ནམ་ཟླ་དཔྱིད་ཀ
ནམ་ཟླ་དཔྱིད་ཀ་ཤར་སོང་། །
དཔྱིད་རླུང་དལ་གྱིས་ལྡང་བྱུང་། །
དཔྱིད་རླུང་རེག་བྱ་འཇམ་པོས། །
ནང་སེམས་མཚོ་མོ་བསྐྱོམས་སོང་། །
ནམ་ཟླ་དཔྱིད་ཀ་ཤར་སོང་། །
ཁུ་བྱུག་གསུང་སྐད་སྙན་བྱུང་། །
སྔར་ཡོད་སེམས་ཀྱི་སྐྱོ་གདུང་། །
མི་མངོན་དབྱིངས་སུ་ཡལ་སོང་། །
ནམ་ཟླ་དཔྱིད་ཀ་ཤར་སོང་། །
སྦྲང་ཆར་ཟིམ་ཟིམ་བབས་བྱུང་། །
རི་ཀླུང་ནོར་འཛིན་ཕང་བར། །
མེ་ཏོག་དཀར་དམར་བཞད་བྱུང་། །
ནམ་ཟླ་དཔྱིད་ཀ་ཤར་སོང་། །
རྩི་ཤིང་ལང་ཚོ་རྒྱས་བྱུང་། །
ཕྱུགས་རིགས་དཀར་ནག་ཁྱུ་ཚོགས། །
བག་ཡངས་རྩེད་འཇོར་རོལ་སོང་། །
ནམ་ཟླ་དཔྱིད་ཀ་ཤར་སོང་། །
གངས་ཆུ་ས་ལ་ཐིམ་སོང་། །
ས་གཞི་སྒེག་མོའི་མཚར་སྡུག །
འདྲེན་བྱེད་ཡུལ་དུ་འཆར་བྱུང་། །
ནམ་ཟླ་དཔྱིད་ཀ་ཤར་སོང་། །
སེམས་ལ་དྲོད་ཁོལ་འཕེལ་བྱུང་། །
ཞལ་རས་དཀྱིལ་འཁོར་ཀློང་དུ། །
འཛུམ་གྱི་པདྨོ་བཞད་སོང་། །