རང་རྒྱུད་ལ་ཤེས་རབ་ཀྱི་གོ་ཆ་སྤྲོས་ཤིག
—— འཛམ་གླིང་དཔེ་ཀློག་ཉིན་མོ་ཐེངས་ཉེར་དགུ་པར་ཕུལ།
ཕྲ་རགས་ཚན་རྩལ་གོ་ཆ་སྣ་ཚོགས་ཤིང་། །
སྲོལ་རྒྱུན་ཆོ་ག་གང་དང་ཅི་ཡིས་ཀྱང་། །
འགོག་པར་ནུས་མིན་དུས་ཀྱི་འཁོར་ལོ་ཡིས། །
སླར་ཡང་འཛམ་གླིང་དཔེ་ཀློག་ཉིན་མོ་བསུས། །
དཔེ་ཀློག་དྲན་གསོའི་ཉིན་བྱེད་ཤར་བའི་ཚེ། །
ཇི་ཙམ་ལྟ་ཀློག་བགྱིས་པའི་དཔེ་དེབ་ཀྱི། །
ངོ་གྲངས་པད་མ་བསྐྱངས་པ་བགྲང་དགོས་ཕྱིར། །
རང་རང་སོ་སོས་ཁོག་རྩིས་སྐྱོན་རན་སོང་། །
དམག་འཁྲུག་ནད་ཡམས་མུ་གེ་ལ་སོགས་པ། །
མི་མཐུན་ཕྱོགས་དང་བྲལ་བའི་དུས་བཟང་པོ། །
དཔེ་ཀློག་ཤེས་བྱའི་མཐུན་རྐྱེན་འཛོམས་པ་ཉིད། །
བདག་ཚོའི་བསྟོད་བྱར་ཅིས་ཀྱང་མི་འོས་སམ། །
འཇིག་རྟེན་འདི་རུ་ལྟེ་ཁྲག་འཕོས་པས་ན། །
ཆོས་སྲིད་ལ་སོགས་བྱ་གཞག་ཅི་སྒྲུབ་ཀྱང་། །
ཤེས་རབ་གོ་ཆས་སྒོ་གསུམ་བརྒྱན་འོས་ཕྱིར། །
དཔེ་ཀློག་དཀའ་བ་དང་དུ་ལེན་པར་འོས། །
རྨོངས་པའི་སྨག་གིས་བཏུམས་པའི་ཀླད་པའི་མཚོར། །
ཤེས་བྱའི་སྣང་བྱེད་རབ་ཏུ་འཚེར་བའི་ཕྱིར། །
ལེ་ལོ་རྣམ་གཡེང་དགྲ་བོ་ཕྱིར་སྐྲོད་པའི། །
རིག་པའི་གོ་མཚོན་དཔེ་དེབ་གདམ་གར་བྱོས། །
དཔལ་དང་འབྱོར་བ་རྒྱས་པའི་གཏམ་བཟང་པོ། །
སྒྲ་འཛིན་དབང་པོའི་གསོས་སུ་གྱུར་བས་ཀྱང་། །
ཕྱུག་བདག་བླུན་པོའི་ཐ་སྙད་བཟློག་མིན་ཏེ། །
དཔེ་དེབ་བཀླགས་ནས་ཤེས་སྒྲིབ་ཞི་བར་མཛོད། །
དུས་རབས་རིམ་པར་བྱོན་པའི་མཁས་པའི་དབང་། །
འཇིག་རྟེན་ཕྱི་མར་གཤེགས་པའི་ཤུལ་བཞག་ཉིད། །
དགོས་འདོད་ཀུན་འབྱུང་ཤེས་བྱའི་དཔེ་དེབ་ཚོགས། །
ཁོང་དུ་ཆུད་པར་དུས་ཚོད་འགྱངས་མི་ཉན། །
ཇ་ཆང་གསོལ་སྟོན་དགའ་འཛོམས་འདྲ་མིན་སྤྱི། །
འཇིག་རྟེན་འཚོ་བའི་སྙིང་བུའི་ཆར་གཏོགས་ཀྱང་། །
འཕྲལ་ཕུགས་གང་གི་བགྲོད་ལམ་མི་འཛོལ་བའི། །
ཕྱོགས་སྟོན་ཤེས་བྱའི་ནོར་བུ་ཁོ་ནར་ངེས། །
དེང་འདིར་སྤྱི་ཚོགས་གོང་འཕེལ་རྟགས་མཚན་དུ། །
འདོད་རྒུར་ལོངས་སུ་སྤྱོད་པའི་རྐྱེན་མང་པོར། །
མི་རྣམས་ཕལ་ཆེར་རྣམ་གཡེང་ཆེ་བ་དེས། །
དཔེ་ཀློག་དུས་ཁོམ་འཕྲོག་པ་བཅོས་པར་འཚལ། །
ཟ་འོག་ཐེར་མ་སོགས་ཀྱི་གོས་ལྷམ་དང་། །
གསེར་དངུལ་མུ་ཏིག་ལ་སོགས་རིན་པོ་ཆེའི། །
