ཕས་བུ་མོར་སྤྲིངས་པའི་འཕྲིན།
སྔོན་བསགས་བསོད་ནམས་བྱེ་བའི་མཐུ་ཡིས་ཁྱོད་ལ་དལ་བརྒྱད་ལུས་འབྱོར་ཚང་བའི་རིན་ཆེན་མི་ཡི་ལུས་རྟེན་ཐོབ་ཅིང་། ལྷག་པར་དུ་ཁྱོད་ནི་ང་ཡི་བུ་མོ་དང་། ང་ནི་ཁྱོད་ཀྱི་ཨ་ཕར་བསྐོས་པ་ནི་ཅི་འདྲའི་ལས་བསོད་ཆེ་བ་ཞིག་མ་རེད་དམ།
ཁྱོད་རང་ཨ་མའི་བྱམས་བརྩེའི་ནུ་ཞོ་མངར་མོའི་འཚོ་བཅུད་ཀྱིས་བསྐྱངས་ཤིང་། ཨ་ཕའི་བྱིས་སྒྲུང་སྙན་མོའི་དབྱངས་རྟའི་ཁྲོད་དུ་འཇམ་པོའི་རྨི་ལམ་གྱི་ཞིང་ཁམས་མྱུལ་ནས་འཚར་ལོངས་བྱུང་བས། ཁྱོད་ནི་བྱམས་ལྡན་ཕ་མའི་དྲོད་ཁོལ་གྱི་ཀློང་དུ་དཀར་གསུམ་མངར་གསུམ་དང་འགྲོགས་ནས་རིམ་གྱིས་ནར་སོན་པ་ཞིག་རེད།
གཅེས་ཕྲུག ཁྱོད་ཀྱིས་སློབ་ཆུང་གི་སྒོ་ཐེམ་འགྲིམ་སྟེ་ཀ་ཁའི་དབྱངས་རྟ་སྙན་མོ་གླུ་རུ་ལེན་འགོ་ཚུགས་པ་ནས་བཟུང་། ཉིན་གྱི་བྱ་ར་དང་མཚན་གྱི་མེལ་ཚེའི་བརྟུལ་ཞུགས་བཟུང་སྟེ་ལུས་སེམས་གཉིས་ཀྱིས་ཐེག་པར་དཀའ་བའི་དཀའ་ངལ་མཐའ་དག་བརྩོན་འགྲུས་ཀྱི་གྲུ་གཟིངས་ལ་བརྟེན་ནས་ཤེས་བྱའི་རིན་ཆེན་ནོར་བུ་ལག་ཏུ་ལོན་ཐབས་ལ་འབད་ཅིང་། རྒྱུགས་ཤོག་གི་ངོས་སུ་འགྲིག་རྟགས་དམར་པོའི་རེ་ཁཱས་བཀྲ་དུས་དགེ་བའི་བཤེས་གཉེན་རྣམས་ཀྱིས་ཁྱོད་ལ་དགའ་རྟགས་ཅི་འདྲའི་མང་པོ་ཞིག་བྱིན་མྱོང་ཡོད་ལ། དེ་བས་ངེད་ཕ་མ་ཟུང་ལ་ཁྱིམ་བདག་མང་པོའི་མདུན་དུ་ངོ་སོ་ཐེངས་མང་སྤྲད་པ་ཁྱོད་ཀྱིས་ཨེ་ཤེས།
གཅེས་ཕྲུག ཁྱོད་ཀྱིས་ཅིས་ནས་ཀྱང་འདས་སོང་གི་ལོ་ཟླའི་རྐང་རྗེས་ལ་ཕྱིར་དྲན་བྱེད་དགོས་ལ། མ་འོངས་པའི་ཤུལ་ལམ་རིང་མོར་རྒྱང་ལྟ་བྱེད་མཁས་དགོས།
ཁྱོད་ཀྱིས་རང་ཉིད་ཀྱི་འདས་སོང་གི་གྲུབ་འབྲས་དང་ཕམ་ཁ་ལ་ཕྱི་མིག་བསློགས་ནས་ཉམས་མྱོང་ལ་ཕྱོགས་བསྡོམས་བྱེད་དགོས་ལ། རེ་བས་ཁེངས་པའི་སང་ཉིན་གྱི་མཛེས་སྡུག་ལ་ཅིས་ཀྱང་རེ་སྙེག་བྱེད་དགོས།
