ཨ་མའི་མཚན་མོ།

སྒོ་ཁྱིའི་ཟུག་སྐད་ཀྱིས་བསྲུངས་ཡོད།

ཨ་མའི་རྨི་ལམ།

ཟླ་འོད་དང་སྐར་ཚོགས་ཀྱི་ཟིལ་པས་བྲན་ཡོད།

ཨ་མའི་རྐང་རྗེས།

འུ་ཚང་གི་མཚེར་ས་རེ་རེའི་ཁོར་མོ་ཡུག་ན་དཔར་ཡོད།

ཨ་མའི་སྐྱ་རེངས།

འབྲི་མོའི་རྭ་རྩེ་ཡིས་བཏེགས་ཡོད།

ཨ་མའི་འཛུམ་མདངས།

ནང་མི་གང་པོའི་སྙིང་ལ་བཞད་ཡོད།

རྩྭ་ཐང་དང་སྤྲིན་དཀར།

ཨ་མའི་ཟོ་ཁ་རུ་ལྟེམས་ཡོད།

ནོར་ལུག་དང་མེ་ཏོག

ཨ་མའི་སེམས་ཁ་ན་འཛུམ་ཡོད།

དགུ་ཚིགས་ཀྱི་གཙང་པོས་བརླན་པའི་ནམ་མཁའ་སྔོན་པོ།

ཉི་ནུབ་ཀྱི་གཤམ་དུ་ཤར་བའི་མཚམས་སྤྲིན་གྱི་མཛེས་སྡུག

ཨ་མའི་གོམ་འགྲོས་ཀྱི་བར་ན་སྨིན་ཞིང་།

ཨ་མའི་དཔྲལ་བར་ཕྲེད་དུ་བབས་པའི་རི་མོ་རེ་རེ་ལས་འཚེར།