་ཚད་མཐོའི་མཐོང་ཆེན་བྱས་པ་དང་གྲོང་གསེབ་ཀྱི་བཟོ་བོ་སྔོག་འདོན་དང་གསོ་སྐྱོང་བྱེད་པར་མཐོང་ཆེན་བྱས་ཏེ། སྲིད་ཇུས་དང་བྱེད་ཐབས་སྔར་བས་ལེགས་སུ་བཏང་ནས་གྲོང་གསེབ་ཀྱི་བཟོ་བོ་ཕྱོགས་ཡོངས་ནས་འཕེལ་རྒྱས་འགྲོ་རྒྱུར་སྐུལ་འདེད་བཏང་ཡོད། མིག་སྔར་ལྗོངས་ཡོངས་ནས་བསླས་འཐག་དང་། ཟངས་རྡུང་། རྐོ་དཀྲོལ། རིས་འབྲི། སྤོས་བཟོ་སོགས་ཀྱི་ལག་རྩལ་རྩལ་ནུས་ལྡན་པའི་གྲོང་གསེབ་ཀྱི་བཟོ་བོ་112(གྲོང་གསེབ་ཀྱི་ཁག་དང་པོའི་བཟོ་བོ་གྲགས་ཅན་10)ལེགས་འདེམས་བྱས་ཏེ་རྩལ་ནུས་གསོ་སྦྱོང་སློབ་གྲྭ་དང་། མངོན་མིན་རིག་གནས་ཤུལ་བཞག་བཟོ་ཁང་། ལས་ཞུགས་ལས་གཏོད་ལྟ་སྦྱོང་རྟེན་གཞི་སོགས་བཙུགས་ནས། རིམ་རྩིས་བྱས་ན་དགེ་རྒན་དང་དགེ་ཕྲུག་800ལྷག་ཙམ་ཡོད་པ་དང་ཞིང་འབྲོག་པ་2000ལྷག་ཙམ་གསོ་སྦྱོང་བྱས་པར་དུད་ཚང་2000ལྷག་ཙམ་ལ་འབབ་འཕར་སྒོར་ཁྲི་1125.5ཡོང་བར་སྐུལ་ཁྲིད་བྱས་པ་རེད།