བུ་མོ་ལགས། ད་ལྟ་ཁྱོད་རང་ནང་སའི་སློབ་གྲྭ་གསར་པ་ཞིག་ཏུ་མཐོ་འབྲིང་འགྲིམ་བཞིན་ཡོད་པས། ཁྱོད་ཀྱིས་རང་གི་བསླབ་བྱའི་རིག་ཚན་ཁག་ལ་བརྩོན་འགྲུས་ཀྱི་ཆུ་མོའི་རྒྱུན་སྐྱོང་ངེས་པ་ཨ་ཕར་ཡིད་ཆེས་ཡོད། ཁྱོད་ཀྱིས་ཅིས་ནས་ཀྱང་དགེ་རྒན་གྱིས་ཁྲིད་པའི་རིག་ཚན་ཁག་ཡག་པོ་སྦྱངས་པའི་རྨང་གཞིའི་ཐོག་དུས་ཚོད་ལ་སྟངས་འཛིན་བྱེད་མཁས་པོ་དགོས། དེ་བས་ཀྱང་དགོང་ཞོགས་གཉིས་ཀྱི་དུས་ཚོད་ནི་ཤིན་ཏུ་རྩ་ཆེན་དུ་འཛིན་རྒྱུ་ནི་གལ་པོ་ཤིན་ཏུ་ཆེ་བས། ཁྱོད་ཀྱིས་དུས་ཚོད་ཡོད་དོ་ཅོག་བསླབ་བྱའི་རིག་ཚན་ཁག་ཁོ་ན་སྦྱོང་བར་མ་སྤྱད་པར་ད་དུང་ཞར་ཞོར་གྱི་ཁོམ་པ་ཡོད་ཚད་སྤྱད་ནས་འཆར་གཞི་ཡོད་པའི་སྒོ་ནས་ལྟ་ཀློག་ཁང་དུ་སློབ་ཕྱིའི་དཔེ་དེབ་ལ་བལྟ་ཀློག་བགྱིད་པ་དང་དཔེ་ཀློག་ཟིན་བྲིས་ཡང་ཡང་རྒྱག་དགོས། ད་དུང་སློབ་གསེང་གི་ལུས་རྩལ་བྱེད་སྒོ་ཁག་ལ་ཧུར་ཐག་གིས་ཞུགས་རྒྱུ་མ་བརྗེད་རོགས། རྒྱུ་མཚན་ནི་སློབ་ཕྱིའི་དཔེ་ཆ་བཀླགས་ན་བསླབ་གཞིའི་ནང་དོན་ཆིག་རྐྱང་གི་རྒྱ་ལས་ཐར་ཏེ། ལྟ་རྒྱ་དང་ཐོས་རྒྱ་ཇེ་ཆེར་འགྲོ་ཐུབ་ལ། ལུས་རྩལ་བྱེད་སྒོར་ཧུར་ཐག་གིས་ཞུགས་ན་དེས་ཁྱོད་ཀྱི་ལུས་སེམས་སྙོམ་སྒྲིག་ལ་རྔོ་ཆེན་པོ་ཐོགས་ཏེ་མི་འདོད་པའི་ནད་དང་རིང་དུ་བྲལ་ནས་བདེ་ཞིང་ཐང་བའི་ལུས་ཕུང་ཞིག་བསྐྲུན་ཐུབ་པ་ཡིན།
གཅེས་ཕྲུག མཐོ་འབྲིང་གི་ལོ་གསུམ་ནི་ཁྱོད་ཀྱི་མི་ཚེའི་ཤུལ་ལམ་རིང་མོར་དཀའ་སྡུག་གི་ཁ་ཆར་ཆེས་རྒོད་པའི་ལོ་གསུམ་རེད་ལ། ཁྱོད་ཀྱི་མི་ཚེ་འདིར་ཆེས་གལ་ཆེའི་ནང་གི་འགངས་ཆེར་གྱུར་པའི་ལོ་གསུམ་ཡང་རེད།
ལོ་གསུམ་པོ་དེར་ཁྱོད་ཀྱིས་ཅིས་ནས་ཀྱང་རང་ཉིད་ཀྱི་སེམས་ཁམས་ལ་བྱི་དོར་གང་ལེགས་བྱེད་དགོས། མི་ཚེའི་ལམ་འཕྲང་དུ་ལུས་སེམས་གཉིས་ཀར་དཀའ་ཁག་དུ་མ་འཕྲད་སྲིད་པས། ཁྱོད་ཀྱིས་དཀའ་ངལ་ཐམས་ཅད་ལ་དཔའ་སྤོབས་ཆེན་པོས་གདོང་ལེན་གྱིས་རང་གི་སེམས་ཁམས་ལ་རང་ཉིད་ཀྱིས་སྙོམ་སྒྲིག་བྱེད་ཤེས་པ་དགོས།
