གྱེས་ཁའི་ཕྱག་རྟགས།
—— གཞིས་རྩེ་མཐོ་འབྲིང་བཞི་པ་ནས་ཁ་གྱེས་སྐབས་བྲིས་པ།
སྔོན་བསགས་བསོད་ནམས་བཟང་པོས་མཐུན་རྐྱེན་སྦྱར་ཞིང་། ཕུན་ཚོགས་དགེ་ལེགས་འཕེལ་བའི་དངོས་གྲུབ་ཀྱིས་ཀུན་ནས་བསྐུལ་ཏེ། ང་ཚོ་གཞིས་ཀ་བསམ་གྲུབ་རྩེ་ཡི་བྱང་ངོས་སུ་ལྷུན་པོར་འགྱིང་བའི་བརྗིད་ཆགས་རྫོང་རིའི་འདབས་རོལ་དུ་ཞལ་འཛོམས་བྱུང་ཞིང་། དམིགས་ཡུལ་དང་ཕུགས་འདུན་གཅིག་མཚུངས་ཀྱིས་མ་འོངས་སློབ་གསོའི་བྱ་གཞག་གི་འཕྲིན་ལས་རླབས་པོ་ཆེ་དོན་དུ་གཉེར་ཆེད་བློ་ཁ་གཅིག་ཕྱོགས་དང་། བློ་སྣ་གཅིག་འདྲེན། བློ་སེམས་གཅིག་སྒྲིལ་བྱེད་པའི་བསམ་བློའི་གྲ་སྒྲིག་ཨང་གསར་བྱས། དུས་དེ་ནས་བཟུང་། ང་ཚོས་མཐོ་འབྲིང་བཞི་པ་འདི་ཉིད་མི་ཚེའི་རིན་ཐང་ངོམ་ས་དང་། སློབ་མའི་ཡིད་ཁ་ཕྱོགས་སའི་ཤེས་རིག་ནོར་བུའི་ཕོ་བྲང་ཉམས་དགའ་བ་ཞིག་ཏུ་སྐྲུན་ཆེད་བསམ་བློ་དྲུག་གསུམ་བཅོ་བརྒྱད་བཏང་ཞིང་། དཀའ་ངལ་དུ་མ་ཁྱད་དུ་བསད་དེ། གང་ཐུབ་ཅི་ཐུབ་དང་། རང་བློས་གང་ལྕོགས། ཐམས་ཅད་བློས་གཏོང་བྱས་པའི་འབྲས་བུ་ནི། ད་ལྟའི་དུས་ཀྱི་མཐོ་འབྲིང་བཞི་པའི་གཞི་རྩའི་གནས་བབ་དང་། རྒྱ་ཆེའི་ཁྱིམ་བདག་ཙམ་མ་ཟད་སྤྱི་ཚོགས་ལས་རིགས་ཁག་གི་མི་སྣ་ཀུན་གྱིས་མཐོ་འབྲིང་བཞི་པར་ཕུལ་བའི་ཚད་མཐོའི་གདེང་འཇོག་ལས་གཏམ་གྱི་གསལ་ཁ་ཐོན་པའོ།
སྔར་སོང་གི་ལོ་ཟླར་ཕྱིན་དྲན་བྱས་པ་ཙམ་གྱིས་ཁོ་བོའི་སྙིང་ཁོངས་ལས་སྤོབས་སེམས་དང་ངར་ཤུགས་ཀྱི་མེ་ལྕེ་ལྷོག་ལྷོག་ཏུ་འབར་ཞིང་། དགའ་ཞེན་དང་དད་མོས་ཀྱི་སྙིང་ཁྲག་མཁའ་ལ་འཕྱོ་གིན། ལྷད་མེད་ལྷག་བསམ་དག་པའི་སྐུལ་སློང་གིས་བསྐྱངས་པའི་ཚད་ལྡན་མཐོ་རིམ་སློབ་འབྲིང་ཞིག་ཀུན་གྱི་འདྲེན་བྱེད་ཀྱི་དགའ་སྟོན་དུ་བཤམས་ཐུབ་པ་བྱུང་།
