ནམ་ཞར་རྨི་ལམ་དུ་རྨིས་པའི་ཁྱོད་རང་།

བདག་གི་མཚན་ལྗོངས་ཀྱི་མཛེས་སྡུག་ཡིན།

ཡིད་གཏིང་གི་དྲན་པ་སྒུལ་མཁན་ཡང་ཡིན།

ཐུག་འཕྲད་ཐེངས་གཅིག་གི་རྗེས་སུ།

ཞེན་ཆགས་ཀྱི་སྐུད་པ་འཐེན་པའི་ཁྱོད་རང་།

བདག་གི་འཚོ་བའི་ཉིན་སྲིབ་ཏུ་ཡང་ཡང་འཛུལ།

སྡོད་མི་ཚུགས་པའི་མིག་ཟུང་།

ཡིད་འོང་གི་ཁྱོད་ཁོ་ནར་ཕྱོགས་པས།

ཉེ་འགྲམ་གྱི་མཛེས་སྡུག་མང་དག་ཅིག

མིག་མཐའ་ནས་དལ་གྱིས་རྒྱང་དུ་ཡལ།

ད་ནི། ཕོ་ལོ་ཉེར་ལྔའི་ལང་ཚོ་དང་།

ཆག་གྲུམ་མ་ཤོར་བའི་སེམས་པ།

གང་ལྟར་བདག་ལ་ཡོད་པའི་མཛེས་སྡུག་མཐའ་དག

རྒྱང་རིང་གི་སྙིང་ཉེ་ཁྱོད་ཁོ་ནར་འབུལ་འདོད།