གཅེས་ཕྲུག ལོ་གསུམ་རིང་ཁྱོད་ཀྱིས་ཅིས་ནས་ཀྱང་རང་གི་ཡར་རྒྱས་ལ་སྨན་པའི་སྨན་གྱི་ལྗོན་པ་དང་འདྲ་བའི་གྲོགས་བཟང་པོ་རེ་སྒྲིག་རྒྱུ་མ་བརྗེད་ལ། ཁ་མཁས་ཚིག་སྙན་དང་། ཁ་ཁོག་མི་གཅིག རྒྱབ་མདུན་ངོ་གཉིས། ལྕེ་གཉིས་དུག་སྦྲུལ་ལྟ་བུའི་གྲོགས་ངན་དང་། ཡོད་ཀྱང་ཆོག་ལ་མེད་ཀྱང་རུང་བའི་ཨ་རག་ལྟ་བུའི་གྲོགས་པོ་གྲོགས་མོ་དང་རིང་དུ་གྱེས་དགོས། ལྷག་པར་དུ། ཁྱོད་ཀྱིས་དགའ་རོགས་སྒྲིག་པའི་བགྱི་བ་རྩ་བ་ནས་དང་དུ་མ་ལེན་རོགས། རྒྱུ་མཚན་ནི་དེས་ཁྱོད་ཀྱི་ལུས་སེམས་གཉིས་ལ་དཀའ་ངལ་འཐོལ་པ་ཞིག་སྣོན་སྲིད་ལ། སློབ་ཚན་ལ་བློ་རྩེ་གཅིག་ཏུ་བསྡུ་མ་ཐུབ་པར་རྣམ་གཡེང་གི་དབང་དུ་མི་འགྲོ་བའི་ངེས་པ་མེད། དེ་བས། གསེར་ལས་དཀོན་པའི་དུས་ཚོད་མང་པོ་སྣང་མེད་དུ་ཟད་འགྲོ་བས། དེ་ནི་བསླབ་པ་དོན་དུ་གཉེར་བའི་སློབ་གཉེར་པ་ཞིག་གི་གེགས་བར་ཆེ་ཤོས་སུ་འགྲོ་ངེས།
གཅེས་ཕྲུག ཁྱོད་ཀྱིས་ཚན་རིག་མཁན་པོའི་སོར་རྩེའི་རྩལ་ལས་ཐོན་པའི་གློག་ཀླད་དང་ཁ་པར་སོགས་ལ་བླང་དོར་ཡོད་པའི་སྒོ་ནས་སྤྱོད་མཁས་པོ་བྱེད་པ་ལས། དེ་ཚོའི་མགོ་སྐོར་དང་བསླུ་བྲིད་ཀྱི་འོག་ཏུ་མ་ཚུད་པ་དང་། རང་གིས་རང་མི་བསླུ་བར་རང་བློ་ནང་དུ་བཀུག་ནས་རང་གཅུན་མཁས་ཤིང་རང་ཚུགས་ཐུབ་པའི་སློབ་མ་ཞིག་བྱེད་དགོས།
གཅེས་ཕྲུག འཕེལ་རྒྱས་ཀྱི་གོམ་འགྲོས་མྱུར་བའི་དེང་གི་དུས་འདིར། ཁྱོད་ཅག་ནི་རྟ་དམག་ཁྲི་ཕྲག་གདུང་ཟམ་བརྒལ་བའི་ངང་ཚུལ་དང་ཅི་འདྲའི་མཚུངས་ཨང་། ཞང་སྟོན་བསྟན་པ་རྒྱ་མཚོས་གསུངས་པའི། ལག་པས་བདེ་བ་ཅན་ལ་འཕེན་མཁན་མེད། །
རྐང་པ་བཟུང་ནས་དམྱལ་བར་འཐེན་མཁན་མེད། །རང་གི་སྐྱིད་སྡུག་རང་ལ་རག་ལུས་པས། །རང་གིས་རང་ཉིད་མི་བསླུ་ཤིན་ཏུ་གཅེས། །ཞེས་པ་ལྟར། ད་ལྟ་ནས་བརྩོན་འགྲུས་ཀྱི་གོ་ཆ་ལུས་ལ་བསྒོས་ནས་རིག་པའི་གནས་སྤྱི་དང་བྱེ་བྲག་ལ་ཐོས་བསམ་དཔྱིས་ཕྱིན་པ་བྱས་ཚེ། ད་གཟོད་དྲག་ཆར་རླུང་འཚུབ་ཀྱི་རྗེས་སུ་མཛེས་སྡུག་ཡིད་འོང་གི་དབང་པོའི་གཞུ་