འདས་ཟིན་པའི་བགྲང་བྱ་དྲུག་ལྷག་གི་ལོ་ཟླའི་ནང་། ང་ཚོས་ལྷག་བསམ་དང་འགན་འཁྲི་སྙིང་ཁར་བཅངས་ཤིང་། རྒྱུ་འབྲས་དང་གཞན་ཕན་རྩ་དོན་དུ་བཟུང་ཐོག རང་འགུལ་དང་བྱམས་སེམས་ཁོ་ནར་བརྟེན་ཏེ་ཚ་སོབ་སོབ་ཀྱི་ཁྱིམ་གཞིས་དྲོན་མོ་ཞིག་གསར་དུ་འཛུགས་སྐྱོང་བྱས་ཡོད་ལ། དོན་སྙིང་ལྡན་པའི་མི་ཚེའི་འཇའ་རིས་གསར་པ་ཞིག་དང་། ཡིད་དབང་འཕྲོག་པའི་མི་ཚེའི་རྣམ་ཐར་སྙན་པོ་ཞིག་གི་དབུ་ཁྱུད་ཀྱང་འབྲི་འགོ་བརྩམས་ཡོད།
སྔར་སོང་གི་རྐང་རྗེས་དེད་དེ་འདས་དོན་ལ་ཕྱིར་དྲན་བྱེད་སྐབས་ཁོ་བོའི་སེམས་ལ་གནོང་འགྱོད་དང་ཡིད་ཕམ་ཏིལ་འབྲུ་ཙམ་ཡང་མེད་ལ། སེམས་འཕྲེང་དང་ངལ་དུབ་ནི་དེ་བས་ཀྱང་ཡོང་མ་མྱོང་། གང་ཡིན་ཟེར་ན། ཁོ་བོས་སྔར་ནས་ད་བར་སློབ་གསོའི་བྱ་གཞག་མ་ཉམས་གོང་སྤེལ་དང་། དགེ་སློབ་ལས་བཟོའི་མ་འོངས་བདེ་སྐྱིད་ཆེད་རང་ནུས་ཡོད་དགུས་བརྩོན་པའི་དཀའ་བ་དང་དུ་བླངས་ཡོད་པ་ནི་ཀུན་གྱིས་མཁྱེན་ངེས་ལགས། ལྷག་དོན་ད་ཐེངས་གོང་རིམ་གྱི་བཀའ་མངགས་ཟབ་མོ་དང་། རྒྱལ་རྩེ་མཐོ་རིམ་སློབ་འབྲིང་གི་དམིགས་བསལ་དགོས་མཁོས་བསྐུལ་ཏེ་གྲོང་ཁྱེར་མཐོ་འབྲིང་བཞི་པ་ནས་ཁ་གྱེས་སྐབས། ངའི་སྙིང་ནས་ཆེས་གཅེས་པར་འོས་པའི་དགེ་སློབ་ལས་བཟོ་ལྷན་རྒྱས་དང་། རྒྱ་ཆེའི་ཁྱིམ་བདག་རྣམས་ཀྱིས་ཁོ་བོར་གནང་བའི་ཕྱག་རྟགས་དམིགས་བསལ་ཅན་དེས་དོན་གྱི་མདོག་ཁ་སྟོན་ཐུབ་ན་རྒྱས་པ་ནི་བརྗོད་པར་མི་སྤྲོའོ།
གྱེས་ཁའི་ཕྱག་རྟགས་འདི་ནི་ངའི་དགེ་སློབ་ལས་བཟོའི་ལྷད་མེད་ཀྱི་བརྩེ་བ་ཟབ་མོས་གཟུངས་གཞུག་ཏུ་བྱས་ཤིང་། དཀར་གཙང་ལྷ་རེག་གིས་ཕྲ་རྒྱན་བཏབ་སྟེ། འོད་མདངས་ཅི་དགར་འཕྲོ་བཞིན་པའི་རིན་ཆེན་ནོར་བུའི་མགུལ་རྒྱན་ཞིག་དང་