རྒྱན་ཆའི་ཚོགས་ཀྱིས་སྒྱུ་ལུས་མཛེས་གྱུར་ཀྱང་། །
ཀླད་པ་ཤེས་བྱས་རྨོངས་པ་སེལ་ནུས་མིན། །
འཇིག་རྟེན་ལེགས་ཉེས་བྱ་བ་ཡོད་དོ་ཅོག །
གང་དང་ཅི་ཡིན་མ་འཛོལ་ཤན་འབྱེད་པའི། །
རྣམ་དཔྱོད་འོད་སྟོང་འབར་བའི་མཚན་ཉིད་དེ། །
སྒོ་གསུམ་ཤེས་བྱའི་དབྱིག་གིས་བརྒྱན་དེར་དབང་། །
འཚོ་གོས་སྡོད་གསུམ་ཡང་ནས་ཡང་དུ་འཕེལ། །
ཟ་འཐུང་ལོངས་སྤྱོད་གང་དགོས་ཅི་དགོས་འཛོམས།
འོན་ཀྱང་ཚན་རྩལ་ཁོང་དུ་མ་ཆུད་དེ། །
དཔེ་དེབ་ཤེས་བྱར་ཞེན་པ་ལོག་པར་ཐུག །
ཕྱུག་ཚོད་མི་ཟིན་ཟ་རྒྱགས་སྤྱོད་གསུམ་དང་། །
དབུལ་པོ་མི་བཅོས་འཁྱམ་མྱུལ་ལང་ཤོར་སོགས། །
སྤྱི་ཚོགས་ཁྱིམ་ཚང་རྒུད་པའི་ཉེན་ཁའི་ནད། །
དཔེ་ཀློག་ཤེས་བྱའི་སྨན་གྱིས་གསོ་བར་མཛོད། །
ཉིན་ལྟར་སྔ་དྲོར་ཇ་ཁང་ཀྲིག་ཅར་ཏེ། །
ས་སྲོད་ཆང་ཁང་མཱ་ཅང་རྒྱན་འགྱེད་ཀྱི། །
གོམ་ཁ་དཔེ་ཁང་ཕྱོགས་སུ་བསྒྱུར་བ་ཡིས། །
ཤེས་བྱ་རིན་ཆེན་དོ་ཤལ་བཞེས་པར་ཕེབས། །
ལུས་ངག་ཡིད་ལ་དམ་པོར་འཁྲིལ་བ་ཡི། །
ཉོན་མོངས་དུག་གསུམ་འདུལ་བའི་ཤེས་བྱ་སྟེ། །
ཀུན་གྱི་སྤྱི་བོས་མཆོད་པའི་ཡོན་ཏན་ནོར། །
དཔེ་དེབ་རྒྱུན་སྲིང་བཀླགས་པས་ཐོབ་པར་གྱུར། །
ཚིག་གི་སྦྱོར་བ་སྟར་ལ་བརྒྱུས་པ་ཡི། །
དོན་བཟང་མི་ཆོས་བསླབ་གཞིའི་དཔེ་དེབ་ཉིད། །
མིག་གི་དགྲ་ཟླར་ལངས་པ་ལྟ་བུ་ཡི། །
སྐྱེ་བོ་དམན་པ་མུན་ནས་མུན་མཐར་འགྲོ། །
ཇ་ལན་ཆུ་འཇལ་དྲིན་གཟོ་མི་ཤེས་ཤིང་། །
དྲིན་ལན་རྡོ་རྡུང་འཇོན་ཐང་ཡིན་པར་རློམ། །
ལེགས་ཉེས་བླང་དོར་བློ་མིག་ལྡོང་བའི་སྐྱོན། །
འཇོམས་ལ་མཁས་པ་དཔེ་ཀློག་ཤེས་བྱར་ངེས། །
སྒོམ་སྒྲུབ་བསམ་གཏན་ཁང་དང་དབྱེར་མེད་པའི། །
དཔེ་དེབ་ཁང་བཟང་ཕྱོགས་ལ་བློ་གཏད་ཅིང་། །
འཁྱམ་མྱུལ་ལང་ཤོར་རྐང་གཉིས་བློས་གཅུན་ཏེ། །
ཤེས་བྱའི་བདུད་རྩི་ལོངས་སུ་སྤྱོད་པར་ཕེབས། །
མི་རབས་གོང་མའི་བརྩོན་འགྲུས་ཐུགས་བསྐྱེད་ཅིང་། །
ཞིང་སར་འཁྲུངས་པའི་བསྟན་བཅོས་རིན་ཆེན་གསེར། །
ནོར་དུ་འཛིན་ནས་ལྟ་ཀློག་བགྱིས་པའི་ཚེ། །
ཚེ་འདིའི་མི་ལུས་དོན་ལྡན་ཅི་ལ་མིན། །
ནོར་རྫས་ཅི་བྱུང་ངོམས་པ་མེད་པ་ཡི། །
འདོད་འདུན་དྲག་པོའི་ཁ་ལོ་ཚུར་གཅུས་ཏེ། །
ཚིམ་པ་ནམ་ཡང་མེད་པའི་འདོད་ཞེན་ཞིག །
དཔེ་ཀློག་ཤེས་བྱ་ལེན་པར་འཆང་བར་མཛོད། །