རིས་འཆར་བ་ཇི་བཞིན་རང་གི་འདོད་དོན་ཐམས་ཅད་ལྷུན་གྱིས་འགྲུབ་པ་རྒྱུ་འབྲས་རྟེན་འབྱུང་གི་ཆོས་ཉིད་རེད། དེ་ལས་ལྡོག་ན། ཕ་རིའི་ལྕི་བ་མེད་ལ། ཚུ་རིའི་སླེལ་པོ་ཡང་མེད་པའི་དཔེ་རུ་མ་གྱུར་པའི་ངེས་པ་མེད་པས། རྙེད་པར་དཀའ་བའི་གཞོན་ནུའི་ལང་ཚོ་དོན་མེད་དུ་སྟོངས་ཚེ་དེ་ནི་ཅི་འདྲའི་ཡིད་ཕངས་དགོས་པ་ཞིག་མ་རེད་དམ།
གཅེས་ཕྲུག ཁྱོད་ཀྱི་རང་ཚུགས་ཐུབ་ལ་རང་བརྩི་རང་གཅེས་ཆེ་ཞིང་རང་བཞིན་བཟང་བ་དང་། ལྷག་པར་དུ། རང་རྒྱུད་ལ་འཇགས་པའི་ཡ་རབས་སྤྱོད་བཟང་དག་གང་ལེགས་སྤྱད་ནས་དགེ་བཀུར་སློབ་མཐུན་དང་། དྲིན་ཅན་དྲིན་དུ་གཟོ་ཤེས་ཤིང་། བྱམས་དང་སྙིང་རྗེ་དང་གཞན་ཕན་གྱི་ལྷག་བསམ་ལྡན་ལ། ལས་དང་རྒྱུ་འབྲས་གཙུག་ཏུ་བཀུར་བ། ཞི་དུལ་བབ་ཆགས་ཀྱི་རང་གཤིས་བཟང་པོར་ནམ་ཡང་སྦགས་བཙོག་དང་དྲི་ངན་མ་འགོ་བར་བྱས་ཏེ། བྱ་བ་གང་དང་ཅི་ལ་ཡང་རང་གི་ཞིབ་མོའི་བློ་ཡི་སྲང་ལ་ཡང་ཡང་གཞལ་བ་དང་རྟོག་དཔྱོད་ལེགས་པར་བྱས་ནས། དགེ་སྒྲུབ་སྐྱོན་སྤང་བྱ་རྒྱུ་ལས་གཞན་གྱི་རྗེས་སུ་གཡམ་ལ་བརྒྱུགས་ཚེ། ལྕམ་ལགས་ཀྱི་འགྲོ་སྟངས་མ་ཤེས་ཁར་རང་ཉིད་ཀྱི་འགྲོ་སྟངས་ཀྱང་ཤོར་བའི་རྣམ་ཐར་སྐྱོ་པོ་མི་སྐྱོང་བའི་ངེས་པ་ཁྱོན་ནས་མེད།
མཇུག་ཏུ། མི་ཚེ་བུ་རྫིའི་ལས་ལ་ཐིམ་པའི་ཨ་ཕ་ངའི་རེ་བར། ཁྱོད་ཀྱིས་ཅིས་ནས་ཀྱང་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཡག་པོ་སྦྱོང་ཞོར་དུ། བོད་ཀྱི་སྐད་དང་ཡི་གེར་ཡང་བརྩོན་པའི་རྒྱུན་མི་ཆད་པ་དང་། རང་རིགས་ཀྱི་སྲོལ་བཟང་ཤ་དང་ཁྲག་ལ་ཐིམ་པ་བཞིན་མ་བསྐྱུར་བའི་དྲན་སྐུལ་ཞུ་རྒྱུ་ཡིན་ལ། ཡིད་ཀྱི་དབྱིངས་རུམ་ནས་གཅེས་ཕྲུག་ཁྱོད་ཀྱི་ལུས་སེམས་ཀྱི་ལྷ་ལམ་ཡངས་པོར་ནད་གདོན་ར་རིའི་དྲི་ཡི་མ་བསླད་པར་སྔར་ལས་སྔོ་ཞིང་བསངས་པ་དང་། ཤེས་རིག་ནོར་བུའི་གླིང་ནས་དགོས་འདོད་ཀྱི་ནོར་བུ་གང་མང་བདོག་པའི་སྨོན་ལམ་གྲངས་མེད་ཞུ་བ་ཡིན།