གཉིས་སུ་མ་མཆིས། ཕྱག་རྟགས་འདི་ནི་ང་ཚོའི་འགྱུར་མེད་ཀྱི་ལ་རྒྱ་དང་། ལྷད་མེད་ཀྱི་བརྩེ་བ་དྲོན་མོའི་མཚོན་རྟགས་གལ་ཆེན་ཞིག་ཡིན་ལ། ང་ཚོ་ཚང་མས་ཐུན་མོང་ཐོག་འཛུགས་སྐྱོང་བྱས་པའི་ཁྱིམ་གཞིས་དྲོན་མོ་འདིའི་སྔར་སོང་གི་ལོ་རྒྱུས་ལ་ཕུལ་བའི་ཆེས་བླ་ན་མེད་པའི་གདེང་འཇོག་ཞིག་ཀྱང་རེད།
གྱེས་ཁའི་ཕྱག་རྟགས་འདི་ལས་མཐོ་འབྲིང་བཞི་པའི་ལང་ཚོའི་གསོན་ཉམས་དང་། དགེ་སློབ་ལས་བཟོའི་བཞིན་གྱི་མཛེས་པ་མངོན་ཐུབ་ལ། དུས་ཡུན་བགྲང་བྱ་དྲུག་ལྷག་གི་ལོ་ཟླའི་ནང་ང་ཚོས་ཕྱར་བ་གྲུ་འདེགས་དང་། གཡས་གཞོགས་གཡོན་འདེགས་བྱས་པའི་འཕྲིན་ལས་ལ་བསམ་པ་ལྟར་བྱུང་བའི་འབྲས་བཟང་སྨིན་པའང་མངོན་ལྐོག་གང་རུང་ནས་མཐོང་ཐུབ་པ་ལགས།
གྱེས་ཁའི་སྣང་ཚུལ་ཡིད་ལ་འཁོར་ཐེངས་རེ་རེར་ངའི་སེམས་ལ་སྤོབས་པ་ཆེན་པོ་སྐྱེ་གི་འདུག་ལ། ཁོ་བོས་ད་བར་ཕྱིན་ཟིན་པའི་དོ་དམ་གྱི་ལམ་བུར་མ་མཐར་ཡང་སྤྱི་ཐུག་ལ་སྒེར་ཚྭ་སྒྲོན་མེད་པ་དང་། ལུང་ཆུང་ནང་གི་དཔོན་ཆུང་དོན་མེད་པ་གསལ་བཤད་བྱས་ལགས་ན་དེ་ལས་ལྷག་པའི་མི་ཚེའི་རིན་ཐང་ཞིག་གང་ན་ཡོད། དེ་བས་རང་ཉིད་མཐོ་འབྲིང་བཞི་པ་ནས་ཁ་གྱེས་ལ་ཁད་དེར་དགེ་རྒན་ལྷན་རྒྱས་ཀྱིས་མ་སྐུལ་རང་མོས་ཀྱིས་དཀར་གཙང་ཁ་བཏགས་གནང་བ་དང་། སློབ་མའི་ཚོགས་ཀྱིས་སློབ་གྲྭའི་རྒྱལ་སྒོ་བཀག་སྟེ་སྐྱོ་ཉམས་ཀྱི་ངོ་མདོག་སྐྱུར་མོ་སྟོན་ལ། ཁྱིམ་བདག་རྣམ་པས་མུ་མཐུད་གནས་འདིར་སྡོད་རྒྱུའི་རེ་འབུལ་གྲངས་མེད་གནང་བ་ལས་ཁོ་བོའི་མི་ཚེར་ཀུན་ལས་ལྷག་པའི་རིན་ཐང་ལྡན་པ་ཤེས་བྱུང་ལ། མུ་མཐུད་མེ་གཏོང་སར་ས་འཚིགས་པ་དང་། ཆུ་རྒྱུག་སར་ཤུལ་ཆགས་པ་ཞིག་ཅིས་ནས་ཀྱང་བྱེད་ངེས་པས་ལྷན་རྒྱས་ཐུགས་བདེ་བར་བཞུགས་རོགས།