འཇིག་རྟེན་སྒོ་མོ་འབྱེད་པའི་ལྡེ་མིག་དང་། །

མ་རིག་མུན་པ་སེལ་བའི་སྒྲོན་མེ་སྟེ། །

སྲིད་དང་ཞི་བ་ཀུན་གྱི་རིན་ཆེན་ནོར། །

དཔེ་དེབ་ཡག་པོ་རིན་ཆེན་གསེར་ལས་ལྷག །

མདུན་གྱི་མུན་པ་སེལ་བའི་འོད་སྣང་ཡིན། །

ཕུགས་ཀྱི་བགྲོད་ལམ་སྙེག་པའི་ལམ་སྟོན་ཡིན། །

རྒྱལ་ཁམས་འཇིག་རྟེན་འགྲིམ་པའི་མིག་ཟུང་སྟེ། །

དཔེ་དེབ་རྨོངས་མུན་སེལ་བའི་ཉིན་བྱེད་ཡིན། །

སྙན་འགྱུར་ངག་གི་ཕུང་པོ་ཚིག་ལ་བྱང་། །

ཟབ་གནད་དོན་གྱི་མན་ངག་ཡིད་ལ་ཤར། །

ཉིན་མཚན་ཁོར་མོ་ཡུག་གི་དུས་ཚོད་དེ། །

དཔེ་ཀློག་ཐོས་བསམ་འཚོལ་བའི་ལས་ལ་འཇུག །

བང་རིམ་དུ་མས་བརྩེཌ་པའི་དགའ་ལྡན་ཁྲིར། །

ཆོས་འཆད་སྨྲ་བའི་སེང་གེ་འགྱིང་པ་དེ། །

ཚིག་ཚོགས་ངག་གི་འདུ་བ་ལས་བྱུང་བའི། །

དཔེ་ཀློག་ལྟེ་བར་འཛིན་པའི་བཀའ་དྲིན་ཡིན། །

མཚན་སྙན་བ་དན་སྣེ་མོ་མཁའ་ལ་གཡོ། །

ཚིག་གི་རབ་བྱེད་སྒྲིག་པའི་སྙན་ངག་པ། །

ཡིག་ཆུང་ཀ་ཁའི་དབྱངས་རྟ་གྱེར་མཁས་པ། །

དཔེ་ཀློག་ཐོས་པ་བསགས་པའི་འབྲས་བུ་ལགས། །

སྐྱེས་པ་ནས་བཟུང་མཐའ་མ་མ་འཆི་བར། །

དཔེ་དེབ་ནོར་དུ་བརྩིས་ནས་དེ་དང་ལྷན། །

ཉིན་མཚན་དུས་བཞི་ཕར་ལ་སྐྱེལ་ཐུབ་པའི། །

རེ་སྨོན་ཡིད་ཀྱི་འཆར་ཡན་འདི་ནས་ཞུས། །